Wanfala Prea wea Pipol Talem Evriwea Long World

TINGIM wei wea staka million pipol askem sem samting. Olketa prea long man wea garem bigfala paoa long universe for duim samting wea olketa askem. Bat staka long olketa no savve wanem nao olketa askem. Waswe, kaen samting olsem savve happen? Ia, hem happen evriday. Wanem nao olketa pipol hia askem? Olketa askem Kingdom bilong God for kam!

Wanfala report hem showimaot samting olsem 37,000 difren lotu nao sei olketa Christian and Jesus Christ hem Leader bilong olketa. Winim tu thousand million pipol nao joinim olketa lotu hia. Staka long olketa talem disfala Lord’s Prea wea stap long Matthew 6:9-13. Waswe, iu savve long disfala prea? Jesus teachim olketa follower bilong hem olsem: “Dadi bilong mifala wea stap long heven, mifala laekem for evriwan mas ting long nem bilong iu olsem hem holy. Mekem kingdom bilong iu kam. Mekem will bilong iu kamap long heven and long earth.”​—Matthew 6:​9, 10.

For staka handred year finis, pipol wea lotu talem disfala prea evritaem long church bilong olketa. Long taem wea olketa stap gud and long taem olketa kasem trabol, olketa famili or man wanwan savve baeheartim disfala prea. Olketa savve talem witim full heart. Olketa narawan baeheartim disfala prea bat olketa no interest long mining bilong hem. Hem no olketa long Christian lotu nomoa wea prea for Kingdom bilong God for kam.

Pipol wea No Christian Tu Savve Prea Olsem

Olketa Jew garem wanfala prea for talem taem samwan long famili hem dae. Nomata disfala prea no story tumas abaotem dae, olketa savve iusim long dae bilong wanfala man. Disfala prea hem olsem: “Maet [God] mekem Kingdom bilong hem kam long taem wea iu laef . . .  for kam kwiktaem.”a Nara oldfala prea bilong olketa hem storyim hao Kingdom bilong Messiah bae kam from laen bilong David.

Olketa narawan wea no Christian laekem tu disfala Kingdom bilong God. Wanfala niuspepa long India talem hao wanfala bigman bilong lotu long India long mek-19 century wea laekem olketa Hindu, Muslim, and Christian for kamap wan, hem talem olsem: “Kingdom bilong God bae hem kam taem evri kantri kamap wan.” Principal long wanfala Muslim skul long Strathfield, Australia, hem raet olsem long wanfala niuspepa: “Olsem evri Muslim, mi biliv hao Jesus bae kam bak and mekem trufala Kingdom bilong God.”

Tru tumas, staka million pipol distaem laekem and prea for datfala Kingdom bilong God. Bat tingim disfala tru samting.

Maet iu savve finis mifala Olketa Jehovah’s Witness nao wakem disfala magasin. Mifala go long haos bilong pipol and storyim Bible witim olketa. Long distaem, mifala duim disfala waka long 236 kantri long world long winim 400 languis. Kingdom bilong God nao hem main samting wea mifala preach abaotem. Lukim full nem bilong disfala magasin, Wastaoa wea Talemaot Kingdom Bilong Jehovah. Plande taem mifala askem pipol sapos olketa prea for datfala Kingdom. Staka talem hao olketa duim olsem. Bat taem mifala askem olketa wanem nao datfala Kingdom, plande pipol talem, “mi no savve,” or olketa garem difren tingting abaotem datwan.

Why nao staka pipol prea for samting wea olketa no minim? Waswe, hem from Kingdom bilong God hem hard tumas for pipol minim? Nomoa. Bible hem storyim gud disfala Kingdom. And tu, message long Bible abaotem Kingdom savve givim hope long man nomata hem stap long taem bilong trabol. Iumi bae lanem long mek-tu article disfala hope wea Bible hem storyim. And long mek-thri article bae iumi lanem wanem taem nao datfala prea bilong Jesus abaotem disfala Kingdom for kam bae kasem ansa.

[Footnote]