Wanem Nao Kingdom Bilong God?

WANEM nao main samting wea Jesus preach abaotem? Jesus seleva talem hao diswan hem Kingdom bilong God. (Luke 4:​43) Taem hem story long pipol, plande taem hem storyim disfala Kingdom. Waswe, olketa minim tu? Waswe, olketa askem hem wanem nao datfala Kingdom? Nomoa. No eni kwestin olsem stap long fofala Gospel. Waswe, pipol hia savve gud long Kingdom bilong God?

Olketa Scripture wea olketa Jew tinghae long hem barava storyim datfala Kingdom and wanem nao hem bae duim. Iumi tu savve lanem staka samting distaem abaotem Kingdom taem iumi readim Bible. Iumi bae lanem sevenfala tru samting long Bible abaotem Kingdom. Olketa Jew long taem bifor savve finis long thrifala tru samting. Jesus and olketa aposol bilong hem talemaot nara thrifala tru samting. Lastfala tru samting hem showaot long taem bilong iumi.

1. Kingdom bilong God hem trufala gavman wea bae stap for olowe. Firstfala profesi long Bible hem showimaot hao God bae sendem kam samwan for sevem olketa faithful man. Nem bilong hem “seed.” Evri nogud samting wea Adam, Eve, and Satan wea bighed duim, disfala seed nao bae finisim. (Genesis 3:​15) Longfala taem bihaen diswan, King David wea faithful kasem wanfala nius abaotem disfala “seed” or Messiah. Hem bae rulim disfala Kingdom. Disfala gavman bae difren from olketa narafala gavman. Hem bae stap for olowe.​—2 Samuel 7:​12-14.

2. Kingdom bilong God bae finisim evri gavman bilong man. Profet Daniel kasem wanfala dream abaotem olketa strongfala gavman start from bifor kam kasem taem bilong iumi. Disfala dream hem barava interesting. Hem olsem: “Long taem bilong olketa [lastfala] king hia God bilong heven bae startim wanfala kingdom wea bae nating savve finis. And bae no eni nara pipol tekova long datfala kingdom. Diswan bae smasem and finisim evri kingdom hia, and hem nomoa bae stap for olowe.” So evri kingdom, or gavman long disfala world and olketa nogud samting wea olketa duim bae finis for olowe. Profesi bilong Daniel hem talem hao Kingdom bilong God hem klosap for rulim full earth. (Daniel 2:​44, 45) Trufala samting nao, disfala gavman seleva nomoa bae stap.a

3. Kingdom bilong God bae finisim war, wei for sik, hangre, and dae tu. Staka profesi long Bible showimaot wanem Kingdom bilong God bae duim long disfala earth. Disfala kingdom bae duim samting wea no eni narafala gavman savve duim nomata long taem bifor or enitaem long future. Tingim diswan, evri samting for faet bae finis for olowe! “Hem bae finisim olketa war . . . evriwea long earth.” (Psalm 46:9) Long datfala taem no eni doctor, no eni hospital and no eni sik bae stap. “No eniwan bae sei: ‘Mi sik.’” (Isaiah 33:24) No eniwan bae hangre, evriwan bae kaikai gud. “Staka kaikai bae stap long earth.” (Psalm 72:16) No eni dae, no eni beregraon, and no eniwan bae sorre from man hem dae. Disfala enemy bilong iumi dae, hem bae nomoa nao. God “bae finisim dae for olowe, and Lord Jehovah bae finisim krae bilong evri man.”​—Isaiah 25:8.

4. God nao chusim King for Kingdom bilong hem. Disfala Messiah hem no chusim hemseleva and no eni man wea no perfect nao chusim hem. Jehovah God seleva nao chusim hem. Tufala nem Messiah and Christ showimaot diswan. Tufala nem hia hem minim “Anointed Wan” long firstfala languis wea olketa raetem. Jehovah nao anointim hem for disfala spesol waka for kamap King. God story olsem abaotem hem: “Servant bilong mi, wea mi hol strong long hem! Datwan wea mi chusim, wea mi hapi long hem! Mi givim spirit bilong mi long hem. Hem bae mekem justice kamap long olketa nation.” (Isaiah 42:1; Matthew 12:17, 18) Creator bilong iumi nomoa hem savve hu nao fit for rulim iumi.

5. King long Kingdom bilong God hem showimaot long evri man wei wea hem fit. Jesus bilong Nazareth nao datfala Messiah wea olketa profesi storyim. Hem born long famili laen wea God chusim. (Genesis 22:18; 1 Chronicles 17:11; Matthew 1:1) Hem duim evri samting wea olketa profesi talem abaotem Messiah taem hem stap long earth. Heven tu talemaot hem nao datfala Messiah. Long wanem wei? God hem story kam from heven and hem talemaot hao diswan nao Son bilong Hem. Olketa angel tu talemaot hao Jesus nao datfala Messiah wea olketa profesi storyim. Plande taem staka pipol lukim Jesus taem hem duim olketa mirakol wea showimaot hem kasem paoa from God.b Jesus hem evritaem showimaot hem fit for rulim iumi. Hem laek helpem pipol no from hem kasem paoa nomoa bat from hem laekem tumas for duim datwan. (Matthew 8:​1-3) Hem no selfish, hem kea for pipol, hem no fraet and hem hambol. Evri story abaotem laef bilong hem long earth hem stap long Bible for evriwan savve readim.

6. Kingdom bilong God garem 144,000 wea rul witim Jesus. Jesus talem hao samfala tu bae rul witim hem long heven. Nem wea hem givim long grup hia hem “smolfala sekson bilong sheepsheep.” (Luke 12:32) Samfala year bihaen, aposol John hem lukim namba bilong disfala smol sekson hem 144,000. Olketa bae garem nambawan waka long heven for rul olsem olketa king and olketa priest witim Jesus.​—Revelation 5:​9, 10; 14:​1, 3.

7. Kingdom bilong God hem rul long heven distaem and hem redi for rulim full earth. Disfala mek-seven tru samting hem barava important for iumi. Staka samting stap long Bible wea showimaot Jesus kasem paoa finis for kamap King long heven. Hem rul long heven distaem and klosap nao hem bae rulim full earth and mekem evri profesi kamap tru. Bat hao nao iumi savve Kingdom bilong God hem rul long heven distaem? Long wanem taem nao bae hem start for rulim disfala earth?

[Footnote]