Word Bilong Jehovah Hem Laef
Olketa Main Point From Buk Bilong Isaiah—I
JEHOVAH GOD hem ask olsem: “Hu nao bae mi sendem go, and hu nao bae go for iumi?” Isaiah son bilong Amoz hem ansa olsem: “Mi long hia! Sendem mi.” (Isaiah 1:1; 6:8) Start long datfala taem hem kasem assignment for kamap wanfala profet. Olketa samting wea Isaiah duim olsem wanfala profet stap long Bible buk wea garem nem bilong hem.
Profet Isaiah nao raetem disfala buk bilong Isaiah. Buk hia storyim olketa samting wea happen from year 778 B.C.E. go kasem lelebet taem bihaen 732 B.C.E. wea datwan hem 46 year. Nomata hem garem judgment message againstim Judah, Israel, and olketa nara kantri wea stap klosap long olketa, main samting wea hem storyim hem no judgment, bat ‘salvation wea kam from Jehovah God.’ (Isaiah 25:9) Datfala nem Isaiah hem minim “Salvation bilong Jehovah.” Disfala article bae storyim olketa main point from Isaiah 1:1–35:10.
“WANFALA SMOL SEKSON NOMOA BAE GO BAK”
Bible no talem sapos pipol herem profesi message wea stap long Isaiah chapter 1 go kasem chapter 5 bifor or bihaen Isaiah kasem assignment for kamap wanfala profet. (Isaiah 6:6-9) Nomata olsem, Bible showimaot klia hao long spiritual wei, Judah and Jerusalem sik “start long leg go kasem hed.” (Isaiah 1:6) Wei for worshipim idol kamap big tumas. Olketa leader duim raverave fasin. Olketa woman bighed. Pipol no servem trufala God long wei wea hem laekem. God sendem Isaiah “staka taem” for story long pipol wea no minim samting and wea no laek for garem savve tu.
Israel and Syria plan tugeta for attakim Judah. Jehovah iusim Isaiah and olketa pikinini bilong hem “olsem olketa saen and olsem olketa mirakol” for showimaot long Judah hao Israel and Syria bae no winim olketa. (Isaiah 8:18) Bat only taem “Prince bilong Peace” hem rul nao peace bae stap for olowe. (Isaiah 9:6, 7) Jehovah bae judgem tu, Assyria, kantri wea hem iusim olsem “stik for kros bilong [hem].” Gogo, Judah bae kamap prisoner, bat “wanfala smol sekson nomoa bae go bak.” (Isaiah 10:5, 21, 22) Taem tokpiksa ‘smol branch wea grow kamaot from Jesse’ hem rul, evri samting bae stret evribit.—Isaiah 11:1.
Ansa for Olketa Bible Kwestin:
1:8, 9—Hao nao dota bilong Zion hem “stap seleva olsem smol leaf haos long grape plantation, olsem wanfala smol haos long garden cucumber”? Diswan showimaot hao taem Assyria attakim Jerusalem, hem bae ting long Jerusalem olsem wanfala leaf haos long grape plantation or wanfala smol haos long garden cucumber wea isi tumas for distroem. Bat Jehovah helpem hem mekem hem no kamap olsem Sodom and Gomorrah.
1:18—Wanem nao mining bilong disfala toktok, “kam distaem, iufala pipol, and iumi stretem evri samting midolwan long iumi”? Diswan hem no invitation for Jehovah and pipol hia story raonem wanem olketa willing for duim and no willing for duim, and bihaen datwan olketa mekem wanfala agreement. Disfala verse storyim wei wea Jehovah, wea hem wanfala raeteous Judge, hem givim chance long olketa Israelite for change and mekem olketa seleva kamap klin.
6:8a—Why nao disfala scripture hem iusim word “mi” and “iumi”? Datfala word “mi” hem minim Jehovah God. Datfala word “iumi” hem showim hao samwan stap witim Jehovah, wea datwan nao hem “only Son wea hemseleva nao wakem.”—John 1:14; 3:16.
6:11—Wanem nao Isaiah minim taem hem ask olsem: “O Jehovah, diswan bae gohed kasem wanem taem?” Isaiah no askem haomas year nao hem mas talemaot message bilong Jehovah long pipol wea no laek for lisin. Bat hem laek for savve haomas year nao wei wea olketa sik long spiritual wei bae mekem nem bilong God no kasem honor.
7:3, 4—Why nao Jehovah sevem King Ahaz wea wicked? King bilong Syria and king bilong Israel plan for finisim wei wea King Ahaz rul long Judah and for changem hem witim wanfala ruler wea olketa savve kontrolem hem. Ruler hia hem son bilong Tabeel and hem no kam from laen bilong David. Disfala plan bilong Satan bae stopem Kingdom covenant wea God mekem witim David for gohed fulfill. Jehovah sevem Ahaz mekem laen wea “Prince bilong Peace” bae kam from hem no finis.—Isaiah 9:6.
7:8—Hao nao Ephraim “pisis” insaed 65 year? Wei for muvim pipol long ten-tribe kingdom go aot and difren pipol kam stap long ples bilong olketa hem start “long taem wea Pekah hem king long Israel,” no longtaem bihaen Isaiah talem disfala profesi. (2 Kings 15:29) Diswan gohed go kasem taem King Esar-haddon rul long Assyria, wea hem son bilong Sennacherib wea rul bihaen Sennacherib hem dae. (2 Kings 17:6; Ezra 4:1, 2; Isaiah 37:37, 38) Disfala wei wea Assyria muvim pipol go long Samaria and muvim pipol go aot from Samaria hem gohed for 65 year olsem Isaiah 7:8 hem talem.
11:1, 10—Hao nao Jesus Christ hem ‘wanfala smol branch wea bae grow kamaot from Jesse,’ and tu, hem “rut bilong Jesse”? (Romans 15:12) Jesus “grow kamaot from Jesse” bikos hem kam from laen bilong David, and David hem son bilong Jesse. (Matthew 1:1-6; Luke 3:23-32) Bat from Jesus kasem paoa for rul olsem King, datwan mekem hem difren from olketa laen dadi bilong hem. From hem garem paoa for givim pipol wea obey laef olowe long earth, Jesus kamap ‘Dadi bilong olketa for olowe.’ (Isaiah 9:6) Dastawe hem “rut” bilong olketa laen dadi bilong hem and Jesse tu.
Olketa Leson for Iumi:
1:3. For les for followim wanem Creator laekem iumi for duim hem olsem buluka or donkey garem moa savve winim iumi. Bat wei for gohed tinghae long evri samting wea Jehovah duim for iumi bae helpem iumi for tingting gud bifor iumi duim samting and no lusim Jehovah.
1:11-13. Jehovah les long kaen ceremony bilong religion wea pipol duim and prea bilong pipol wea no kam from heart. Samting iumi duim and olketa prea bilong iumi shud kam from gudfala samting nao muvim heart bilong iumi.
1:25-27; 2:2; 4:2, 3. Wei wea Judah stap emti and for wei for olsem slave bae finis taem datfala smol sekson wea repent go bak long Jerusalem and startim bak trufala worship. Jehovah showimaot mercy long pipol wea duim rong samting and olketa repent.
2:2-4. Wei wea iumi strong long waka for preach abaotem Kingdom and mekem pipol kamap disaepol helpem pipol long plande kantri lanem hao for stap long peace and for gohed garem peace witim narawan.
4:4. Jehovah bae aotem fasin wea no klin and wei for guilty for killim man dae.
5:11-13. For man no kontrolem seleva and no balance long wei for chusim hapitaem hem olsem hem les for duim samting followim savve.—Romans 13:13.
5:21-23. Olketa Christian elder, or overseer mas no “tingse olketa wise.” Olketa need tu for showimaot fasin for balance saed long wei for ‘drinkim wine’ and mas no favorim eniwan.
11:3a. Example and teaching bilong Jesus showimaot man wea fraet long Jehovah hem hapi.
“JEHOVAH BAE SHOWIMAOT MERCY LONG JACOB”
Long chapter 13 go kasem chapter 23 hem olketa message bilong judgment againstim olketa nation. Bat “Jehovah bae showimaot mercy long Jacob” long wei for letem evri tribe bilong Israel go bak long hom bilong olketa. (Isaiah 14:1) Message abaotem wei wea Judah bae stap emti long chapter 24 go kasem chapter 27 garem tu promis for Judah kamap gud moa bihaen. Jehovah barava kros long “olketa long Ephraim [Israel] wea drunk” from olketa joinim Syria, and hem kros tu long “priest and profet” long Judah from olketa joinim Assyria. (Isaiah 28:1, 7) “Ariel [Jerusalem]” bae kasem trabol from hem “laek go long Egypt” for Egypt protectim hem. (Isaiah 29:1, footnote; 30:1, 2) Nomata olsem, profesi showimaot hao Jehovah bae sevem olketa wea garem faith long hem.
“Olsem wanfala young lion wea standap ovarem animal wea hem killim dae and singaot big,” Jehovah bae protectim “Maunt Zion.” (Isaiah 31:4) Disfala promis tu stap: “Wanfala king bae rul for raeteous fasin.” (Isaiah 32:1) Wei wea Assyria laek for attakim Judah hem mekem “pipol for talemaot message bilong peace” tu for krae big. Nomata olsem, Jehovah promis hao hem bae healim pipol bilong hem mekem olketa ‘kasem forgiveness for sin bilong olketa.’ (Isaiah 33:7, 22-24) “Jehovah barava kros long evri nation, and hem kros long evri army bilong olketa.” (Isaiah 34:2) Judah bae no stap emti for olowe. Bible hem sei: “Drae area and ples wea no garem wata bae singaot from olketa hapi, and olketa flat ples wea drae bae hapi and garem flaoa olsem saffron.”—Isaiah 35:1.
Ansa for Olketa Bible Kwestin:
13:17—Long wanem wei nao pipol long Media ting long silver olsem samting nating and no laekem gold? Long tingting bilong pipol long Media and Persia, bignem wea olketa kasem taem olketa winim wanfala faet hem moabeta winim samting wea olketa tekem from ples wea olketa faet long hem. Datwan hem tingting bilong Cyrus tu. Hem givim olketa Israelite wea go bak olketa gold and olketa silver samting wea Nebuchadnezzar stealim from temple bilong Jehovah.
14:1, 2—Hao nao pipol bilong Jehovah “kasholem pipol wea mekem olketa prisoner firstaem and rulim pipol wea mekem olketa waka hard firstaem”? Diswan kamap tru for Daniel wea garem hae position long Babylon taem Media and Persia rul. Esther kamap queen long Persia, and Mordecai kamap prime minister long Gavman bilong Persia.
20:2-5—Waswe, Isaiah really naked and wakabaot raon for thrifala year? Maet from hem werem tufala kaleko, hem aotem wanfala and “werem wanfala nomoa.”—1 Samuel 19:24, footnote.
21:1—Wanem ples nao “wilderness bilong sea”? Nomata Babylon no stap klosap long sea, Bible talem hao hem wanfala sea bikos evri year Euphrates and Tigris river savve flood and fulimap datfala ples witim wata olsem “sea.”
24:13-16—Hao nao olketa Jew bae stap “midolwan pipol olsem man wea whipim olive tree witim stik, olsem wei for kolektem leftova taem olketa finis for hipimap grape”? Long sem wei wea pipol no harvestim evri frut or grape, samfala nomoa bae no dae taem Jerusalem and Judah distroe. Nomata enemy sendem olketa hia go long “ples bilong laet [Babylon long East]” or long “olketa island bilong [Mediterranean] sea,” olketa bae givim glory long Jehovah.
24:21—Olketa hu nao “olketa army wea stap long haefala ples” and “olketa king long graon”? Maet olketa wicked spirit nao “olketa army wea stap long haefala ples.” Sapos olsem, “olketa king long graon” hem olketa ruler long earth wea olketa demon kontrolem.”—1 John 5:19.
25:7—Wanem nao “kava wea kavarem evri pipol, and datfala samting wea olsem haos bilong spider wea evri nation pas insaed”? Diswan storyim tufala barava nogud enemy bilong olketa man—sin and dae.
Olketa Leson for Iumi:
13:20-22; 14:22, 23; 21:1-9. Profesi bilong Jehovah evritaem kamap tru, olsem samting wea happen long Babylon.
17:7, 8. Nomata staka long Israel no lisin, samfala man trustim Jehovah. Olsem tu, samfala long olketa church wea sei olketa Christian acceptim message abaotem Kingdom.
28:1-6. Assyria bae tekovarem Israel, bat God bae mek sure olketa man wea faithful bae no dae. Olketa judgment bilong Jehovah givim hope long olketa wea raeteous.
28:23-29. Jehovah stretem olketa man wea garem gudfala heart followim need and living bilong olketa.
30:15. For Jehovah sevem iumi, iumi mas showimaot faith long wei for “rest,” wea minim for no lukaotem help from samting wea olketa man planim for sevem iumi. Wei wea iumi “gohed for no fraet” hem showimaot iumi trustim Jehovah for protectim iumi.
30:20, 21. Iumi “lukim” Jehovah and “herem” voice bilong hem for sevem iumi long wei for obeyim wanem hem talem long Word bilong hem, Bible, and thru long “faithful and wise slave.”—Matthew 24:45.
Profesi Bilong Isaiah Strongim Wei for Trustim Toktok Bilong God
Iumi barava thankiu for message bilong God long buk bilong Isaiah! Olketa profesi wea fulfill finis strongim trust bilong iumi hao ‘toktok wea go aot from mouth bilong Jehovah bae no kam bak nating long hem.’—Isaiah 55:11.
Waswe long olketa profesi abaotem Messiah long Isaiah 9:7 and 11:1-5, 10? Olketa profesi hia strongim faith bilong iumi abaotem samting wea Jehovah duim for sevem iumi. Buk bilong Isaiah garem tu samfala profesi wea fulfill long bigfala wei distaem and samfala wea no fulfill yet. (Isaiah 2:2-4; 11:6-9; 25:6-8; 32:1, 2) Tru nao, buk bilong Isaiah hem narafala pruv wea showimaot “word bilong God hem laef”!—Hebrews 4:12.
[Piksa long page 14]
Isaiah and olketa pikinini bilong hem olketa “olsem olketa saen and olsem olketa mirakol long Israel”
[Piksa long page 15]
Jerusalem bae kamap “olsem smol leaf haos long grape plantation”
[Piksa long page 16]
Hao nao pipol from olketa nation kasem help for “hammerim sword bilong olketa for kamap hou”?