Long Wanem Taem Nao Kingdom Bilong God Bae Kam?

“LORD, bae iu startim moa kingdom bilong Israel long distaem?” (Acts 1:6) Olketa aposol barava laek for savve wanem taem nao Kingdom bilong Jesus bae start. Kam kasem distaem bihaen samting olsem 2,000 year, pipol barava laek for savve long wanem taem nao Kingdom bilong God bae kam.

Maet iu tingse Jesus mas storyim wanem taem nao Kingdom bae kam from diswan nao main samting wea hem storyim long preaching waka bilong hem. Diskaen tingting hem stret from hem nao barava samting wea hem storyim! Staka taem hem story abaotem wanfala taem wea hem bae “stap.” (Matthew 24:37) Datfala taem wea Jesus stap hem join witim start bilong datfala Kingdom wea hem rulim. Wanem nao for stap hem minim? Distaem iumi bae storyim fofala tru samting wea Bible talem abaotem taem wea Jesus hem stap.

1. Taem wea Jesus stap hem start longfala taem bihaen hem dae. Jesus talem wanfala tokpiksa wea hem storyim hemseleva olsem “wanfala man wea born long famili bilong olketa chief [wea] go long wanfala farawe kantri for kasem paoa bilong hem olsem king,” or for “kasem kingdom.” (Luke 19:12; footnote) Hao nao datfala profesi tokpiksa hem kamap tru? Jesus hem dae and bihaen hem laef bak hem go long “farawe kantri” wea datwan nao long heven. Long narafala tokpiksa wea Jesus talem, hem storyim hao kakam bilong hem olsem king bae kamap “bihaen longfala taem.”​—Matthew 25:19.

Samfala year bihaen Jesus go ap long heven, aposol Paul talem diswan: “Disfala man [Jesus] offerim wanfala sakrifaes for olketa sin for olowe and sidaon long raet saed bilong God, and start long datfala taem hem weit go kasem taem olketa enemy bilong hem bae kamap olsem stul for putim leg bilong hem.” (Hebrews 10:12, 13) Diswan minim bihaen Jesus kasem heven hem mas weit for longfala taem. Taem for weit hem finis taem Jehovah God mekem Son bilong hem King long datfala Kingdom wea God promisim for longfala taem. Long datfala taem nao taem wea Jesus stap hem start. Waswe, pipol long earth bae lukim disfala nambawan samting?

2. Taem wea Jesus stap pipol no lukim witim eye bilong olketa. Tingim hao Jesus storyim saen for showimaot hem stap. (Matthew 24:3) Waswe, pipol needim eni saen sapos taem wea hem stap olketa bae lukim witim eye bilong olketa? For explainim diswan, tingim sapos iu gogo for lukim saedsea. Maet iu lukim olketa saen wea stap long saed road for showim iu wea for go, bat taem iu kasem saedsea and lukim sea finis, waswe, iu need for lukim wanfala saen moa wea olketa raetem “Sea” long hem? Barava nomoa nao! Iu bae no needim eni saen nao from iu lukim sea finis witim eye bilong iu.

Jesus storyim saen bilong taem wea hem stap for helpem pipol for luksavve long samting wea bae happen long heven and no for showimaot samting wea pipol savve lukim witim eye bilong olketa. Dastawe Jesus tok olsem: “Taem kingdom bilong God hem kam, man bae no lukim witim eye bilong hem.” (Luke 17:20) Long wanem wei nao saen hia showimaot for pipol long earth hao Jesus hem stap?

3. Taem wea Jesus stap earth bae garem staka trabol. Jesus talem hao taem wea hem kamap King long heven, earth bae garem olketa faet, taem bilong hangre, earthquake, nogud sik, and fasin for brekem law. (Matthew 24:​7-​12; Luke 21:10, 11) Wanem nao mekem diskaen wei for safa kamap? Bible hem storyim hao Satan wea hem “ruler bilong disfala world,” hem kros tumas bikos hem savve taem bilong hem barava short from taem wea Jesus kamap King hem start. (John 12:31; Revelation 12:​9, 12) Long taem bilong iumi staka samting happen wea showimaot Satan hem kros and iumi stap long taem wea Jesus hem stap. Start kam long datfala year 1914 wea olketa sei hem wanfala difren year, staka samting wea happen evriwea long world hem barava narawe nao.

Olketa samting wea iumi storyim maet hem here nogud, bat hem no olsem. Olketa samting hia showimaot hao distaem Jesus hem rulim Kingdom long heven. Klosap nao disfala kingdom bae rulim disfala earth. Hao nao pipol bae minim gud disfala Kingdom mekem olketa tu savve acceptim and obeyim hem?

4. Long taem wea Jesus stap preaching waka bae gohed evriwea long world. Jesus talem hao taem wea hem stap hem bae olsem “taem bilong Noah.”a (Matthew 24:37-​39) Noah hem no buildim ark nomoa bat hem “man wea preach abaotem raeteous fasin.” (2 Peter 2:5) Noah warnim pipol hao taem for God judgem olketa hem klosap. Jesus talem hao long taem wea hem stap olketa follower bilong hem long earth bae duim sem samting tu. Hem talem disfala profesi: “Olketa bae preachim disfala gud nius bilong kingdom evriwea long earth for givim witness long evri nation; and then end bae kam.”​—Matthew 24:14.

Iumi lanem finis long disfala magasin hao Kingdom bilong God bae finisim evri gavman long disfala world. Disfala preaching waka hem warnim pipol hao disfala Kingdom hem klosap nao for duim datwan and hem givim chance for pipol stap sef long datfala Kingdom. Important kwestin hem olsem, Wanem nao bae iu duim?

Waswe, Bae Iu Kasem Gud Samting From Kingdom Bilong God?

Jesus preachim wanfala nambawan hope. Bihaen bighed fasin long Eden, Jehovah God mekem plan for wanfala kingdom wea bae stretem evri samting. Disfala kingdom bae mekem olketa man wea faithful for gud bak moa and laef olowe long paradaes long earth. From iumi savve disfala kingdom hem rul long heven distaem, diswan barava mekem iumi hapi fogud. Hem no wanfala laea samting, bat hem wanfala tru samting!

King wea God markem hem rulim disfala kingdom distaem nomata olketa enemy stap yet. (Psalm 110:2) Long disfala world wea staka pipol no savve long God, Jesus hem duim wanem Dadi bilong hem laekem long wei wea hem lukaotem pipol wea laek savve long God and worshipim hem “witim spirit and truth.” (John 4:​24) Nomata pipol garem difren kala skin, olo or young, or difren living, olketa garem chance for laef olowe taem Kingdom bilong God hem rulim olketa. (Acts 10:34, 35) Mifala barava laekem iu for mekius long disfala nambawan chance wea iu garem distaem. Lanem Kingdom bilong God distaem mekem iu savve enjoyim laef for olowe taem disfala kingdom rulim disfala earth!​—1 John 2:​17.

[Footnote]

[Piksa long page 8, 9]

Olketa nogud samting iumi herem evritaem showimaot hao klosap nao iumi bae kasem olketa gudfala samting

[Credit Line]

Antiaircraft gun: U.S. Army photo