Mek-124 Gilead Graduation

Olketa Missionary Olsem Olketa Grashopa

EVRI sixfala month, Gilead Skul garem wanfala graduation wea evri Bethelite long America savve go long hem. Long March 8, 2008, olketa wea kam from 30 difren kantri hipap witim Bethel famili for graduation bilong mek-124 class bilong Gilead Skul. Long datfala spesol day, 6,411 hapi for hipap witim olketa student hia.

Chairman bilong program, Stephen Lett, wanfala long Governing Body, startim program witim tok “Waka Witim Olketa Tokpiksa Grashopa Bilong Jehovah.” Revelation 9:​1-4 storyim datfala smol sekson bilong olketa anointed Christian wea startim moa waka bilong Jehovah long 1919, olsem olketa grashopa wea redi for waka. Brata Lett talem olketa student, wea olketa bilong “nara sheep,” hao olketa waka witim olketa tokpiksa grashopa.​—John 10:16.

Lon Schilling, wanfala long Branch Komiti long America, givim tok “Waka Gud Witim Narawan.” Hem storyim datfala story long Bible abaotem Aquila and Priscilla (or Prisca), wanfala hasband and waef long first-century. (Rom. 16:​3, 4) Datfala Gilead class garem 28-fala hasband and waef. Brata Schilling talem olketa hao, for gohed duim missionary waka, olketa mas gohed fren gud witim hasband or waef bilong olketa. Evritaem Bible storyim Aquila, hem storyim tu Priscilla, waef bilong hem. Aposol Paul and olketa long kongregeson mas lukim hao tufala waka tugeta evritaem. Olketa missionary wea marit distaem tu mas waka tugeta, prea tugeta, feisim olketa problem wea olketa kasem long niu kantri tugeta, wea diswan bae showimaot hao olketa waka gud witim narawan.​—Gen. 2:​18.

Guy Pierce, wanfala long Governing Body givim disfala tok “Duim Gudfala Samting From Jehovah Hem Gud.” Brata Pierce storyim hao, for kamap wanfala gud man, datfala man mas duim gudfala samting for helpem pipol. No eniwan hem gud olsem Jehovah God. (Zech. 9:​16, 17) Love and wei bilong God for duim gud samting savve muvim iumi for duim gudfala samting for pipol. Brata Pierce talem disfala last toktok for praisem olketa student: “Iufala duim gud samting finis. Mifala savve iufala bae gohed for duim gudfala samting long eni assignment wea Jehovah God givim long iufala from God hem gud.”

Bihaen, Michael Burnett wea hem missionary bifor and distaem hem teacher long Gilead, givim disfala tok “Werem Olsem Samting wea Stap Front Long Eye Bilong Iu.” Olketa Israelite mas tingim mirakol wea Jehovah duim for sevem olketa from Egypt “olsem samting wea stap front long eye” bilong olketa. (Ex. 13:16) Hem strongim olketa student for tingim evri samting wea olketa lanem long Gilead Skul olsem samting wea stap front long eye bilong olketa. Brata Burnett mekhae long wei for hambol, no ova tumas and for followim toktok long Bible taem olketa garem problem witim eni missionary and nara pipol.​—Matt. 5:​23, 24.

Mark Noumair, wanfala teacher long Gilead for longfala taem, givim disfala tok “Wanem Kaen Singsing Nao Pipol Bae Singim Abaotem Iu?” Long taem bifor, hem wei bilong pipol for singsing taem olketa winim eni faet. Wanfala long olketa singsing hia hem talemaot hao tribe bilong Reuben, Dan, and Asher nating willing for duim samting, bat tribe bilong Zebulun kasem praise from olketa willing for duim samting. (Judg. 5:​16-​18) Olsem olketa toktok long wanfala singsing, gogo pipol bae savve long olketa samting wea evri Christian duim. Sapos samwan strong for duim waka bilong God and hem faithful long organization bilong God, diswan savve helpem hem for fren gud witim Jehovah and showim gudfala wei for olketa brata and sista for followim. Taem olketa long kongregeson herem tokpiksa singsing abaotem samting wea iumi duim, olketa tu bae laek followim gudfala wei bilong iumi.

Olketa long mek-124 class duim samting olsem 3,000 hour long preaching waka taem olketa long Gilead Skul. Long disfala tok “Letem Holy Spirit Leadim Iu,” olketa student talem Sam Roberson long Theocratic Skul Department abaotem olketa naesfala story long preaching waka and olketa actim samfala. Bihaen olketa herem olketa naesfala story hia, Patrick LaFranca, wanfala long Branch Komiti long America, hem interviewim olketa missionary wea skul finis long Gilead and wea go long olketa difren kantri. Olketa student tinghae long gudfala advaes bilong olketa brata hia.

Anthony Morris, wanfala long Governing Body givim lastfala tok “Tingim Evritaem Hao Olketa Samting Iumi Lukim Hem for Lelebet Taem Nomoa.” Bible talem iumi for tingting strong abaotem olketa blessing wea Jehovah bae givim iumi and no long hard taem wea iumi kasem distaem wea hem for lelebet taem nomoa. (2 Cor. 4:​16-​18) Wei for barava poor, samting gohed wea no stret, narawan spoelem narawan, sik, and dae hem olketa samting iumi lukim hem happen distaem. Olketa missionary maet lukim samfala problem olsem. Bat taem iumi tingim hao olketa samting hia hem for lelebet taem nomoa, diswan bae helpem iumi for gohed and duim olketa samting wea Jehovah laekem.

Olketa student kam and sidaon long stage for herem Brata Lett givim lastfala toktok for finisim program. Hem strongim olketa for no givap and sei: “Sapos Jehovah helpem iumi, iumi bae gohed faithful and no givap nomata wanem hem kasem iumi.” Hem talem olketa niu missionary hia for olsem olketa grashopa, strong for gohed duim waka bilong Jehovah and obeyim hem for olowe.

[Box long page 30]

OLKETA LONG CLASS

Haomas kantri olketa kam from: 7 

Haomas kantri olketa bae go long hem: 16

Haomas student: 56

Average age: 33.8

Average year long truth: 18.2

Average year long full-taem ministry: 13.8

[Piksa long page 31]

Mek-124 Class Bilong Gilead Skul

List long daon start long front and go bihaen, and olketa nem start long left saed go long raet saed bilong each laen.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Piksa long page 32]

Gilead Skul hem stap long Wastaoa Education Center