Lukluk Gud Long “Olketa Deep Samting wea Kam From God”
“Spirit hem lukluk gud insaed long evri samting, nomata olketa deep samting wea kam from God.”—1 CORINTHIANS 2:10.
1. Wanem nao samfala truth insaed Bible wea mekem olketa niu Bible student hapi?
PLANDE long iumi wea insaed Christian kongregeson savve tingim wei wea iumi barava hapi taem iumi lanem truth. Iumi lanem why nao nem bilong Jehovah hem barava important, why God letem pipol gohed for safa, why samfala pipol nomoa garem hope for go long heven, and wanem nao future for olketa man wea faithful. Maet bifor iumi lanem olketa truth hia iumi trae for studyim Bible, bat iumi olsem plande nara pipol wea no minim olketa samting hia. Iumi olsem man wea trae for lukim olketa coral wea insaed long wanfala reef, bat from hem no werem glass for daev, hem no savve lukim staka naesfala samting wea insaed datfala reef. Bat taem datfala man iusim glass for daev for luk go daon insaed long sea, hem barava hapi for lukim olketa coral wea luk naes tumas, olketa fish, olketa animal long sea wea luk olsem plant wea garem flaoa, and olketa nara interesting samting. Long sem wei tu, taem wanfala brata or sista helpem iumi for minim Bible, iumi start for minim lelebet samting long “olketa deep samting wea kam from God.”—1 Corinthians 2:8-10.
2. Why nao wei for lane from Word bilong God savve mekem iumi gohed for hapi?
2 Waswe, iumi satisfae for minim lelebet truth nomoa insaed long Bible? Datfala toktok “olketa deep samting wea kam from God” savve minim tu wei for savve long wisdom bilong God. Jehovah iusim holy spirit bilong hem for showimaot datfala wisdom long olketa Christian, bat hem haedem datwan from nara pipol. (1 Corinthians 2:7) Wisdom bilong Jehovah hem big tumas and iumi savve enjoyim wei for studyim datwan nomata iumi bae no savve long evri samting abaotem wisdom bilong hem. Sapos iumi gohed for lukluk gud long “olketa deep samting wea kam from God,” bae iumi gohed for garem sem hapi wea iumi kasem taem iumi lanem olketa main teaching insaed long Bible.
3. Why nao iumi need for minim gud olketa reason why iumi bilivim samting?
3 Why nao iumi need for minim “olketa deep samting” olsem? Taem iumi minim olketa biliv bilong iumi and olketa reason why iumi biliv olsem, datwan savve strongim faith bilong iumi and mekem iumi sure long olketa samting wea iumi bilivim. Bible hem talem iumi for iusim “gudfala tingting,” mekem iumi savve “pruvim long [iumiseleva] wanem nao datfala gud and stretfala and perfect will bilong God.” (Romans 12:1, 2) Taem iumi minim why Jehovah laekem iumi for duim samting followim wanfala wei, datwan savve strongim disison wea iumi mekem for obeyim hem. Dastawe, wei for savve long “olketa deep samting” savve strongim iumi for no duim olketa samting wea no stret and hem savve muvim iumi for “strong for duim olketa gudfala waka.”—Titus 2:14.
4. Wanem nao hem minim for studyim Bible?
4 Iumi mas study for minim olketa deep samting. Bat wei for study hem no minim iumi readim samting nomoa. Hem minim for lukluk gud long information wea iumi readim and hao datwan hem join witim samting wea iumi savve finis long hem. (2 Timothy 1:13) Hem minim iumi mas luksavve long olketa reason why nao datfala information sei olsem. Taem iumi studyim Bible, iumi shud ting raonem hao iumi savve iusim information wea iumi lanem for mekem olketa wise disision and for helpem olketa narawan. And tu, from ‘evri scripture hem kam from God and hem gud for iumi,’ iumi shud no studyim samfala sekson long Bible nomoa bat “evri toktok wea kamaot from mouth bilong Jehovah.” (2 Timothy 3:16, 17; Matthew 4:4) Tru nao, hem no isi samting for studyim Bible! Nomata olsem, hem samting wea iumi savve enjoyim, and tu, hem no hard tumas for minim “olketa deep samting wea kam from God.”
Jehovah Helpem Olketa wea Hambol for Minim Samting
5. Wanem kaen pipol nao savve minim “olketa deep samting wea kam from God”?
5 Nomata sapos iu no kasem olketa gudfala mark long skul and hem no wei bilong iu for duim study seleva, iu shud no tingse hem hard for iu minim olketa “olketa deep samting wea kam from God.” Taem Jesus duim ministry bilong hem long earth, Jehovah no showimaot plan bilong Hem long olketa wea wise and wea garem bigfala savve, bat hem showimaot datwan long olketa wea no skul gud and olketa man nating wea hambol for letem servant bilong God teachim olketa. Olketa olsem olketa baby taem iumi markem olketa witim olketa wea kasem big education. (Matthew 11:25; Acts 4:13) Saed long “olketa samting wea God redyim for olketa wea lovem hem,” aposol Paul hem sei long olketa Christian: “God hem iusim spirit bilong hem for showimaot olketa samting hia long iumi, from spirit hem lukluk gud insaed long evri samting, nomata olketa deep samting wea kam from God.”—1 Corinthians 2:9, 10.
6. Long wanem wei nao spirit bilong God hem lukluk gud “insaed long evri samting”?
6 Long wanem wei nao spirit bilong God hem lukluk gud “insaed long evri samting, nomata olketa deep samting wea kam from God”? Jehovah no iusim spirit bilong hem for showimaot truth long man wanwan. Bat hem iusim spirit bilong hem for leadim organization bilong hem, and datfala organization nao helpem pipol bilong God wea garem wan mind for minim Bible. (Acts 20:28; Ephesians 4:3-6) Evri kongregeson long world garem klosap sem program for studyim Bible. Insaed long olketa year wea go pas, olketa kongregeson studyim evri teaching wea insaed long Bible. Thru long kongregeson, holy spirit hem helpem pipol for garem stretfala tingting, mekem olketa savve minim “olketa deep samting wea kam from God.”—Acts 5:32.
Wanem Nao “Olketa Deep Samting wea Kam From God”?
7. Why nao plande pipol no minim “olketa deep samting wea kam from God”?
7 Iumi shud no tingse hem hard for iumi minim “olketa deep samting.” Reason why plande pipol no minim “olketa deep samting wea kam from God” hem no bikos wisdom bilong God hem barava hard for olketa minim, bat hem bikos Satan mekem pipol rejectim help wea Jehovah givim thru long organization bilong Hem.—2 Corinthians 4:3, 4.
8. Wanem nao olketa deep samting wea Paul showimaot long Ephesians chapter thri?
8 Long Ephesians chapter thri, Paul showimaot hao plande long “olketa deep samting wea kam from God” hem olketa truth insaed Bible wea plande worshiper bilong Jehovah barava minim gud, olsem hu nao datfala Seed wea God promis for sendem kam, wei wea God chusim olketa man for go long heven, and datfala Kingdom bilong Messiah. Paul hem sei: “Long olketa narafala genereson, olketa son bilong man no savve long disfala secret olsem spirit hem showimaot distaem long olketa holy aposol and profet bilong hem, wea hem nao for pipol bilong olketa nation . . . shud join witim and kamap member bilong datfala body and kasem datfala promis wea wan mind witim Christ Jesus.” Paul hem sei hao hem kasem assignment for “helpem olketa man luksavve hao nao disfala holy secret hem showaot, wea for longfala taem finis God . . . hem haedem from olketa man.”—Ephesians 3:5-9.
9. Why nao wei for minim “olketa deep samting wea kam from God” hem wanfala privilege?
9 Paul gohed for explainim hao hem will bilong God tu for “olketa paoa long heven savve long bigfala wisdom bilong God thru long kongregeson.” (Ephesians 3:10) Olketa angel kasem gud samting taem olketa minim and lukim wei wea Jehovah iusim wisdom bilong hem for deal witim Christian kongregeson. Hem nambawan privilege for iumi minim olketa samting wea olketa angel tu interest long hem! (1 Peter 1:10-12) Bihaen, Paul hem sei hao iumi shud trae hard for “minim witim olketa holy wan wanem nao waed, long, hae, and deep” bilong Christian biliv bilong iumi. (Ephesians 3:11, 18) Distaem, iumi bae storyim samfala long olketa deep samting wea maet bifor iumi no tingting raonem datwan.
Samfala Long Olketa Deep Samting
10, 11. Olsem Bible hem showimaot, wanem taem nao Jesus kamap main part bilong “seed” bilong “woman” bilong God long heven?
10 Iumi savve hao Jesus nao main part bilong datfala “seed” bilong “woman” bilong God long heven wea Genesis 3:15 story abaotem. For minim go moa diswan, maet iumi ask olsem: ‘Wanem taem nao Jesus kamap datfala Seed wea God promis for sendem kam? Waswe, hem bifor hem kam daon long earth, taem hem born olsem man, taem hem baptaes, or taem hem resurrect?’
11 God promisim hao organization bilong hem long heven, wea profesi long Bible storyim olsem “woman” bilong hem, bae garem wanfala seed wea bae killim datfala snek long hed. Bat plande thousand year go pas, and woman bilong God no garem seed wea fit for finisim Satan and olketa waka bilong hem. Dastawe, profesi bilong Isaiah storyim datfala woman olsem “woman wea no savve garem pikinini” and wea “feel sorre.” (Isaiah 54:1, 5, 6) Gogo, Jesus born long Bethlehem. Bat bihaen Jesus hem baptaes and God anointim hem witim holy spirit for kamap spiritual son bilong hem, long datfala taem nao Jehovah sei olsem: “Diswan nao Son bilong mi.” (Matthew 3:17; John 3:3) Long datfala taem nao main part bilong “seed” bilong woman hem showaot. Bihaen datwan, God anointim tu olketa follower bilong Jesus witim holy spirit. Datfala “woman” bilong Jehovah wea tingse bae hem olsem “woman wea no savve garem pikinini,” hem savve “singaot witim hapi” nao from hem garem pikinini.—Isaiah 54:1; Galatians 3:29.
12, 13. Wanem nao olketa scripture wea showimaot evri anointed Christian wea stap long earth long enitaem olketa nao datfala “faithful and wise slave”?
12 Narafala deep samting wea God showimaot long iumi hem abaotem plan bilong Hem for chusim 144,000 man from earth for go long heven. (Revelation 14:1, 4) Iumi minim and bilivim hao evri anointed Christian wea stap long earth long enitaem, olketa nao datfala “faithful and wise slave” wea Jesus sei bae givim “kaikai” for olketa wakman bilong hem long barava taem. (Matthew 24:45) Wanem nao olketa scripture long Bible wea pruvim disfala teaching hem stret? Waswe, datfala slave wea Jesus storyim hem eni Christian wea strongim olketa brata bilong hem long spiritual wei?
13 God sei olsem long nation bilong Israel: “Iufala nao olketa witness bilong mi, and servant bilong mi wea mi chusim.” (Isaiah 43:10) Bat long Nisan 11 long year 33 C.E., Jesus talem olketa leader bilong Israel hao God rejectim nation bilong olketa olsem servant bilong Hem. Hem sei: “God bae aotem datfala kingdom from iufala and givim long wanfala nation wea showimaot olketa frut bilong hem.” Jesus sei long olketa pipol: “Iufala mas savve! [God] hem lusim iufala nao.” (Matthew 21:43; 23:38) Nation bilong Israel wea olsem slave bilong Jehovah, olketa nating faithful and no wise. (Isaiah 29:13, 14) Long datfala sem day wea Jesus askem “Hu nao datfala faithful and wise slave?,” really, Jesus askem, ‘Which nation wea wise nao bae changem Israel for kamap faithful slave bilong God?’ Aposol Peter ansarem datwan taem hem story long kongregeson bilong olketa anointed Christian. Hem sei: “Iufala . . . ‘wanfala holy nation, wanfala spesol samting bilong [God].’” (1 Peter 1:4; 2:9) Datfala spiritual nation, wea hem nao “Israel bilong God,” hem kamap niufala slave bilong Jehovah. (Galatians 6:16) Olsem wei wea olketa long Israel bifor kamap datfala “servant,” evri anointed Christian tu wea stap long earth long enitaem kamap datfala “faithful and wise slave.” Hem nambawan privilege for iumi kasem spiritual “kaikai” from datfala slave bilong God!
Study Seleva Hem Samting wea Iumi Savve Enjoyim
14. Why nao wei for duim study seleva insaed Bible hem mekem man hapi winim wei for readim samting nomoa?
14 Iumi barava hapi taem iumi minim Bible long wei wea moa klia, from datwan hem strongim faith bilong iumi. Dastawe, wei for duim study seleva insaed Bible hem samting wea iumi savve enjoyim winim wei for readim samting nomoa. So taem iu readim olketa Christian pablikeson, askem iuseleva olsem: ‘Hao nao disfala information hem difren from information wea mi savve finis abaotem disfala subject? Wanem nao samfala Bible scripture or information wea mi tingim wea sapotim samting wea disfala article storyim?’ Sapos iu need for duim moa research, raetem kwestin wea iu tingim and markem goal for studyim datwan.
15. Wanem nao olketa subject wea iu savve enjoyim wei for duim research long hem, and wanem nao iu savve duim wea bae helpem iu for olowe?
15 Wanem nao olketa subject wea iu savve enjoyim wei for duim research long hem mekem iu kasem moa savve? Iumi savve study abaotem olketa difren covenant wea God mekem witim olketa man for helpem olketa. Wei for studyim olketa profesi abaotem Jesus Christ or for studyim evri verse long wanfala profesi buk long Bible bae strongim faith bilong iu. Wei for iusim datfala buk Jehovah’s Witnesses—Proclaimers of God’s Kingdoma for studyim history bilong Olketa Jehovah’s Witness long taem bilong iumi bae strongim faith bilong iu tu. And wei for studyim olketa “Kwestin From Reader” wea insaed long olketa Wastaoa magasin bae mekem iu barava minim gud samfala scripture long Bible. Ting raonem gud samting wea Bible talem for sapotim samting wea article storyim. Diswan bae helpem iu for garem “fasin for luksavve” and for minim samting. (Hebrews 5:14) Taem iu duim study seleva, raetem olketa point wea iu lanem insaed long Bible bilong iu or long wanfala pepa. Wei for duim olsem bae mekem iu and olketa narawan wea iu helpem kasem gud samting for olowe.
Helpem Olketa Young Wan for Enjoyim Wei for Studyim Bible
16. Wanem nao iu savve duim for helpem olketa young wan enjoyim wei for studyim Bible?
16 Olketa dadi and mami savve duim plande samting for helpem pikinini for laek fren gud witim God. No tingse olketa young wan bae no savve minim olketa deep samting. Sapos iu markem wanfala subject for olketa duim research long hem for famili Bible study, iu savve askem olketa abaotem wanem olketa lanem. Long famili study iu savve iusim datfala taem tu for practice witim olketa young wan hao for defendim faith bilong olketa and hao for pruvim samting wea olketa lanem hem tru. And tu, iu savve iusim datfala brochure “See the Good Land”b for teachim olketa pikinini abaotem olketa ples long Bible and for explainim point wea iufala lanem long Bible reading for evri week.
17. Why nao iumi need for balance taem iumi duim study seleva abaotem samfala Bible subject?
17 Wei for duim study seleva abaotem samfala Bible subject hem interesting and hem bae strongim faith bilong iu tu. Bat iu mas balance saed long datwan nogud datwan mekem iu no garem taem nao for prepare for olketa kongregeson meeting. Olketa meeting wea “faithful and wise slave” redyim hem narafala wei wea Jehovah teachim iumi. Nomata olsem, wei for duim research savve helpem iu for givim olketa gudfala koment long olketa meeting, olsem long Kongregeson Buk Study or long taem bilong olketa main point from Bible reading wea kamap evri week long Theocratic Ministry Skul.
18. Why nao wei for waka hard for studyim “olketa deep samting wea kam from God” hem gud samting?
18 Wei for duim study seleva for minim moa samting insaed Word bilong God savve helpem iu for fren gud witim Jehovah. Bible hem storyim gudfala samting wea iu savve kasem from wei for duim study olsem. Hem sei: “Long sem wei wea wisdom hem protectim man, selen tu savve protectim man; bat savve hem moabeta from wisdom nao mekem man gohed for laef.” (Ecclesiastes 7:12) So iu bae kasem gud samting from wei wea iu waka hard for barava minim gud olketa truth wea kam from God. Bible promisim hao olketa wea gohed for lukluk gud long olketa samting hia “bae barava savve long God.”—Proverbs 2:4, 5.
[Olketa Footnote]
a Olketa Jehovah’s Witness pablisim.
b Olketa Jehovah’s Witness pablisim.
Waswe, Iu Savve Explainim?
• Wanem nao “olketa deep samting wea kam from God”?
• Why nao iumi shud no stop for studyim olketa deep samting?
• Why nao evri Christian fit for minim “olketa deep samting wea kam from God”?
• Wanem nao iu savve duim for kasem barava gud samting from “olketa deep samting wea kam from God”?
[Piksa long page 29]
Wanem taem nao Jesus kamap datfala Seed wea God promis for sendem kam?
[Piksa long page 32]
Olketa dadi and mami savve markem olketa subject for olketa pikinini duim research long hem for famili study