Wanem Nao Bible Talem?

Wanem Nao Armageddon?

Samfala tingse . . .

Hem wanfala nuclear war wea bae distroem evri samting long earth, or hem wei wea pipol spoelem environment. Wanem nao tingting bilong iu?

Bible hem sei

Armageddon hem “datfala war wea bae kamap long bigfala day bilong Olmaeti God,” wea hem taem wea God bae distroem nogud pipol.—Revelation 16:14, 16.

Wanem moa iumi savve lanem from Bible?

• God nao hem faet long Armageddon, and war hia bae no spoelem disfala earth, bat bae hem distroem nomoa pipol wea spoelem disfala earth.—Revelation 11:18.

• Bihaen Armageddon no enitaem bae war kamap moa.—Psalm 46:8, 9.

Waswe, man savve sev taem Armageddon finisim olketa nogud pipol?

Wanem nao bae iu sei?

• Ia

• Nomoa

• Maet olsem

Bible hem sei?

“Wanfala big crowd” from evri kantri bae no dae long “datfala big trabol” wea end bilong hem nao Armageddon.—Revelation 7:9, 14.

Wanem moa iumi savve lanem from Bible?

• God laekem staka pipol for sev taem Armageddon kam. Only sapos man no repent then God bae finisim hem.—Ezekiel 18:32.

• Bible talem wanem man mas duim mekem hem sev long taem bilong Armageddon.—Zephaniah 2:3.