Waswe, Iu Barava Biliv Long Datfala Resurrection Hope?
“Wanfala resurrection bae kamap.”—ACTS 24:15.
1. Why nao man no savve missim dae?
LONG 1789, wanfala bigman long America, Benjamin Franklin, talem olsem: “Long disfala world, only samting wea iumi barava sure hem bae kamap hem wei for peim tax and for dae.” Samfala pipol talem hao disfala man barava luksavve long samting wea tru. Nomata olsem, plande pipol wea no honest ravem gavman and no peim tax or full tax wea olketa shud peim. Bat dae hem samting wea olketa man no savve missim. No eniwan long iumi savve duim eni samting for sevem iumiseleva. Long tokpiksa wei, Sheol, wea hem grev bilong olketa man, hem barava hangre and hem olsem hem swallowim olketa wea iumi lovem. (Proverbs 27:20) Bat tingim wanfala samting wea savve comfortim iumi.
2, 3. (a) Why nao hem stret for sei samfala bae nating dae, nomata plande pipol no luksavve long datwan? (b) Wanem nao bae iumi storyim long disfala article?
2 Word bilong Jehovah hem strongim datfala resurrection hope, wea minim olketa man wea dae finis bae laef bak moa long future. Diswan hem no wanfala dream nomoa, and no eniwan long full universe savve stopem Jehovah for mekem diswan kamap. Bat plande pipol distaem no luksavve hao samfala pipol bae nating dae. Why nao hem stret for sei samfala bae no dae? Datwan hem bikos wanfala “big crowd” bae laef thru long “datfala big trabol” wea klosap for kam. (Revelation 7:9, 10, 14) Bae olketa gohed for laef bihaen datwan, witim chance for kasem laef olowe. So olketa hia bae no dae. And tu, “dae . . . bae finis evribit.”—1 Corinthians 15:26.
3 Iumi mas barava biliv strong long datfala resurrection hope olsem aposol Paul, wea sei: “Wanfala resurrection bae kamap for olketa wea raeteous and olketa wea no raeteous.” (Acts 24:15) Bae iumi storyim thrifala kwestin hia abaotem resurrection: Why nao iu savve trustim disfala hope? Hao nao resurrection hope savve comfortim iu? And hao nao disfala hope savve affectim laef bilong iu distaem?
Resurrection—Wanfala Hope wea Iumi Savve Trustim
4. Why nao resurrection mas happen for mekem plan bilong Jehovah hem fulfill?
4 Plande reason stap why iumi savve trustim datfala resurrection hope. Main reason, hem samting wea mas happen for mekem plan bilong Jehovah hem fulfill. Remember hao hem Satan nao wea leadim olketa man for sin and kasem dae. Dastawe Jesus hem sei olsem abaotem Satan: “Hem man for killim man dae from taem wea hem first start.” (John 8:44) Bat Jehovah promisim hao “woman” bilong hem, wea hem nao organization bilong hem long heven, bae garem wanfala “seed” wea bae killim datfala “snek bilong bifor kam” long hed, wea minim hem bae distroem Satan evribit. (Genesis 3:1-6, 15; Revelation 12:9, 10; 20:10) Taem Jehovah isisi showimaot plan bilong hem for datfala Seed wea bae kamap Messiah, hem showaot klia hao datfala Seed bae no just distroem nomoa Satan. Word bilong God hem talem hao “Son bilong God hem showaot for finisim olketa samting wea Devil duim.” (1 John 3:8) Dae wea kamaot from sin wea iumi kasem from Adam hem main samting wea Satan duim wea Jehovah bae iusim Jesus Christ for finisim. Dastawe ransom sakrifaes bilong Jesus and datfala resurrection hope hem barava important.—Acts 2:22-24; Romans 6:23.
5. Hao nao resurrection bae mekhae long nem bilong Jehovah?
5 Jehovah bae mekhae long holy nem bilong hem. Satan hem tok spoelem nem bilong God and laea abaotem hem. Hem laea long Adam and Eve and sei tufala “bae nating dae” sapos tufala kaikaim datfala frut wea God tambuim. (Genesis 2:16, 17; 3:4) Start long datfala taem, Satan hem gohed for talem olketa laea olsem. Wanfala laea hem datfala false teaching wea sei soul bilong man no savve dae. Bat thru long resurrection, Jehovah bae pruvim hao olketa teaching olsem hem false. Hem bae pruvim for olowe hao hem nomoa savve mekem pipol stap laef and mekem pipol laef bak moa.
6, 7. Hao nao iumi savve Jehovah laekem tumas for resurrectim olketa man wea dae finis?
6 Jehovah laekem tumas for resurrectim olketa man wea dae finis. Bible showimaot klia feeling bilong Jehovah saed long diswan. Olsem example, tingim disfala toktok wea hem muvim datfala faithful man Job for raetem: “Sapos wanfala man hem dae, waswe, hem savve laef moa? Olketa day wea mi mas stap long grev bae mi weit, go kasem taem wea mi bae kamap free. Iu bae kolem mi, and mi bae ansarem iu. Iu bae laekem tumas samting wea hand bilong iu wakem.” (Job 14:14, 15) Wanem nao olketa toktok hia hem minim?
7 Job savve hao bihaen hem dae hem olsem hem sleep and hem weit. Hem ting long datfala taem wea hem “mas stap long grev” olsem taem wea hem weit for kamap free. Job feel sure hao hem bae kamap free. Hem savve datfala taem bae kam. Why nao hem trustim datwan? Hem bikos Job savve long feeling bilong Jehovah. Jehovah barava “laekem tumas” for lukim faithful servant bilong hem laef bak moa. Tru nao, God hem laekem tumas for mekem evri raeteous man wea dae finis for laef bak moa. Jehovah bae givim chance tu long olketa narawan for kasem laef olowe long Paradaes long earth. (Luke 23:43; John 5:28, 29) From hem nao will bilong God for duim datwan, no eniwan savve stopem hem.
8. Wanem nao Jehovah duim wea mekem iumi “trustim” hope bilong iumi for future?
8 Resurrection bilong Jesus hem mekem iumi savve trustim hope bilong iumi for future. Taem Paul givim wanfala tok long Athens, hem talem olsem: “[God] markem wanfala day wea hem bae iusim wanfala man wea hem appointim for judgem evriwan long earth long raeteous wei, and hem mekem diswan samting wea iumi savve trustim taem hem resurrectim hem from dae.” (Acts 17:31) Samfala pipol wea herem tok bilong Paul mekfani abaotem resurrection wea hem storyim. Bat samfala kamap olketa Christian. Maet samting wea mekem olketa interest nao hem wei wea Jehovah duim samting wea mekem olketa savve trustim disfala resurrection hope. Taem Jehovah hem resurrectim Jesus, Hem duim wanfala barava nambawan mirakol wea winim olketa nara mirakol. Hem resurrectim Son bilong hem olsem wanfala maeti spirit. (1 Peter 3:18) Jesus kasem barava haefala position bihaen hem resurrect winim taem hem stap long heven bifor. Hem bae nating dae and Jehovah nomoa garem bigfala paoa winim hem. From datfala taem Jesus hem fit nao for duim olketa nambawan waka wea Dadi markem hem for duim. Jehovah markem Jesus for duim evri nara resurrection, wea minim Jesus nao bae resurrectim olketa man wea bae kasem laef long heven and olketa wea bae kasem laef moa long earth. Jesus seleva hem sei: “Mi nao resurrection and laef.” (John 5:25; 11:25) Wei wea Jehovah resurrectim Son bilong hem pruvim hao hope bilong olketa wea faithful bae barava fulfill.
9. Hao nao Bible showimaot resurrection hem wanfala hope wea iumi savve trustim?
9 Pipol lukim olketa resurrection and God muvim olketa faithful man for recordim olketa hia insaed long Word bilong Hem. Bible storyim staka information abaotem eitfala man wea dae and wea kasem laef bak moa long earth. Plande taem staka pipol nao lukim olketa mirakol hia. Lazarus hem dae and fofala day bihaen datwan Jesus resurrectim hem front long staka pipol wea feel sorre, wea minim famili and olketa fren and neiba bilong hem tu. Diswan hem barava pruvim hao God nao sendem kam Jesus and olketa enemy bilong Jesus no denyim hao hem resurrectim Lazarus. Bat olketa mekem plan for killim dae Jesus and Lazarus tu! (John 11:17-44, 53; 12:9-11) Tru tumas, resurrection hem wanfala hope wea iumi savve trustim. God muvim olketa faithful man for recordim olketa resurrection bifor for comfortim iumi and for strongim faith bilong iumi.
Kasem Comfort From Datfala Resurrection Hope
10. Wanem nao bae helpem iumi for kasem comfort from olketa story insaed Bible abaotem olketa resurrection?
10 Taem wanfala fren or relative bilong iu hem dae or iuseleva feisim dae, for sure iu barava laek for kasem comfort. Iumi barava kasem comfort from olketa story insaed Bible abaotem olketa resurrection. Taem iu readim, ting raonem, and tingim olketa story hia long mind bilong iu, hem savve mekem iu barava trustim moa datfala resurrection hope. (Romans 15:4) Olketa resurrection hem no olketa story nomoa. Bat hem samting wea barava happen long pipol wea olsem iumi. Bae iumi story lelebet abaotem wanfala resurrection, wea hem nao firstfala resurrection insaed long Bible.
11, 12. (a) Wanem barava nogud samting nao happen long datfala widow woman long Zarephath, and wanem nao hem duim firstaem? (b) Storyim samting profet Elijah duim for datfala widow woman thru long paoa wea hem kasem from Jehovah.
11 Tingim long mind bilong iu disfala samting wea happen. For samfala week, profet Elijah hem stap witim wanfala widow woman and smol boy bilong hem long Zarephath, long wanfala smol rum antap long haos bilong tufala. Hem wanfala sorre taem. Hem no rain for longfala taem long datfala area and pipol barava hangre. Plande pipol klosap for dae. Jehovah givim paoa finis long Elijah for duim wanfala mirakol for disfala hambol widow woman for rewardim faith bilong hem. Disfala woman and smol boy bilong hem klosap dae from hangre and tufala garem inaf kaikai for kaikaim wantaem nomoa taem God givim paoa long Elijah for duim mirakol for mekem flour and oil bilong tufala for no savve finis. Bat then wanfala barava nogud samting hem happen. Seknomoa, pikinini bilong hem sik big, and no longtaem bihaen hem no brith nao. Datfala widow woman barava sorre fogud! Hem kasem hard taem finis from hem no garem hasband for sapotim hem, and then only pikinini wea hem garem hem dae. From hem barava sorre fogud, hem blamem tu Elijah and God bilong hem, Jehovah! Wanem nao bae profet hia duim?
12 Elijah no kaonselem datfala widow woman from hem talem samting wea no tru, bat hem sei: “Givim kam boy bilong iu.” Bihaen Elijah karem datfala pikinini wea dae finis long rum antap, hem gohed prea for pikinini hia laef bak moa. Gogo, Jehovah duim samting! Tingim hapi bilong Elijah taem hem lukim datfala boy start for brith. Eye bilong pikinini hem open and hem laef bak moa. Elijah tekem datfala boy long mami bilong hem and hem sei: “Lukim, boy bilong iu hem laef.” Datfala woman hem barava hapi narawe. Hem sei: “Tru nao, distaem mi barava savve hao iu wanfala wakman bilong God and toktok bilong Jehovah wea iu talem hem barava tru.” (1 Kings 17:8-24) Faith bilong hem long Jehovah and disfala man bilong God hem strong winim enitaem bifor.
13. Hao nao datfala story abaotem wei wea Elijah resurrectim boy bilong wanfala widow woman hem comfortim iumi distaem?
13 For sure, wei for ting raonem datfala resurrection bae barava comfortim iu. Hem barava showimaot klia hao Jehovah hem fit for winim dae, wea hem nao datfala enemy bilong iumi! Tingim datfala taem long future wea plande thousand pipol long earth bae kasem semkaen hapi olsem datfala widow woman taem resurrection hem start! Olketa long heven tu bae hapi taem Jehovah givim komand long Son bilong hem for resurrectim olketa man long full earth. (John 5:28, 29) Waswe, wanfala long famili bilong iu or fren bilong iu hem dae finis? Hem nambawan samting for savve Jehovah hem fit for mekem olketa laef bak moa and bae hem duim datwan!
Hope Bilong Iu and Laef Bilong Iu Distaem
14. Long wanem wei nao datfala resurrection hope savve affectim laef bilong iu?
14 Long wanem wei nao datfala resurrection hope savve affectim laef bilong iu distaem? Disfala hope savve strongim iu taem iu kasem olketa hard taem, problem, persecution, or iu stap long danger. Satan laekem for iu barava fraetem dae, mekem iu savve willing for lusim faith bilong iu for eni laea promis wea sei iu bae stap sef nomoa. No forgetim samting wea Satan sei long Jehovah: “Evri samting wea man garem bae hem givim for sevem soul bilong hem.” (Job 2:4) Taem Satan talem datwan, hem tok spoelem iumi evriwan, wea minim iu tu. Waswe, bae iu stop for worshipim God sapos laef bilong iu stap long danger? Taem iu ting raonem datfala resurrection hope, datwan savve strongim go moa disison bilong iu for gohed duim will bilong Dadi bilong iu long heven.
15. Hao nao toktok bilong Jesus long Matthew 10:28 savve comfortim iumi sapos iumi stap long danger?
15 Jesus hem sei: “No fraet long olketa wea savve killim dae body bat kanduit killim dae soul; bat fraet long datwan wea savve finisim soul and body long Gehenna.” (Matthew 10:28) Iumi shud no fraetem Satan and eni man wea hem iusim. Hem tru, samfala garem paoa for spoelem iumi and for killim iumi dae tu. Bat olketa no savve spoelem iumi for olowe. Jehovah garem paoa for stretem eni nogud samting wea kasem olketa faithful servant bilong hem, and bae hem mekem olketa laef bak tu. Hem fitim for iumi fraet long Jehovah nomoa, and barava respectim hem. Hem nomoa garem paoa for finisim laef and eni hope bilong man for laef long future, long wei for distroem body and soul long Gehenna. Gud samting nao, Jehovah no laekem iu for kasem datwan. (2 Peter 3:9) From iumi olketa servant bilong God garem disfala resurrection hope, iumi feel sure hao Jehovah bae no letem eni samting spoelem iumi for olowe. Sapos iumi faithful, bae iumi kasem laef olowe long future, and Satan and olketa wea saedem hem no savve duim eni samting for stopem datwan.—Psalm 118:6; Hebrews 13:6.
16. Hao nao tingting bilong iumi abaotem resurrection savve affectim wanem hem important long laef bilong iumi?
16 Sapos iumi barava biliv long resurrection hope, datwan savve affectim tingting bilong iumi abaotem laef. Iumi luksavve hao nomata ‘sapos iumi laef or sapos iumi dae, iumi bilong Jehovah.’ (Romans 14:7, 8) So taem iumi markem olketa samting wea important, iumi followim disfala kaonsel bilong Paul: “Finis for followim disfala world, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Plande pipol distaem barava hariap for kasem evri samting olketa laekem, for duim evri samting olketa laek duim, and for duim evri samting olketa tingim nomoa. From olketa tingse laef hem short, hem olsem olketa barava hariap for kasem hapi, and nomata sapos olketa sei olketa worshipim God, datwan hem no wan mind witim “perfect will bilong God.”
17, 18. (a) Wanem nao Word bilong Jehovah sei abaotem wei wea laef hem barava short, and wanem nao God laekem iumi for kasem? (b) Wanem nao muvim iumi for praisem Jehovah evriday?
17 Hem tru, laef hem barava short. Maet 70 or 80 year hem “go pas kwiktaem, and [iumi] go nao.” (Psalm 90:10) Laef bilong olketa man hem for lelebet taem nomoa, olsem green grass, wanfala shadow wea go pas, and olsem taem man hem brith wantaem nomoa. (Psalm 103:15; 144:3, 4) Bat hem no plan bilong God for iumi growap and kasem lelebet savve and wisdom insaed samting olsem thirti year and then iumi gogo for olo, kasem sik, and dae. Jehovah creatim olketa man witim feeling for laekem laef olowe. Bible storyim hao God “putim feeling for laekem laef olowe insaed long heart bilong olketa man.” (Ecclesiastes 3:11) From iumi savve “God hem love,” hem hard tumas for hem putim datfala feeling insaed long heart bilong iumi and then no mekem eni wei for iumi kasem datwan. (1 John 4:8) Hem bae resurrectim olketa man wea dae finis and givim chance long olketa for kasem laef olowe.
18 From iumi garem datfala resurrection hope, iumi savve garem gudfala future. Iumi no need for hariap for duim evri samting iumi laek for duim and fit for duim distaem. Iumi no iusim world “evribit.” (1 Corinthians 7:29-31; 1 John 2:17) Iumi difren from pipol wea no garem hope, from iumi garem datfala nambawan present for savve hao sapos iumi gohed faithful long Jehovah God, bae iumi praisem hem and enjoyim laef for olowe. So hem barava fitim for iumi praisem Jehovah evriday, from hem nao mekem iumi fit for trustim datfala resurrection hope!
Hao Nao Bae Iu Ansa?
• Iumi shud garem wanem tingting abaotem resurrection?
• Wanem nao olketa samting wea mekem iumi savve trustim resurrection hope?
• Hao nao iu savve kasem comfort from datfala resurrection hope?
• Long wanem wei nao datfala resurrection hope savve affectim laef bilong iu distaem?
[Piksa long page 20]
Job savve hao Jehovah laekem tumas for resurrectim olketa man wea raeteous
[Piksa long page 21]
“Lukim, boy bilong iu hem laef”