Hao Nao Mi Savve Teachim Pikinini Bilong Mi Long BEST WEI?
WEI for teachim pikinini hem olsem wanfala gogo wea interesting bat long semtaem hem garem olketa challenge tu. Hem wanfala gogo wea iu and olketa pikinini bilong iu mas wakabaot followim tugeta. Iu encouragem olketa and leadim olketa long kaenfala wei, wea helpem olketa for gohed wakabaot followim datfala road bilong laef. Staka samting nao stap for olketa mas lanem!
For olketa pikinini kasem gud samting and hapi long laef, olketa mas lane for garem olketa standard saed long worship and saed long fasin, and for luksavve long samting wea stret and samting wea no stret. Sapos iu teachim olketa for savve long Jehovah and lovem hem, datwan hem best teaching wea bae helpem olketa for olowe. Sapos iu wanfala dadi or mami, iu garem barava important waka for duim saed long wanem nao olketa pikinini bilong iu lanem, and wei wea olketa tinghae and minim samting wea olketa lanem.
Parents mas feisim olketa challenge long disfala gogo wea olketa followim. Hem wei bilong pikinini for kwiktaem bilivim and followim nara pipol, and olketa savve lanem staka nogud samting from disfala world. Satan nao rulim world wea iumi stap insaed. (1 John 5:19) Hem interest long teaching wea olketa pikinini bilong iu kasem, bat olketa goal bilong hem barava difren. Satan hem savve tumas for teach, bat hem wanfala teacher wea barava wicked. Nomata hem mekem hemseleva olsem “wanfala angel bilong laet,” samting wea hem teachim hem laea samting and hem againstim Bible and will bilong Jehovah. (2 Corinthians 4:4; 11:14; Jeremiah 8:9) Devil and olketa demon bilong hem barava savve tumas hao for trikim man, mekhae long wei for no honest, selfish fasin, and dirty fasin.—1 Timothy 4:1.
Wanem nao iu savve duim for protectim olketa pikinini bilong iu for no bilivim olketa laea samting? Hao nao iu savve teachim olketa for acceptim samting wea tru and gudfala? Wanfala important samting hem for lukluk gud long iuseleva. Iu need for showimaot gudfala example. Hem barava important tu for iu acceptim hao hem responsibility bilong iu nao for teachim olketa pikinini bilong iu and spendem taem for duim datwan. Bat bifor iumi storyim olketa point hia, iumi laek for savve wanem nao faondeson bilong best teaching.
Faondeson Bilong Best Teaching
Iumi savve lane from King bilong Israel, Solomon, wanfala man wea wise winim eni nara man long earth. Bible hem sei: “God hem gohed for givim Solomon wisdom and wei for minim samting long barava bigfala wei and fasin for no fraet, olsem sandbis long saed sea. And Solomon hem wise winim evriwan long East and evriwan long Egypt.” Solomon “savve talem thri thousand wisefala toktok, and hem raetem wan thousand and faev song.” Hem garem bigfala savve saed long olketa plant and olketa animal. (1 Kings 4:29-34) King Solomon hem lukaftarem tu olketa building waka long Israel, wea wanfala nao hem datfala nambawan temple bilong Jehovah wea olketa buildim long Jerusalem.
Olketa buk wea Solomon raetem, olsem buk bilong Ecclesiastes, showimaot hem savve tumas long wei bilong olketa man. God muvim hem for talemaot wanem nao faondeson bilong best teaching. Solomon hem sei: “Wei for fraet long Jehovah hem start bilong savve.” Wise king hia hem sei tu: “Wei for fraet long Jehovah hem start bilong wisdom, and savve abaotem Most Holy nao hem wei for minim samting.”—Proverbs 1:7; 9:10.
Sapos iumi fraet long God, iumi barava respectim hem and traem best for mekem hem hapi long iumi. Iumi luksavve hem nao Most Hae and iumi mas givim ansa long hem. Maet samfala pipol tingse olketa man wea wise nao hem olketa wea ting nating long God wea givim iumi laef, bat kaen wisdom olsem hem “krangge samting long God.” (1 Corinthians 3:19) “Wisdom from antap” nao hem faondeson bilong teaching wea olketa pikinini bilong iu needim.—James 3:15, 17.
Wei for fraet for mekem Jehovah no hapi hem barava join witim wei for lovem hem. Jehovah laekem olketa servant bilong hem for fraet long hem and lovem hem tu. Moses hem sei: “Iufala bilong Israel, God bilong iufala Jehovah hem askem iufala for fraet long Hem, mekem iufala followim evri wei bilong hem and lovem hem and servem God bilong iufala Jehovah witim full heart and full soul bilong iufala; for obeyim olketa komandment bilong Jehovah and olketa law bilong hem wea mi talem long iufala tuday, mekem iufala kasem gudfala samting.”—Deuteronomy 10:12, 13.
Sapos iumi teachim olketa pikinini bilong iumi for fraet long Jehovah, iumi bae buildim faondeson bilong teaching wea bae helpem olketa for kamap barava wise. Taem olketa gohed for fraet long God, feeling for tinghae long Creator bilong olketa bae kamap moa big, wea Hem nao start bilong evri trufala savve. Diswan bae helpem olketa pikinini bilong iumi for garem balance tingting long samting wea olketa lanem and no for garem rong tingting. Olketa bae fit for “luksavve long samting wea stret and samting wea no stret.” (Hebrews 5:14) Faondeson olsem bae helpem olketa tu for gohed stap hambol and stap klia long wei for duim nogud samting.—Proverbs 8:13; 16:6.
Pikinini Bilong Iu Luk Followim Iu!
Bat hao nao iumi savve helpem olketa pikinini bilong iumi for lovem Jehovah and fraet long hem? Ansa bilong datfala kwestin hem stap long Law wea Jehovah givim olketa Israelite thru long profet Moses. Olketa Israelite dadi and mami kasem disfala instruction: “Iufala mas lovem God bilong iufala Jehovah witim full heart bilong iufala and full soul bilong iufala and full strong bilong iufala. And olketa toktok hia wea mi talem iufala tuday mas stap long heart bilong iufala; and iufala mas evritaem strongim toktok hia long son bilong iufala and storyim olketa taem iufala sidaon long haos bilong iufala and taem iufala wakabaot long road and taem iufala leidaon and taem iufala getap.”—Deuteronomy 6:5-7.
Disfala scripture hem teachim olketa important samting long parents. Wanfala nao hem diswan: Dadi and mami nao mas showimaot gudfala example. For teachim olketa pikinini bilong iu for lovem Jehovah, iu nao mas lovem God, and olketa toktok bilong hem mas stap long heart bilong iu. Why nao diswan hem important tumas? Hem bikos iu nao main teacher bilong olketa pikinini bilong iu. Samting wea olketa lanem from example bilong iu bae barava affectim olketa. And no eni nara samting savve affectim pikinini bilong iu long bigfala wei olsem example wea iu showimaot.
Olketa samting wea iu barava laek for kasem, olketa standard, goal, and samting wea iu interest long hem, no showaot long wanem iu talem nomoa bat long wanem iu duim tu. (Romans 2:21, 22) Start from taem wea hem baby, pikinini lanem samting from wei for luk followim parents bilong hem. Olketa pikinini luksavve long samting wea important long parents, and plande taem olketa samting hia kamap important samting long olketa young wan tu. Sapos iu really lovem Jehovah, olketa pikinini bilong iu bae luksavve long datwan. Olsem example, bae olketa lukim hao wei for duim Bible reading and study seleva hem important long iu. Bae olketa luksavve hao olketa samting saed long Kingdom hem main samting long laef bilong iu. (Matthew 6:33) Wei wea iu attendim olketa Christian meeting evritaem and share long waka for preach abaotem Kingdom bae mekem olketa luksavve hao wei for worshipim Jehovah nao barava important samting long iu.—Matthew 28:19, 20; Hebrews 10:24, 25.
Acceptim Responsibility Bilong Iu
Narafala samting wea parents savve lanem from Deuteronomy 6:5-7 hem diswan: Iu nao garem responsibility for trainim olketa pikinini bilong iu. Long taem bifor, parents wea worshipim Jehovah nao teachim olketa pikinini bilong olketa. Long first century, Christian parents gohed for duim barava important waka for teachim olketa pikinini bilong olketa. (2 Timothy 1:5; 3:14, 15) Taem aposol Paul raet go long olketa nara Christian, hem talemaot hao olketa dadi nao mas “gohed for trainim [olketa pikinini bilong olketa] long discipline and wei for stretem tingting wea kam from Jehovah.”—Ephesians 6:4.
From parents kasem hevi distaem saed long living, waka, and olketa nara samting wea mekem olketa iusim staka taem and strong bilong olketa, maet olketa letem nomoa for nara pipol, olsem olketa skul teacher, for teachim olketa pikinini bilong olketa. Bat from dadi and mami lovem olketa pikinini, tufala nao barava fit for lukaftarem olketa. No tingse responsibility bilong iu hem no important and samting wea iu duim hem no savve affectim pikinini bilong iu. Sapos iu needim help, chusim datwan long wisefala wei bat no givim long eniwan disfala responsibility wea God givim long iu.
Spendem Taem for Trainim Pikinini Bilong Iu
Bat narafala samting wea parents lanem from Deuteronomy 6:5-7 hem diswan: Iu need for spendem taem and waka hard for trainim olketa pikinini bilong iu. Israelite parents mas “evritaem strongim” truth bilong God insaed long heart bilong olketa pikinini bilong olketa. Hebrew word wea olketa transleitim “evritaem strongim” hem minim “for talem olowe.” Parents duim diswan long full day, from morning go kasem evening, taem olketa insaed ‘long haos bilong olketa’ and ‘taem olketa wakabaot long road.’ Iu mas spendem taem and waka hard for teachim olketa pikinini and for stretem tingting and fasin bilong olketa, mekem olketa duim samting wea bae mekem God hapi.
So wanem nao iu savve duim for teachim olketa pikinini bilong iu long best wei? Staka samting nao iu savve duim. Teachim olketa for lovem Jehovah and for fraet long hem. Showimaot gudfala example. Acceptim responsibility for teachim pikinini bilong iu, and spendem taem for trainim olketa. Iu no perfect, and iu bae duim samfala mistek. Bat sapos iu traem best for duim will bilong God, olketa pikinini bilong iu bae barava tinghae long hard waka bilong iu and kasem gud samting from datwan. Proverbs 22:6 hem sei: “Trainim wanfala boy fitim wei for hem followim; nomata taem hem kamap olo, hem bae no lusim datwan.” Sem principle hem fitim olketa gele tu.
Wei for teachim olketa pikinini hem wanfala gogo wea gohed for full laef. Sapos iu and olketa pikinini bilong iu lovem God, hem wanfala gogo wea iu bae enjoyim for olowe. Diswan hem bikos iumi bae evritaem garem plande samting for lanem abaotem Jehovah and for duim will bilong hem.—Ecclesiastes 3:10, 11.
[Piksa long page 11]
Waswe, iu readim Bible long pikinini bilong iu?
[Piksa long page 12]
Spendem taem for teachim pikinini bilong iu abaotem Creator