Teachim Really Samting wea Insaed Bible
“Mekem pipol long evri nation for kamap disaepol . . . and teachim olketa.” —MATTHEW 28:19, 20.
1. Wanem nao iumi savve talem abaotem Bible?
WORD BILONG JEHOVAH, wea hem nao Holy Bible, hem wanfala barava old buk wea stap long staka ples raonem world. Full Bible or samfala part bilong hem stap long winim 2,300 languis. Winim 90 percent long evri pipol long earth garem Bible long languis bilong olketa.
2, 3. (a) Why nao pipol konfius abaotem samting wea Bible teachim? (b) Wanem nao olketa kwestin wea bae iumi storyim?
2 Plande million pipol readim lelebet part long Bible evriday. Samfala readim finis full Bible plande taem. Plande thousand religion sei teaching bilong olketa kam from Bible, bat olketa no savve agree long wanem Bible hem teachim. Samting wea mekem pipol konfius moa, hem wei wea olketa member bilong sem religion no savve agree long wanem Bible teachim. Samfala pipol no sure abaotem Bible, wea nao hem kam from, and sapos hem gud samting or nomoa. Plande ting long Bible olsem holy buk for iusim long ceremony nomoa or taem man promis for talem tru samting long kot.
3 Bat Bible hem garem barava strongfala message from God for olketa man. (Hebrews 4:12) From iumi olketa Witness bilong Jehovah, iumi laekem pipol for lanem samting wea Bible hem teachim. Iumi hapi for followim disfala komand wea Jesus Christ givim for olketa follower bilong hem: “Go . . . and mekem pipol long evri nation for kamap disaepol . . . and teachim olketa.” (Matthew 28:19, 20) Long ministry bilong iumi, iumi meetim pipol wea garem honest heart wea wari tumas bikos olketa lukim wei wea pipol evriwea long world konfius abaotem religion. Olketa laek savve long truth abaotem Creator bilong iumi, and olketa laek savve wanem Bible hem teachim saed long mining bilong laef. Bae iumi storyim thrifala kwestin wea plande pipol laek for savve abaotem. Long each wan, bae iumi lukim rong idea bilong olketa bigman, and then bae iumi lukim really samting wea Bible teachim. Olketa kwestin hia nao hem olsem: (1) Waswe, God hem kea for iumi? (2) Why nao iumi laef? and (3) Wanem nao hem happen long iumi taem iumi dae?
Waswe, God Hem Kea?
4, 5. Why nao pipol tingse God no kea for iumi?
4 Bae iumi start witim firstfala kwestin, Waswe, God hem kea for iumi? Sorre tumas, plande pipol tingse God hem nating kea for iumi. Why nao olketa ting olsem? Wanfala reason hem bikos olketa lukim hao world hem fulap witim war, fasin for heit, and wei for safa. Long tingting bilong olketa, ‘sapos God hem kea, for sure hem bae no letem olketa nogud samting olsem for happen.’
5 Narafala reason why pipol tingse God hem no kea for iumi, hem from olketa bigman bilong religion nao mekem olketa garem kaen tingting olsem. Wanem nao plande taem olketa bigman talem taem barava nogud samting hem happen? Taem tufala smol pikinini bilong wanfala woman dae long wanfala accident long trak, bigman long church bilong hem sei: “Hem will bilong God. God needim nara tufala angel.” Taem olketa bigman tok olsem, olketa blamem God nao for olketa nogud samting wea happen. Bat disaepol James hem talem olsem: “Taem man hem kasem test, hem no fit for sei: ‘God nao testim mi.’ From man no savve testim God witim nogud samting and God tu no testim eniwan.” (James 1:13) No enitaem Jehovah God mekem olketa wicked samting for happen. Tru nao, ‘hem hard for trufala God duim wicked samting.’—Job 34:10.
6. Hu nao bihaenem olketa nogud samting and wei wea pipol safa long disfala world?
6 Sapos olsem, why nao olketa nogud samting happen and staka pipol safa? Wanfala reason hem from big haf long olketa man rejectim God olsem Ruler, from olketa no laek for followim olketa raeteous law and principle bilong hem. Olketa man stap anda long Enemy bilong God, Satan, bikos “full world hem stap anda long paoa bilong wicked wan.” (1 John 5:19) Datfala toktok hem mekem iumi savve why evri samting hem nogud tumas. Satan hem fulap witim heit, hem laea, and hem raf. So iumi no sapraes hao world hem garem sem fasin olsem ruler bilong hem. Dastawe pipol duim staka barava nogud samting!
7. Wanem nao samfala reason why iumi safa?
7 Narafala reason why olketa man safa hem from olketa no perfect. Hem wei bilong olketa man wea sin for trae kontrolem nara pipol and diswan spoelem pipol and mekem wei for safa and olketa war kamap. Ecclesiastes 8:9 hem talem disfala toktok wea barava fitim: “Man rulim narawan [gogo] hem spoelem hem.” Narafala reason moa why pipol safa hem from “taem and samting wea iumi no expectim hem kasem evriwan.” (Ecclesiastes 9:11) Plande taem, pipol kasem olketa nogud samting from olketa stap long ples wea nogud samting hem happen.
8, 9. Hao nao iumi savve Jehovah hem kea for iumi?
8 Wei for savve Jehovah no mekem wei for safa hem kamap barava comfortim iumi. Bat waswe, God hem barava kea abaotem olketa samting wea gohed long laef bilong iumi? Ansa hem ia! Iumi savve Jehovah hem kea for iumi bikos hem talem iumi insaed Word bilong hem why hem letem olketa man for go followim nogud wei. Olketa reason bilong God hem join witim tufala important samting: rul bilong God and faithful fasin bilong olketa man. From hem olmaeti Creator, Jehovah no need for explainim long iumi olketa reason why hem letem olketa man for safa. Nomata olsem, hem talem iumi bikos hem kea for iumi.
9 Tingim samfala pruv moa wea showimaot God kea for iumi. “Heart bilong hem feel sorre” taem earth hem fulap witim nogud fasin long taem bilong Noah. (Genesis 6:5, 6) Waswe, God garem semkaen feeling distaem? Ia, hem nating change. (Malachi 3:6) Hem heitim evri samting wea no stret, and hem heitim tumas for lukim pipol safa. Bible teachim iumi hao klosap nao bae hem stretem evri nogud samting wea kamaot from rul bilong man and wei wea Devil affectim olketa. Waswe, iu agree hao datwan nao barava pruvim hao God hem kea for iumi?
10. Wanem nao tingting bilong Jehovah abaotem wei wea olketa man safa?
10 Olketa bigman bilong religion barava laea abaotem God taem olketa sei hem will bilong God for olketa nogud samting kasem iumi. Tru samting nao, Jehovah laekem tumas for finisim wei wea olketa man safa. First Peter 5:7 hem sei: “Hem kea for iufala.” Datwan nao really samting wea Bible teachim!
Why Nao Iumi Laef?
11. Wanem nao plande taem olketa religion talem abaotem wei wea olketa man laef and stap long earth?
11 Iumi lukluk long mek-tu kwestin wea plande pipol laek savve abaotem, Why nao iumi laef? Plande taem olketa religion sei olketa man stap long earth for lelebet taem nomoa bifor olketa go long nara ples. Samfala bigman teachim pipol hao wanday God bae distroem disfala earth. From kaen teaching olsem, plande pipol no garem hope, wea mekem olketa trae for duim staka samting long laef bilong olketa bikos olketa tingse olketa bae dae nomoa. Wanem nao really samting wea Bible teachim abaotem why iumi laef?
12-14. Wanem nao Bible teachim abaotem plan bilong God for disfala earth and for olketa man?
12 God hem garem nambawan plan for disfala earth and for olketa man. Hem “no creatim [earth] for stap nating” bat hem “wakem for pipol stap long hem.” (Isaiah 45:18) And tu, Jehovah “wakem earth long barava ples bilong hem; bae hem stap for olowe.” (Psalm 104:5) Taem iumi lanem olketa samting hia abaotem plan bilong God for disfala earth and for olketa man, datwan savve helpem iumi for savve why nao iumi laef.
13 Genesis chapter 1 and 2 showim hao Jehovah barava redyim gud earth for olketa man stap long hem. Bihaen, evri samting “barava gud tumas.” (Genesis 1:31) God putim first man and woman, Adam and Eve, long naesfala garden long Eden and givim tufala plande gudfala kaikai. Diswan nao toktok bilong God for tufala: “Garem plande pikinini and fulimap earth and lukaftarem.” Plan bilong God hem for tufala garem olketa pikinini wea perfect, for mekem datfala garden wea tufala stap insaed kavarem full earth, and for tufala lukaftarem olketa animal long loving wei.—Genesis 1:26-28.
14 Plan bilong Jehovah hem for wanfala perfect famili bilong olketa man for stap olowe long disfala earth. Word bilong God hem sei: “Olketa wea raeteous bae kasem earth olsem present, and olketa bae stap for olowe long hem.” (Psalm 37:29) Tru nao, God wakem olketa man for enjoyim laef olowe insaed Paradaes long earth. Datwan nao plan bilong God, and hem nao really samting wea Bible teachim!
Wanem Nao Happen Long Iumi Taem Iumi Dae?
15. Wanem nao klosap evri religion long world teachim abaotem wanem hem happen long iumi taem iumi dae?
15 Distaem, iumi storyim mek-thri kwestin wea plande pipol laek savve abaotem: Wanem nao happen long iumi taem iumi dae? Klosap evri religion long world teachim hao samting insaed long man hem gohed for laef bihaen man hem dae. Samfala religion hol strong long idea wea sei God panisim olketa wea wicked long wei for mekem olketa safa for olowe insaed long hellfire. Bat waswe, datwan hem tru? Wanem nao really samting wea Bible teachim abaotem dae?
16, 17. Wanem nao Bible talem abaotem olketa wea dae finis?
16 Word bilong God hem sei: “Olketa wea laef savve olketa bae dae; bat olketa wea dae finis nating savve long eni samting, and olketa no savve kasem pei moa.” From olketa wea dae finis “nating savve long eni samting,” olketa no savve herehere, lukluk, toktok, feelim samting, and tingting. Olketa no savve waka for kasem pei tu. Barava nomoa nao! Olketa no fit for duim eni waka! And tu, “love bilong olketa, heit, and jealous fasin bilong olketa hem finis,” from olketa no garem eni feeling nao.—Ecclesiastes 9:5, 6, 10.
17 Samting wea Bible talem abaotem diswan hem simpol and klia—man wea dae finis, hem no gohed laef long eni nara ples. No eni samting hem lusim body bilong iumi taem iumi dae and born moa long nara body wea gohed for laef olsem samfala bilivim. For minim diswan, tingim disfala example: Laef bilong iumi hem olsem kandol wea laet. Taem man killim dae kandol hia, datfala laet no go long eni ples. Hem finis nao.
18. Taem Bible student lanem hao olketa wea dae finis olketa no savve long eni samting, hem luksavve long olketa wanem samting?
18 Tingim datwan. Hem tru samting wea simpol bat hem garem bigfala mining. Taem wanfala Bible student lanem hao olketa wea dae finis no savve long eni samting, hem shud isi for hem luksavve hao nomata sapos olketa laen dadi bilong hem wea dae finis maet kros taem olketa laef, olketa no savve duim eni samting long hem distaem. Hem shud isi for hem minim tu hao olketa wea hem lovem wea dae finis no savve herehere, lukluk, story, feelim samting, or tingting. So olketa no savve safa from olketa lonely tumas long ples olketa kolem purgatory or safa long wanfala ples wea fire bonem olketa olowe. Bat Bible hem teachim hao God hem rememberim olketa wea dae finis and bae hem resurrectim olketa. Datwan hem barava nambawan hope!—John 5:28, 29.
Niu Buk for Iumi Iusim
19, 20. Iumi olketa Christian garem wanem responsibility, and wanem buk nao iumi garem for iusim for studyim Bible witim pipol?
19 Iumi storyim thrifala nomoa long olketa kwestin wea plande pipol laek savve abaotem. Iumi lukim hao Bible ansarem olketa kwestin hia long wei wea klia and isi for minim. Hem barava mekem iumi hapi for sharem olketa tru teaching hia witim pipol wea laek for savve long samting wea Bible hem teachim! Bat plande nara important kwestin stap wea pipol wea garem honest heart laek kasem ansa long hem. From iumi olketa Christian, hem responsibility bilong iumi for helpem pipol kasem ansa for olketa kwestin olsem.
20 So samting iumi mas trae for duim nao hem for teachim olketa tru samting from Bible long kliafala wei wea kasem heart bilong man. For helpem iumi long diswan, “datfala faithful and wise slave” redyim wanfala buk for iumi iusim long Christian ministry. (Matthew 24:45-47) Title bilong disfala buk hem What Does the Bible Really Teach? and hem garem 224 page.
21, 22. Wanem nao samfala interesting samting insaed disfala buk What Does the Bible Really Teach?
21 Disfala buk wea garem samfala spesol samting, hem release long “Obeyim God” Distrik Convention bilong Olketa Jehovah’s Witness wea kamap long 2005. Olsem example, disfala niu buk hem garem faevfala page long introduction for helpem iumi startim olketa Bible study. Bae iu lukim hao hem isi for storyim olketa piksa and olketa scripture wea insaed disfala introduction. Maet iu iusim information long there tu for showim olketa student hao olketa savve faendem olketa chapter and verse long Bible.
22 Olketa raetem disfala buk long wei wea hem simpol and klia. Hem encouragem student for tekpart wea datwan bae help for barava kasem heart bilong hem. Each chapter hem garem olketa kwestin long start and garem tu wanfala box long end wea garem title, “What the Bible Teaches.” Datfala box hem garem olketa ansa from Bible for olketa kwestin wea stap long start bilong chapter. Olketa nambawan piksa and short toktok and olketa tokpiksa insaed disfala buk bae helpem student for minim olketa niu idea. Nomata main part bilong disfala buk hem simpol lelebet, wanfala appendix stap for storyim go moa 14-fala important subject sapos student hem laekem moa information.
23. Wanem nao samfala idea wea iumi savve iusim taem iumi studyim Bible Teach buk witim olketa Bible student?
23 Disfala Bible Teach buk hem for helpem iumi teachim pipol nomata olketa skul gud or nomoa, and nomata wanem nao religion bilong olketa. Sapos student hem no savve long Bible, maet hem gud for duim haf chapter nomoa long each study. No hariap for finisim buk, bat trae for kasem heart bilong student. Sapos hem no minim wanfala tokpiksa wea olketa iusim long disfala buk, iusim narawan wea hem bae minim. Prepare gud, duim best for iusim disfala buk long gudfala wei, and prea long God for helpem iu for savve hao for “iusim word bilong truth long stretfala wei.”—2 Timothy 2:15.
Tinghae Long Olketa Spesol Privilege Bilong Iu
24, 25. Wanem nao olketa spesol privilege wea Jehovah givim long pipol bilong hem?
24 Jehovah givim olketa spesol privilege for pipol bilong hem. Hem mekem wei for iumi savve long truth abaotem hem. Iumi mas no ting smol long datfala privilege! Tru nao, God showimaot olketa plan bilong hem long olketa wea hambol and hem haedem from olketa wea praod. Jesus story olsem abaotem diswan: “Mi praisem iu long pablik, Dadi, Lord bilong heven and earth, bikos iu haedem evri samting hia from olketa man wea garem bigfala savve, and iu showim long olketa baby.” (Matthew 11:25) Hem spesol privilege for hem ting long iumi olsem olketa wea hambol and wea servem Haefala Ruler, Jehovah.
25 God givim iumi privilege tu for teachim nara pipol abaotem hem. No forgetim hao plande teachim olketa laea samting abaotem Jehovah. Staka pipol barava garem rong tingting abaotem Jehovah, and tingse hem bighed and hem nating kea. Waswe, iu willing and barava want for helpem pipol garem stretfala tingting abaotem Jehovah? Waswe, iu laekem pipol evriwea wea garem honest heart for savve long truth abaotem God? Sapos olsem, letem datfala love and respect wea iu garem muvim iu for obeyim hem and share evribit long waka for preach and teachim olketa narawan samting wea Bible talem abaotem olketa important samting. Pipol wea lukaotem truth need for lanem really samting wea Bible teachim.
Wanem Nao Ansa Bilong Iu?
• Wanem nao mekem iumi savve God hem kea for iumi?
• Why nao iumi laef long earth?
• Wanem nao hem happen long iumi taem iumi dae?
• Wanem part long Bible Teach buk nao iu barava laek for iusim?
[Piksa long page 4]
Bible hem teachim hao wei for safa bae finis
[Credit Line long page 4]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Piksa long page 5]
Olketa wea raeteous bae stap olowe long Paradaes