Hem Laek for Duim Samting

WASWE, iu savve long eniwan wea barava sik tumas?​— Waswe, iu laek duim samting for helpem hem?​— Waswe sapos hem from nara kantri or garem difren religion? Waswe, bae iu laek helpem hem for gud bak?​— Wanfala young gele wea stap long Israel klosap 3,000 year go finis hem duim datwan. Distaem bae iumi storyim samting wea happen.

Staka taem Israel faetem Syria, wea Israel hem ples wea disfala gele stap. (1 Kings 22:1) Wanfala taem olketa long Syria kam long Israel and tekem datfala smol gele for kamap prisoner. Olketa tekem hem go long Syria, and hem waka for waef bilong Naaman, wea hem bigman long army bilong Syria. Naaman hem garem wanfala rabis sik leprosy, wea savve spoelem skin and mekem meat kamaot.

Datfala gele talem waef bilong Naaman hao hasband bilong hem savve kamap gud. Hem tok olsem: ‘Sapos Naaman hem go long Samaria, profet bilong Jehovah, Elisha, savve healim leprosy bilong hem.’ Samting wea datfala gele storyim abaotem Elisha mekem Naaman bilivim hao datfala profet savve healim hem. Bihaen hem askem Ben-hadad, king bilong Syria, Naaman and samfala wakman mas gogo for samting olsem 150 kilometer for lukim Elisha.

Olketa go lukim firstaem Jehoram, wea hem king bilong Israel. Olketa givim hem leta bilong King Ben-hadad wea askem hem for helpem Naaman. Bat Jehoram nating garem faith long Jehovah or profet Elisha. Jehoram tingse Ben-hadad hem laek for faetem hem. Taem Elisha herem diswan, hem talem King Jehoram olsem: “Talem hem kam long mi.” Elisha laek for showim hao God savve healim rabis sik bilong Naaman.​—2 Kings 5:​1-8.

Taem Naaman kasem haos bilong Elisha witim olketa horse and chariot bilong hem, Elisha askem wanfala wakman for talem Naaman olsem: ‘Iu mas swim sevenfala taem long Jordan River, and iu bae kamap gud.’ Naaman hem kros nao. Long tingting bilong hem, Elisha shud kam for putim hand bilong hem long leprosy mekem hem kamap gud. Batawea, wakman bilong Elisha nomoa kam for lukim hem! So Naaman kros tumas and laek go bak long ples bilong hem.​—2 Kings 5:​9-​12.

Wanem nao bae iu duim sapos iu wanfala wakman bilong Naaman?​— Olketa wakman bilong Naaman askem hem: ‘Sapos Elisha askem iu for duim wanfala hard samting, waswe, bae iu duim? Why nao iu no swim nomoa mekem iu kamap gud?’ Naaman duim samting wea olketa talem. Hem “go daon and swim long Jordan sevenfala taem . . . , and bihaen diswan skin bilong hem kamap gud moa olsem skin bilong wanfala smol boy.”

Naaman go bak long Elisha and talem olsem: “Distaem mi barava savve hao no eni God stap long eni nara ples long earth, bat long Israel nomoa.” Hem promisim Elisha hao hem bae no “mekem moa sakrifaes wea hem bonem long eni nara god bat long Jehovah nomoa.”​—2 Kings 5:​13-​17.

Waswe, iu laek helpem eniwan for lane abaotem Jehovah and wanem hem savve duim, olsem datfala smol gele duim?​— Taem Jesus stap long earth, wanfala leprosy man wea garem faith long Jesus hem talem olsem: ‘Sapos iu barava laek for helpem mi, iu savve duim.’ Iu savve wanem nao Jesus talem?​— “Mi barava laek for duim datwan.” And Jesus healim hem, olsem Jehovah tu hem healim Naaman.​—Matthew 8:​2, 3.

Waswe, iu savve tu hao Jehovah bae mekem niu world wea evri pipol bae stap gud and laef olowe?​— (2 Peter 3:​13; Revelation 21:​3, 4) Sapos olsem, iu bae barava laek for talem olketa narawan tu abaotem olketa nambawan samting hia!