Salvation for Olketa wea Chusim Laet
“Jehovah hem laet and salvation bilong mi. Hu nao bae mi fraetem?”—PSALM 27:1.
1. Wanem samting wea givim laef nao Jehovah wakem?
JEHOVAH hem Start bilong sunlaet wea mekem disfala earth garem laef. (Genesis 1:2, 14) Hem tu Creator bilong spiritual laet, wea aotem darkness bilong world bilong Satan wea savve killim man dae. (Isaiah 60:2; 2 Corinthians 4:6; Ephesians 5:8-11; 6:12) Olketa wea chusim laet savve sei witim man wea raetem psalm: “Jehovah hem laet and salvation bilong mi. Hu nao bae mi fraetem?” (Psalm 27:1a) Bat, olsem long taem bilong Jesus, olketa wea chusim darkness bae kasem nogud judgment.—John 1:9-11; 3:19-21, 36.
2. Long taem bifor, wanem nao happen long olketa wea rejectim laet bilong Jehovah and long olketa wea lisin long toktok bilong hem?
2 Long taem bilong Isaiah, planti pipol wea mekem covenant witim Jehovah olketa rejectim laet. From diswan, Isaiah lukim north kingdom bilong Israel finis olsem wanfala nation. And long 607 B.C.E., Jerusalem and temple bilong hem finis evribit and pipol bilong Judah go stap olsem prisoner. Nomata olsem, olketa wea lisin long toktok bilong Jehovah kasem strong for againstim apostate wei bilong datfala taem. Saed long 607 B.C.E., Jehovah promisim hao olketa wea lisin long hem bae stap laef. (Jeremiah 21:8, 9) Distaem, iumi wea lovem laet savve lanem planti samting from samting wea happen long datfala taem.—Ephesians 5:5.
Hapi Bilong Olketa wea Insaed Long Laet
3. Distaem, wanem trust nao iumi savve garem, wanem “raeteous nation” nao iumi lovem, and wanem “strongfala taon” nao datfala “nation” garem?
3 “Mifala garem strongfala taon. [God] putim salvation olsem olketa wall and strongfala protection. Openem olketa gate, iufala man, mekem disfala raeteous nation wea keepim faithful wei savve go insaed.” (Isaiah 26:1, 2) Olketa hia nao hapi toktok bilong pipol wea trust long Jehovah. Olketa faithful Jew long taem bilong Isaiah luk go long Jehovah olsem really Ples for kasem sef living, no long olketa giaman god bilong pipol long ples bilong olketa. Distaem iumi garem sem trust. And tu, iumi lovem datfala “raeteous nation” bilong Jehovah—“datfala Israel bilong God.” (Galatians 6:16; Matthew 21:43) Jehovah tu lovem disfala nation bikos long faithful fasin bilong hem. From blessing bilong hem, Israel bilong God garem “wanfala strong taon,” wanfala organization wea olsem taon wea saportim and protectim hem.
4. Wanem wei for tingting nao hem gud for iumi mekem grow?
4 Olketa wea stap insaed long disfala “taon” luksavve hao “datfala tingting wea kasem saport [Jehovah] bae protectim long peace olowe, bikos long [Jehovah] nao datwan hem trustim.” Jehovah saportim olketa wea garem tingting for trustim hem and followim olketa raeteous principle bilong hem. So, olketa faithful wan long Judah obeyim encouragement bilong Isaiah: “Trust long Jehovah, iufala pipol, for olowe, for long Jah Jehovah nao disfala Rok bilong taem olowe.” (Isaiah 26:3, 4; Psalm 9:10; 37:3; Proverbs 3:5) Olketa wea garem kaen tingting olsem luk long “Jah Jehovah” olsem only strong Rok. Olketa garem “peace olowe” witim hem.—Philippians 1:2; 4:6, 7.
Shame for Olketa Enemy Bilong God
5, 6. (a) Hao nao Babylon bifor kasem shame? (b) Long wanem wei nao “Bigfala Babylon” kasem shame?
5 Waswe sapos olketa wea trust long Jehovah kasem trabol? Olketa no need for fraet. Jehovah letem olketa samting hia go ahed for lelebet taem, bat gogo hem givim help, and olketa wea kosim datfala trabol feisim judgment bilong hem. (2 Thessalonians 1:4-7; 2 Timothy 1:8-10) Tingim story bilong wanfala “hae taon.” Isaiah hem sei: “[Jehovah] mekem olketa wea stap hae, datfala hae taon, for stap low. Hem daonem, hem daonem go kasem graon; hem mekem hem for tasim dust. Leg nao bae purubutim, leg bilong wan wea safa, olketa step bilong olketa wea low.” (Isaiah 26:5, 6) Hae taon long hia maet hem Babylon. Datfala taon barava mekem trabol for pipol bilong God. Bat wanem nao happen long Babylon? Long 539 B.C.E., hem foldaon long hand bilong olketa long Media and Persia. Olketa barava kasem shame!
6 Long taem bilong iumi profesi toktok bilong Isaiah barava fitim samting wea happen long “Bigfala Babylon” start kam long 1919. Datfala hae taon barava foldaon nogud long datfala year taem olketa forcem hem for letem pipol bilong Jehovah go free from spiritual prison. (Revelation 14:8) Next samting wea happen mekem hem kasem moa shame. Datfala smol sekson bilong olketa Christian tan raon and ‘purubutim’ pipol wea kasholem olketa bifor. Long 1922, olketa start for talemaot wei wea Christendom bae finis, olketa talemaot fofala trumpet saond bilong Revelation 8:7-12 and thrifala trabol wea Revelation 9:1–11:15 profesi abaotem.
“Road Bilong Raeteous Wan Hem Stretfala Fasin”
7. Wanem instruction nao olketa wea tan go long laet bilong Jehovah kasem, hu nao olketa hope long hem and wanem nao olketa barava tinghae long hem?
7 Jehovah givim salvation for olketa wea tan go long laet bilong hem, and hem leadim olketa long road, olsem Isaiah hem showimaot: “Road bilong raeteous wan hem stretfala fasin. From iu raeteous, iu bae stretem gogo bilong wanfala wea raeteous. Yes, from road bilong judgment bilong iu, O Jehovah, mifala hope long iu. Soul bilong mifala aftarem nem and memorial bilong iu.” (Isaiah 26:7, 8) Jehovah hem wanfala raeteous God, and olketa wea worshipim hem mas keepim olketa raeteous mark bilong hem. Taem olketa duim olsem, Jehovah leadim olketa, smoothim gogo bilong olketa. Taem olketa followim instruction bilong hem, olketa hambol wan showimaot hope bilong olketa hem long Jehovah and witim full heart tinghae long nem bilong hem—“memorial” bilong hem.—Exodus 3:15.
8. Wanem gudfala example long wei for tingting nao Isaiah showimaot?
8 Isaiah barava tinghae long nem bilong Jehovah. Datwan hem showaot klia long next toktok bilong hem: “Witim soul bilong mi, mi wantem iu insaed long naet; yes, witim spirit insaed long mi, mi go ahed for lukaotem iu; bikos taem iu givimaot olketa judgment bilong iu for earth, raeteous fasin nao samting wea pipol long datfala gudfala land bae barava lanem.” (Isaiah 26: 9) Isaiah barava wantem Jehovah ‘witim soul bilong hem’—witim full man. Tingim wei wea datfala profet iusim olketa kwaet taem long naet for prea long Jehovah, talemaot barava deep tingting bilong hem and strong for lukaotem gaedens bilong Jehovah. Datwan hem nambawan example! And tu, Isaiah lanem raeteous fasin from olketa judgment bilong Jehovah. Long diswan, hem mekem iumi tingim need for evritaem lukaot, wekap evritaem for luksavve long will bilong Jehovah.
Samfala Chusim Darkness
9, 10. Wanem kaenfala samting nao Jehovah duim for nation bilong hem wea no faithful, bat wanem nao olketa duim?
9 Jehovah showimaot bigfala loving-kaeness long Judah, bat sorre tumas, no evriwan acceptim. Planti taem, staka long olketa chus for bighed and apostate and no tan go long laet bilong truth bilong Jehovah. Isaiah hem sei: “Nomata wicked wan kasem gud samting, hem bae nating lanem raeteous fasin. Long land bilong stretfala fasin hem bae no followim justice and bae hem no lukim position bilong Jehovah.”—Isaiah 26:10.
10 Long taem bilong Isaiah taem hand bilong Jehovah protectim Judah againstim olketa enemy, planti long olketa nating willing for luksavve long diswan. Taem hem blessim olketa witim peace bilong hem, datfala nation nating showimaot thankiu. So, Jehovah lusim olketa for servem “olketa narafala masta,” and gogo hem letem olketa Jew for go olsem prisoner long Babylon long 607 B.C.E. (Isaiah 26:11-13) Nomata olsem, wanfala smol sekson bilong datfala nation repent and go bak long homland bilong olketa.
11, 12. (a) Wanem future nao stap for sekson wea kasholem Judah? (b) Long 1919, wanem future nao stap for sekson wea kasholem olketa anointed servant bilong Jehovah?
11 Waswe long sekson wea kasholem Judah? Isaiah hem ansa witim profesi: “Olketa dae finis; olketa bae no laef. Olketa iusles long dae, and bae no laef bak. So iu lukluk long olketa mekem iu savve finisim olketa evribit and distroem evri samting bilong olketa.” (Isaiah 26:14) Tru nao, bihaen hem foldaon long 539 B.C.E., Babylon no garem eni future. Gogo datfala taon bae no stap moa. Hem bae “iusles long dae,” and bigfala rul bilong hem insaed buk bilong history nomoa. Hem strong warning for olketa wea putim hope long pipol bilong disfala world wea garem paoa!
12 Samfala part bilong disfala profesi fulfill taem God letem olketa anointed servant bilong hem for kamap prisoner long spiritual wei long 1918 and then mekem olketa kamap free long 1919. Start long datfala taem, future bilong sekson wea kasholem olketa, main wan nao Christendom, hem nogud. Bat staka blessing stap for pipol bilong Jehovah.
“Iu Joinim Moa Long Disfala Nation”
13, 14. Wanem nao olketa rich blessing wea olketa anointed servant bilong Jehovah enjoyim start kam long 1919?
13 God blessim datfala wei for repent wea olketa anointed servant bilong hem garem long 1919 and mekem olketa kamap big. Firstaem, wei for hipimap olketa lastfala member bilong Israel bilong God nao hem go ahed, then wei for hipimap “wanfala big crowd” bilong “nara sheep” hem start. (Revelation 7:9; John 10:16) Profesi bilong Isaiah talem olketa blessing hia: “Iu joinim moa long disfala nation; O Jehovah, iu joinim moa long disfala nation; iu givim glory long iuseleva. Iu muvim go evri spialaen bilong disfala land. O Jehovah, long taem bilong trabol olketa lukluk long iu; olketa talemaot wanfala smolfala prea taem olketa kasem discipline bilong iu.”—Isaiah 26:15, 16.
14 Distaem, olketa spialaen bilong Israel bilong God go kasem full earth, and datfala big crowd kasem samting olsem six million wea strong for share insaed waka for preachim gud nius. (Matthew 24:14) Hem bigfala blessing from Jehovah! And diswan givim bigfala glory long nem bilong hem! Datfala nem olketa herem insaed 235 kantri—nambawan wei for fulfillim promis bilong hem.
15. Wanem tokpiksa resurrection nao happen long 1919?
15 Judah needim help bilong Jehovah for ranawe from wei for olsem prisoner long Babylon. Olketa no savve duim seleva. (Isaiah 26:17, 18) Olsem tu, wei wea Israel bilong God kamap free long 1919 hem pruvim Jehovah saportim olketa. Datwan kanduit happen sapos hem no helpem olketa. And disfala change hem barava big tumas dastawe Isaiah talemaot hao diswan hem olsem wanfala resurrection: “Olketa bilong iu wea dae bae laef. Dead body bilong mi—bae olketa rise ap. Wekap and singaot witim hapi, iufala wea stap long dust! From wata bilong naet bilong iu hem olsem wata bilong mallow plant, and earth bae letem olketa wea iusles long dae for born kam.” (Isaiah 26:19; Revelation 11:7-11) Tru nao, olketa wea iusles long dae bae olsem born moa for duim waka!
Protection Long Danger Taem
16, 17. (a) Long 539 B.C.E., wanem nao olketa Jew need for duim for stap laef taem Babylon foldaon? (b) Luk olsem wanem nao olketa “rum wea stap insaed” long distaem, and hao nao olketa hia helpem iumi?
16 Olketa servant bilong Jehovah evritaem needim protection bilong hem. Bat, klosap nao, hem bae iusim hand bilong hem for lastfala taem againstim world bilong Satan, and olketa wea worshipim hem bae needim help bilong hem winim enitaem bifor. (1 John 5:19) Abaotem datfala danger taem, Jehovah warnim iumi: “Go, pipol bilong mi, insaed long olketa rum wea stap insaed, and satem door bihaen long iufala. Haedem iufala seleva for lelebet taem nomoa go kasem taem kros hem finis. From, lukim! Jehovah hem kam from ples bilong hem for mekem pipol bilong land givim ansa for olketa sin bilong olketa againstim hem, and disfala land bae showimaot klia olketa blood wea hem kapsaetem and bae no haedem moa olketa wea hem killim dae.” (Isaiah 26:20, 21; Zephaniah 1:14) Disfala warning showim olketa Jew hao for stap laef taem Babylon hem foldaon long 539 B.C.E. Olketa wea obeyim bae stap insaed haos bilong olketa, sef from olketa soldia aotsaed long olketa street.
17 Distaem, “olketa rum wea stap insaed” bilong datfala profesi luk olsem hem point go long planti thousand kongregeson bilong pipol bilong Jehovah evriwea long world. Olketa kongregeson hia olsem protection long distaem tu, wanfala ples wea olketa Christian faendem sef ples midolwan long olketa brata bilong olketa, anda long loving kea bilong olketa elder. (Isaiah 32:1, 2; Hebrews 10:24, 25) Diswan hem barava tru taem iumi tingim wei wea end bilong disfala system hem klosap tumas, taem wei for stap laef hem depend long wei for obey.—Zephaniah 2:3.
18. Hao nao Jehovah bae klosap nao “killim datfala sea animal”?
18 Abaotem datfala taem, Isaiah hem talem disfala profesi: “Long datfala day Jehovah, witim hardfala and bigfala and strongfala sword bilong hem, bae luk go long Leviathan, datfala snek wea slide, long Leviathan, datfala kruked snek, and hem bae killim dae datfala sea animal wea stap insaed sea.” (Isaiah 27:1) Wanem nao “Leviathan” bilong distaem? Luk olsem hem “firstfala snek,” Satan seleva, witim wicked system bilong hem, wea hem iusim for faet againstim Israel bilong God. (Revelation 12:9, 10, 17; 13:14, 16, 17) Long 1919, Leviathan lusim wei for holem pipol bilong God. Gogo, bae hem finis evribit. (Revelation 19:19-21; 20:1-3, 10) So, Jehovah bae “killim dae datfala sea animal.” Go kasem datfala taem, no eni samting wea Leviathan maet traem againstim pipol bilong Jehovah bae win. (Isaiah 54:17) Datwan givim bigfala comfort!
“Wanfala Grape Plantation Bilong Wine wea Rich”
19. Long disfala taem remnant stap hao?
19 Bikos long evri laet hia from Jehovah, waswe, iumi garem evri reason for hapi? Barava nao! Isaiah storyim gud hapi bilong pipol bilong Jehovah taem hem raet olsem: “Long datfala day sing long hem, iufala pipol: ‘Wanfala grape plantation bilong wine wea rich! Mi, Jehovah, mi protectim hem. Evri minute mi bae givim wata long hem. For no letem eniwan againstim hem, mi bae protectim hem long naet and day.’” (Isaiah 27:2, 3) Jehovah lukaftarem “grape plantation” bilong hem, datfala remnant bilong Israel bilong God, and for olketa wea waka hard witim olketa. (John 15:1-8) Samting wea kamaot from diswan nao olketa frut wea givim glory long nem bilong hem and mekem bigfala wei for hapi midolwan olketa servant bilong hem long earth.
20. Hao nao Jehovah protectim Christian kongregeson?
20 Iumi hapi bikos kros bilong Jehovah againstim olketa anointed servant bilong hem—wea mekem hem letem olketa for kamap prisoner long spiritual wei long 1918—hem finis. Jehovah seleva hem sei olsem: “No eni kros mi garem. Hu nao bae givim mi olketa nila grass and rabis grass long faet? Mi bae purubutim olketa samting olsem. Mi bae bonem olketa long semtaem. Sapos nomoa letem hem holem sef ples bilong mi, letem hem mek peace witim mi; peace letem hem mekem witim mi.” (Isaiah 27:4, 5) For mek sure olketa grape tree go ahed for mekem staka “wine wea rich,” Jehovah smasem and finisim eni samting wea olsem nila grass wea savve spoelem olketa. So, no letem eniwan mekem danger kamap for Christian kongregeson! Letem evriwan ‘hol strong long sef ples bilong Jehovah,’ lukaotem wei for hem hapi and protectim olketa. Taem iumi duim olsem, iumi mek peace witim God—samting wea important tumas dastawe Isaiah storyim tufala taem.—Psalm 85:1, 2, 8; Romans 5:1.
21. Long wanem wei nao gudfala land hem fulap witim “kaikai”?
21 Olketa blessing hia go ahed: “Long olketa day wea bae kam Jacob bae garem rut, Israel bae open olsem flaoa and bae really grow; and olketa bae fulimap gudfala land hia witim kaikai.” (Isaiah 27:6) Disfala verse fulfill start kam long 1919, wea givim nambawan pruv long paoa bilong Jehovah. Olketa anointed Christian fulimap earth witim “kaikai,” gudfala spiritual kaikai. Midolwan long wanfala nogud world, olketa hapi for keepim olketa hae mark bilong God. And Jehovah go ahed for blessim olketa witim wei for grow. From diswan, planti million fren bilong olketa, datfala nara sheep, ‘givim [God] holy service day and naet.’ (Revelation 7:15) Letem iumi nating forgetim nambawan privilege for kaikaim “kaikai” and sharem witim nara pipol!
22. Wanem nao olketa blessing wea olketa wea acceptim laet kasem?
22 Long olketa hard taem distaem, taem darkness kavarem earth and thick darkness olketa nation, waswe, iumi no thankiu hao Jehovah pourimaot spiritual laet long pipol bilong hem? (Isaiah 60:2; Romans 2:19; 13:12) For evriwan wea acceptim, laet olsem minim peace long mind and hapi distaem and laef olowe long future. So, witim gudfala reason, iumi wea lovem laet liftimap heart bilong iumi long praise for Jehovah and sei witim man wea raetem psalm: “Jehovah hem laet and salvation bilong mi. Hu nao bae mi fraetem? Hope long Jehovah; stap strong and letem heart bilong iu hem strong. Tru nao, hope long Jehovah.”—Psalm 27:1b, 14.
Waswe, Iu Remember?
• Wanem future nao stap for olketa wea againstim pipol bilong Jehovah?
• Wanem wei for grow nao Isaiah profesi abaotem?
• Iumi shud stap long olketa wanem “rum wea stap insaed,” and why nao olsem?
• Why nao wei wea pipol bilong Jehovah stap givim praise long hem?
[Box long page 22]
NIU PABLIKESON
Bigfala part long information long tufala study article hia hem insaed wanfala tok wea kamap long distrik convention program for 2000/2001. Long end bilong datfala tok, olketa releasem wanfala niu pablikeson, wea garem title Isaiah’s Prophecy—Light for All Mankind I. Disfala 416-page buk hem garem story long evri verse insaed first 40 chapter bilong buk bilong Isaiah.
[Piksa long page 18]
Olketa wea raeteous nomoa savve go insaed “strongfala taon” bilong Jehovah, organization bilong hem
[Piksa long page 19]
Isaiah lukaotem Jehovah “long naet”
[Piksa long page 21]
Jehovah protectim “grape plantation” bilong hem and mekem garem frut