Waswe, Olketa Prea Bilong Iu Showimaot Iu Fren Gud Witim Jehovah?
“God, iu nao iu herem prea bilong mifala. Olketa man long evri ples bae kam long iu.”—PS. 65:2.
1, 2. Why nao pipol wea worshipim Jehovah savve hem bae herem prea bilong olketa?
JEHOVAH evritaem herem prea bilong pipol wea faithful long hem. Hem bae herem prea bilong iumi tu. Nomata sapos staka million Jehovah’s Witness prea long God long semtaem, hem savve herem prea bilong evriwan.
2 David savve God herem olketa prea bilong hem, dastawe hem singsing olsem: “God, iu nao iu herem prea bilong mifala. Olketa man long evri ples bae kam long iu.” (Ps. 65:2) Jehovah herem olketa prea bilong David bikos hem faithful long hem. Hem gud for iumi tingim diswan: ‘Waswe, olketa prea bilong mi showimaot mi trustim Jehovah and mi tingim evritaem tru worship? Waswe, olketa prea bilong mi showimaot mi fren gud witim Jehovah?’
Hambol Taem Iu Prea Long Jehovah
3, 4. (a) Taem iumi prea, iumi mas hao? (b) Wanem nao iumi shud duim sapos iumi “wari” tumas bikos iumi duim bigfala sin?
3 Sapos iumi laekem God for herem prea bilong iumi, iumi mas hambol. (Ps. 138:6) Iumi shud askem Jehovah for lukluk gud long iumi, olsem David duim taem hem sei: “Plis God, lukluk gud long mi and savve long tingting bilong mi. Plis iu lukluk gud long mi and savve long olketa samting wea mi wari abaotem. Sapos iu lukim mi garem eni nogud wei, plis iu leadim mi mekem mi kasem laef olowe.” (Ps. 139:23, 24) Taem iumi prea long God, iumi shud askem God for lukluk gud long iumi tu and followim wanem hem talem long Bible. Jehovah savve leadim iumi “mekem [iumi] kasem laef olowe.”
4 Waswe sapos iumi “wari” tumas bikos iumi duim bigfala sin? (Readim Psalm 32:1-5.) Sapos conscience bilong iumi pokem iumi bat iumi stap kwaet nomoa, datwan savve mekem iumi wikdaon olsem tree wea sun hotem gogo hem drae nao. From David duim sin, hem no hapi and maet datwan mekem hem sik tu. Bat taem hem talem long God sin bilong hem, hem feel gud nao! David mas hapi tumas taem Jehovah ‘forgivim sin bilong hem.’ Man savve hapi taem hem talem long God sin bilong hem and olketa elder tu savve helpem hem for fren gud moa witim Jehovah.—Prov. 28:13; Jas. 5:13-16.
Prea Strong Long God and Thankiu Long Hem
5. Wanem nao iumi shud duim sapos iumi wari tumas abaotem eni samting?
5 Sapos iumi wari tumas abaotem eni samting, iumi mas duim wanem Paul talem. Hem sei: “Iufala mas no wari long eni samting, bat prea long God evritaem and prea strong long hem. Thankiu long hem and askem hem wanem iufala needim.” (Phil. 4:6) Taem pipol spoelem iumi and taem eni samting happen wea maet mekem iumi dae, iumi mas prea strong long Jehovah for helpem iumi and leadim iumi.
6, 7. Taem iumi prea, why nao iumi mas thankiu long God?
6 Bat sapos iumi prea nomoa taem iumi needim samting, waswe, hem showimaot iumi fren gud witim Jehovah? Paul hem sei taem iumi askem God for eni samting, iumi shud “thankiu” long hem tu. Hem fitim for iumi thankiu long God olsem David duim. Hem sei: “Jehovah, iu barava hae fogud and iu garem evri paoa. Iu nambawan and evri samting wea luk naes hem bilong iu. Hem bikos evri samting long heven and long earth hem bilong iu. Kingdom hem bilong iu Jehovah, and iu nao hed long evri samting. . . . God bilong mifala, mifala thankiu long iu and mifala praisem nambawan nem bilong iu.”—1 Chron. 29:11-13.
7 Jesus thankiu long God for kaikai and for datfala bred and wine wea olketa kaikaim and drinkim long Evening Kaikai Bilong Lord. (Matt. 15:36; Mark 14:22, 23) Iumi tu mas thankiu for kaikai and “thankiu long Jehovah for olketa nambawan samting wea hem duim for olketa man,” for olketa “stretfala law bilong hem,” and for message wea hem givim kam long Bible.—Ps. 107:15; 119:62, 105.
Prea for Olketa Narawan
8, 9. Why nao iumi mas prea for olketa Christian brata and sista?
8 Iumi prea long God for hem helpem iumi, bat iumi mas prea tu for olketa nara Christian nomata sapos iumi savve long olketa or nomoa. Aposol Paul no savve long evri Christian long Colossae, bat hem sei: “Taem mifala prea for iufala, evritaem mifala thankiu long God, Dadi bilong Lord bilong iumi Jesus Christ bikos mifala herem hao iufala barava biliv long Jesus Christ and iufala lovem tumas olketa holy wan.” (Col. 1:3, 4) Paul prea for olketa Christian long Thessalonica tu. (2 Thess. 1:11, 12) Taem iumi prea for olketa Christian brata and sista, datwan showimaot iumi fren gud witim God and iumi garem gudfala tingting abaotem olketa.
9 Taem iumi prea for olketa anointed Christian and “olketa nara sheepsheep,” hem showimaot iumi tingim organization bilong God. (John 10:16) Paul askem olketa Christian for prea for hem mekem ‘God savve helpem hem for savve wanem for talem taem hem talemaot holy secret abaotem gud nius.’ (Eph. 6:17-20) Waswe, iu prea for God duim sem samting tu for olketa Christian brata and sista?
10. Taem iumi prea for olketa narawan, wanem nao hem savve mekem iumi duim?
10 Taem iumi prea for olketa narawan, datwan savve mekem iumi changem tingting bilong iumi abaotem olketa. Sapos iumi prea for man wea iumi no laekem tumas, bae hard for iumi duim nogud samting long hem! (1 John 4:20, 21) Taem iumi prea olsem, evriwan long kongregeson savve wan mind and hem savve strongim narawan. Hem showimaot tu iumi lovem narawan olsem Christ lovem narawan. (John 13:34, 35) Holy spirit savve mekem man for garem love. Waswe, iumi wanwan askem Jehovah for givim kam holy spirit mekem iumi showimaot love, hapi, garem peace, no givap kwiktaem, kaen long narawan, duim gudfala samting, garem faith, hambol, and kontrolem iumiseleva? (Luke 11:13; Gal. 5:22, 23) Sapos olsem, wanem iumi talem and duim bae showimaot holy spirit leadim iumi.—Readim Galatians 5:16, 25.
11. Why nao hem fitim for iumi askem olketa narawan for prea for iumi?
11 Sapos iumi herem hao olketa pikinini bilong iumi laek raverave long exam, iumi mas prea for olketa and storyim olketa scripture tu wea bae helpem olketa for honest and no duim eni rong samting. Paul talem olketa Christian long Corinth: “Mifala prea long God mekem hem helpem iufala for no duim eni rong samting.” (2 Cor. 13:7) Jehovah hapi taem iumi prea olsem long hem bikos datwan mekem hem luksavve iumi garem olketa gudfala wei and iumi hambol. (Readim Proverbs 15:8.) Iumi savve askem olketa narawan for prea for iumi tu, olsem aposol Paul duim. Hem sei: “Iufala gohed prea for mifala. Mifala savve gud hao tingting bilong mifala hem stret and mifala laek duim nomoa olketa stret samting.”—Heb. 13:18.
Olketa Nara Samting wea Prea Bilong Iumi Showimaot Abaotem Iumi
12. Wanem nao olketa main samting wea iumi mas prea abaotem?
12 Waswe, olketa prea bilong iumi showimaot iumi hapi and gohed strong for worshipim Jehovah? Taem iumi prea, waswe, iumi storyim olketa samting wea followim wanem God laekem? Waswe, iumi storyim preaching waka, hao Jehovah nomoa fit for rul, and for nem bilong hem stap holy? Hem nao olketa main samting wea iumi mas prea abaotem, olsem Jesus showimaot taem hem talem Lord’s Prea. Hem sei: “Dadi bilong mifala long heven, mifala laekem nem bilong iu for stap holy. Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.”—Matt. 6:9, 10.
13, 14. Wanem nao olketa prea bilong iumi showimaot abaotem iumi?
13 Taem iumi prea long God, toktok wea iumi talem hem showimaot why iumi laek duim wanfala samting, olketa samting wea iumi interest long hem, and wanem iumi laekem tumas. Jehovah savve gud long iumi. Proverbs 17:3 hem sei: “Man savve bonem silver and gold long fire for lukim sapos hem gud or nogud, bat Jehovah nomoa savve lukluk long heart bilong man.” God savve wanem nao tingting bilong iumi. (1 Sam. 16:7) Hem savve long tingting bilong iumi abaotem olketa meeting, ministry, and olketa Christian brata and sista. Jehovah savve tu long tingting bilong iumi abaotem olketa anointed “brata” bilong Christ. (Matt. 25:40) Hem savve sapos iumi barava laek for kasem wanem iumi prea abaotem or sapos iumi toktok nating nomoa. Jesus hem sei: “Taem iu prea, no talem sem samting evritaem olsem pipol long world duim, bikos olketa tingse wei for talem staka toktok bae mekem God herem olketa.”—Matt. 6:7.
14 Toktok wea iumi talem taem iumi prea showimaot tu sapos iumi barava trustim God or nomoa. David hem sei: “Iu [Jehovah] nao ples bilong mi for haed. Iu nao strong taoa wea protectim mi from enemy bilong mi. Mi bae stap olowe long tent bilong iu. Mi bae haed andanit long olketa wing bilong iu.” (Ps. 61:3, 4) Long tokpiksa wei, taem ‘iumi stap insaed long tent bilong God,’ iumi stap sef and hem protectim iumi. (Rev. 7:15) Taem iumi prea long Jehovah, iumi trustim hem bikos iumi savve hem bae ‘helpem iumi’ taem eni samting testim faith bilong iumi. Datwan barava strongim iumi!—Readim Psalm 118:5-9.
15, 16. Sapos iumi prea from iumi laek kasem samfala waka long kongregeson, diswan savve mekem iumi luksavve long wanem?
15 Sapos iumi story long Jehovah abaotem wanem iumi laek duim, datwan bae helpem iumi for luksavve why nao iumi laek duim datfala samting. Tingim diswan. Sapos iumi barava laek kamap elder long kongregeson, waswe, hem from iumi laek helpem olketa brata and sista and laek waka hard long preaching and long kongregeson? Or waswe, iumi laek ‘apim iumiseleva’ or laek “rul ovarem” pipol? Pipol wea worshipim Jehovah mas no olsem. (Readim 3 John 9, 10; Luke 22:24-27.) Sapos iumi no garem stretfala tingting, taem iumi prea long Jehovah God, datwan savve helpem iumi for luksavve long diswan and changem tingting bilong iumi bifor hem hard nao for aotem kaen tingting olsem.
16 Maet samfala waef barava laekem hasband bilong olketa for kamap ministerial servant and gogo kamap elder. Maet olketa talem diswan taem olketa prea seleva long Jehovah and olketa waka hard for showimaot gudfala wei. Hem important for olketa duim olsem bikos toktok and wei bilong famili bilong wanfala brata savve mekem olketa long kongregeson garem gudfala tingting abaotem brata hia or nomoa.
Prea Long Taem Bilong Meeting
17. Why nao hem gud for iumi prea long kwaet ples?
17 Staka taem Jesus go long kwaet ples wea no eniwan stap mekem hem savve prea long Dadi bilong hem. (Matt. 14:13; Luke 5:16; 6:12) Iumi tu laek for stap seleva samfala taem. Taem iumi prea long kwaet ples, bae hem isi for iumi disaedem samting wea Jehovah hapi long hem and wea helpem iumi for gohed fren gud witim hem. Bat Jesus prea tu long ples wea staka pipol stap and hem gud for iumi storyim hao for duim diswan long stretfala wei.
18. Taem brata prea long meeting, wanem nao samfala samting wea hem mas no talem?
18 Long olketa meeting bilong iumi, olketa faithful brata savve prea long kongregeson. (1 Tim. 2:8) Long end bilong prea, olketa brata and sista mas fit for talem “amen,” wea minim “barava nao.” Bat olketa mas hapi long wanem brata talem bifor olketa talem “amen.” Prea wea Jesus lanem long olketa disaepol bilong hem no garem eni nogud toktok or toktok wea mekem man feel nogud. (Luke 11:2-4) Nara samting tu, hem no storyim evri smol samting abaotem olketa problem and need bilong man wanwan wea herem hem taem hem prea. Taem man prea seleva nao hem savve storyim olketa samting hia bat no taem hem prea front long staka pipol. And taem brata prea long meeting, hem mas no storyim olketa samting wea olketa elder nomoa savve abaotem.
19. Wei bilong iumi mas hao taem brata hem prea long meeting?
19 Taem iumi herehere long brata wea prea, iumi mas showimaot respect long God and “fraet long [hem].” (1 Pet. 2:17) Samfala samting hem olraet nomoa for iumi duim long narataem bat hem no fitim for iumi duim long taem bilong meeting. (Eccl. 3:1) Tingim sapos evriwan wea standap long wanfala laen olketa hol hand long taem wea brata hem prea. Maet samfala brata and sista and pipol wea no Witness feel nogud taem olketa lukim diswan or hem mekem olketa no herehere gud taem brata hem prea. Maet samfala hasband and waef hol hand bat sapos tufala huggim tufala long taem wea brata hem prea, samfala wea lukim olketa maet stambol. Maet olketa tingse tufala hia tingim wei wea tufala lovem tufala and no respectim Jehovah. Dastawe iumi mas barava respectim Jehovah and “duim evri samting long wei wea iumi mekhae long God.” Iumi mas no duim eni samting wea mekem narawan stambol or no herehere gud taem brata hem prea.—1 Cor. 10:31, 32; 2 Cor. 6:3.
Wanem Nao Iumi Savve Prea Abaotem?
20. Minim kam Romans 8:26, 27.
20 Samfala taem maet iumi no savve wanem for talem taem iumi prea seleva long God. Paul sei: “Samfala taem iumi savve iumi need for prea, bat iumi no savve wanem for prea abaotem. Long taem olsem, nomata iumi no savve wanem for talem, God givim holy spirit bilong hem for helpem iumi. And God wea lukluk long heart bilong evriwan savve iusim holy spirit bilong hem for savve long wanem nao iumi tingim.” (Rom. 8:26, 27) Jehovah mekem olketa man raetem staka prea insaed long Bible. Hem hapi taem iumi talem toktok long olketa prea hia and hem herem. God savve gud long iumi and hem savve long mining bilong olketa samting wea holy spirit bilong hem leadim olketa man for raetem long Bible. Taem iumi prea strong long Jehovah, hem ansarem prea bilong iumi taem hem iusim holy spirit for “helpem” iumi. Bat taem iumi savve gud long wanem Bible talem, iumi bae kwiktaem tingim wanem iumi bae prea abaotem.
21. Wanem nao bae iumi storyim long study bihaen diswan?
21 Iumi lanem hao samting wea iumi talem long God taem iumi prea hem showimaot staka samting abaotem iumi. Hem savve showimaot sapos iumi barava fren gud witim Jehovah and savve gud long Bible. (Jas. 4:8) Long study bihaen diswan, iumi bae story abaotem samfala prea wea pipol talem wea stap long Bible witim samfala toktok wea pipol talem taem olketa prea. Taem iumi lukluk long Bible abaotem diswan, long wanem wei nao datwan bae helpem iumi taem iumi prea long God?
Wanem Nao Ansa Bilong Iu?
• Taem iumi prea, iumi mas hao?
• Why nao iumi mas prea for olketa Christian brata and sista?
• Wanem nao olketa prea bilong iumi showimaot abaotem iumi?
• Wei bilong iumi mas hao taem brata hem prea long meeting?
[Piksa long page 4]
Waswe, iu praisem Jehovah and thankiu long hem evritaem?
[Piksa long page 6]
Taem brata prea long meeting, iumi mas evritaem showimaot respect long Jehovah