Waswe, Iu Remember?

Waswe, iu kasem gud samting from olketa Wastaoa magasin wea iu readim finis no longtaem go nomoa? Trae for tingim ansa for olketa kwestin hia:

• Wanem problem nao samfala Christian kasem bihaen olketa marit, and wanem nao olketa mas trae for duim?

Gogo samfala Christian hasband and waef luksavve hao samting wea wanfala interest long hem, hem difren from narawan. From tufala luksavve hem no followim Bible for divorce for stretem datfala problem, tufala mas waka hard for strongim marit bilong tufala.​—4/15, page 17.

• Wanem nao olketa hard samting wea wanfala olo feisim long nursing hom?

Datfala nursing hom maet stap long territory bilong kongregeson wea datfala olo no savve gud long hem. Olketa wea hem stap witim maet bilong difren religion and olketa maet trae mekem hem for duim samfala samting long religion bilong olketa. Olketa Christian relative and olketa long kongregeson mas luksavve long olketa problem olsem and sapotim and lukaftarem olketa.​—4/15, page 25-27.

• Wanem nao fofala wei wea savve helpem hasband and waef for stretem olketa problem?

Markem taem for storyim olketa problem. (Eccl. 3:​1, 7) Talem stret tingting bilong iu and showimaot respect. (Eph. 4:​25) Herehere and luksavve long feeling bilong narawan. (Matt. 7:​12) Agree long hao for stretem problem, and waka tugeta long datwan. (Eccl. 4:​9, 10)​—4/1, page 18-​20.

• Olketa wanem komiti nao olketa long Governing Body waka long hem?

Coordinators’ Komiti; Personnel Komiti; Publishing Komiti; Service Komiti; Teaching Komiti; Raeting Komiti.​—5/15, page 29.

• Hao nao iumi savve Flood long taem bilong Noah kasem full earth?

Jesus bilivim hao Flood hem happen, and hem bilivim tu hao hem kasem full earth. For olketa warning long Bible hem tru, datfala story abaotem Flood wea kasem full earth mas tru.​—4/1, page 8.

• Waswe, hem olketa Jew or pipol wea no Jew wea duim olketa samting wea Romans 1:​24-​32 storyim?

Diswan hem fitim eniwan long tufala sekson hia, bat aposol Paul storyim olketa Israelite bifor wea for staka handred year olketa no followim Law. Olketa savve long stretfala law bilong God, bat olketa nating followim.​—6/15, page 29.

• Why nao wei for duim samting wea iumi fit for duim savve mekem iumi hapi?

Sapos iumi trae duim samting wea hem hard tumas for duim, maet datwan mekem iumi barava wari. And sapos iumi no markem eni samting for iumi trae for duim, iumi bae iusim datwan olsem excuse for isisi nomoa long Christian ministry.​—7/15, page 29.