Jehovah Sevem Iumi From Olketa Trap Bilong Man for Kasholem Bird

“[Jehovah] bae sevem iu from trap bilong man for kasholem bird.”​—PSALM 91:3.

1. Hu nao datfala “man for kasholem bird,” and why nao hem danger tumas?

EVRI tru Christian garem wanfala enemy wea laek for kasholem olketa. Hem barava kleva and garem bigfala savve winim olketa man. Long Psalm 91:3, Bible kolem hem datfala “man for kasholem bird.” Hu nao disfala enemy bilong iumi? The Watchtower magasin start long June 1, 1883, showimaot hao disfala man hem Satan. Disfala enemy wea strong tumas hem trae for trikim pipol bilong Jehovah for go difren and trapim olketa olsem man for kasholem bird hem trapim bird.

2. Why nao Bible kolem Satan datfala man for kasholem bird?

² Long taem bifor, pipol no kasholem olketa bird for kaikaim and sakrifaesim nomoa, bat olketa laek for herem krae bilong olketa and laek kasholem olketa from olketa luk naes tumas. Bat hem no isi for trapim olketa bird from olketa savve fraet tumas. Dastawe man for kasholem bird long taem bifor mas lukluk gud firstaem long wei bilong olketa difren kaen bird wea hem laek for kasholem. Then hem iusim olketa kleva trik bilong hem for trapim olketa. Wei wea Bible kolem Satan man for kasholem bird helpem iumi for minim olketa wei bilong hem. Devil hem barava lukluk gud long iumi wanwan. Hem lukim fasin and wei bilong iumi and hem iusim olketa trap wea stap haed for trae kasholem iumi. (2 Timothy 2:​26) Sapos hem kasholem iumi, datwan bae spoelem wei wea iumi fren witim God and savve stopem iumi for kasem laef olowe. Dastawe iumi mas luksavve long olketa difren kaen trik wea “man for kasholem bird” hem iusim for mekem iumi savve protectim iumiseleva.

3, 4. Long wanem wei nao Satan attakim pipol olsem wanfala lion and wanfala snek?

³ Man wea raetem psalm markem tu olketa trik wea Satan iusim witim wei bilong wanfala young lion and wanfala snek. (Psalm 91:13) Olsem wei wea lion hem attak, samfala taem Satan iusim persecution and olketa law bilong kantri for againstim pipol bilong Jehovah. (Psalm 94:20) Raf persecution olsem maet mekem samfala for lusim Jehovah. Bat plande taem, olketa attak bilong Satan hem kikbak and hem strongim pipol bilong God for garem wan mind. Bat waswe long olketa attak bilong Satan wea haed wea olsem wei bilong wanfala snek?

⁴ Olsem poison snek hem attak from ples wea haed, Devil iusim bigfala savve wea hem garem for attakim iumi. Long wei olsem, hem spoelem tingting bilong samfala wea worshipim God and giamanim olketa for duim samting wea hem laekem, winim wei for duim will bilong Jehovah. Olketa kasem nogud samting bihaen. Gud samting nao iumi savve long olketa trik wea Satan iusim. (2 Corinthians 2:​11) Distaem bae iumi storyim fofala difren kaen trap wea datfala “man for kasholem bird” hem iusim.

Fasin for Fraet Long Man

5. Why nao staka Christian foldaon long disfala trap for “fraet long man”?

⁵ “Man for kasholem bird” minim gud feeling wea man garem for laekem nara pipol hapi long hem and laekem hem. Wei wea nara pipol ting long iumi olketa Christian hem savve affectim iumi. Devil hem luksavve long diswan and hem mekius long hem. Olsem example, hem iusim “wei for fraet long man” for trapim samfala wea worshipim God. (Proverbs 29:25) Sapos olketa wea servem God duim samting wea Jehovah tambuim or no duim samting wea Word bilong God talem olketa for duim bikos olketa fraet long man, datfala “man for kasholem bird” hem trapim olketa nao.​—Ezekiel 33:8; James 4:​17.

6. Wanem nao wanfala example wea showimaot “man for kasholem bird” savve trapim wanfala young wan?

⁶ Olsem example, maet wanfala young wan smokem cigarette from olketa skulfren switim hem. Maet taem hem lusim haos long morning for go long skul hem no ting for duim olsem. Bat long datfala day hem duim samting wea God no hapi long hem and wea savve spoelem health bilong hem. (2 Corinthians 7:1) Wanem nao switim hem? Maet hem kaban witim olketa nogud fren and hem fraet nogud olketa mekfani long hem and no laekem hem. Iufala olketa young wan, no letem “man for kasholem bird” switim and trapim iu! Faithful long olketa smol samting mekem iu no foldaon long olketa trap wea hem iusim for kasholem iu! Obeyim warning long Bible for no kaban witim nogud pipol.​—1 Corinthians 15:33.

7. Long wanem wei nao maet Satan mekem samfala dadi and mami no balance long spiritual wei?

⁷ Christian parents barava ting strong long responsibility from Bible for provaedem olketa material samting for famili bilong olketa. (1 Timothy 5:8) Nomata olsem, goal bilong Satan hem for mekem olketa Christian for garem tingting wea no balance saed long diswan. Maet samfala Christian missim staka meeting from boss askem olketa evritaem for waka ovataem. Maet olketa fraet for askem boss for taem off mekem olketa attendim full program bilong distrik convention for worshipim Jehovah witim olketa nara Christian brata. Wei for “trust long Jehovah” bae protectim iumi from disfala trap. (Proverbs 3:​5, 6) And tu, taem iumi evritaem tingim hao iumi pipol bilong Jehovah and hao hem promis for lukaftarem iumi, datwan bae helpem iumi for balance. Waswe iufala olketa dadi and mami, iufala garem faith hao Jehovah bae lukaftarem iu and famili bilong iu taem iu duim will bilong hem? Or waswe, bae Devil kasholem iu and mekem iu duim samting wea hem laekem bikos iu fraet long man? Plis olketa dadi and mami, ting raonem and prea abaotem olketa kwestin hia.

Trap for Laek Kasem Tumas Material Samting

8. Long wanem wei nao Satan iusim wei for laek kasem tumas material samting for switim iumi?

⁸ Satan iusim tu wei for laek kasem tumas material samting for switim and trapim iumi. Long world distaem, enikaen plan kamap for pipol kasem selen and kamap rich kwiktaem. Maet olketa plan olsem giamanim samfala servant bilong God tu. Maet samfala taem pipol sei long iu: “Waka hard. Bihaen iu kasem staka selen, iu savve rest lelebet and enjoyim laef. Maet iu savve pioneer tu.” Maet samfala long kongregeson nao talem kaen toktok olsem wea showimaot tingting bilong olketa no balance. Maet olketa hia laek for mekius long olketa brata and sista long Christian kongregeson for kasem selen for olketa seleva nomoa. Tingting gud abaotem datfala goal for kasem staka selen mekem iu garem isi laef bihaen. Waswe, iu agree hao datfala tingting hem olsem datfala rich man wea Jesus story abaotem wea “no garem stretfala tingting”?​—Luke 12:16-​21.

9. Why nao maet samfala Christian foldaon long trap for laek kasem tumas material samting?

⁹ World bilong Satan hem mekem pipol for laek kasem olketa material samting nomoa. Datwan savve barava spoelem laef bilong wanfala Christian, and tu, hem savve stopem hem for talemaot message bilong God and stopem hem for “garem eni frut.” (Mark 4:​19) Bible encouragem iumi for satisfae witim kaikai and ples for stap. (1 Timothy 6:8) Nomata olsem, plande foldaon long datfala trap wea “man for kasholem bird” hem iusim bikos olketa no followim datfala kaonsel. Waswe, olketa praod dastawe olketa tingse olketa mas garem plande material samting and gudfala living? Waswe long iumi? Waswe, wei for laek kasem olketa material samting hem mekem tru worship no main samting long laef bilong iumi? (Haggai 1:​2-8) Sorre nao, long taem wea hem hard for kasem selen, samfala wikdaon long spiritual wei from olketa trae hard for garem semkaen living wea olketa getius long hem. Wei for garem datfala feeling for laek kasem tumas material samting hem mekem datfala “man for kasholem bird” hapi tumas!

Nogud Hapitaem Hem Wanfala Trap

10. Evri Christian mas ting raonem wanem samting?

¹⁰ Nara trap wea “man for kasholem bird” hem iusim, hem for spoelem tingting bilong pipol abaotem samting wea gud and samting wea nogud. Staka samting long television and video distaem hem showimaot semkaen fasin wea pipol long Sodom and Gomorrah bifor garem. Nius long television and olketa magasin tu mekhae long raf fasin and wei wea pipol interest tumas long sex. Staka samting long television, radio, magasin, and niuspepa hem stopem pipol for “luksavve long samting wea stret and samting wea no stret.” (Hebrews 5:​14) Bat tingim disfala samting wea Jehovah talem thru long profet Isaiah: “Trabol long olketa wea sei gud samting hem nogud and nogud samting hem gud!” (Isaiah 5:​20) Waswe, “man for kasholem bird” hem iusim nogud hapitaem olsem for isisi affectim tingting bilong iu? Hem barava important for iumi lukluk gud long iumiseleva.​—2 Corinthians 13:5.

11. Wanem warning nao The Watchtower magasin talem abaotem samfala program long television?

¹¹ Samting olsem 25 year go finis, long kaenfala wei The Watchtower magasin warnim olketa wea worshipim Jehovah abaotem samfala program long television.a Olketa raetem diswan abaotem wei wea samfala program savve isisi affectim man: “Taem olketa mekem olketa program hia, olketa iusim wei wea man laekem narawan for lovem hem olsem excuse for duim eni samting nomoa. Olsem example, long wanfala program, wanfala young gele wea babule nating hem sei olsem long fren bilong hem: ‘Bat mi lovem Victor. Mi no wari nomoa. . . . For garem baby bilong hem nao mi barava laekem tumas!’ Naesfala music wea gohed hem mekem man tingim samting wea gele hia duim hem stret nomoa. And taem iu lukluk long datfala program, iu tu start for laekem Victor. Iu feel sorre long datfala gele. Iu minim feeling bilong tufala and acceptim samting wea tufala duim. Wanfala woman wea lukluk long datfala program kasem bak gudfala tingting bilong hem and hem sei: ‘Mi barava sapraes hao hem isi tumas for mekem excuse for samting wea man hem duim. Iumi savve dirty fasin hem no stret, bat mi luksavve hao mi feel sorre long tufala wea duim dirty fasin and mi start for saed witim olketa.’”

12. Wanem nao showimaot datfala warning abaotem samfala television program hem barava fitim distaem tu?

¹² Staka program olsem kamap long television bihaen olketa pablisim olketa article hia. Long staka ples, olketa program olsem savve gohed for full day and full naet. Olketa man, woman, and plande teenager lukluk long olketa evriday and no savve missim. Bat iumi mas no giamanim iumiseleva. Hem bae no stret sapos iumi tingse olketa kaen program olsem hem normal samting nomoa. Waswe, hem stret for wanfala Christian chus for lukim olowe long television kaen pipol olsem wea hem hard tumas for hem invaetem long haos bilong hem?

13, 14. Wanem nao samfala talem wea showimaot olketa warning abaotem olketa program long television helpem olketa?

¹³ Staka brata and sista kasem gud samting taem olketa followim warning wea “faithful and wise slave” givim. (Matthew 24:45-​47) Samfala wea readim datfala kaonsel wea kam from Bible olketa raetem leta hao olketa article hia barava helpem olketa.b Wanfala sista hem sei: “For 13 year, mi lukluk olowe long olketa program olsem. Mi tingse datwan bae no spoelem spiritual saed bilong mi sapos mi gohed for attendim olketa Christian meeting and go samfala taem long field service. Bat mi followim tingting bilong world wea olketa program olsem mekhae long hem. Olketa sei hem olraet for waef duim adultery sapos hasband no showimaot love and kaenfala fasin long hem, bikos hasband nao duim samting wea no stret. So datwan nao hem ‘excuse’ bilong mi. Mi duim adultery and sin againstim Jehovah and hasband bilong mi.” Disfala sista hem disfellowship. Gogo hem kasem bak gudfala tingting, hem repent, and hem reinstate long kongregeson. Olketa article wea warnim iumi abaotem olketa television program olsem helpem datfala sista for disaed strong for no lukluk moa long olketa program olsem wea pipol duim samting wea Jehovah heitim.​—Amos 5:​14, 15.

¹⁴ Narawan wea garem problem from hem lukim olketa program olsem hem sei: “Mi krae taem mi readim olketa article bikos mi luksavve hao mi no lovem Jehovah witim full heart bilong mi. Mi promis long God bae mi no gohed for lukluk moa long olketa program olsem.” Narafala Christian sista wea barava tinghae long olketa article hia hem storyim problem bilong hem and hem sei: “Mi ting raonem . . . sapos olketa savve spoelem wei wea mi fren witim Jehovah. Waswe, mi savve fren witim pipol olsem and long semtaem fren witim Jehovah?” Sapos olketa program olsem spoelem tingting bilong pipol 25 year go finis, waswe long olketa program long television distaem? (2 Timothy 3:​13) Iumi mas luksavve long evrikaen trap wea Satan iusim saed long nogud hapitaem, nomata sapos datwan hem kaen program wea iumi storyim finis, olketa raf video game, or olketa music video wea mekhae long dirty fasin.

Wei for Garem Problem Witim Narawan Hem Wanfala Trap

15. Wanem nao Devil duim for kasholem samfala?

¹⁵ Satan iusim tu wei for garem problem witim narawan olsem trap for divaedem pipol bilong Jehovah. Iumi savve foldaon long datfala trap nomata wanem kaen privilege iumi garem insaed long organization bilong Jehovah. Devil kasholem samfala from olketa letem problem wea olketa garem witim narawan for spoelem peace and wan mind wea Jehovah mekem kamap.​—Psalm 133:​1-3.

16. Wanem kleva trik nao Satan iusim for trae mekem iumi no garem wan mind?

¹⁶ Taem World War I gohed, Satan hem iusim persecution for attakim and trae finisim organization bilong Jehovah long earth, bat hem nating win. (Revelation 11:​7-​13) Start long datfala taem kam kasem distaem, hem iusim olketa kleva trik for trae spoelem wan mind wea iumi garem. Taem iumi letem problem wea iumi garem witim narawan for spoelem datwan, iumi givim chance long “man for kasholem bird” for trapim iumi. Samting wea iumi duim savve stopem God for givim holy spirit long iumi and long kongregeson tu. Sapos datwan hem happen, Satan hem barava hapi bikos hem savve hao sapos hem spoelem peace and wan mind insaed long kongregeson, datwan bae spoelem preaching waka tu.​—Ephesians 4:​27, 30-​32.

17. Wanem nao savve helpem olketa wea garem problem witim narawan for stretem datwan?

¹⁷ Wanem nao iu savve duim sapos iu garem problem witim nara Christian? Hem tru, no evri problem hem semsem. Nomata maet staka reason stap why olketa problem kamap, iumi shud no letem olketa problem gohed. (Matthew 5:​23, 24; 18:15-​17) Advaes wea God givim insaed Word bilong Hem, hem perfect. Taem iumi followim olketa Bible principle iumi bae kasem gud samting evritaem!

18. Why nao wei for followim example bilong Jehovah bae helpem iumi for stretem olketa problem wea iumi garem witim narawan?

¹⁸ Jehovah hem “redi for forgive,” and hem “forgive long trufala wei.” (Psalm 86:5; 130:4) Iumi showimaot iumi olketa pikinini bilong Jehovah taem iumi followim example bilong hem. (Ephesians 5:1) Iumi evriwan sin and barava needim Jehovah for forgivim iumi. Dastawe iumi mas barava tingting gud sapos iumi no laek forgivim narawan. Iumi savve kamap olsem datfala slave wea Jesus storyim wea garem bigfala kaon. Nomata masta bilong hem forgivim hem, hem nating laek forgivim nara slave for barava smol kaon bilong hem. Taem masta hia savve long datwan, hem torowem datfala slave wea no laek forgivim nara slave long prison. Long end bilong datfala story Jesus hem sei: “Long sem wei, Dadi bilong mi long heven bae duim olsem long iufala sapos iufala no forgivim narawan from heart bilong iufala.” (Matthew 18:21-​35) Taem iumi ting raonem datfala tokpiksa and tingim hao Jehovah forgivim iumi staka taem, datwan bae helpem iumi taem iumi trae for stretem problem wea iumi garem witim nara brata.​—Psalm 19:14.

Stap Sef Long “Secret Ples Bilong Most Hae”

19, 20. Long disfala taem wea danger tumas, wanem tingting nao iumi shud garem abaotem “secret ples” and “shadow” bilong Jehovah?

¹⁹ Iumi stap long barava nogud taem distaem. Sapos Jehovah no lovem and protectim iumi, Satan bae finisim iumi evriwan. So for iumi no foldaon long olketa trap wea “man for kasholem bird” hem iusim, iumi mas stap insaed long tokpiksa ples wea protectim iumi, wea hem nao for stap haed “long secret ples bilong Most Hae . . . anda long shadow bilong Olmaeti Wan.”​—Psalm 91:1.

²⁰ Iumi shud evritaem ting long olketa reminder and direction from Jehovah olsem samting for protectim iumi, no olsem samting for stopem iumi for duim samting wea iumi laek for duim. Iumi evriwan garem wanfala enemy wea laek for kasholem iumi wea garem bigfala savve winim olketa man. Sapos iumi no kasem help from Jehovah, evriwan bae foldaon long trap bilong Satan. (Psalm 124:​7, 8) So iumi mas gohed prea long Jehovah for sevem iumi from datfala “man for kasholem bird”!​—Matthew 6:​13.

[Olketa Footnote]

Waswe, Iu Remember?

• Why nao “wei for fraet long man” hem wanfala trap wea savve barava spoelem iumi?

• Long wanem wei nao Satan iusim wei for laek kasem tumas material samting for switim iumi?

• Hao nao Satan iusim nogud hapitaem for trapim samfala?

• Wanem trap nao Devil iusim for mekem iumi no garem wan mind?

[Piksa long page 29]

Samfala foldaon long trap “for fraet long man”

[Piksa long page 30]

Waswe, iu laekem hapitaem wea Jehovah heitim?

[Piksa long page 31]

Wanem nao iu savve duim sapos iu garem problem witim nara Christian?