“Gohed Lukluk Gud Long Ministry wea Iu Kasem From Lord”
“Gohed lukluk gud long ministry wea iu kasem from Lord, mekem iu duim gud datwan.”—COL. 4:17.
1, 2. Wanem responsibility nao olketa Christian garem long pipol?
IUMI garem wanfala barava important responsibility long pipol. Samting wea olketa disaedem distaem bae showimaot sapos olketa bae laef or dae long taem bilong “datfala big trabol.” (Rev. 7:14) Bible buk bilong Proverbs hem talem diswan: “Sevem olketa wea gogo for dae; and olketa wea no stedy taem olketa wakabaot go for dae, plis sevem olketa.” Hem barava tru nao! Sapos iumi no warnim pipol abaotem samting wea olketa mas chusim, maet iumi nao guilty long dae bilong olketa. Verse bihaen datwan hem sei tu: “Sapos iu tok olsem: ‘Mifala no savve long diswan,’ God wea lukluk gud long evri heart bae luksavve long diswan, and God wea lukluk long soul bilong iu bae hem savve and bae hem changem bak long olketa man long earth fitim waka wea olketa duim.” Tru tumas, olketa servant bilong Jehovah no fit for talem hao ‘olketa no savve’ long wei wea pipol stap long danger.—Prov. 24:11, 12.
2 Jehovah tinghae long laef. Hem encouragem olketa servant bilong hem for traem best for helpem pipol. Evri servant bilong God mas talem long pipol datfala message insaed Word bilong God wea savve sevem laef bilong olketa. Waka wea iumi duim hem klosap semsem olsem waka bilong man for talem warning taem hem lukim danger samting hem klosap for happen. Iumi no laek for guilty long dae bilong pipol. (Ezek. 33:1-7) Dastawe hem barava important for iumi gohed waka hard for “preach”!—Readim 2 Timothy 4:1, 2, 5.
3. Disfala article and nara tufala bihaen bae storyim olketa wanem samting?
3 Disfala article bae showim iu hao for winim olketa hard samting wea iu feisim taem iu duim ministry wea savve sevem laef bilong pipol, and hao iu savve helpem staka pipol. Article bihaen hem abaotem hao iu savve mekem savve bilong iu for teachim olketa barava important truth hem kamap moa big. Mek-thri article bae storyim samfala gud samting wea olketa Christian brata and sista evriwea long world kasem long ministry. Bat bifor iumi lukluk long olketa topic hia, hem gud for storyim hao iumi stap long taem wea barava important tumas.
Staka No Garem Eni Hope
4, 5. Wanem nao kasem olketa man distaem, and diswan mekem staka for duim wanem?
4 Olketa problem long world distaem showimaot iumi stap long taem wea world distaem bae finis and datwan hem klosap nao. Jesus and olketa disaepol bilong hem talem hao olketa nogud samting wea kasem olketa man distaem hem showimaot world hem stap long “olketa last day” bilong hem. Olketa samting olsem war, bigfala hangre, earthquake, and narafala trabol wea spoelem olketa man olketa part long wanfala taem wea olsem “woman hem start for feel soa for bornem pikinini.” Fasin for brekem law, selfish fasin, and fasin wea againstim God hem big tumas. Nomata pipol wea traem best for obeyim olketa Bible standard, olketa faendem disfala taem hem “nogud taem wea hard for deal witim” tu.—Matt. 24:3, 6-8, 12; 2 Tim. 3:1-5.
5 Bat bigfala haf bilong olketa man no luksavve why nao olketa problem happen distaem. Diswan mekem staka pipol wari abaotem living and famili bilong olketa tu. Taem wanfala long famili hem dae or narafala nogud samting kasem pipol, diswan mekem olketa barava safa. Pipol hia no garem hope nao from olketa no savve why nao evri samting hia happen.—Eph. 2:12.
6. Why nao “Bigfala Babylon” no fit for helpem pipol bilong hem?
6 “Bigfala Babylon,” wea minim evri giaman religion, hem nating comfortim olketa man. Bat ‘olketa man wea stap long earth durong witim hem, olsem man wea drinkim wine gogo hem drunk,’ wea diswan minim hem mekem staka pipol konfius long spiritual wei. And tu, from giaman religion hem olsem wanfala jury woman, hem switim and bossim “olketa king bilong earth” long wei for iusim olketa giaman teaching and spiritism for mekem staka man followim nomoa olketa gavman bilong man. From diswan, olketa giaman religion kasem bigfala paoa, bat long semtaem olketa lusim evribit trufala teaching.—Rev. 17:1, 2, 5; 18:23.
7. Staka man gogo for kasem wanem, bat hao nao iumi savve helpem samfala?
7 Jesus talem hao klosap evri man nao gogo followim bigfala road wea lead go for dae. (Matt. 7:13, 14) Samfala followim datfala big road bikos olketa min for rejectim samting wea Bible teachim, bat plande narawan wea gogo long datfala road no savve long datwan bikos olketa bigman bilong olketa no showim long olketa wanem Jehovah laekem olketa for duim. Sapos olketa herem stretfala reason from Bible for changem living bilong olketa, maet samfala duim datwan. Bat olketa wea stap long Bigfala Babylon and gohed for rejectim olketa standard insaed Bible bae no sev long taem bilong “datfala big trabol.”—Rev. 7:14.
Gohed for Preach and “Nating Givap”
8, 9. Wanem nao olketa Christian long first century duim taem pipol againstim olketa, and why nao olsem?
8 Jesus talem hao olketa disaepol bilong hem bae preachim gud nius abaotem Kingdom and mekem pipol kamap disaepol. (Matt. 28:19, 20) Dastawe olketa tru Christian evritaem ting long waka for preach olsem samting wea showimaot olketa faithful long God, and hem wanfala part long faondeson bilong faith bilong olketa. From diswan, olketa firstfala disaepol bilong Jesus no givap nomata pipol againstim olketa. Olketa depend long Jehovah for strongim olketa, and olketa prea for hem mekem olketa fit for gohed “talemaot toktok bilong [hem] and no fraet.” Fitim diswan, Jehovah givim holy spirit long olketa and mekem olketa no fraet for talemaot toktok bilong Hem.—Acts 4:18, 29, 31.
9 Taem raf persecution kamap, waswe, olketa follower bilong Jesus stop nao for preach abaotem gud nius? Barava nomoa nao! From olketa bigman bilong Jew religion kros tumas, olketa kasholem olketa aposol, tok strong long olketa, and killim olketa. Nomata olsem, olketa aposol “gohed and nating givap for teach and talemaot gud nius abaotem datfala Christ, wea hem nao Jesus.” Olketa barava luksavve hao olketa mas “obeyim God olsem ruler winim olketa man.”—Acts 5:28, 29, 40-42.
10. Wanem nao olketa test wea olketa Christian distaem feisim, bat wanem samting nao savve kamaot from gudfala fasin bilong olketa?
10 Long distaem, plande long iumi no stap long prison or no eniwan killim iumi from preaching waka wea iumi duim. Nomata olsem, evri tru Christian kasem olketa test and hard taem. Olsem example, from conscience bilong iu kasem training from Bible, maet samting iu duim or wei bilong iu hem difren from nara pipol. Pipol wea iu waka witim, skul witim, or olketa neiba maet ting iu wanfala krangge man bikos iu duim olketa samting wea Bible talem. Nomata wanem nao tingting bilong olketa, datwan shud no stopem iu for duim samting wea stret. Nomata world hem dark long spiritual wei, olketa Christian mas “shaen olsem laet” insaed long world. (Phil. 2:15) Maet samfala wea garem gudfala heart bae lukim datwan and tinghae long olketa gudfala samting wea iu duim, and from diswan givim glory long Jehovah.—Readim Matthew 5:16.
11. (a) Wanem nao samfala pipol savve duim taem iumi preach long olketa? (b) Wanem hard taem nao aposol Paul feisim, and wanem nao hem duim taem datwan kasem hem?
11 For gohed preach abaotem gud nius bilong Kingdom, iumi needim fasin for no fraet. Samfala pipol, maet olketa relative tu, savve tok spoelem iu or trae for mekem iu feel wikdaon long narafala wei. (Matt. 10:36) Olketa killim aposol Paul tu-thri taem bikos long preaching waka wea hem duim. Diswan nao wanem hem talem abaotem datwan: ‘Bihaen mifala safa and olketa duim nogud samting long mifala, mifala kasem strong from God for no fraet for talem iufala gud nius bilong God. Nomata olsem, mifala stragol for duim datwan.’ (1 Thess. 2:2) Masbi Paul barava no fraet mekem hem savve gohed for preach abaotem gud nius bihaen olketa kasholem hem, aotem kaleko bilong hem, hitim hem witim stik, and putim hem long prison. (Acts 16:19-24) Wanem nao mekem hem no fraet? Wei wea hem barava laek tumas for duim ministry bilong hem nao helpem hem for no fraet.—1 Cor. 9:16.
12, 13. Wanem nao olketa hard samting wea kasem samfala, and wanem nao olketa duim for trae winim olketa hard samting hia?
12 Hem no isi tu for gohed strong for preach long olketa territory wea pipol no savve stap long haos or pipol no mas interest for herem message abaotem Kingdom. Wanem nao iumi savve duim sapos iumi feisim kaen samting olsem? Maet iumi need for barava no fraet for story long pipol long enitaem. And tu, maet iumi mas markem olketa difren taem long day or long week for preach, or for preach long olketa ples wea iumi savve faendem staka pipol.—Markem witim John 4:7-15; Acts 16:13; 17:17.
13 Olketa narafala hard samting wea savve affectim waka bilong plande for preach nao hem wei for olo and health bilong olketa no mas gud. Sapos iu nao wanfala olsem, no feel wikdaon. Jehovah savve long samting wea iu no fit for duim and hem tinghae long wanem iu fit for duim. (Readim 2 Corinthians 8:12.) Nomata wanem hard samting iu feisim, olsem wei wea pipol againstim iu, pipol no interest, or health bilong iu no mas gud, duim best bilong iu for storyim gud nius long nara pipol.—Prov. 3:27; markem witim Mark 12:41-44.
‘Gohed Lukluk Gud Long Ministry Bilong Iu’
14. Wanem example nao aposol Paul showimaot for olketa nara Christian, and wanem kaonsel nao hem talem long olketa?
14 Aposol Paul hem ting long ministry bilong hem olsem samting wea barava important, and hem encouragem olketa nara Christian for duim sem samting tu. (Acts 20:20, 21; 1 Cor. 11:1) Archippus hem wanfala Christian long first century wea Paul barava encouragem hem. Long leta wea Paul raetem for olketa long Colossae, hem sei olsem: “Talem Archippus for gohed lukluk gud long ministry wea [hem] kasem from Lord, mekem [hem] duim gud datwan.” (Col. 4:17) Iumi no savve hu nao Archippus or wanem kaen living nao hem garem bat luk olsem hem acceptim datfala waka for preach. Sapos iu wanfala Christian wea dedicate finis, iu tu garem waka for preach. Waswe, iu gohed for lukluk gud long ministry mekem iu duim gud datwan?
15. Christian wea dedicate mas duim wanem samting, and wanem nao olketa kwestin wea iumi mas ting raonem?
15 Bifor iumi baptaes, iumi dedicatem laef bilong iumi long Jehovah long wei for prea from heart. Diswan minim iumi disaed strong for duim will bilong hem. Dastawe iumi shud askem iumiseleva olsem, ‘Waswe, wei for duim will bilong God nao hem barava nambawan samting long laef bilong mi?’ Maet iumi garem olketa difren responsibility wea Jehovah laekem iumi for duim, olsem wei for lukaftarem famili. (1 Tim. 5:8) Bat wanem nao iumi duim long olketa narataem, and tu, iumi iusim strong bilong iumi for duim wanem? Wanem nao nambawan samting long laef bilong iumi?—Readim 2 Corinthians 5:14, 15.
16, 17. Olketa Christian wea no garem staka responsibility garem chance for duim olketa wanem samting?
16 Waswe, iu wanfala young wan wea baptaes, wea finis skul no longtaem go nomoa or iu klosap for finis skul? Maet iu no garem olketa bigfala famili responsibility. So wanem nao iu plan for duim bihaen iu finis skul? Olketa wanem samting wea iu disaed for duim nao bae helpem iu for followim promis wea iu talem for duim will bilong Jehovah? Plande barava hapi and satisfae bikos olketa changem samfala samting long living mekem olketa savve pioneer.—Ps. 110:3; Eccl. 12:1.
17 Maet iu wanfala young wan. Iu waka for selen bat iu no garem responsibility for lukaftarem eni narawan. Hem tru, maet iu garem samfala waka insaed long kongregeson and datwan mekem iu hapi. Bat waswe, iu savve barava hapi go moa? Waswe, iu tingting for duim samfala nara samting tu insaed long ministry bilong iu? (Ps. 34:8; Prov. 10:22) Long samfala ples, bigfala waka stap for talemaot disfala message bilong truth wea savve mekem man kasem laef. Waswe, iu savve changem samfala samting long laef bilong iu, maet for serve long wanfala ples wea garem need for samfala moa pablisa for preach abaotem gud nius?—Readim 1 Timothy 6:6-8.
18. Wanem nao samfala change wea wanfala young hasband and waef duim, and wanem nao tufala kasem from datwan?
18 Tingim example bilong Kevin and Elena wea stap long United States.a From tufala just marit, tufala tingse tufala mas peim wanfala haos from hem nao samting wea young pipol wea just marit savve duim long ples olketa stap. Tufala waka for selen mekem olketa savve garem gudfala living. Bat from tufala busy long waka and olketa nara waka long haos, olketa garem lelebet taem nomoa for duim ministry. Olketa luksavve hao olketa iusim full strong and taem bilong olketa for lukaftarem material samting bilong olketa nomoa. Bat taem tufala lukim wanfala hasband and waef wea pioneer and garem living wea simpol, Kevin and Elena disaed for changem samting wea important long laef bilong tufala. Bihaen tufala prea long Jehovah for helpem olketa disaed long wisefala wei, tufala salem haos and muv go long haos wea moa smol. Elena hem waka part-taem and kamap wanfala pioneer. From Kevin herem olketa gudfala samting wea waef bilong hem kasem long ministry, hem finis from waka bilong hem and start for pioneer tu. Gogo, tufala muv go long wanfala kantri long South America for serve long ples wea olketa needim samfala moa for preach abaotem Kingdom. Kevin hem sei: “Mitufala garem marit wea hapi, bat taem mifala waka hard for kasem olketa spiritual goal, mitufala barava hapi go moa.”—Readim Matthew 6:19-22.
19, 20. Why nao wei for preach abaotem gud nius hem barava important waka distaem?
19 Waka for preach abaotem gud nius nao hem barava important waka wea gohed long earth distaem. (Rev. 14:6, 7) Disfala waka hem part long wei for evriwan mas ting long nem bilong Jehovah olsem hem holy. (Matt. 6:9) Message long Bible wea staka thousand pipol acceptim evri year hem mekem laef bilong olketa kamap moabeta, and diswan savve sevem olketa. Bat aposol Paul hem askem disfala kwestin: “Hao nao olketa bae herem sapos no eniwan preach?” (Rom. 10:14, 15) Bae hem hard nao! Hem bae gud tumas sapos iu duim best bilong iu for duim evribit ministry bilong iu!
20 Taem iu kamap wanfala gudfala teacher, iu savve helpem pipol for minim wei wea taem iumi stap long hem barava hard tumas, and tu, hao gudfala or nogud samting savve kamaot from wanem olketa disaedem. Nextfala article bae storyim hao for kamap gudfala teacher.
[Footnote]
a Mifala changem olketa nem.
Hao Nao Bae Iu Ansa?
• Wanem responsibility nao olketa Christian garem long pipol?
• Hao nao iumi savve deal witim wei wea pipol againstim preaching waka bilong iumi?
• Long wanem wei nao iumi savve duim ministry wea iumi kasem from Jesus?
[Piksa long page 5]
Man needim fasin for no fraet taem pipol againstim hem
[Piksa long page 7]
Wanem nao iu savve duim sapos iu preach long olketa territory wea pipol no savve stap long haos?