Iumi Praisem Nem Bilong Jehovah Tugeta

“Mekhae long Jehovah witim mi, iufala pipol, and iumi praisem nem bilong hem tugeta.”​—PSALM 34:3.

1. Wanem nambawan example nao Jesus showimaot taem hem duim ministry bilong hem long earth?

LONG datfala naet long Nisan 14, 33 C.E., Jesus and olketa aposol bilong hem hipap insaed wanfala rum long wanfala haos long Jerusalem and singim olketa song for praisem Jehovah. (Matthew 26:30) Datwan hem lastfala taem for Jesus duim olsem witim olketa aposol bilong hem. Hem fitim for Jesus finisim datfala meeting long wei for singim olketa song for praisem Jehovah. Start long taem wea hem startim ministry bilong hem go kasem taem hem dae, Jesus praisem Dadi bilong hem and strong for talemaot nem bilong Hem. (Matthew 4:​10; 6:9; 22:37, 38; John 12:28; 17:6) So really, hem talemaot datfala sem invitation olsem man wea raetem psalm hem talem wea sei olsem: “Mekhae long Jehovah witim mi, iufala pipol, and iumi praisem nem bilong hem tugeta.” (Psalm 34:3) Jesus hem showimaot nambawan example for iumi followim!

2, 3. (a) Hao nao iumi savve Psalm 34 hem storyim samting wea bae happen long future? (b) Wanem nao bae iumi storyim long disfala article and long next wan?

² Tu-thri hour bihaen hem singim olketa song witim Jesus, aposol John hem lukim olketa barava nogud samting. Hem lukim Masta bilong hem and tufala criminal hange long olketa post for dae. Olketa soldia bilong Rome brekem leg bilong tufala criminal hia for mekem olketa dae kwiktaem. Bat John talem hao olketa nating brekem leg bilong Jesus. Taem olketa kam long Jesus, olketa lukim hem dae finis. Dastawe John explainim insaed Gospel bilong hem hao diswan hem fulfillim narafala part bilong Psalm 34 wea sei: “No eni bon bilong hem bae brek.”​—John 19:32-​36; Psalm 34:20, Septuagint.

³ Psalm 34 hem garem plande narafala point wea olketa Christian interest long hem. Dastawe insaed disfala article and long next wan, bae iumi lukluk long wanem nao gohed taem David raetem datfala psalm and olketa samting wea psalm hia hem talem wea savve encouragem iumi.

David Ranawe From Saul

4. (a) Why nao Samuel anointim David for kamap nextfala king long Israel? (b) Hao nao, gogo, Saul “barava lovem” David?

⁴ Taem David hem young man, Saul nao hem king long Israel. Bat Saul hem no obeyim Jehovah and from datwan, Jehovah rejectim hem. Dastawe profet Samuel talem hem olsem: “Jehovah hem aotem iu from wei for rul olsem king long Israel tuday, and hem bae givim diswan long nara man wea gud winim iu.” (1 Samuel 15:28) Bihaen, Jehovah talem Samuel for anointim David, lastborn son bilong Jesse, for kamap nextfala king long Israel. From King Saul hem no garem spirit bilong Jehovah, plande taem hem nating hapi. So Saul markem David wea savve tumas for ringim harp, for kam long Gibeah for servem hem, and music bilong David hem mekem Saul feel hapi and “gogo, hem barava lovem hem.”​—1 Samuel 16:11, 13, 21, 23.

5. Why nao tingting bilong Saul abaotem David hem change, and from datwan, wanem nao David mas duim?

⁵ Hem showaot klia hao Jehovah sapotim David. Jehovah helpem David for win long faet againstim datfala Philistine, Goliath, and hem gohed sapotim hem long olketa nara faet wea gogo mekem olketa pipol honorim hem for savve wea hem garem for win againstim enemy. Bat from Jehovah hem blessim David, Saul hem kamap jealous and barava heitim hem. Tufala taem nao Saul trae for sutim David witim spia bilong hem taem David ringim harp bilong hem. Bat lucky nao tufala taem David hem jamp kwiktaem and spia hem missim hem. Taem Saul trae for killim hem dae mek-thri taem, David luksavve hao hem mas ranawe nao. From Saul trae hard for kasholem hem for killim hem dae, gogo David disaed for faendem eni sef ples for stap wea farawe from Israel.​—1 Samuel 18:11; 19:​9, 10.

6. Why nao Saul givim komand for killim dae evriwan wea stap long Nob?

⁶ Taem hem gogo for border bilong Israel, David hem rest long taon bilong Nob wea tabernacle bilong Jehovah hem stap. Luk olsem olketa young man go witim David for protectim hem, and David lukaotem kaikai and wata for olketa and hemseleva tu. Taem Saul faendemaot hao hae priest hem givim samfala kaikai and sword bilong Goliath long David and olketa man hia, hem barava kros and hem givim komand for killim dae 85 priest and evriwan long datfala taon.​—1 Samuel 21:​1, 2; 22:12, 13, 18, 19; Matthew 12:​3, 4.

David Ranawe Moa

7. Why nao Gath hem no wanfala sef ples for David haed?

⁷ David lusim Nob and ranawe go long ples bilong olketa Philistine, wea datwan hem samting olsem 40 kilometer west from Nob. Hem lukaotem ples for stap sef witim King Achish wea stap long Gath, wea datwan hem homtaon bilong Goliath. Maet long tingting bilong David, Saul bae nating ting for lukaotem hem long Gath. Bat no longtaem bihaen, olketa servant bilong king bilong Gath luksavve long hu nao David. Taem David herem hao olketa luksavve long hem, “hem barava fraetem nao Achish, datfala king bilong Gath.”​—1 Samuel 21:10-​12.

8. (a) Wanem samting wea kasem David long Gath nao Psalm 56 hem storyim? (b) Wanem nao mekem David fit for ranawe from Gath?

⁸ Olketa Philistine kasholem David. Maet long datfala taem nao David raetem disfala psalm wea hem barava askem Jehovah olsem: “Putim wata from krae bilong mi insaed long skin botol bilong iu.” (Psalm 56:8 and short toktok wea stap bifor verse 1) Toktok hia showimaot hem trustim wei wea Jehovah bae no forgetim krae bilong hem and hao hem bae lukaftarem and protectim hem. David tingim tu wanfala plan for giamanim datfala king. Hem act olsem hem mentol. Taem King Achish lukim diswan, hem waelem nao olketa servant bilong hem bikos olketa tekem kam long hem wanfala man wea “mentol.” Diswan showimaot klia hao Jehovah sapotim plan bilong David. Klosap olketa killim hem dae, bat king ronem David from datfala taon and hem ranawe from olketa.​—1 Samuel 21:13-​15.

9, 10. Why nao David raetem Psalm 34, and maet David hem tingim hu nao taem hem raetem datfala psalm?

⁹ Bible no talem sapos olketa wea sapotim David go witim hem long Gath or stap long olketa vilij long Israel wea klosap long there, mekem olketa savve warnim David sapos olketa lukim Saul hem kam. Nomata wanem, masbi olketa hapi tumas taem David storyim wei wea Jehovah sevem hem moa. Datwan nao reason why David raetem Psalm 34, olsem short toktok wea stap bifor verse 1 talem. Long verse 1 go kasem verse 7 bilong datfala psalm, David hem praisem God for sevem hem and hem invaetem olketa wea sapotim hem for praisem Jehovah olsem Nambawan man wea sevem pipol bilong Hem.​—Psalm 34:​3, 4, 7.

¹⁰ David and olketa wea go witim hem haed long wanfala cave long Adullam wea stap long olketa maunten bilong Israel, samting olsem fiftin kilometer east from Gath. Olketa Israelite wea no satisfae witim rul bilong King Saul kam long there and joinim olketa. (1 Samuel 22:​1, 2) Maet David tingim olketa hia taem hem raetem toktok wea stap long Psalm 34:​8-​22. Olketa reminder long olketa verse hia hem important for iumi distaem tu, and iumi bae barava kasem gud samting from wei for storyim disfala barava naesfala psalm.

Waswe, Iu Laek Duim Sem Samting wea David Laek Duim?

11, 12. Wanem nao olketa reason wea iumi garem for praisem Jehovah evritaem?

¹¹ “Mi bae blessim Jehovah evritaem; evritaem mouth bilong mi bae praisem hem.” (Psalm 34:1) From David mas ranawe go haed, masbi hem wari abaotem hao hem bae kasem olketa material need bilong hem. Bat olsem olketa toktok hia hem showimaot, hem no letem wari bilong hem abaotem olketa samting olsem stopem hem for praisem Jehovah. Datwan hem nambawan example for iumi followim taem iumi feisim olketa hard taem! Nomata sapos iumi long skul, waka, kaban witim olketa Christian brata or sista, or long ministry, samting wea iumi shud barava laek for duim hem for praisem Jehovah. Tingim staka reason wea iumi garem for duim datwan! Olsem example, iumi savve enjoyim and lanem plande samting abaotem nambawan creation bilong Jehovah. And tingim olketa samting Jehovah duim finis thru long organization bilong hem long earth! Jehovah iusim olketa man wea faithful long bigfala wei distaem, nomata olketa no perfect. Distaem pipol barava mekhae long olketa man wea duim olketa big samting long world. Bat wanem nao iumi savve lukim taem iumi markem olketa samting God duim witim samting wea olketa man hia duim? For sure iu bae agree witim David wea hem raetem tu disfala toktok: “No eniwan long olketa god hem olsem iu Jehovah, and no eni waka hem olsem waka bilong iu”?​—Psalm 86:8.

¹² Olsem David, iumi barava laek for praisem Jehovah evritaem bikos no eni waka bilong man hem olsem waka bilong hem. And tu, iumi barava hapi for savve datfala Laen Pikinini bilong David, Jesus Christ, hem rul long Kingdom bilong God distaem. (Revelation 11:15) Diswan minim end bilong disfala world hem klosap nao. Laef bilong winim six billion pipol hem stap long danger. Winim enitaem bifor, hem barava important for talem long olketa narawan abaotem Kingdom bilong God and wanem hem klosap for duim for olketa man and for helpem olketa for praisem Jehovah witim iumi. So iumi barava luksavve hao main samting long laef bilong iumi hem mas for iusim evri chance for encouragem olketa narawan for acceptim disfala “gud nius” taem chance hem stap yet.​—Matthew 24:14.

13. (a) David hem tok praod abaotem hu, and wanem kaen pipol nao tinghae long datwan? (b) Wanem nao muvim olketa wea hambol for kam long Christian kongregeson distaem?

¹³ “Soul bilong mi bae tok praod abaotem Jehovah; olketa wea hambol bae herem and hapi.” (Psalm 34:2) David no tok praod abaotem eni samting wea hemseleva duim. Olsem example, hem no tok praod abaotem wei wea hem giamanim king bilong Gath. Hem luksavve hao Jehovah nao protectim hem taem hem stap long Gath and hem fit for ranawe bikos long help wea hem kasem from Jehovah. (Proverbs 21:1) So David hem tok praod abaotem Jehovah, no hemseleva. From David mekhae long Jehovah, olketa wea hambol tinghae long Jehovah and kam long hem. Jesus mekhae long nem bilong Jehovah tu, and diswan muvim pipol wea hambol and willing for lane for kam long Jehovah. Distaem, pipol from evri nation wea hambol kam long kongregeson bilong olketa anointed Christian wea stap evriwea long world, wea Jesus nao hem Hed bilong datwan. (Colossians 1:​18) Taem olketa hia herem olketa hambol servant bilong God praisem nem bilong God and herem message from Bible, wea holy spirit bilong God helpem olketa for minim, datwan muvim heart bilong olketa.​—John 6:​44; Acts 16:14.

Olketa Meeting Strongim Faith Bilong Iumi

14. (a) Waswe, David hem satisfae for praisem Jehovah taem hem stap seleva? (b) Jesus showimaot wanem example for iumi followim saed long olketa meeting for worship?

¹⁴ “O mekhae long Jehovah witim mi, iufala pipol, and iumi praisem nem bilong hem tugeta.” (Psalm 34:3) David no satisfae for praisem Jehovah taem hem stap seleva. Long naesfala wei, hem invaetem olketa fren bilong hem for praisem nem bilong God tugeta witim hem. Jesus Christ tu, wea hem nao Bigfala David, hapi tumas for praisem Jehovah long pablik ples, olsem long synagogue, long olketa festival long temple bilong God long Jerusalem, and taem hem kaban witim olketa follower bilong hem. (Luke 2:​49; 4:​16-​19; 10:21; John 18:20) Hem nambawan privilege for followim example bilong Jesus long wei for praisem Jehovah long evri chance wea iumi garem witim olketa spiritual brata, especially taem iumi “lukim hao datfala day hem kakam moa klos”!​—Hebrews 10:24, 25.

15. (a) Hao nao samting wea kasem David affectim olketa wea sapotim hem? (b) Wanem gud samting nao iumi kasem taem iumi attendim olketa meeting bilong iumi?

¹⁵ “Mi askem Jehovah, and hem ansarem mi, and hem sevem mi from evri samting wea mi fraetem.” (Psalm 34:4) Disfala samting wea kasem David hem important long hem. Dastawe hem gohed for sei olsem: “Diswan wea safa tumas hem singaot, and Jehovah herem datwan. And Hem sevem hem from evri hevi bilong hem.” (Psalm 34:6) Taem iumi kaban witim olketa brata, iumi garem plande chance for storyim olketa naesfala experience hao Jehovah helpem iumi for no givap taem iumi kasem olketa hard taem. Diswan hem strongim faith bilong olketa narawan wea worshipim God, olsem olketa toktok bilong David strongim faith bilong olketa wea sapotim hem. Saed long David, olketa fren bilong hem “depend long [Jehovah] and olketa shaen witim hapi, and feis bilong olketa no savve shame.” (Psalm 34:5) Nomata olketa mas ranawe from King Saul, olketa no feel shame. Olketa trustim hao God sapotim David, and feis bilong olketa shaen witim hapi. Long sem wei, olketa wea interest, and tu, olketa wea tru Christian for longfala taem finis, depend long Jehovah for sapotim olketa. From olketa kasem help from hem, feis bilong olketa shaen and showimaot hao olketa disaed strong for stap faithful.

Tinghae Long Help From Olketa Angel

16. Hao nao Jehovah iusim olketa angel bilong hem for sevem iumi?

¹⁶ “Angel bilong Jehovah stap raonem olketa wea fraet long hem, and hem sevem olketa.” (Psalm 34:7) David no ting long wei wea Jehovah sevem hem olsem samting wea savve happen long hem nomoa. Hem tru, David hem man Jehovah anointim wea bae kamap king long Israel; bat hem savve Jehovah iusim olketa angel bilong hem for protectim evri worshiper bilong hem wea faithful, nomata olketa garem bigfala responsibility or nomoa. Long distaem, olketa tru worshiper tu kasem protection wea Jehovah provaedem. Long Nazi Germany, and tu, long Angola, Malawi, Mozambique, and plande nara kantri, olketa gavman trae hard for finisim Olketa Jehovah’s Witness. Bat olketa no win for duim datwan. Pipol bilong Jehovah long olketa kantri hia gohed strong taem olketa praisem nem bilong God tugeta. Why nao olsem? Hem from Jehovah iusim olketa holy angel bilong hem for protectim and leadim pipol bilong hem.​—Hebrews 1:​14.

17. Olketa angel bilong God helpem iumi long olketa wanem wei?

¹⁷ Witim datwan, olketa angel bilong Jehovah savve mek sure eniwan wea mekem olketa narawan stambol bae no gohed for stap witim pipol bilong Jehovah. (Matthew 13:41; 18:​6, 10) And staka taem olketa angel aotem olketa samting wea savve mekem hem moa hard for servem God, and olketa protectim iumi from olketa samting wea savve spoelem wei wea iumi fren witim Jehovah, nomata iumi no luksavve hao hem olketa angel nao wea duim datwan. Barava important samting nao, olketa leadim iumi long waka for talemaot “gud nius for olowe” long evri man, and for duim diswan tu long olketa ples wea danger tumas for duim preaching waka. (Revelation 14:6) Plande taem olketa experience insaed Bible literature wea Olketa Jehovah’s Witness pablisim showimaot klia hao olketa angel helpem iumi.a From olketa experience hia hem staka, iumi no daotem hao olketa angel nao helpem iumi.

18. (a) Wanem nao iumi mas duim for kasem help from olketa angel? (b) Wanem nao bae iumi storyim long next article?

¹⁸ For mekem iumi gohed kasem help and protection from olketa angel, iumi mas gohed for praisem nem bilong Jehovah nomata pipol againstim iumi. No forgetim hao angel bilong God hem stap “raonem olketa wea fraet long [Jehovah]” nomoa. So wanem nao datwan hem minim? Wanem nao hem minim for fraet long God, and wanem nao iumi mas duim for garem datwan? Why nao God wea showimaot love laekem iumi for fraet long hem? Bae iumi storyim olketa kwestin hia long next article.

[Footnotes]

Hao Nao Bae Iu Ansa?

• Wanem nao olketa hard samting wea David mas deal witim taem hem wanfala young man?

• Olsem David, wanem samting nao iumi barava laek for duim?

• Hao nao iumi ting long olketa Christian meeting?

• Long wanem wei nao Jehovah iusim olketa angel bilong hem for helpem iumi?

[Map long page 21]

(For fully formatted text, see publication)

Ramah

Gath

Ziklag

Gibeah

Nob

Jerusalem

Bethlehem

Adullam

Keilah

Hebron

Ziph

Horesh

Carmel

Maon

En-gedi

Salt Sea

[Credit Line]

Map: Based on maps copyrighted by Pictorial Archive (Near Eastern History) Est. and Survey of Israel

[Piksa long page 23]

Nomata David mas ranawe and haed, hem praisem nem bilong Jehovah

[Piksa long page 24]

Olketa naesfala experience wea iumi herem long olketa Christian hipap strongim faith bilong iumi