KWESTIN FROM READER

Olsem John 11:35 hem storyim, why nao Jesus krae bifor hem mekem Lazarus laef bak?

Taem famili member or fren hem dae, iumi krae bikos bae iumi missim hem. Nomata Jesus lovem Lazarus, reason why hem krae hem no bikos Lazarus hem dae. Datfala story showimaot hem krae bikos hem sorre for olketa famili member and fren bilong Lazarus.—John 11:36.

Taem Jesus herem Lazarus hem sik, hem no go kwiktaem long haos bilong Lazarus for healim hem. Bible sei: “Taem [Jesus] herem Lazarus hem sik, hem weit for tufala day moa long ples wea hem stap.” (John 11:6) Why nao Jesus delay? Hem garem reason for duim olsem. Hem sei: “Why hem kasem disfala sik nao hem no for hem dae, bat hem for mekhae long God and Son bilong God tu.” (John 11:4) Lazarus hem sik gogo hem dae, bat datwan no finis long there. Jesus plan for iusim wei wea Lazarus hem dae “for mekhae long God.” Long wanem wei? Jesus bae duim wanfala nambawan mirakol and mekem gudfala fren bilong hem for laef bak.

Taem Jesus story abaotem Lazarus witim olketa disaepol bilong hem, hem sei dae hem olsem sleep. Dastawe hem talem olketa hem bae “go for wekapem [Lazarus].” (John 11:11) For Jesus mekem Lazarus laef bak, hem olsem wanfala mami wekapem pikinini bilong hem wea sleep. So no eni reason for Jesus sorre taem Lazarus hem dae.

So why nao Jesus krae? Olketa nara part bilong datfala story helpem iumi for savve long ansa. Taem Jesus meetim Mary wea hem sista bilong Lazarus, and hem lukim Mary and olketa narawan krae, hem “barava sorre tumas.” Dastawe “Jesus hem krae.” Taem Jesus lukim olketa fren wea hem lovem barava sorre, datwan mekem hem sorre tu.—John 11:33, 35.

Disfala story showimaot Jesus garem paoa for mekem olketa famili member and fren bilong iumi wea dae for laef bak and healthy moa long niu world. Hem showimaot tu Jesus feel sorre for olketa wea famili member or fren bilong olketa dae, and iumi tu shud feel sorre long pipol olsem.

Jesus savve hem bae mekem Lazarus for laef bak. Nomata olsem, hem krae bikos hem lovem and feel sorre long olketa fren bilong hem. Maet iumi tu krae witim pipol wea krae bikos iumi sorre long olketa. (Rome 12:15) Wei for man showimaot hem sorre olsem no minim hem no garem faith long resurrection. So taem Jesus krae nomata hem plan for mekem Lazarus laef bak, hem showimaot example bilong wei for garem feeling for olketa wea famili member or fren bilong olketa hem dae.