Kwestin From Reader

Taem aposol Paul sei olketa woman shud “stap kwaet insaed olketa kongregeson,” wanem nao hem minim?

Paul raet olsem long Christian kongregeson long Corinth: “Long evri kongregeson bilong olketa holy wan, olketa woman shud stap kwaet . . ., from hem tambu for olketa toktok.” (1 Corinthians 14:33, 34) For iumi minim diswan long stretfala wei, hem bae gud for ting raonem olketa nara verse wea join witim kaonsel bilong Paul.

Long 1 Corinthians chapter 14, Paul storyim olketa samting wea join witim olketa meeting bilong Christian kongregeson. Hem talem wanem for storyim long olketa meeting hia and hao for conductim olketa. (1 Corinthians 14:1-6, 26-34) And tu, hem mekhae long goal bilong olketa Christian meeting, wea hem nao for “kongregeson savve kasem encouragement.”—1 Corinthians 14:4, 5, 12, 26.

Toktok wea Paul talem for “stap kwaet” hem kamap insaed thrifala verse long 1 Corinthians chapter 14. Each taem hia, Paul story long olketa difren grup insaed kongregeson, bat reason why nao hem iusim datfala toktok hem semsem nomoa, hem nao for “evri samting followim stretfala wei.”—1 Corinthians 14:40.

Firstaem toktok hia kamap, Paul hem sei: “Sapos samwan tok long narafala languis, tufala or thrifala nomoa shud duim, each wan shud tek-tan for duim datwan; and samwan shud transleit. Bat sapos no eniwan for transleit hem stap, datfala man shud stap kwaet insaed kongregeson and story long hemseleva and long God.” (1 Corinthians 14:27, 28) Diswan no minim datfala man no garem eni chance for story long taem bilong olketa meeting, bat long samfala taem hem shud stap kwaet. Remember, goal bilong olketa meeting hem for encouragem each other. Datwan no savve happen sapos hem tok long narafala languis and no eniwan minim wanem hem talem.

Long mek-tu taem, Paul hem sei: “Tufala or thrifala profet shud toktok, and olketa narawan shud kasem mining bilong datwan. Bat sapos holy spirit nao muvim narawan wea sidaon long there, datfala first wan shud stap kwaet.” Diswan no minim firstfala profet mas no story long taem bilong olketa meeting, bat hem mas stap kwaet samfala taem. Then datwan wea spirit muvim hem savve story long kongregeson, and long wei olsem meeting bae kasem goal bilong hem, hem nao for “evriwan kasem encouragement.”—1 Corinthians 14:26, 29-31.

Long mek-thri taem, Paul story long olketa Christian woman nomoa, and hem sei: “Olketa woman shud stap kwaet insaed olketa kongregeson, from hem tambu for olketa toktok, bat olketa shud stap anda olsem Law hem talem.” (1 Corinthians 14:34) Why nao Paul talem disfala komand long olketa sista? Diswan hem for mekem evri samting long kongregeson followim order. Hem sei: “Bat sapos olketa laek for lanem samting, olketa shud askem hasband bilong olketa long haos, bikos for wanfala woman tok insaed kongregeson hem samting for shame long hem.”—1 Corinthians 14:35.

Maet samfala sista kwestinim samting wea kamap insaed kongregeson. Kaonsel bilong Paul helpem olketa sista for stap klia long datkaen nogud wei and hambol for acceptim waka bilong olketa followim hedship arrangement bilong Jehovah, especially saed long hasband bilong olketa. (1 Corinthians 11:3) And tu, for olketa sista stap kwaet hem showimaot olketa no trae for kamap olsem teacher insaed kongregeson. Taem Paul raet go long Timothy, hem showimaot hem no stret for wanfala woman for teach insaed kongregeson. Hem sei: “Mi no letem woman for teach, or for garem paoa ovarem man, bat hem mas stap kwaet.”—1 Timothy 2:12.

Waswe, diswan minim wanfala Christian woman mas no enitaem tok, taem kongregeson meeting gohed? Nomoa. Long taem bilong Paul, holy spirit muvim olketa Christian woman for prea or talem profesi insaed kongregeson samfala taem. Long olketa taem hia, olketa kavarem hed bilong olketa from olketa luksavve position bilong olketa insaed arrangement bilong Jehovah.a (1 Corinthians 11:5) Long datfala taem and distaem tu, olketa sista and olketa brata kasem encouragement for talemaot hope bilong olketa long pablik. (Hebrews 10:23-25) And tu, olketa sista talemaot hope bilong olketa and encouragem olketa narawan long wei for talem olketa naesfala koment wea olketa ting raonem gud firstaem, and acceptim olketa assignment for duim demonstration or student tok insaed long olketa kongregeson meeting.

Dastawe, olketa Christian woman “stap kwaet” long wei for no aftarem waka bilong olketa brata and no teach insaed kongregeson. Olketa no kwestinim olketa wea garem responsibility for teach, long wei for askem olketa kwestin for kosim wei for argue. Taem olketa Christian sista duim waka wea olketa shud duim insaed kongregeson, olketa barava share for mekem peace kamap wea bae mekem “evri samting [long olketa kongregeson meeting] hem for buildimap man.”—1 Corinthians 14:26, 33.

[Footnotes]