Helpem Olketa for Kam Bak Kwiktaem!
“Hu moa bae mifala followim? Iu nomoa storyim olketa samting wea bae mekem man laef olowe.”—JOHN 6:68.
1. Taem olketa disaepol lusim Jesus, wanem nao Peter hem talem?
WANTAEM staka disaepol no laek followim Jesus Christ nao from olketa no hapi long wanfala teaching bilong hem. So Jesus askem olketa aposol: “Waswe iufala, iufala laek go tu?” Peter hem sei: “Lord, hu moa bae mifala followim? Iu nomoa storyim olketa samting wea bae mekem man laef olowe.” (John 6:51-69) No eniwan moa hem stap for olketa followim. Long bifor, religion bilong olketa Jew no “storyim olketa samting wea bae mekem man laef olowe,” and evri giaman religion distaem, wea hem nao Bigfala Babylon, no storyim olketa samting hia tu. Eniwan wea lusim kongregeson bilong God distaem and wea laekem Jehovah for hapi long hem, hem ‘kasem taem nao for hem mas wekap’ and kam bak long kongregeson.—Rom. 13:11, King James Version.
2. Wanem nao pablisa mas tingim sapos hem faendaot abaotem samting wea hem no fitim for storyim olobaot or wea wanfala judicial komiti nao mas deal witim?
2 Jehovah barava tingim and helpem olketa Israelite wea olsem sheepsheep wea lus. (Readim Ezekiel 34:15, 16.) Long sem wei tu, olketa elder laek for helpem olketa sheepsheep wea lus, and hem nao samting wea olketa mas duim. Sapos olketa askem wanfala pablisa for study witim brata or sista olsem wea laek for kasem help, wanem nao pablisa mas duim sapos hem faendaot datfala brata or sista duim bigfala sin? Pablisa bae no givim eni kaonsel long hem abaotem samting wea hem no fitim for storyim olobaot or wea wanfala judicial komiti nao mas deal witim, bat hem mas talem hem for go storyim diswan long olketa elder. Sapos hem no duim datwan, pablisa hia bae go storyim datwan long olketa elder.—Lev. 5:1; Gal. 6:1.
3. Hao nao tingting bilong datfala man wea garem 100 sheepsheep taem hem faendem wanfala sheepsheep wea lus?
3 Long study bifor diswan, hem storyim wanfala tokpiksa wea Jesus talem abaotem man wea garem 100 sheepsheep. Taem wanfala hem lus, hem leavim nara 99 sheepsheep and hem go lukaotem datfala sheepsheep. Taem hem faendem, hem hapi tumas nao! (Luke 15:4-7) Iumi hapi tumas tu taem wanfala sheepsheep bilong God wea lus hem kam bak long kongregeson. Olketa elder and nara brata and sista go lukim datfala sheepsheep wea lus from olketa lovem hem. Olketa tu laekem datfala brata or sista for kam bak long kongregeson mekem God savve helpem, protectim, and blessim hem. (Deut. 33:27; Ps. 91:14; Prov. 10:22) Wanem nao olketa savve duim for helpem brata or sista hia for kam bak long kongregeson?
4. Galatians 6:2, 5 hem storyim wanem?
4 Olketa elder and narawan long kongregeson savve storyim long hem hao Jehovah lovem olketa sheepsheep bilong Hem. Hem laekem iumi for duim nomoa wanem iumi fit for duim, olsem for studyim Bible, go long olketa meeting, and preachim gud nius abaotem Kingdom. Maet hem gud for readim Galatians 6:2, 5 long hem and storyim hao olketa Christian savve helpem narawan taem olketa kasem hevi, bat “man wanwan mas karem lod bilong hemseleva” for faithful long Jehovah. No eniwan moa savve duim datwan for iumi.
Waswe, ‘Olketa Wari Tumas’ Dastawe Olketa Lusim Kongregeson?
5, 6. (a) Why nao iumi mas lisin gud taem olketa wea lusim kongregeson talemaot tingting bilong olketa? (b) Wanem nao iu savve storyim long olketa for mekem olketa luksavve olketa no kasem eni gud samting from olketa no kakam long meeting?
5 Olketa elder and olketa nara brata and sista mas lisin gud taem olketa wea lusim kongregeson talemaot tingting bilong olketa. Diswan bae helpem olketa for savve gud hao for helpem olketa hia. Tingim sapos iu wanfala elder wea go lukim wanfala hasband and waef wea no kakam long meeting and no go preaching from ‘olketa wari tumas’ long olketa samting. (Luke 21:34) Maet olketa olsem from selen hem hard or tufala garem staka waka distaem long famili. Maet olketa samting hia mekem tufala tingse olketa mas isisi lelebet. Bat iu savve talem tufala hao tufala bae no kasem eni gud samting nomoa sapos tufala no kakam long olketa meeting. (Readim Proverbs 18:1.) Maet iu savve askem olketa: “Waswe, iufala hapi distaem from iufala no kakam long olketa meeting? Waswe, famili bilong iufala stap gud distaem winim bifor? Waswe, iufala hapi yet distaem olsem taem iufala trustim Jehovah?”—Neh. 8:10.
6 Taem olketa ting raonem olketa kwestin hia, datwan savve helpem olketa luksavve hao olketa no fren gud witim Jehovah distaem and no hapi bikos olketa no kakam long olketa meeting. (Matt. 5:3; Heb. 10:24, 25) Maet iu savve helpem olketa for luksavve taem olketa go preaching bifor, datwan mekem olketa hapi tumas, bat distaem nomoa nao bikos olketa no go preaching. (Matt. 28:19, 20) So wanem nao bae hem gud for olketa brata and sista olsem for duim?
7. Hem gud for iumi encouragem olketa wea lusim kongregeson for duim wanem samting?
7 Jesus hem sei: “Lukluk gud long iufala seleva, nogud iufala gohed nomoa for kaikai tumas and drink tumas and wari nomoa abaotem olketa samting long laef . . . Dastawe iufala mas wekap and prea evritaem mekem iufala savve standap strong taem evri samting hia happen.” (Luke 21:34-36) Taem iu story long olketa wea lusim kongregeson bat wea laek for kam bak and for olketa hapi moa, hem gud for encouragem olketa for prea for holy spirit and askem God for helpem olketa. Olketa mas duim samting tu fitim wanem olketa prea for hem.—Luke 11:13.
Waswe, Samting Mekem Olketa Stambol?
8, 9. Maet wanem nao wanfala elder savve talem for helpem man wea stambol?
8 From evri man born sin, samfala taem man savve feel nogud long wei bilong narawan and diswan savve mekem hem stambol. Samfala stambol taem wanfala brata or sista wea olketa narawan respectim hem duim samting wea no fitim wanem Bible hem talem. Sapos kaen samting olsem nao mekem brata or sista lusim kongregeson, elder wea go lukim hem savve storyim hao Jehovah no savve mekem eni man stambol. Dastawe hem no fitim eniwan for lusim wei wea hem fren witim God and pipol bilong Hem. Bat fitim hem for gohed worshipim God, from hem trustim God nao hem “Judge bilong full earth” and hem savve long samting wea happen and hem bae stretem long gudfala wei. (Gen. 18:25; Col. 3:23-25) Man wea stambol hem olsem man wea foldaon long graon. Datfala man bae no sidaon olowe long graon, bat bae hem trae for standap and go moa.
9 For helpem wanfala brata or sista for kam bak long kongregeson, maet elder savve storyim hao bihaen lelebet taem, samfala wea feel nogud olsem olketa no tingim tumas samting wea mekem olketa stambol. Maet samting wea mekem olketa stambol hem nomoa nao. Sapos disfala brata or sista stambol from hem kasem discipline, elder savve encouragem hem for prea abaotem datwan. Wei for duim olsem savve helpem hem for luksavve datfala discipline hem fitim, and hem mas no letem datwan for mekem hem stambol.—Ps. 119:165; Heb. 12:5-13.
Waswe, Wanfala Teaching Nao Mekem Hem Stambol?
10, 11. Wanem nao iu savve talem for helpem man wea garem difren wei for minim samfala teaching long Bible?
10 Maet samfala lusim kongregeson bilong God bikos olketa no agree witim wanfala teaching from Bible. Bihaen olketa Israelite go aot from Egypt, olketa forgetim “samting wea [God] duim for olketa” and “olketa no weit for herem kaonsel bilong hem.” (Ps. 106:13) Maet for storyim long datfala brata or sista hao “wakman wea faithful and wise” hem gohed givim nambawan spiritual kaikai savve helpem hem tu. (Matt. 24:45) Kaikai hia nao helpem hem for lanem truth long firstaem. Encouragem hem for tingim datwan and for disaed strong moa for followim truth.—2 John 4.
11 For helpem olketa olsem, maet elder savve storyim olketa disaepol wea lusim Jesus bikos olketa feel nogud long wanfala teaching bilong hem. (John 6:53, 66) Wei for lusim Christ and olketa faithful follower bilong hem nao mekem olketa no tinghae tumas long olketa spiritual samting and for no hapi. Waswe, olketa wea lusim kongregeson savve kasem nambawan spiritual kaikai long eni nara ples moa? Nomoa nao, bikos datfala wakman wea faithful and wise nomoa savve givim spiritual kaikai olsem!
Waswe, Hem Duim Bigfala Rong?
12, 13. Sapos samwan hem lusim kongregeson and hem duim bigfala rong, wanem nao iumi savve duim for helpem hem?
12 Samfala brata and sista no kakam long meeting and no go preaching bikos olketa duim bigfala rong. Maet long tingting bilong olketa, sapos olketa talemaot rong bilong olketa long olketa elder, bae olketa disfellowship. Bat bae olketa no disfellowship sapos olketa stop for no duim datfala rong and barava repent. (2 Cor. 7:10, 11) Olketa elder bae hapi for olketa kam bak long kongregeson and helpem olketa for fren bak witim God.
13 Sapos iu wanfala mature pablisa, olketa elder savve askem iu for helpem wanfala man olsem. Wanem nao bae iu duim sapos brata olsem talem iu hem duim bigfala rong? Olsem iumi storyim long paragraf 2, no givim eni kaonsel long hem bat encouragem hem for storyim diswan long olketa elder. Sapos hem no laek for duim, iu bae showimaot iu tingim nem bilong Jehovah and kongregeson taem iu followim wanem Bible hem talem abaotem diswan. (Readim Leviticus 5:1.) Olketa elder nao bae savve hao for helpem eniwan wea laek for kam bak long kongregeson and duim wanem God hem laekem. Maet datfala man hem needim discipline wea Jehovah hem givim bikos hem lovem hem. (Heb. 12:7-11) Sapos man hia talemaot hem sin againstim God, hem stop for no duim datfala sin, and hem barava repent, olketa elder savve helpem hem and Jehovah savve forgivim hem.—Isa. 1:18; 55:7; Jas. 5:13-16.
Boy Kam Bak and Evriwan Hapi
14. Storyim kam tokpiksa bilong Jesus abaotem datfala olobaot boy.
14 For helpem wanfala brata or sista wea lusim kongregeson, pablisa wea olketa elder markem for helpem hem savve storyim tokpiksa bilong Jesus long Luke 15:11-24. Long tokpiksa hia, datfala boy hem weistim selen wea dadi givim long hem taem hem drink tumas, and duim olketa nara rabis samting. Gogo hem luksavve and les nao long nogud samting wea hem duim. Hem hangre, hem missim famili, and hem disaed for hem mas go bak long hom nao! Taem hem wakabaot kam farawe yet, dadi lukim hem and hem ran go for holem hem. Dadi kissim hem and hem hapi tumas for lukim hem. Maet wei for story raonem tokpiksa hia savve encouragem kaen brata and sista olsem for kam bak long kongregeson. From world hem klosap for finis, hem mas kam bak kwiktaem.
15. Wanem nao mekem samfala isisi lusim kongregeson?
15 Staka wea gogo olketa lusim kongregeson no barava olsem datfala olobaot boy. Samfala olketa isisi wikdaon gogo olketa lusim kongregeson nao, olsem sea hem savve isisi tekem wanfala kanu go farawe. Olketa narawan garem olketa bigfala hevi gogo datwan mekem olketa no tingim spiritual samting. Maet samfala brata feel nogud long samting wea narawan long kongregeson duim and olketa stambol. Samfala no hapi witim wanfala teaching long Bible. Samfala tu olketa duim olketa samting wea againstim Bible. Wei for iusim olketa point wea iumi storyim finis savve helpem olketa brata and sista wea lusim kongregeson for kam bak bifor hem tu leit.
“Welkam Bak, Boy Bilong Mi!”
16-18. (a) Wanem nao wanfala elder duim for helpem brata wea hem wik for staka year finis? (b) Wanem nao mekem brata hia wik olsem? Wanem help nao hem kasem? Wanem nao olketa long kongregeson duim taem hem kam bak?
16 Wanfala elder hem sei: “Olketa elder long kongregeson bilong mifala tingim tumas olketa wea no kakam long meeting and no go preaching and go for visitim olketa. Mi tingim wanfala brata wea bifor mi study witim hem and helpem hem for savve long truth. For 25 year hem no kakam long meeting and no go preaching and hem kasem barava hard taem. So mi storyim long hem hao wei for followim olketa principle long Bible savve helpem hem. Gogo hem start for kam long Kingdom Hall and hem laek for studyim Bible for strongim hem and helpem hem for kam bak long kongregeson.”
17 Wanem nao gogo mekem disfala brata hem wik olsem? Hem sei: “Mi start for no tingim spiritual samting bat mi busy for duim olketa nara samting. Then mi no savve duim study seleva, no go preaching, and no gogo long olketa meeting. No longtaem bihaen, mi lusim kongregeson nao. Bat from datfala elder tingim mi and laek for helpem mi, diswan nao mekem mi kam bak long kongregeson.” Bihaen hem start for studyim Bible moa, olketa problem bilong hem no big tumas nao. Hem sei: “Mi luksavve hao samting wea mi no garem nao hem love and help from Jehovah and organization bilong hem.”
18 Wanem nao olketa nara brata and sista duim taem hem kam bak long kongregeson? Hem sei: “Feeling bilong mi hem olsem nao datfala olobaot boy wea Jesus Christ storyim. Wanfala olo sista wea hem stap long kongregeson 30 year bifor and hem gohed faithful yet, hem tok olsem long mi, ‘Welkam bak, boy bilong mi!’ Mi barava tinghae long datwan. Mi luksavve kongregeson nao best ples for mi stap long hem. Mi thankiu tumas long datfala elder and full kongregeson for love wea olketa showimaot, for wei wea olketa tingim mi, and helpem mi. Samting wea helpem mi for kam bak long kongregeson nao hem love wea olketa garem for Jehovah and nara pipol.”
Encouragem Olketa for Mas Duim Samting Kwiktaem!
19, 20. Wanem nao iu savve duim for encouragem olketa wea wik for kam bak kwiktaem? Wanem nao iu savve talem for helpem olketa luksavve God no askem olketa for duim samting wea olketa no fit for duim?
19 Iumi stap long olketa last day distaem and world hem barava klosap for finis nao. So encouragem olketa wik brata and sista olsem for kakam moa long olketa meeting stretawe. Helpem olketa for minim hao Satan hem traem best for spoelem wei wea olketa fren witim God. Satan laekem tu for olketa tingse olketa bae no garem staka hevi sapos olketa stop for no worshipim Jehovah. Helpem olketa for barava trustim hao taem olketa faithful for followim Jesus, datwan nomoa bae mekem olketa barava hapi and kasem gud samting.—Readim Matthew 11:28-30.
20 Storyim long olketa hao God laekem for iumi duim nomoa wanem iumi fit for duim. Klosap long taem for Jesus dae, sista bilong Lazarus, Mary, hem putim oil wea smel naes and kost tumas long hed bilong Jesus. Taem pipol komplen abaotem diswan, Jesus hem sei: “No trae for stopem hem. . . . Hem duim nomoa wanem hem fit for duim.” (Mark 14:6-8) Long narataem, Jesus hem tinghae long wanfala widow woman wea givim smol donation long temple. Disfala woman tu duim nomoa wanem hem fit for duim. (Luke 21:1-4) Staka long iumi fit for kam long olketa meeting and go preaching. Jehovah savve helpem olketa brata and sista wea wik for duim sem samting tu.
21, 22. Wanem nao olketa blessing wea iu savve storyim long olketa wea kam bak long Jehovah?
21 Sapos wanfala sheepsheep wea lus olsem hem fraet lelebet for kam bak long kongregeson, iu savve storyim long hem hao evriwan barava hapi taem datfala olobaot son hem kam bak long hom. Olketa brata and sista tu bae hapi taem olketa olsem kam bak long kongregeson. Encouragem olketa for mas kwiktaem againstim Satan and for fren bak moa witim God.—Jas. 4:7, 8.
22 Evriwan bae hapi tumas for welkamim olketa wea kam bak long Jehovah. (Lam. 3:40) Masbi plande samting wea olketa duim for worshipim God bifor hem barava mekem olketa hapi. Olketa wea kwiktaem for kam bak long kongregeson bae kasem staka gud samting distaem and long future!
Wanem Nao Ansa Bilong Iu?
• Wanem nao iu savve duim for helpem Christian wea stambol and lusim kongregeson?
• Wanem nao iu savve talem for helpem samwan wea lusim kongregeson from hem garem difren tingting abaotem wanfala teaching?
• Hao nao iu savve helpem man wea fraet lelebet for kam bak long kongregeson?
[Piksa long page 13]
Lisin gud taem brata or sista wea lusim kongregeson talemaot tingting bilong hem
[Piksa long page 15]
Tokpiksa bilong Jesus abaotem olobaot boy savve helpem samfala for kam bak long kongregeson