Helpem Olketa Narawan Obeyim Samting wea Bible Teachim
“Saed long datwan wea stap long gudfala graon, olketa hia herem datfala word witim gudfala heart, and olketa keepim and garem frut witim fasin for gohed strong.”—LUKE 8:15.
1, 2. (a) Wanem nao goal bilong datfala buk, What Does the Bible Really Teach? (b) Long olketa year wea just go finis, hao nao Jehovah blessim wei wea pipol bilong hem waka hard for mekem pipol kamap disaepol?
WANFALA Jehovah’s Witness wea hem regular pioneer story abaotem datfala buk wea garem title, What Does the Bible Really Teach?a Hem sei: “Datfala buk hem barava nambawan. Olketa student bilong mi barava laekem. Mi laekem tumas. Hem isi for startim Bible study insaed disfala buk witim pipol wea iu firstaem meetim olketa.” Wanfala olo brata hem sei olsem abaotem disfala sem buk: “Mi helpem staka pipol for savve long Jehovah insaed 50 year wea mi strong for duim ministry. Bat for tok stret, disfala buk hem barava nambawan. Olketa tokpiksa and olketa piksa barava naes tumas.” Waswe, iu garem sem tingting abaotem datfala Bible Teach buk? Disfala Bible study buk, hem for helpem iu fulfillim disfala komand bilong Jesus: “Iufala mas go and mekem pipol long evri nation for kamap disaepol bilong mi, . . . and teachim olketa for duim evri samting wea mi komandim long iufala.”—Matthew 28:19, 20.
2 Taem Jehovah lukim samting olsem 6.6 million Witness bilong hem willing for obeyim datfala komand bilong Jesus for mekem pipol kamap disaepol, heart bilong hem mas barava hapi. (Proverbs 27:11) Jehovah nao blessim hard waka wea olketa duim. Olsem example, long 2005 olketa talemaot gud nius long 235 kantri and conductim samting olsem 6,061,500 Bible study. From datwan, plande pipol ‘herem word bilong God and acceptim datwan olsem toktok bilong God and no olsem toktok bilong man.’ (1 Thessalonians 2:13) Long tufala year wea go finis, winim 500,000 niu disaepol changem laef bilong olketa for followim olketa standard bilong Jehovah and dedicate long God.
3. Olketa wanem kwestin long hao for iusim Bible Teach buk nao iumi bae storyim long disfala article?
3 Waswe, enitaem iu kasem hapi wea kamap from wei for duim Bible study witim samwan? Evriwea long world samfala stap wea garem “gudfala heart” wea taem olketa herem word bilong God olketa bae “keepim and garem frut witim fasin for gohed strong.” (Luke 8:11-15) Iumi bae lukluk long hao nao iu savve iusim Bible Teach buk long waka for mekem pipol kamap disaepol. Iumi bae storyim thrifala kwestin: (1) Hao nao iu savve startim Bible study? (2) Wanem nao olketa best wei for teach? (3) Hao nao iu savve helpem student for muv ahed for kamap wanfala teacher long Word bilong God, Bible?
Hao Iu Savve Startim Bible Study
4. Why nao maet samfala hol bak for studyim Bible, and hao nao iumi savve helpem olketa for winim datwan?
4 Sapos samwan askem iu for jamp from wansaed go long narasaed bilong wanfala river, maet iu hol bak for duim datwan. Bat sapos olketa ston stap for step antap, maet iu trae for akrosim datfala river. Long sem wei tu, man wea busy maet hol bak for studyim Bible. Haosholder maet tingim hao bae hem tekem staka taem and hard waka for duim study. Hao nao iu savve helpem haosholder for winim datkaen tingting? Taem iu iusim Bible Teach buk for storyim samfala short interesting story, iu savve helpem man for interest for gohed studyim Word bilong God. Sapos iu prepare gud, each return visit wea iu duim hem olsem wanfala step for helpem datfala man fren witim Jehovah.
5. Why nao iu need for readim Bible Teach buk?
5 Bat for iu savve helpem narawan for kasem gud samting from datfala Bible Teach buk, iu need for barava readim and studyim gud buk hia. Waswe, iu readim full buk finis? Wanfala hasband and waef tekem disfala buk taem tufala go holiday and readim taem tufala sisidaon long saedsea. Wanfala woman wea salem olketa samting long olketa tourist hem kam pas long tufala and lukim title bilong buk hia, What Does the Bible Really Teach? Datfala woman storyim long tufala hao hem just prea long God for givim hem ansa for datfala kwestin tu-thri hour go nomoa. Tufala barava hapi for givim long woman hia wanfala copy bilong datfala buk. Waswe, iu ‘baem taem’ for readim disfala buk maet winim wanfala taem? Iu savve duim diswan taem iu weitim samwan or long brek taem long skul or wakples. (Ephesians 5:15, 16) Sapos iu duim olsem bae iu savve gud long disfala Bible study buk and maet iu garem chance for story long olketa narawan abaotem samting wea stap insaed buk hia.
6, 7. Hao nao iu savve iusim Bible Teach buk for startim olketa Bible study?
6 Taem iu iusim datfala buk long ministry, iusim gud olketa piksa, scripture, and olketa kwestin long page 4, 5, and 6. Olsem example, maet iu savve startim story witim disfala kwestin, “From olketa man kasem staka problem distaem, long tingting bilong iu, wea nao iumi savve kasem advaes wea iumi savve trustim?” Bihaen iu lisin gud long tingting bilong man, readim 2 Timothy 3:16, 17, and explainim hao Bible hem garem barava ansa for olketa problem bilong man. Then openem buk and showim page 4 and 5, and askem hem olsem: “Long olketa samting wea iu lukim long piksa hia, which wan nao iu wari tumas abaotem?” Taem haosholder showim wanfala piksa, askem hem for holem buk, then openem Bible long datfala scripture wea stap saed long datfala piksa and readim. Then, readim page 6 and askem haosholder olsem: “Long sixfala kwestin wea stap long botom long disfala page, which wan nao iu laek for kasem ansa long hem?” Taem man showim wanfala, openem buk long chapter wea ansarem datfala kwestin, leavim buk witim hem, and arrange for kam bak for storyim datfala kwestin.
7 Disfala story bae iu savve storyim long samting olsem faev minute nomoa. Nomata olsem, insaed tu-thri minute hia bae iu faendemaot samting wea haosholder wari abaotem, iu bae readim and explainim tufala scripture, and arrange for wanfala return visit. Maet for longfala taem nao haosholder no herem wanfala story wea barava encouragem and comfortim hem olsem datfala short story bilong iu. From datwan, nomata man wea busy bae luk forward for story witim iu moa for tu-thri minute taem iu helpem hem for tekem nara step for wakabaot followim ‘road wea lead go long laef.’ (Matthew 7:14) Bihaen iu go bak samfala taem for duim return visit, iu savve startim study.
Olketa Best Wei for Teach
8, 9. (a) Hao nao iu savve redyim Bible student bilong iu for deal witim olketa problem and test wea maet bae hem kasem? (b) Wea nao iu savve faendem olketa material wea fire no savve bonem for buildim strongfala faith?
8 Taem man start for obeyim samting wea Bible teachim, maet hem kasem olketa test wea savve stopem hem for muv ahed. Aposol Paul hem sei: “Evriwan wea laek garem fasin for lovem God wea join witim Christ Jesus bae kasem persecution tu.” (2 Timothy 3:12) Paul markem olketa test hia witim fire wea savve bonem olketa rabis building material, bat wea no savve bonem olketa material olsem gold, silver, and spesol ston. (1 Corinthians 3:10-13; 1 Peter 1:6, 7) Iu need for helpem Bible student bilong iu build witim olketa material wea fire no savve bonem, mekem hem garem olketa fasin wea hem needim for deal witim olketa test wea maet bae hem kasem.
9 Man wea raetem psalm hem markem “toktok bilong Jehovah” witim “silver wea kamap klin from wei for meltim long bigfala fire bilong earth, wea hem klinim sevenfala taem.” (Psalm 12:6) Tru nao, Bible hem garem evri spesol material wea iu savve iusim for buildim strongfala faith. (Psalm 19:7-11; Proverbs 2:1-6) And Bible Teach buk showim iu hao for iusim gud Bible.
10. Hao nao iu savve helpem student for lukluk gud long olketa scripture long Bible?
10 Taem iutufala study, helpem student for lukluk gud long olketa scripture wea stap long each chapter wea iutufala studyim. Iusim olketa kwestin for helpem student for minim olketa main scripture and for luksavve hao hemseleva savve followim. Iu mas keakea nogud iu talem stret wanem hem mas duim. Winim wei for duim olsem, followim example bilong Jesus. Taem wanfala man wea savve gud long Law askem Jesus wanfala kwestin, Jesus ansa olsem: “Wanem nao olketa raetem insaed long Law? Wanem nao iu readim insaed long hem?” Man hia hem talem ansa wea stap long olketa scripture and Jesus helpem hem for lukim hao hemseleva savve followim datfala principle. Jesus iusim wanfala tokpiksa tu for helpem hem for luksavve hao datfala teaching shud affectim hem. (Luke 10:25-37) Datfala Bible Teach buk hem garem staka simpol tokpiksa wea iu savve iusim for helpem student for luksavve hao for followim olketa Bible principle.
11. Long each taem iutufala study, haomas paragraf nao iutufala shud studyim?
11 Datfala Bible Teach buk hem iusim olketa simpol toktok for explainim Word bilong God long sem wei wea Jesus explainim olketa hard samting long simpol wei. (Matthew 7:28, 29) Followim example bilong hem taem iu teach. Storyim datfala information long wei wea stret, simpol, and klia. No trae for finisim buk kwiktaem. Bat, haomas paragraf wea iutufala savve studyim each taem hem depend long living and savve bilong student. Jesus hem savve olketa disaepol bilong hem no savve minim evri samting wantaem, so hem no givim staka information long olketa wea olketa no needim long datfala taem.—John 16:12.
12. Hao nao iu shud iusim appendix?
12 Appendix wea stap long Bible Teach buk hem garem 14-fala topic. From iu nao teacher bilong hem, iu shud fit for luksavve long best wei for iusim disfala information fitim need bilong student. Olsem example, sapos student faendem hem hard for minim wanfala subject or garem olketa kwestin abaotem samfala teaching bilong religion bilong hem bifor, maet only samting wea iu need for duim hem for showim hem appendix wea storyim datwan and letem hemseleva lukluk long hem. Bat long narasaed, iu bae luksavve tu sapos iu need for story raonem datfala information witim student. Appendix hem garem olketa important Bible subject olsem “‘Soul’ and ‘Spirit’—What Do These Terms Really Mean?” and “Identifying ‘Babylon the Great.’” Maet iu laek for story tugeta witim student bilong iu abaotem olketa subject hia. From olketa subject wea stap long disfala appendix no garem olketa kwestin, iu bae need for savve gud long datfala information mekem iu savve askem olketa kwestin wea barava fitim.
13. Long wanem wei nao prea savve strongim faith?
13 Psalm 127:1 hem sei: “Sapos Jehovah no buildim haos, then hem iusles nomoa for olketa man waka hard for buildim.” Dastawe, taem iu prepare for conductim Bible study, prea long Jehovah for help. Olketa prea wea iu talem long start and long end bilong each study mas showimaot wei wea iu fren gud witim Jehovah. Encouragem student for prea long Jehovah for wisdom wea bae helpem hem for minim Word bilong God and strong for followim kaonsel wea stap insaed. (James 1:5) Sapos hem duim olsem, datwan bae helpem student for stand strong long olketa test wea hem kasem and faith bilong hem bae kamap moa strong.
Helpem Olketa Bible Student for Kamap Olketa Teacher
14. Long wanem wei nao olketa Bible student need for muv ahed?
14 For olketa Bible student bilong iumi obeyim “evri samting” wea Jesus komandim olketa disaepol bilong hem, olketa need for kamap olketa teacher long Word bilong God, no olketa student nomoa. (Matthew 28:19, 20; Acts 1:6-8) Wanem nao iu savve duim for helpem student for muv ahed long spiritual wei olsem?
15. Why nao iu shud encouragem Bible student bilong iu for kam long olketa Christian meeting?
15 Long barava first study, invaetem student for kam long olketa kongregeson meeting witim iu. Explainim long hem hao iu kasem training for kamap teacher long Word bilong God long olketa meeting hia. For samfala week, iusim tu-thri minute long end bilong each study for storyim olketa program bilong spiritual instruction wea iu kasem long olketa meeting and assembly. Showimaot iu hapi taem iu storyim olketa gud samting wea iu kasem from olketa meeting hia. (Hebrews 10:24, 25) Taem student start for kam olowe long olketa meeting, luk olsem hem bae kamap wanfala teacher long Word bilong God.
16, 17. Wanem nao samfala goal wea Bible student savve markem and kasem?
16 Helpem Bible student for markem olketa goal wea hem savve kasem. Olsem example, encouragem hem for storyim samting wea hem lanem long wanfala fren or relative bilong hem. And tu, encouragem hem for markem goal for readim full Bible. Sapos iu helpem hem for startim and keepim wanfala schedule for readim Bible evriday, datwan bae gohed for helpem hem bihaen hem baptaes. And witim datwan, hem gud for encouragem student for garem goal for rememberim wanfala Bible text wea ansarem wanfala main kwestin long each chapter bilong Bible Teach buk. Taem hem duim olsem, bae hem kamap “wanfala wakman wea no garem eni reason for feel shame, wea iusim word bilong truth long stretfala wei.”—2 Timothy 2:15
17 Winim wei for teachim student for baeheartim or talem nomoa main point bilong olketa scripture, encouragem hem for explainim samfala Bible verse wea savve givim ansa long olketa wea askem hem abaotem faith bilong hem. Maet hem gud samting for practice witim hem, taem iu nao act olsem wanfala relative or wakfren wea askem hem for explainim biliv bilong hem. Taem student duim datwan, showim hem hao for givim ansa witim “kwaet fasin and bigfala respect.”—1 Peter 3:15.
18. Taem Bible student fit for kamap anbaptaes pablisa, wanem moa samfala help wea iu savve givim hem?
18 Gogo, maet datfala student kamap fit for go aot long field ministry. Strongim long hem hao hem wanfala privilege for tekpart long disfala waka. (2 Corinthians 4:1, 7) Taem olketa elder luksavve hao datfala student hem fit for kamap wanfala anbaptaes pablisa, iu savve helpem hem for preparem wanfala simpol story and then waka witim hem long field service. Gohed for waka witim hem long olketa difren part long ministry, and teachim hem hao for prepare and duim olketa gudfala return visit. Gudfala example bilong iu bae barava encouragem hem.—Luke 6:40.
“Sevem Iu and Olketa wea Lisin Long Iu”
19, 20. Wanem waka nao hem important tumas for iumi duim distaem, and why nao olsem?
19 Hem barava hard waka for helpem wanfala man for kasem “stretfala savve abaotem truth.” (1 Timothy 2:4) Nomata olsem, iumi savve kasem bigfala hapi taem iumi helpem samwan for obeyim samting wea Bible teachim. (1 Thessalonians 2:19, 20) Tru nao, hem nambawan privilege wea iumi garem for kamap “pipol wea waka witim God” long disfala teaching waka wea gohed evriwea long world!—1 Corinthians 3:9.
20 Klosap nao Jehovah bae iusim Jesus Christ and olketa strongfala angel for judgem olketa “wea no savve long God and olketa wea no obeyim gud nius abaotem Lord bilong iumi Jesus.” (2 Thessalonians 1:6-8) Laef bilong pipol hem stap long danger. Waswe, iu savve markem goal for conductim nomata wanfala Bible study nomoa? Taem iu duim disfala waka, iu garem chance for “sevem iu and olketa wea lisin long iu.” (1 Timothy 4:16) Distaem, winim enitaem bifor, hem barava important for helpem olketa narawan for obeyim samting wea Bible teachim.
[Footnotes]
a Olketa Jehovah’s Witness pablisim.
Wanem Nao Iu Lanem?
• Wanem nao goal bilong Bible Teach buk?
• Hao nao iu savve iusim Bible Teach buk for startim olketa Bible study?
• Wanem nao olketa best wei for teach?
• Hao nao iu savve helpem student for kamap teacher long Word bilong God?
[Piksa long page 8]
Waswe, iu iusim gud disfala buk?
[Piksa long page 9]
Short story savve mekem man interest for kasem savve long Bible
[Piksa long page 11]
Wanem nao iu savve duim for helpem student for lukluk gud long olketa scripture long Bible?
[Piksa long page 12]
Helpem Bible student for muv ahed