Gohed for Wekap Olsem Jeremiah Duim
“Mi [Jehovah] gohed for wekap mekem olketa toktok bilong mi kamap tru.”—JER. 1:12.
1, 2. Why nao wei wea Jehovah “gohed for wekap” hem olsem almond tree?
LONG olketa hill long Lebanon and Israel, firstfala tree wea garem flaoa nao hem almond tree. Hem garem olketa pink or white flaoa wea barava luk naes, and hem savve flaoa long end bilong January or start bilong February. Hebrew nem for disfala tree minim “datwan wea wekap firstaem.”
2 Taem Jehovah chusim Jeremiah for kamap profet, hem storyim almond tree for piksarem wanfala important samting. Taem Jeremiah startim waka bilong hem, hem lukim long vision wanfala branch bilong datfala tree. Wanem nao datwan minim? Jehovah explainim olsem: “Mi gohed for wekap mekem olketa toktok bilong mi kamap tru.” (Jer. 1:11, 12) Olsem almond tree savve flaoa firstaem, Jehovah tu talem firstaem wanem hem bae duim. Hem sendem olketa profet for warnim pipol bifor abaotem nogud samting wea olketa bae kasem sapos olketa no obey. (Jer. 7:25) Jehovah bae no rest bat hem bae “gohed for wekap” go kasem taem evri profesi wea hem talem kamap tru. Long 607 B.C.E., Jehovah finisim nation bilong Judah wea apostate long barava taem wea hem markem.
3. Iumi savve Jehovah bae duim wanem?
3 Distaem tu Jehovah gohed for wekap, wea minim hem gohed for duim wanem hem planim. Hard tumas for hem no duim wanem hem promisim. Wei wea Jehovah gohed for wekap mekem iu for duim wanem? Waswe, iu barava bilivim Jehovah hem “wekap” distaem and bae duim wanem hem promisim? Sapos iu daotem datwan, distaem nao hem taem for wekap long spiritual wei. (Rom. 13:11) Profet Jeremiah gohed for wekap long spiritual wei. Taem iumi tingim samting wea helpem Jeremiah for duim assignment bilong hem and why hem duim datwan, bae hem helpem iumi tu for gohed duim waka wea Jehovah givim long iumi.
Barava Important Message
4. Why nao hem no isi for Jeremiah talemaot message bilong God, and why nao datfala message barava important?
4 Taem Jeremiah kasem assignment from Jehovah for duim waka olsem man for lukaot, hem samting olsem 25 year. (Jer. 1:1, 2) Nomata olsem, hem tingse hem young tumas and no fit for story long olketa man wea olo winim hem and wea garem hae position. (Jer. 1:6) Jeremiah mas talem strongfala toktok and judgment long olketa priest, false profet, and olketa wea rul. Hem mas talem datwan tu long “olketa wea followim samting wea narawan duim” and wea “no faithful.” (Jer. 6:13; 8:5, 6) Jeremiah mas talem hao temple wea King Solomon wakem wea stap for klosap 400 year and wea hem main ples bilong tru worship, bae finis. Pipol long Jerusalem and Judah bae kamap prisoner and no eniwan bae stap long there. Tru tumas, message wea Jeremiah mas talemaot hem barava important!
5, 6. (a) Jehovah iusim olketa anointed Christian for duim wanem samting distaem? (b) Wanem nao bae iumi storyim long disfala study?
5 Long distaem tu, Jehovah iusim olketa anointed Christian for duim waka olsem man for lukaot and warnim pipol abaotem judgment bilong God. For staka year finis, olketa anointed Christian talem pipol for lukluk gud long taem wea iumi stap long hem. (Jer. 6:17) Bible sei Jehovah bae no delay. Day bilong hem bae kam long barava taem wea hem markem and long taem wea pipol no tingim.—Zeph. 3:8; Mark 13:33; 2 Pet. 3:9, 10.
6 Evriwan wea worshipim Jehovah luksavve niu world hem klosap. Olketa savve lelebet taem nomoa stap for olketa preach. Hem barava important distaem for talemaot datfala message long pipol. Datwan shud mekem iu for duim wanem? Hem shud mekem iu gohed strong for duim preaching waka. Olsem Jesus showimaot, diswan bae givim chance long olketa narawan for disaed sapos olketa bae worshipim Jehovah or nomoa. Bae iumi storyim thrifala samting wea helpem Jeremiah gohed wekap for duim assignment bilong hem, and wea bae helpem iumi tu for duim sem samting.
Lovem Pipol
7. Storyim hao love wea Jeremiah garem for pipol mekem hem for preach nomata hem no isi.
7 Wanem nao mekem Jeremiah for preach nomata hem no isi? Hem lovem pipol. Jeremiah savve olketa bigman wea leadim olketa Israelite nao kosim staka problem. (Jer. 23:1, 2) Dastawe hem showimaot love and feel sorre long pipol taem hem duim assignment bilong hem. Hem laekem olketa Israelite for herem toktok bilong God and stap laef. Hem krae taem hem tingim trabol wea bae kasem olketa. (Readim Jeremiah 8:21; 9:1.) Buk bilong Lamentations showimaot bigfala love wea Jeremiah garem for Jehovah and pipol bilong Hem. (Lam. 4:6, 9) Taem iu lukim pipol distaem “garekil and stap olobaot olsem olketa sheepsheep wea no garem eni man for lukaftarem olketa,” waswe, datwan mekem iu laek for storyim gud nius abaotem Kingdom long olketa?—Matt. 9:36.
8. Wanem nao showimaot Jeremiah no kros long pipol nomata olketa spoelem hem?
8 Nomata pipol wea Jeremiah preach long olketa spoelem hem, hem no pei bak or kros long olketa. Hem patient and kaen, nomata long datfala rabis king, Zedekiah! Nomata Zedekiah talem olketa bigman for killim dae Jeremiah, hem talem king for mas obeyim toktok bilong Jehovah. (Jer. 38:4, 5, 19, 20) Waswe, iumi barava lovem pipol olsem Jeremiah duim?
God Helpem Hem for No Fraet
9. Hao nao iumi savve God strongim Jeremiah for no fraet?
9 Long firstaem wea Jehovah story long Jeremiah, Jeremiah talem enikaen excuse long hem. Bat bihaen Jeremiah no fraet bikos Jehovah nao strongim hem. Jeremiah barava trustim God and datwan nao mekem hem strong for duim waka olsem profet. From Jehovah hem olsem “strongfala man for faet,” hem sapotim Jeremiah and strongim hem for duim assignment bilong hem. (Jer. 20:11) From staka pipol savve abaotem wei wea Jeremiah gohed strong and no fraet, taem Jesus duim ministry long earth, samfala sei Jesus nao Jeremiah wea laef bak!—Matt. 16:13, 14.
10. Why nao iumi fit for sei olketa anointed Christian “garem paoa ovarem olketa nation and king”?
10 From Jehovah hem “King bilong olketa nation,” hem givim assignment long Jeremiah for talemaot judgment message long olketa nation and king. (Jer. 10:6, 7) Bat long wanem wei nao olketa anointed Christian “garem paoa ovarem olketa nation and king”? (Jer. 1:10) Olsem profet Jeremiah bifor, olketa anointed Christian kasem assignment from Barava Haefala God for talemaot olketa judgment message. Olketa iusim Bible for talemaot God bae finisim olketa nation and king wea rul distaem, long taem wea hem markem and long wei wea hem laekem. (Jer. 18:7-10; Rev. 11:18) Olketa anointed Christian nating givap for duim assignment wea God givim for talemaot olketa judgment message evriwea long world.
11. Wanem nao bae helpem iumi for gohed preach nomata iumi kasem hard taem?
11 Hem normal samting for feel wikdaon taem pipol againstim iumi, no interest long gud nius, or taem iumi kasem hard taem. (2 Cor. 1:8) Bat iumi mas olsem Jeremiah and no givap. No feel wikdaon. Iumi evriwan mas gohed for prea long God, trustim hem, and askem hem for ‘strongim iumi.’ (1 Thess. 2:2) From iumi worshipim God long stretfala wei, iumi mas gohed for wekap for duim waka wea God givim long iumi. Iumi mas gohed for preach abaotem hao God bae finisim olketa religion wea sei olketa Christian, wea Jerusalem bifor wea no faithful hem piksarem. Olketa anointed Christian preach abaotem “taem for Jehovah blessim iumi” and abaotem “day bilong God for panisim pipol.”—Isa. 61:1, 2; 2 Cor. 6:2.
Barava Hapi
12. Why nao iumi savve sei Jeremiah gohed for hapi?
12 Waka wea Jeremiah duim mekem hem hapi. Hem sei long Jehovah: “Taem mi herem toktok bilong iu, mi barava ting strong long hem. Toktok bilong iu hem mekem mi barava hapi bikos pipol kolem mi long nem bilong iu, Jehovah.” (Jer. 15:16) Long tingting bilong Jeremiah, hem privilege for hem stand for tru God and for talemaot message bilong hem. Taem Jeremiah tingim wei wea pipol tok spoelem hem, datwan mekem hem no hapi. Bat taem hem ting abaotem important message wea hem talemaot, hem hapi moa.—Jer. 20:8, 9.
13. Why nao hem important for kaikaim strongfala spiritual kaikai?
13 For gohed hapi long preaching waka, iumi mas kaikaim “strongfala kaikai,” wea minim olketa deep samting long Bible. (Heb. 5:14) Wei for studyim olketa deep samting bae strongim faith bilong iumi. (Col. 2:6, 7) Datwan savve mekem iumi luksavve wanem iumi duim hem affectim Jehovah. Sapos iumi no savve garem taem for readim and studyim Bible, iumi shud lukluk gud long schedule bilong iumi. Nomata sapos iumi study and ting raonem Bible for tu-thri minute evriday, bae iumi fren gud witim Jehovah and “barava hapi” olsem Jeremiah.
14, 15. (a) Wanem gud samting nao kamaot from wei wea Jeremiah faithful for duim assignment bilong hem? (b) Pipol bilong God distaem luksavve long wanem samting abaotem preaching waka?
14 Jeremiah gohed for talem olketa warning and judgment message bilong Jehovah, bat hem tingim tu assignment bilong hem “for build and for plant.” (Jer. 1:10) Gud samting kamaot from waka wea hem duim. Samfala Jew and olketa wea no Jew stap laef taem Jerusalem finis long 607 B.C.E. Samfala hem olketa Rechabite, Ebed-melech, and Baruch. (Jer. 35:19; 39:15-18; 43:5-7) Olketa hia wea fren witim Jeremiah olketa faithful and fraet long God. Olketa piksarem sekson wea garem hope for stap long earth wea fren witim olketa anointed Christian. Olketa anointed Christian barava hapi for strongim faith bilong “big crowd” hia. (Rev. 7:9) Big crowd wea fren witim olketa anointed Christian barava hapi tu for helpem pipol wea garem gudfala heart for savve long truth.
15 Pipol bilong God luksavve waka for preachim gud nius hem no for helpem pipol nomoa bat hem part long worship bilong olketa for God. Nomata sapos pipol lisin or nomoa, waka wea iumi duim for Jehovah hem mekem iumi barava hapi.—Ps. 71:23; readim Romans 1:9.
‘Gohed Wekap’ Mekem Iu Duim Assignment Bilong Iu!
16, 17. Revelation 17:10 and Habakkuk 2:3 showimaot wanem samting abaotem taem bilong iumi?
16 Taem iumi lukluk long profesi long Revelation 17:10, iumi luksavve world distaem hem barava klosap for finis. Mek-seven king, wea hem nao England and America World Paoa, hem rul distaem. Bible sei: “Taem [mek-seven world paoa] kam hem bae stap for lelebet taem nomoa.” Bat “lelebet taem” hia hem klosap finis nao. Profet Habakkuk talem disfala promis abaotem end bilong disfala world: “Datfala vision wea iu lukim hem garem taem wea set finis for olketa samting hia happen . . . Gohed for weitim bikos hem bae kamap tru. Hem bae no leit.”—Hab. 2:3.
17 Tingim diswan: ‘Waswe, samting wea mi duim long laef showimaot mi luksavve lelebet taem nomoa stap and world klosap for finis? Or waswe, samting wea mi disaedem and tinghae long hem showimaot mi tingse end hem no klosap or mi no sure sapos end bae kam?’
18, 19. Why nao distaem hem no taem for isisi long Kingdom waka?
18 Waka bilong olketa anointed Christian for gohed lukaot no finis yet. (Readim Jeremiah 1:17-19.) Iumi hapi tumas bikos olketa anointed Christian olsem “wanfala iron post” and “strongfala taon” wea no savve seksek! Olketa “werem truth olsem wanfala belt raonem bele” bilong olketa bikos olketa letem Bible strongim olketa go kasem taem waka bilong olketa bae finis. (Eph. 6:14) Big crowd tu strong for sapotim olketa anointed Christian for duim assignment wea God givim long olketa.
19 Distaem hem no taem for isisi long Kingdom waka bat hem gud for minim wanem Jeremiah 12:5 talem. (Readim.) Iumi evriwan kasem olketa hard taem bat iumi mas no givap. Olketa hard taem wea iumi kasem hem olsem iumi insaed wanfala resis wea iumi ‘ranran witim olketa narawan.’ Iumi savve iumi bae kasem staka test moa taem “bigfala trabol” kam klosap. (Matt. 24:21) Olketa bigfala test wea iumi bae kasem hem olsem iumi insaed wanfala resis wea iumi “ranran witim olketa horse.” Man wea ranran witim olketa horse hem needim moa strong mekem hem no givap. So hem gud for iumi no givap long olketa hard taem wea iumi kasem distaem, from datwan bae redyim iumi for olketa hard taem wea bae kamap long future.
20. Wanem nao iu disaed strong for duim?
20 Iumi evriwan savve followim example bilong Jeremiah and duim assignment bilong iumi for preach! From Jeremiah lovem pipol, no fraet, and hapi, datwan mekem hem for faithful for duim ministry bilong hem for 67 year. Naesfala flaoa bilong almond tree mekem iumi tingim hao Jehovah bae “gohed for wekap” mekem olketa toktok bilong hem kamap tru. Dastawe iumi tu mas gohed for wekap. Jeremiah ‘gohed wekap’ for duim assignment bilong hem and iumi tu savve duim sem samting.
Waswe, Iu Tingim Yet?
• Hao nao love wea Jeremiah garem for pipol mekem hem ‘gohed wekap’ for duim assignment bilong hem?
• Why nao iumi needim God for helpem iumi no fraet?
• Wanem nao helpem Jeremiah for gohed hapi?
• Why nao iu laek for ‘gohed wekap’?
[Piksa long page 31]
Waswe, bae iu gohed for preach nomata pipol againstim iu?