Kwestin From Reader
Waswe, snek wea story long Eve hem garem leg?
Long Genesis 3:14, Jehovah God tok olsem long datfala snek wea trikim Eve long garden bilong Eden: “From iu duim disfala samting, long evri animal wea wild and no wild, iu nao animal wea mi cursim. Bae iu krol long bele bilong iu and bae iu kaikaim dust for full laef bilong iu.” Bible no talem sapos snek wea Satan iusim for testim Eve hem garem leg firstaem and then bihaen hem no garem leg moa. Maet toktok long Genesis 3:14 hem mekem samfala for garem datkaen tingting, bat iumi shud no tingse olketa snek garem leg firstaem bifor God talem datfala curse long olketa. Why nao olsem?
Main reason hem bikos Jehovah really judgem Satan, datfala spirit wea mekius long datfala snek. Bible storyim Satan olsem “dadi bilong laea fasin” and “datfala snek bilong bifor kam.” Olketa toktok hia storyim wei wea Satan iusim wanfala snek for toktok for hem for switim Eve for no obeyim komand bilong God.—John 8:44; Revelation 20:2.
God creatim olketa snek, and Adam nemim olketa bifor Satan iusim wanfala snek for trikim Eve. Datfala snek wea story long Eve no garem tingting and shud no kasem blame from datfala laea samting. Hem no savve Satan mekius long hem, and hem no savve minim judgment wea God givim long thrifala wea no obeyim hem.
Sapos olsem, why nao God talem datfala toktok long snek? Hem wei bilong snek for krol long bele and aotem tongue for kaikaim dust, wea diswan hem barava piksarem nogud position bilong Satan. Firstaem Satan garem hae position olsem wanfala angel bilong God, bat distaem God mekem hem garem low position wea Bible kolem Tartarus.—2 Peter 2:4.
And tu, long sem wei wea wanfala snek savve baetem leg bilong man, Satan long low position bilong hem bae ‘killim seed bilong God long leg.’ (Genesis 3:15) Main part bilong datfala seed hem Jesus Christ, wea for lelebet taem hem safa from samting wea olketa man wea Satan iusim duim long hem. Bat gogo, Christ and olketa anointed Christian wea resurrect bae pisisim evribit tokpiksa hed bilong snek. (Romans 16:20) So, curse wea God talem long snek barava piksarem low position bilong Satan and wei wea “datfala snek bilong bifor kam” bae finis evribit.