“Mi Stap Witim Iufala”

‘Datfala man for talemaot message bilong Jehovah, gohed for sei: . . . “‘Mi stap witim iufala,’ hem nao toktok bilong Jehovah.”’—HAGGAI 1:13.

1. Jesus markem taem bilong iumi witim taem bilong hu?

IUMI distaem stap long wanfala barava spesol and important taem long full history bilong olketa man. Olketa Bible profesi wea fulfill finis pruvim hao iumi stap insaed “day bilong Lord.” Diswan hem start long 1914. (Revelation 1:10) Maet iu study finis abaotem datwan. Sapos olsem, iu savve hao Jesus markem ‘taem wea Son bilong man’ hem rul long Kingdom witim “taem bilong Noah” and “taem bilong Lot.” (Luke 17:26, 28) So Bible hem markem olketa samting wea happen long taem bilong Noah and Lot witim olketa samting wea happen long taem bilong iumi. Bat, bae iumi lukluk gud long narafala profesi wea fulfill long taem bilong iumi tu.

2. Wanem assignment nao Jehovah givim for Haggai and Zechariah?

² Bae iumi story raonem samting wea happen long taem bilong tufala Hebrew profet, Haggai and Zechariah. Wanem message nao tufala faithful profet hia talem wea barava fitim pipol bilong Jehovah distaem? Taem olketa Jew kamap free from Babylon and kam bak long hom bilong olketa, Haggai and Zechariah ‘talemaot message bilong Jehovah’ long olketa. Tufala kasem assignment for helpem olketa Israelite luksavve hao God bae sapotim waka for buildim bak temple. (Haggai 1:13; Zechariah 4:8, 9) Nomata buk bilong Haggai and Zechariah short nomoa, tufala buk hia part long “full Bible [wea] kam from God and [wea] gud for teachim man, for givim kaonsel, for stretem evri samting, and for givim discipline long raeteous wei.”—2 Timothy 3:16.

Iumi Shud Interest Long Olketa

3, 4. Why nao iumi shud interest long olketa message bilong Haggai and Zechariah?

³ Tru nao, message bilong Haggai and Zechariah barava helpem olketa Jew long datfala taem. Olketa profesi bilong tufala hem fulfill finis long datfala taem. Sapos olsem, why nao iumi distaem shud interest long tufala buk hia? Long Hebrews 12:26-29, iumi start for kasem ansa. Aposol Paul talem toktok from Haggai 2:6 wea storyim wei wea God “sekem skae and earth.” Thru long wei for sekem olketa, Jehovah bae “torowem daon throne bilong olketa kingdom and finisim evribit strong bilong olketa kingdom bilong olketa nation.”—Haggai 2:22.

⁴ Paul iusim disfala toktok from Haggai for showimaot samting wea bae happen long “olketa kingdom bilong olketa nation,” and hem talem hao Kingdom wea olketa anointed Christian bae kasem hem moabeta bikos hem no savve seksek. (Hebrews 12:28) Diswan showimaot hao olketa profesi bilong Haggai and Zechariah hem point go long taem bihaen Paul raetem buk bilong Hebrews long first century. Distaem, wanfala smol sekson bilong olketa anointed Christian stap yet long earth. Olketa bae kamap olketa king and rul witim Jesus insaed Kingdom bilong Messiah. Dastawe, hem important for iumi savve abaotem olketa profesi bilong Haggai and Zechariah.

5, 6. Wanem nao samfala samting wea lead go long wei wea Haggai and Zechariah talemaot olketa profesi?

⁵ Insaed buk bilong Ezra hem showimaot olketa samting wea lead go long wei wea Haggai and Zechariah talem olketa profesi. Bihaen olketa Jew kamap free from Babylon and go bak long Jerusalem long 537 B.C.E., Governor Zerubbabel and Hae Priest Joshua (or Jeshua) lukaftarem waka for buildim faondeson bilong niu temple long 536 B.C.E. (Ezra 3:8-13; 5:1) Nomata olketa Jew barava hapi tumas long datwan, no longtaem bihaen, olketa start for fraet. Ezra 4:4 hem sei, “pipol bilong datfala ples” kamap enemy bilong olketa Jew and olketa enemy hia “gohed for mekem hand bilong pipol bilong Judah for slakdaon and mekem olketa wikdaon for build.” Olketa main wan wea talem enikaen laea toktok abaotem olketa Jew, hem nao olketa Samaritan. Gogo olketa enemy hia mekem king bilong Persia for tambuim waka bilong olketa for buildim temple.—Ezra 4:10-21.

⁶ Long firstaem olketa strong and hapi for wakem datfala temple, bat gogo olketa wikdaon. Olketa Jew start for aftarem nomoa samting for olketa seleva. Bat, long 520 B.C.E., Jehovah chusim Haggai and Zechariah for muvim olketa Jew for obey and startim bak waka for buildim temple. Diswan hem 16 year bihaen olketa start for wakem faondeson bilong temple. (Haggai 1:1; Zechariah 1:1) From Jehovah strongim olketa and encouragem olketa thru long tufala profet hia, olketa Jew lukim Jehovah hem sapotim olketa and diswan muvim olketa for start wakem moa datfala temple and gogo hem finis long 515 B.C.E.—Ezra 6:14, 15.

7. Hao nao samting wea happen long taem bilong Haggai and Zechariah hem semsem witim distaem?

⁷ Waswe, iu savve hao nao evri samting hia join witim taem bilong iumi? Iumi duim waka wea join witim wei for preach abaotem “gud nius bilong kingdom.” (Matthew 24:14) Taem World War 1 hem finis, datfala waka hem kamap moa important. Olsem wei wea olketa Jew bifor kamap free from Babylon, pipol bilong Jehovah distaem kamap free from olketa giaman religion evriwea long world, wea hem nao Bigfala Babylon. Olketa anointed wan bilong God busy for duim waka for preach, teach, and leadim pipol for go long tru worship. Disfala waka hem gohed yet distaem, bat hem moa big winim bifor. Maet iu tu share for duim disfala waka. Tru nao, distaem hem taem for duim disfala waka, bikos end bilong disfala wicked world hem klosap tumas! Disfala waka wea God assignim for iumi mas gohed go kasem taem bilong datfala “bigfala trabol.” (Matthew 24:21) Long datfala taem God bae finisim wicked fasin and mekem evriwan long earth join insaed long tru worship.

8. Why nao iumi feel sure God hem sapotim waka bilong iumi?

⁸ Olketa profesi bilong Haggai and Zechariah showimaot klia hao iumi savve feel sure Jehovah bae sapotim and blessim iumi taem iumi duim disfala waka witim full heart. Nomata samfala trae for stopem olketa servant bilong God or tambuim waka bilong olketa, no eni gavman fit for stopem wei wea disfala waka for preach hem muv ahed. Tingim hao Jehovah hem blessim Kingdom waka long wei wea hem kamap moa big bihaen World War I. Nomata olsem, staka waka stap yet for iumi duim.

9. Iumi shud ting raonem wanem samting wea happen bifor, and why nao olsem?

⁹ Hao nao olketa samting wea iumi lanem from Haggai and Zechariah savve muvim iumi for gohed obeyim komand bilong God for preach and teach? Bae iumi storyim samfala samting wea iumi savve lanem from tufala Bible buk hia. Olsem example, tingim samting wea happen taem olketa Jew buildim bak temple. Olketa wea go bak long Jerusalem wakem faondeson bilong temple. Bat olketa nating gohed for finisim datfala waka for buildim temple. Bihaen olketa finisim faondeson, olketa barava slakdaon nao. Wanem kaen tingting wea no stret nao olketa start for garem? And wanem nao iumi savve lanem from datwan?

Kasem Stretfala Tingting

10. Wanem kaen tingting wea no stret nao olketa Jew start for garem, and wanem nao kamaot from datwan?

¹⁰ Taem olketa Jew start for buildim faondeson bilong temple long 536 B.C.E., olketa nating sei: “Hem no kasem taem yet.” Bat no longtaem bihaen, olketa start for sei: “Hem no kasem taem yet.” (Haggai 1:2) Diswan hem bikos olketa letem olketa neiba wea againstim olketa and gavman wea laek stopem datfala waka for affectim olketa. Olketa Jew start for tingim nomoa wei for garem haos bilong olketa seleva and for garem gud living. Olketa nating wakem finis temple, bat olketa gohed wakem haos bilong olketa seleva witim olketa barava naes timba. Dastawe Jehovah ask olsem: “Waswe, fitim iufala stap long olketa stael haos bilong iufala, and letem nomoa disfala haos kamap nogud?”—Haggai 1:4.

11. Why nao Jehovah mas givim kaonsel long olketa Jew long taem bilong Haggai?

¹¹ Tru nao, olketa Jew hia changem tingting bilong olketa saed long wanem nao hem moa important. Winim wei for followim plan bilong Jehovah for buildim temple firstaem, pipol bilong God start for tingim olketa seleva and haos bilong olketa. Olketa stop for wakem haos bilong God. Toktok bilong Jehovah long Haggai 1:5 hem encouragem olketa Jew for ‘lukluk gud long wei bilong olketa.’ Jehovah talem olketa for stop and ting raonem samting wea olketa duim, and luksavve hao datwan hem affectim olketa from olketa no tingim waka for buildim temple olsem first samting long laef bilong olketa.

12, 13. Hao nao Haggai 1:6 storyim samting wea kasem olketa Jew, and wanem nao disfala verse hem minim?

¹² From olketa Jew no tingim waka for buildim temple olsem first samting long laef, diswan affectim each wan long olketa. Tingim samting wea God talem long Haggai 1:6: “Iufala plantim staka seed, bat harvest hem no big. Iufala gohed kaikai, bat iufala no satisfae. Iufala gohed for drink, bat iufala no savve drunk. Iufala werem kaleko, bat no eniwan feel hot; and man wea waka, hem waka for basket wea garem olketa hol.”

¹³ Olketa Jew hia stap long land wea God givim long olketa, bat samting wea olketa plantim hem no grow gud. Jehovah hol bak for givim blessing, olsem hem warnim olketa finis. (Deuteronomy 28:38-48) From hem no sapotim olketa, olketa plantim seed, bat harvest hem no big, olketa no garem inaf kaikai for mekem olketa satisfae. From hem no blessim olketa, olketa no garem gudfala kaleko. And tu, pei wea man kasem no helpem hem, bikos datfala selen wea hem waka hard for kasem hem olsem hem go insaed wanfala basket wea garem staka hol and hem lus nao. Bat wanem nao disfala toktok hem minim: “Iufala gohed for drink, bat iufala no savve drunk”? Diswan no minim God blessim olketa for kamap drunk. God heitim fasin for drunk. (1 Samuel 25:36; Proverbs 23:29-35) Disfala verse hem storyim wei wea God no blessim olketa Jew. Olketa savve mekem lelebet wine nomoa, bat hem no inaf for mekem man drunk. Revised Standard Version hem transleitim Haggai 1:6 olsem: “Iufala drink, bat iufala nating savve satisfae.”

14, 15. Wanem leson nao iumi lanem from Haggai 1:6?

¹⁴ Taem Bible story abaotem olketa haos bilong olketa Jew, hem no for teachim iumi hao for staelem haos bilong iumi. Bifor olketa Jew kamap prisoner long Babylon, profet Amos hem tok strong long olketa rich pipol long Israel from olketa garem “olketa haos wea olketa wakem from ivory” and “olketa chair wea garem ivory design.” (Amos 3:15; 6:4) Bat gogo olketa stael haos hia hem distroe. Taem enemy bilong olketa winim olketa, olketa tekem evri samting hia. Nomata pipol bilong God stap olsem prisoner for 70 year, plande long olketa no lane from disfala samting wea happen bifor. So waswe, iumi bae lane from olketa samting hia? Hem gud for iumi askem iumiseleva olsem: ‘For tok stret, waswe, mi savve tingting tumas abaotem haos bilong mi and hao for mekem hem luk stael? Waswe, mi tingting for duim extra education for mekem mi garem bigfala waka, nomata datwan bae mekem mi busy tumas and wea gohed for plande year, and maet mekem mi lusim worship bilong mi for God?’—Luke 12:20, 21; 1 Timothy 6:17-19.

¹⁵ Samting wea iumi readim long Haggai 1:6 shud mekem iumi luksavve hao iumi needim blessing bilong God. Olketa Jew bifor no garem datfala blessing, and from datwan olketa kasem plande nogud samting. Nomata sapos iumi garem plande samting or nomoa, sapos iumi no garem blessing bilong Jehovah, bae iumi no savve fren gud witim God. (Matthew 25:34-40; 2 Corinthians 9:8-12) Bat, hao nao iumi savve kasem datfala blessing?

Jehovah Givim Help Thru Long Holy Spirit Bilong Hem

16-18. Wanem nao Zechariah 4:6 hem minim for olketa Jew bifor?

¹⁶ Jehovah muvim profet Zechariah for talemaot hao Jehovah bae iusim wanfala samting for encouragem and blessim pipol wea lovem hem long datfala taem, and long distaem tu. And hem sei: “‘Bae mi no iusim army, or paoa, bat bae mi iusim spirit bilong mi,’ diswan nao toktok bilong Jehovah, komanda bilong olketa army.” (Zechariah 4:6) Maet plande taem nao iu herem disfala verse, bat long taem bilong Haggai and Zechariah wanem nao diswan hem minim for olketa Jew bifor, and why nao diswan important for iu?

¹⁷ Tingim hao toktok bilong God wea hem talem thru long Haggai and Zechariah hem barava muvim olketa Jew long datfala taem. Toktok bilong tufala profet hia mekem olketa faithful Jew for strong bak moa. Haggai start for talem profesi long mek-six month bilong 520 B.C.E. And Zechariah start for talem profesi long mek-eit month long datfala sem year. (Zechariah 1:1) Olsem iumi lukim long Haggai 2:18, olketa Jew startim bak waka for buildim datfala faondeson long mek-naen month. So samting wea tufala profet hia talem hem barava muvim olketa Jew for duim samting, for obeyim Jehovah and trustim hao hem bae sapotim olketa. So, toktok long Zechariah 4:6 hem minim God hem sapotim olketa.

¹⁸ Long 537 B.C.E., taem olketa Jew hia go bak long hom bilong olketa, olketa no garem eni army. Nomata olsem, Jehovah protectim olketa and leadim olketa for travel go bak from Babylon. And tu, no longtaem bihaen olketa kam bak, spirit bilong hem leadim olketa taem olketa start for buildim bak temple. Taem olketa duim waka hia witim full heart, Jehovah bae sapotim olketa thru long holy spirit bilong hem.

19. Spirit bilong God win ovarem wanem strongfala samting?

¹⁹ Thru long eitfala vision from God, Jehovah promis long Zechariah hao hem bae stap witim pipol bilong hem wea faithful for finisim waka for buildim temple. Chapter 3 hem storyim mek-foa vision, wea showim hao Satan barava trae hard for stopem datfala waka for buildim bak temple. (Zechariah 3:1) Satan no laek for lukim Hae Priest Joshua mekem olketa sakrifaes for olketa pipol long datfala niu temple. Nomata Devil trae hard for stopem datfala waka, spirit bilong Jehovah barava protectim olketa Jew from eni samting wea savve spoelem olketa, and tu, Jehovah gohed strongim olketa Jew go kasem taem wea olketa wakem finis temple.

20. Hao nao holy spirit helpem olketa Jew for duim will bilong God?

²⁰ Wanfala hard samting kamap wea olsem wanfala big maunten wea hard for olketa Jew hia winim. Datwan hem wei wea samfala bigman long gavman tambuim datfala waka for buildim bak temple. Bat, Jehovah promisim hao hem bae aotem disfala hard samting wea olsem “maunten” and mekem hem kamap “flat graon.” (Zechariah 4:7) And gogo datwan hem happen! King Darius I hem laek for savve abaotem samting wea happen, and gogo hem faendem leta bilong Cyrus wea talem olketa Jew for buildim bak datfala temple. So Darius aotem datfala tambu and talem olketa bigman for givim selen bilong hem for helpem olketa Jew for duim datfala waka. Plan for stopem disfala waka hem barava fail nao! Waswe, holy spirit bilong God nao help for duim diswan? Ia, iumi sure hem duim. Gogo, olketa finis for buildim bak datfala temple long 515 B.C.E., long mek-six year long rul bilong Darius I.—Ezra 6:1, 15.

21. (a) Long bifor, hao nao God “sekem evri nation,” and hao nao olketa “barava spesol samting” kamaot? (b) Waswe long distaem?

²¹ Long Haggai 2:5, datfala profet remindim olketa Jew abaotem datfala covenant wea God mekem witim olketa long Maunt Sinai taem “full maunten hem seksek tumas.” (Exodus 19:18) Olsem tokpiksa long verse 6 and 7 talem, Jehovah bae mekem nara bigfala change for kamap long taem bilong Haggai and Zechariah. Datfala Rul bilong Persia bae start for seksek, bat nomata olsem, waka long temple bae gohed kasem taem hem finis. And pipol wea no Jew, wea hem nao “olketa barava spesol samting bilong evri nation,” bae join witim olketa Jew for mekhae long God long datfala ples for worship. Long bigfala wei distaem, God iusim preaching waka for ‘sekem olketa nation,’ and “olketa barava spesol samting bilong evri nation” kam for worshipim God witim olketa anointed Christian. Tru nao, olketa anointed and nara sheep gohed for fulimap haos bilong Jehovah witim glory. Olketa tru worshiper hia garem faith and gohed for weitim taem wea Jehovah bae “sekem skae and earth” long nara wei. Datwan nao taem wea hem bae winim and finisim evribit olketa kingdom bilong olketa nation.—Haggai 2:22.

22. Hao nao Jehovah “sekem” olketa nation, wanem nao bae kamap from datwan, and wanem nao no happen yet?

²² Diswan mekem iumi tingim olketa bigfala change wea kamap, wea olketa samting olsem “skae and earth and sea and drae graon” hem piksarem. Olsem example, Jesus torowem kam daon Satan and olketa demon bilong hem long earth. (Revelation 12:7-12) Datfala preaching waka wea olketa anointed wan bilong God leadim, hem barava sekem olketa samting long disfala earth wea part long world distaem. (Revelation 11:18) Nomata olsem, “wanfala big crowd” wea hem nao olketa spesol samting from olketa nation, join witim spiritual Israel for servem Jehovah. (Revelation 7:9, 10) Datfala big crowd waka witim olketa anointed Christian for preachim gud nius hao klosap nao God bae sekem olketa nation long Armageddon. Bihaen datwan hem bae mekem tru worship kamap perfect evriwea long world.

Waswe, Iu Remember?

• Long wanem taem nao Haggai and Zechariah servem Jehovah, and wanem nao happen long datfala taem?

• Hao nao iu savve followim message wea Haggai and Zechariah talem?

• Wanem encouragement nao iu kasem from Zechariah 4:6?

[Piksa long page 3]

Toktok bilong Haggai and Zechariah pruvim hao God sapotim iumi

[Piksa long page 6]

“Waswe, fitim iufala stap long olketa stael haos bilong iufala, and letem nomoa disfala haos kamap nogud?”

[Piksa long page 7]

Pipol bilong Jehovah share insaed wei for kasem ‘olketa spesol samting bilong olketa nation’