Samfala Ask Olsem
Sapos Iumi No Barava Savve Hao for Talem Nem Bilong God, Why Nao Iumi Shud Iusim?
No eniwan distaem barava savve hao for talem nem bilong God long Hebrew languis wea olketa iusim bifor. Bat important samting nao, nem bilong God hem stap long Bible samting olsem 7,000 taem. Jesus iusim nem bilong God taem hem stap long earth, and hem talem olketa disaepol bilong hem for prea for datfala nem hem holy. (Matthew 6:9; John 17:6) Dastawe, for iusim nem bilong God hem important tumas for olketa Christian. So why nao iumi no barava savve hao for talem datfala nem distaem? Bikos long tufala main reason.
Firstfala reason, samting olsem tu thousand year go pas finis, olketa Jew garem disfala biliv hao hem no stret for talem nem bilong God. Taem man readim Bible and hem lukim datfala nem, hem bae talem “Lord” nomoa. Bihaen staka year wea olketa no iusim datfala nem, olketa forgetim nao hao for talem nem bilong God.
Mek-tu reason, taem olketa raetem Hebrew languis bifor olketa no iusim olketa vowel leta a, e, i, o, u. Taem man hem read, hemseleva mas tingim olketa vowel long olketa word wea hem readim. Gogo, olketa faendem wei for putim bak olketa vowel long Hebrew word mekem olketa no forgetim hao for talem. Olketa addim olketa vowel long evri word long Hebrew Bible. Bat for nem bilong God, olketa addim vowel for datfala word “Lord” mekem olketa wea readim savve talem datfala word, or olketa no addim eni vowel.
Taem olketa duim olsem, fofala leta wea olketa kolem Tetragrammaton nao stap. Wanfala dictionary minim Tetragrammaton olsem “fofala Hebrew leta wea olketa raetem YHWH or JHVH wea hem nao stretfala nem bilong God long Bible.” So taem olketa putim olketa vowel long JHVH, hem kamap “Jehovah,” nem wea pipol iusim long Pijin languis.
Samfala savveman sei for iusim “Yahweh.” Waswe, hem nao hao olketa talem datfala nem bifor? No eniwan barava savve. And samfala nara savveman talem samfala reason for no iusim Yahweh. Hem tru, hao iumi talem olketa Bible nem distaem hem maet barava here difren from firstfala Hebrew languis, bat no eniwan sei hem no stret. Hem bikos pipol luksavve and iusim olketa nem hia long languis bilong olketa. Datfala nem Jehovah hem olsem tu.
Olketa firstfala Christian kamap pipol for nem bilong God. Olketa talemaot datfala nem long olketa narawan and helpem olketa for iusim tu. (Acts 2:21; 15:14; Romans 10:13-15) So hem barava important for iusim nem bilong God long evri languis iumi story long hem, hem important for luksavve long mining bilong datfala nem, and duim samting followim mining bilong datfala nem.
[Blurb long page 30]
Important samting nao, nem bilong God hem stap long Bible samting olsem 7,000 taem