Samting wea Jehovah Promisim Hem Kamap Tru Evritaem
“Evri samting wea God bilong iufala Jehovah promisim long iufala hem kamap tru. No eni samting wea hem promisim for iufala hem fail.”—JOSHUA 23:14.
1. Joshua hem wanem kaen man, and wanem nao hem duim taem hem klosap for dae?
JOSHUA hem wanfala strongfala komanda bilong army and hem man wea no fraet. Hem garem faith long God and laek for duim stret samting evritaem. Hem waka witim Moses and Jehovah chusim hem for leadim nation bilong Israel for go aot from wilderness wea mekem man fraet and for go insaed wanfala land wea garem staka milk and honey. Joshua hem man wea pipol barava respectim. Taem hem klosap for dae, lastfala tok wea hem givim long olketa elder long Israel hem barava muvim olketa. Iumi sure datfala tok barava strongim faith bilong olketa wea lisin long hem, and hem savve strongim faith bilong iu tu.
2, 3. Taem Joshua story long olketa elder long Israel, hao nao living bilong olketa Israelite, and wanem nao Joshua talem?
2 Tingim living bilong olketa Israelite wea Bible storyim. Bible hem sei: “For longfala taem kam finis Jehovah mekem Israel for garem peace witim olketa enemy wea stap raonem olketa and Joshua hem olo nao and klosap for dae. So Joshua kolem kam olketa elder, olketa hed bilong famili, olketa judge, and olketa bigman bilong Israel and hem sei long olketa: ‘Mi olo nao and klosap for dae.’”—Joshua 23:1, 2.
3 Joshua hem klosap 110 year, and hem stap long taem wea God duim olketa nambawan samting for pipol bilong hem. Hem lukim staka bigfala samting wea God duim, and wei wea plande promis bilong Jehovah kamap tru. Dastawe hem savve sei olsem: “Iufala savve witim full heart and full soul bilong iufala hao evri samting wea God bilong iufala Jehovah promisim long iufala hem kamap tru. No eni samting wea hem promisim for iufala hem fail. Evri promis hem kamap tru.”—Joshua 23:14.
4. Wanem nao olketa samting wea Jehovah promis for duim for olketa Israelite?
4 Wanem nao olketa samting wea Jehovah promisim wea kamap tru taem Joshua hem laef? Bae iumi storyim thrifala samting wea Jehovah promis for duim for olketa Israelite. First wan, God hem promisim hao hem bae mekem olketa kamap free from wei for slave long Egypt. Mek-tu, hem promisim hao hem bae protectim olketa. Mek-thri, hem promisim hao hem bae lukaftarem olketa. Jehovah promis for duim sem samting for pipol bilong hem distaem, and iumi lukim olketa promis hia kamap tru. Firstaem bae iumi storyim olketa samting wea Jehovah duim long taem bilong Joshua, and then bae iumi storyim olketa samting wea hem duim distaem.
Jehovah Mekem Pipol Bilong Hem Kamap Free
5, 6. Wanem nao Jehovah duim for mekem olketa Israelite kamap free from Egypt, and wanem nao diswan showimaot?
5 From olketa Israelite slave long Egypt, olketa singaot long Jehovah for help and hem herem olketa. (Exodus 2:23-25) Jehovah story kam long Moses long datfala smol tree wea bone and hem sei: “Bae mi go daon nao for sevem [pipol bilong mi] from olketa bilong Egypt and tekem olketa go aot from datfala ples go long ples wea barava naes and wea big tumas, and wea garem staka milk and honey.” (Exodus 3:8) Masbi olketa Israelite barava hapi for lukim wei wea Jehovah duim diswan! Taem Pharaoh no willing for letem olketa Israelite for lusim Egypt, Moses talem hem hao God bae mekem Nile River kamap blood. Samting wea Jehovah talem hem kamap tru. Nile River hem kamap blood. Olketa fish dae and pipol no savve drinkim wata long datfala river. (Exodus 7:14-21) From Pharaoh gohed for bighed, Jehovah mekem naenfala trabol moa for kasem Egypt, and hem talem firstaem samting wea hem bae duim bifor datwan happen. (Exodus, chapter 8-12) Bihaen long mek-ten trabol wea killim dae evri firstborn long Egypt, Pharaoh komandim olketa Israelite for go, and olketa Israelite lusim Egypt nao!—Exodus 12:29-32.
6 Long datfala taem nao Jehovah adoptim Israel for kamap nation bilong hem. Wei wea hem mekem olketa kamap free hem mekhae long Jehovah olsem Datwan wea evritaem fulfillim olketa promis bilong hem. Datwan showimaot tu wei wea Jehovah garem paoa wea winim olketa god bilong olketa nation. Taem iumi read abaotem olketa samting hia, datwan hem barava strongim faith bilong iumi. Tingim sapos iu stap long datfala taem and lukim olketa samting wea happen! Joshua lukim olketa samting hia and hem no daotem hao Jehovah hem “Most Hae ovarem full earth.”—Psalm 83:18.
Jehovah Protectim Pipol Bilong Hem
7. Wanem nao Jehovah duim for protectim olketa Israelite from army bilong Pharaoh?
7 Waswe long datfala mek-tu promis bilong Jehovah hao hem bae protectim pipol bilong hem? Diswan hem showaot klia long promis bilong Jehovah hao hem bae mekem pipol bilong hem kamap free from Egypt and letem olketa go insaed long Promis Land. Tingim hao Pharaoh hem kros tumas and aftarem olketa Israelite witim army bilong hem wea strong tumas and wea garem staka handred chariot. Masbi Pharaoh tingse hem savve kasholem olketa Israelite from olketa stap midolwan long olketa maunten and Red Sea and luk olsem hem hard for olketa ranawe nao! Bat God duim samting for protectim pipol bilong hem long wei for putim wanfala cloud midolwan long olketa Israelite and army bilong Egypt. Hem dark long saed bilong army bilong Pharaoh, bat long saed bilong olketa Israelite hem laet. Taem disfala cloud stopem olketa bilong Egypt for kakam klosap, Moses holemap stik bilong hem and wata bilong Red Sea hem divaed, wea datwan mekem wei for olketa Israelite for ranawe, bat hem trapim olketa bilong Egypt. Jehovah finisim barava strongfala army bilong Pharaoh, and hem sevem pipol bilong Hem.—Exodus 14:19-28.
8. Long wanem wei nao Jehovah protectim olketa Israelite (a) long wilderness and (b) taem olketa go insaed long Promis Land?
8 Bihaen olketa Israelite akrosim Red Sea, olketa wakabaot long wilderness wea Bible storyim olsem hem “big tumas and wea mekem man fraet, wea garem olketa poison snek and scorpion, and wea drae tumas from hem no garem eni wata.” (Deuteronomy 8:15) Jehovah protectim pipol bilong hem long datfala ples tu. And waswe long taem wea olketa go insaed long Promis Land? Olketa strongfala army bilong Canaan againstim olketa. Nomata olsem, Jehovah sei long Joshua: “Iu and olketa pipol hia mas standap, akrosim disfala Jordan, and go insaed long datfala land wea mi givim long olketa son bilong Israel. Long full laef bilong iu, no eniwan bae winim iu. Long sem wei wea mi stap witim Moses bae mi stap witim iu tu. Bae mi nating lusim iu.” (Joshua 1:2, 5) Evri samting hia wea Jehovah talem hem kamap tru. Insaed samting olsem sixfala year nomoa, Joshua winim 31 king and tekovarem bigfala area bilong Promis Land. (Joshua 12:7-24) Joshua bae no savve winim olketa king hia sapos Jehovah no protectim hem.
Jehovah Lukaftarem Pipol Bilong Hem
9, 10. Wanem nao Jehovah duim for lukaftarem pipol bilong hem long wilderness?
9 Tingim datfala mek-thri promis bilong Jehovah hao hem bae lukaftarem pipol bilong hem. No longtaem bihaen olketa Israelite kamap free from Egypt, God promisim olketa olsem: “Bae mi mekem bred foldaon from skae for iufala; and olketa pipol mas go and kolektem inaf bred hia fitim olketa for wanfala day nomoa.” And olsem God talem, Hem givim olketa ‘bred from skae.’ “Taem olketa Israelite lukim diswan . . . , olketa sei olsem long narawan: ‘Diswan hem wanem ia?’” Datwan hem manna, bred wea Jehovah promis for givim long olketa.—Exodus 16:4, 13-15.
10 Jehovah lukaftarem olketa Israelite for 40 year wea olketa stap insaed long wilderness, and hem givim kaikai and wata for strongim olketa. Hem mek sure tu kaleko bilong olketa no kamap old and brek, and leg bilong olketa no boela. (Deuteronomy 8:3, 4) Joshua lukim evri samting hia wea Jehovah hem duim. Olsem Jehovah promis for duim, hem mekem pipol bilong hem kamap free, hem protectim olketa, and hem lukaftarem olketa tu.
Jehovah Mekem Pipol Bilong Hem Kamap Free Distaem
11. Long 1914, long Brooklyn, New York, wanem nao Charles Taze Russell announcem, and hem taem for Jehovah duim wanem samting?
11 Waswe long taem bilong iumi? Long Friday morning, October 2, 1914, Charles Taze Russell, wea leadim waka bilong Olketa Bible Student long datfala taem, hem kam insaed long rum for kaikai long Bethel long Brooklyn, New York. Hem morning long evriwan bifor hem sidaon, and then hem hapi for talem disfala announcement: “Taem bilong olketa Gentile hem finis nao; taem bilong olketa king for rul hem finis.” Hem narataem moa wea Jehovah, wea hem Ruler bilong universe, mas duim samting for pipol bilong hem. And hem duim datwan!
12. Long wanem wei nao pipol bilong God kamap free long 1919, and wanem nao kamaot from datwan?
12 Faevfala year bihaen datwan, Jehovah mekem pipol bilong hem kamap free from “Bigfala Babylon,” wea hem nao evri false religion long world. (Revelation 18:2) Plande long iumi no stap long datfala taem for lukim datfala nambawan samting. Nomata olsem, iumi savve lukim olketa samting wea kamaot from datwan. Jehovah startim moa tru worship and hem mekem pipol wea laek for worshipim hem for garem wan mind. Profet Isaiah hem profesi abaotem datwan. Hem sei: “Hem mas happen long olketa last day hao maunten bilong haos bilong Jehovah bae barava hae winim olketa maunten and no eni samting bae sekem datfala maunten, and bae hem mas hae winim olketa hill; and evri nation mas go long hem.”—Isaiah 2:2.
13. Start long taem wea iu lanem truth kam kasem distaem, haomas pipol bilong Jehovah nao stap long earth?
13 Evri samting hia wea Isaiah talem hem kamap tru. Long 1919, olketa anointed Christian evriwea long world strong for duim waka for preach wea mekem worship bilong tru God kamap hae. Long olketa year midolwan 1931 and 1935, hem showaot klia hao Jehovah hipimap olketa “nara sheep.” (John 10:16) Firstaem olketa hia tu-thri thousand nomoa, gogo, olketa plande handred thousand, and distaem plande million nao sapotim tru worship! Long wanfala vision wea aposol John lukim, hem storyim olketa hia olsem “wanfala big crowd wea no eni man savve kaontem, wea kam from evri nation, tribe, pipol, and languis.” (Revelation 7:9) Wanem nao iu lukim? Taem iu start for lanem truth, haomas Witness bilong Jehovah nao stap long earth? Distaem, namba bilong olketa wea worshipim Jehovah hem winim 6,700,000. From Jehovah mekem pipol bilong hem kamap free from Bigfala Babylon, datwan mekem wei for staka moa pipol long world kam for worshipim hem.
14. Wanem nao bae Jehovah duim for pipol bilong hem long future?
14 Long future, Jehovah bae duim samting wea bae affectim evriwan long earth. Hem bae showimaot bigfala paoa bilong hem taem hem finisim evriwan wea againstim hem, and hem bae mekem pipol bilong hem for go insaed wanfala niu world wea evriwan bae garem raeteous fasin. Bae iumi barava hapi tumas for lukim olketa wicked samting hem finis, and tu, for lukim barava nambawan taem for pipol bilong God hem start!—Revelation 21:1-4.
Jehovah Protectim Iumi Distaem
15. Why nao iumi needim Jehovah for protectim iumi distaem?
15 Olsem iumi storyim finis, olketa Israelite long taem bilong Joshua needim Jehovah for protectim olketa. Waswe, pipol bilong Jehovah distaem needim Jehovah for protectim olketa tu? Olketa barava needim datwan! Jesus warnim olketa follower bilong hem olsem: “Pipol bae persecutim and bae killim iufala dae, and evri nation bae heitim iufala bikos long nem bilong mi.” (Matthew 24:9) Long olketa year wea go finis, pipol long plande kantri barava againstim and persecutim Olketa Jehovah’s Witness. Nomata olsem, iumi luksavve hao Jehovah hem protectim pipol bilong hem. (Romans 8:31) Word bilong hem promisim hao ‘no eni samting wea man iusim for againstim iumi’ bae stopem waka bilong iumi for preach abaotem Kingdom and teachim pipol.—Isaiah 54:17.
16. Wanem nao iu lukim wea showimaot Jehovah protectim pipol bilong hem?
16 Nomata world hem heitim pipol bilong Jehovah, olketa kamap staka tumas insaed long 236 kantri, wea datwan pruvim Jehovah hem protectim iumi from olketa wea laek for finisim iumi or stopem iumi for preach. Waswe, iu savve tingim nem bilong samfala bigman bilong gavman or olketa bigman bilong religion wea iu lukim olketa barava againstim pipol bilong God? Wanem nao happen long olketa? Waswe, olketa laef yet? Plande long olketa no laef distaem olsem Pharaoh hem dae tu long taem bilong Moses and Joshua. And wanem nao happen long olketa servant bilong God distaem wea faithful go kasem taem olketa dae? Jehovah protectim olketa long wei wea hem no forgetim olketa, and hem bae mekem olketa laef bak moa from dae. Tru nao, evri samting wea Jehovah promisim saed long wei for protectim pipol bilong hem, hem kamap tru.
Jehovah Lukaftarem Pipol Bilong Hem Distaem
17. Jehovah promisim wanem samting abaotem spiritual kaikai?
17 Jehovah lukaftarem pipol bilong hem long wilderness, and distaem hem lukaftarem pipol bilong hem tu. “Faithful and wise slave” givim spiritual kaikai for helpem iumi fren gud witim God. (Matthew 24:45) Iumi lanem olketa trufala samting abaotem God wea stap haed for plande handred year. Wanfala angel hem sei olsem long Daniel: “No storyim disfala message long eniwan and iu mas satem disfala buk go kasem taem bilong end. Plande pipol bae lukaotem trufala savve long evri ples and trufala savve bae kamap big.”—Daniel 12:4.
18. Why nao iumi savve sei trufala savve hem kamap moa big distaem?
18 Iumi stap long taem bilong end, and trufala savve abaotem God hem barava kamap big. Evriwea long world, holy spirit leadim pipol wea lovem truth for kasem stretfala savve abaotem tru God and olketa plan bilong hem. Plande pipol long earth distaem garem Bible long languis bilong olketa, and staka pablikeson stap tu wea helpem pipol for minim olketa nambawan truth insaed long Bible. Olsem example, tingim olketa subject insaed long datfala buk, Wanem Nao Really Samting wea Bible Teachim?a wea iumi iusim for studyim Bible witim nara pipol. Samfala chapter garem title olsem: “Wanem Nao Truth Abaotem God?,” “Wea Nao Olketa wea Dae Finis?,” “Wanem Nao Kingdom Bilong God?,” and “Why Nao God Letem Iumi for Safa?” For plande thousand year, olketa man ting raonem olketa kwestin olsem. Distaem iumi kasem ansa for olketa kwestin hia. Nomata for plande handred year staka pipol no savve wanem nao Bible hem teachim and olketa false Christian religion teachim pipol olketa apostate teaching, Word bilong God hem stap yet and hem gohed for helpem and strongim evriwan wea laek for worshipim Jehovah.
19. Wanem nao olketa promis wea iu lukim hem fulfill finis, and wanem nao iu barava sure long hem?
19 Tru nao, long olketa samting wea iumi lukim, iumi savve sei hao ‘evri samting wea God bilong iumi Jehovah promisim long iumi hem kamap tru. No eni samting wea hem promisim for iumi hem fail. Evri promis hem kamap tru.’ (Joshua 23:14) Jehovah mekem pipol bilong hem kamap free, hem protectim olketa, and hem lukaftarem olketa tu. Waswe, iu savve tingim eni promis bilong hem wea no fulfill long taem wea hem markem? Hem hard for iumi tingim eniwan. Hem wise for iumi barava trustim Word bilong God.
20. Why nao iumi savve trustim olketa promis bilong Jehovah for future?
20 Waswe long future? Jehovah talem finis hao plande long iumi savve garem hope for stap long disfala earth wea bae kamap paradaes. Samfala nomoa garem hope for rul witim Christ long heven. Nomata sapos iumi hope for laef long heven or long earth, staka reason stap for iumi gohed faithful olsem Joshua. Gogo, taem bae kam wea hope bilong iumi for go long heven or stap long earth bae kamap tru. Then iumi bae tingim bak olketa promis bilong Jehovah, and iumi tu bae sei: “No eni samting wea hem promisim . . . hem fail.”
[Footnote]
a Olketa Jehovah’s Witness pablisim.
Waswe, Iu Savve Explainim?
• Wanem nao olketa promis bilong Jehovah wea Joshua lukim hem kamap tru?
• Wanem nao olketa promis bilong God wea iu lukim hem kamap tru?
• Wanem nao mekem iumi barava trustim olketa promis bilong God?
[Piksa long page 24]
Jehovah duim samting for mekem pipol bilong hem kamap free
[Piksa long page 24]
Wanem nao Jehovah duim for protectim pipol bilong hem long Red Sea?
[Piksa long page 25]
Wanem nao Jehovah duim for lukaftarem pipol bilong hem long wilderness?
[Piksa long page 26]
Jehovah lukaftarem pipol bilong hem distaem