Fren Gud Witim God
Hem Feel Sorre Long Iumi
FOR tingim feeling bilong nara pipol iumi mas barava feel sorre long olketa. Jehovah God tingim feeling bilong pipol winim eni man. Hem barava feel sorre taem pipol bilong hem safa. Hao nao iumi savve? Samting wea Jesus talem and duim taem hem stap long earth barava showimaot nambawan wei bilong Jehovah for feel sorre long pipol. (John 5:19) Tingim disfala story long John 11:33-35.
Taem fren bilong Jesus, Lazarus, hem dae, Jesus go long vilij bilong hem. Tufala sista bilong Lazarus, Mary and Martha, barava sorre fogud. Jesus lovem tumas disfala famili. (John 11:5) Wanem nao bae hem duim? Story gohed olsem: “Taem Jesus lukim [Mary] krae and olketa Jew wea kam witim hem olketa krae, hem barava sorre fogud and talem: ‘Wea nao iufala putim hem?’ Olketa talem hem: ‘Lord, iu kam lukim.’ Jesus hem krae nao.” (John 11:33-35) Why nao Jesus hem krae? Iumi savve fren bilong hem Lazarus dae, bat Jesus klosap mekem hem laef bak. (John 11:41-44) Waswe, eni nara samting mekem Jesus for sorre and krae?
Lukim moa toktok long John 11:33-35. Taem Jesus lukim Mary and olketa wea stap witim hem krae, hem “barava sorre fogud.” Datfala toktok long Greek languis minim feeling wea barava strong.a Samting wea Jesus lukim barava mekem hem sorre fogud. Taem hem start krae, datwan showimaot hem garem feeling wea barava strong. Jesus barava feel sorre long pipol. Waswe, enitaem iu start krae bikos samwan wea iu lovem hem krae?—Romans 12:15.
Wei bilong Jesus for tingim feeling bilong pipol and feel sorre long olketa helpem iumi for luksavve long olketa wei bilong Dadi bilong hem Jehovah. From Jesus barava showimaot olketa wei bilong Dadi bilong hem, datwan mekem hem for tok olsem: “Man wea lukim mi hem lukim Dadi tu.” (John 14:9) So taem iumi readim hao “Jesus hem krae,” datwan barava showimaot hao Jehovah tu feel sorre long olketa wea worshipim hem. Samfala man wea raetem Bible talem sem samting tu. (Isaiah 63:9; Zechariah 2:8) Jehovah God barava tingim feeling bilong pipol!
Iumi laekem man wea tingim feeling bilong iumi and savve feel sorre. Taem iumi sorre or feel nogud, iumi laek story witim man wea minim feeling bilong iumi and savve feel sorre. Jehovah savve tingim feeling bilong iumi winim eni man, hem barava feel sorre long iumi and savve wanem nao mekem iumi krae! Diswan mekem iumi barava laek for fren witim God!—Psalm 56:8.
[Footnote]
a Long Greek languis, “start krae nao” hem savve minim wei for “krae kwaet nomoa.” Bat languis toktok for krae wea Mary and olketa wea stap witim hem duim savve minim “krae big, or singaot.”