Armageddon​—Start Bilong Wanfala Hapi Samting

DATFALA word “Armageddon” hem kam from datfala Hebrew toktok “Har–Magedon,” wea minim “Maunten bilong Megiddo.” Long Revelation 16:16, hem sei: “Olketa hipimap olketa tugeta long ples wea olketa kolem long Hebrew Har–Magedon.” Hu nao olketa wea hipap long Armageddon, and why nao olsem? Long verse 14 long datfala sem chapter hem read olsem: “Olketa king bilong full earth” hipap tugeta for “war bilong bigfala day bilong God Olmaeti.” Toktok hia mekem olketa barava interesting kwestin for kamap. Wea nao “olketa king” hia bae faet? Bae olketa faet for wanem, and hu nao bae olketa faet witim? Plande pipol biliv hao olketa bae iusim olketa weapon wea bae killim dae staka pipol, bat waswe, datwan hem tru? Waswe, bae evriwan dae long Armageddon? Bible garem ansa for olketa kwestin hia.

Waswe, datfala toktok “Maunten bilong Megiddo,” hem minim war bilong Armageddon bae kamap long wanfala maunten long Middle East? Nomoa. For tok stret, no eni really maunten olsem hem stap. Long ples wea Megiddo hem stap bifor, wanfala smol hill wea hae bilong hem no winim 20 meter nomoa stap long datfala valley. And tu, area wea stap raonem Megiddo hem no big fitim evri “king bilong earth and olketa army bilong olketa.” (Revelation 19:19) Nomata olsem, Megiddo hem ples wea samfala barava nogud and important war happen long history bilong Middle East. Dastawe, datfala nem Armageddon hem piksarem wanfala important war, wea hem barava klia hao Jehovah nao bae winim.—Lukim box “Fitim Megiddo for Piksarem Armageddon,” long page 5.

Armageddon hem no wanfala war wea happen midolwan olketa nation long earth nomoa. Revelation 16:14 hem talem hao “olketa king bilong full earth” bae hipap tugeta olsem wanfala grup wea bae faet long “war bilong bigfala day bilong God Olmaeti.” Long profesi bilong Jeremiah hem talem hao “olketa wea Jehovah killim dae” bae stap ‘long wanfala saed bilong earth go kasem narafala saed bilong earth.’ (Jeremiah 25:33) Dastawe, Armageddon hem no wanfala war bilong olketa man wea bae kamap long Middle East nomoa. Hem war bilong Jehovah, and bae hem kamap long full earth.

Bat tingim, Revelation 16:16 hem kolem Armageddon wanfala “ples.” Long Bible, datfala word “ples” maet minim samting wea happen. Long disfala scripture, hem storyim hao full world bae hipap tugeta for againstim Jehovah. (Revelation 12:6, 14) Long Armageddon evri nation long earth bae hipap tugeta for againstim “olketa army wea stap long heven” anda long datfala komanda, Jesus Christ, “King bilong olketa king and Lord bilong olketa lord.”—Revelation 19:14, 16.

Waswe long wei wea pipol tingse Armageddon hem wanfala war wea olketa nation bae iusim olketa weapon wea bae killim dae staka pipol or wanfala samting from space wea bae bangam earth? Waswe, wanfala loving God bae letem nogud samting olsem for distroem olketa man and disfala earth, wea hem nao hom bilong olketa? Nomoa. Hem talem stret hao hem no wakem earth “for stap nating,” bat hem ‘wakem for pipol stap long hem.’ (Isaiah 45:18; Psalm 96:10) Long Armageddon, Jehovah bae no bonem disfala earth witim fire. Bat, bae hem “finisim olketa wea spoelem earth.”—Revelation 11:18.

Armageddon—Wanem Taem?

Insaed plande handred year wea go pas, wanfala important kwestin mekem staka toktok for kamap, Wanem taem nao bae Armageddon hem kam? Wei for lukluk long buk bilong Revelation witim olketa nara part long Bible savve helpem iumi for faendemaot taem wea disfala barava important war bae kamap. Revelation 16:15 hem joinim Armageddon witim wei wea Jesus hem bae kam olsem man for steal. Jesus iusim datfala tokpiksa tu taem hem story abaotem taem wea bae hem kam for judgem disfala world.—Matthew 24:43, 44; 1 Thessalonians 5:2.

Olsem olketa profesi long Bible wea fulfill finis showimaot, start long 1914 iumi stap insaed olketa last day bilong disfala world.a Jesus hem kolem lastfala part bilong olketa last day, datfala “bigfala trabol.” Bible no talem haomas year or month nao datfala bigfala trabol bae gohed, bat olketa trabol wea bae happen long datfala taem nao bae barava worse winim eni samting wea happen long world bifor. Datfala bigfala trabol hem lead go long Armageddon.—Matthew 24:21, 29.

From Armageddon hem “war bilong bigfala day bilong God Olmaeti,” man no savve duim eni samting for mekem datwan delay. Jehovah markem wanfala “taem wea set finis” for datfala war start. “Hem bae no leit.”—Habakkuk 2:3

God wea Raeteous Faetem Wanfala War wea Followim Justice

Bat, why nao God bae mekem wanfala war kamap evriwea long earth? Armageddon join witim wanfala long olketa main fasin bilong hem, hem nao justice. Bible hem sei: “Jehovah hem lovem justice.” (Psalm 37:28) Hem lukim evri samting wea no followim justice wea kasem olketa man long full history bilong olketa. Datwan mekem hem barava fit for feel nogud. Dastawe, hem markem Son bilong hem for faet insaed wanfala war wea followim justice for finisim disfala full world wea wicked.

Jehovah nomoa savve mekem wanfala war wea followim justice and wea bae distroem nomoa olketa wicked wan. Bat long semtaem, hem savve sevem olketa wea raeteous nomata wanem ples olketa stap long earth. (Matthew 24:40, 41; Revelation 7:9, 10, 13, 14) And from hem nao Creator bilong earth, hem nomoa garem raet for mekem sovereignty bilong hem kamap ovarem full earth.—Revelation 4:11.

Wanem nao Jehovah bae iusim for faet againstim olketa enemy bilong hem? Iumi no savve. Bat iumi savve hao Jehovah hem garem paoa for finisim evribit olketa wicked nation. (Job 38:22, 23; Zephaniah 1:15-18) Bat, olketa worshiper bilong God long earth bae no tekpart long datfala war. Long vision wea stap long Revelation chapter 19, hem showimaot hao army long heven nomoa bae join witim Jesus Christ insaed long datfala war. No eniwan long olketa Christian servant bilong Jehovah long earth bae tekpart long datwan.—2 Chronicles 20:15, 17.

God wea Garem Wisdom Givim Kliafala Warning

Hu nao bae laef? Tru nao, evriwan nomoa fit for laef thru long Armageddon. Aposol Peter hem sei: “Jehovah . . . no laekem eniwan for dae bat hem laekem evriwan for repent.” (2 Peter 3:9) And aposol Paul talem hao hem ‘will bilong God for evri difren kaen man for sev and kasem stretfala savve bilong truth.’—1 Timothy 2:4.

For kasem datwan, Jehovah mek sure datfala message bilong “gud nius bilong kingdom” hem kasem evriwea long earth long staka handred languis. Pipol long evri ples kasem chance for stap laef and kasem salvation. (Matthew 24:14; Psalm 37:34; Philippians 2:12) Olketa wea willing for acceptim datfala gud nius savve laef thru long Armageddon and kamap perfect and stap olowe long wanfala paradaes earth. (Ezekiel 18:23, 32; Zephaniah 2:3; Romans 10:13) Tru nao, iumi expectim God wea hem love for duim datwan!—1 John 4:8.

Waswe, God Bilong Love Savve Mekem War Kamap?

Nomata olsem, plande pipol no minim why wanfala God bilong love savve distroem barava staka pipol. Iumi savve markem datwan witim wanfala haos wea fulap witim olketa insect. Waswe, bae iu agree hao man wea ownim haos shud aotem olketa insect for protectim health bilong famili bilong hem?

Long sem wei, from Jehovah lovem olketa man hem bae mekem war bilong Armageddon kamap. Plan bilong God hem for mekem earth kamap paradaes and for olketa man kamap perfect and garem peace and ‘no eniwan mekem olketa seksek.’ (Micah 4:3, 4; Revelation 21:4) So, wanem nao bae kasem olketa wea spoelem peace and sef living bilong pipol? For protectim olketa raeteous wan, God mas finisim olketa wicked pipol wea no willing for change wea olsem “olketa insect.”—2 Thessalonians 1:8, 9; Revelation 21:8.

Plande war and wei for killim dae staka pipol distaem hem kamap from rul bilong olketa man wea no perfect, and selfish wei for mekhae long nation bilong olketa seleva. (Ecclesiastes 8:9) Wei wea olketa gavman bilong man trae for mekem paoa bilong olketa kamap moa big, hem mekem olketa barava forgetim Kingdom bilong God wea rul finis. No eni samting showimaot hao olketa bae willing for givim go sovereignty bilong olketa long God and Christ. (Psalm 2:1-9) Dastawe God mas finisim olketa gavman olsem for mekem raeteous rul bilong Kingdom bilong Jehovah, witim Christ olsem King, for rulim earth. (Daniel 2:44) Armageddon mas kamap mekem hem stretem evribit datfala kwestin abaotem hu nao garem right for rulim disfala planet earth and olketa man.

Wei wea Jehovah strong for duim samting long Armageddon hem bae mekem olketa man kasem gud samting. Long disfala world wea fulap witim staka nogud samting, perfect rul bilong God nomoa savve satisfaem evribit need bilong olketa man. Kingdom bilong hem nomoa bae givim tru peace and gudfala living. Wanem nao bae happen long world sapos God no duim eni samting? Bae fasin for heit, raf fasin, and war gohed for spoelem olketa man olsem hem happen insaed staka year wea man hem rul finis. Tru nao, iumi olketa man kasem gud samting from datfala war bilong Armageddon!—Luke 18:7, 8; 2 Peter 3:13.

War wea Bae Finisim Evri War

Armageddon bae duim wanfala samting wea no eni nara war hem fit for duim—hem bae finisim evri war. Iumi evriwan barava laekem war for finis evribit! Bat, nomata olketa man trae hard, olketa fail for finisim war. Wei wea olketa man fail evritaem hem barava pruvim hao disfala toktok bilong Jeremiah hem tru: “Olketa wei bilong man hem no for hemseleva chusim. Man wea wakabaot no garem right for chusim seleva gogo bilong hem.” (Jeremiah 10:23) Bible promis olsem abaotem samting wea Jehovah bae duim: “Hem bae finisim olketa war go kasem evriwea long earth. Hem brekem bow and pisisim spia; Olketa wagon hem bonem long fire.”—Psalm 46:8, 9.

Long future, taem olketa nation iusim olketa weapon bilong olketa for killim dae each other and olketa klosap for distroem environment, Datwan wea wakem earth bae duim samting, hem bae mekem Armageddon kamap wea Bible story abaotem! (Revelation 11:18) Dastawe, disfala war bae duim samting wea olketa man wea fraet long God barava luk forward long hem for plande year finis. Hem bae showimaot klia Jehovah God nao ownim earth and garem right for rulim evri creation bilong hem.

Dastawe, pipol wea lovem raeteous fasin no need for fraetem Armageddon. Bat, hem samting wea givim hope for olketa. Datfala war bilong Armageddon bae mekem earth kamap klin from evrikaen raverave and wicked fasin and openem wei for wanfala raeteous niu world anda long rul bilong Messiah Kingdom bilong God. (Isaiah 11:4, 5) Armageddon hem no wanfala nogud samting wea iumi shud fraetem, bat hem start bilong wanfala hapi samting for olketa raeteous pipol wea bae stap olowe long wanfala paradaes earth.—Psalm 37:29.

[Footnote]

[Box/Picture on page 5]

Fitim Megiddo for Piksarem Armageddon

Megiddo bilong bifor hem stap long wanfala barava gudfala ples wea luk ovarem west saed bilong Jezreel Valley, long north Israel, wea evri samting grow gud tumas. Megiddo hem garem paoa, from plande road wea olketa bisnis pipol and olketa army savve go followim hem go thru long there. Dastawe, Megiddo hem ples wea olketa important war hem kamap. Professor Graham Davies hem raet olsem insaed buk bilong hem Cities of the Biblical World—Megiddo: “Datfala taon bilong Megiddo . . . hem stap long ples wea olketa bisnisman and pipol from evri difren ples isi for kasem; and tu, sapos datfala taon hem garem barava strongfala paoa, hem fit for kontrolem wanem hem happen saed long bisnis and war. Dastawe iumi no sapraes, . . . hao plande difren sekson faet for tekovarem datfala taon and sapos wanfala sekson hem win, hem mas faet strong for keepim datwan.”

History bilong Megiddo hem start winim 3,500 year go finis taem king bilong Egypt Thutmose III winim olketa king bilong Canaan long datfala taon. And history bilong hem gohed for plande handred year go kasem 1918 taem British General Edmund Allenby winim army bilong Turkey. Long Megiddo God hem mekem Judge Barak for barava finisim evribit King Jabin bilong Canaan. (Judges 4:12-24; 5:19, 20) Long datfala area Judge Gideon winim olketa Midianite. (Judges 7:1-22) Long there tu, olketa killim dae King Ahaziah and Josiah.—2 Kings 9:27; 23:29, 30.

Hem fitim for markem datfala area witim Armageddon from plande important war hem kamap long there. Hem barava fitim Meggido for piksarem wei wea God bae win ovarem evriwan wea againstim hem.

[Credit Line]

Pictorial Archive (Near Eastern History) Est.

[Piksa long page 7]

Evriwea long world, pipol kasem warning and chance for laef thru long Armageddon

[Picture on page 7]

Armageddon bae hem start bilong wanfala hapi samting