No Forgetim Olketa wea Inactive
1. Why nao iumi shud trae hard for encouragem olketa wea kamap inactive?
1 Waswe, iu savve long eniwan wea kamap inactive? Maet hem stop for kaban witim kongregeson and isisi go difren. Maet iu meetim samwan olsem taem iu duim haos-tu-haos ministry. Iumi mas no forgetim hao man wea inactive hem still spiritual brata bilong iumi. Iumi laek for showimaot love long hem and helpem hem for kam bak long kongregeson and long ‘datfala shepherd and overseer bilong soul bilong iumi.’—1 Pet. 2:25.
2. Hao nao iumi savve encouragem olketa wea inactive?
2 Showimaot Interest: Maet wei for ringim long telephone or visitim man wea kamap inactive bae showimaot long hem hao iumi no forgetim hem. Wanem nao iumi savve sei long hem? Maet iumi savve encouragem hem long wei for talem hem iumi tingim hem. Storyim olketa samting wea savve muvim and buildimap man. (Phil. 4:8) Maet iumi savve storyim wanfala point iumi laekem from wanfala meeting. Iumi savve invaetem hem for kam long wanfala meeting or assembly wea bae kamap and askem hem sapos hem laek for go witim iumi and maet sidaon witim iumi.
3. Hao nao wanfala sista kamap active moa?
3 Wanfala sista meetim sista long territory wea inactive for winim 20-fala year. Nomata hem no willing for acceptim wanfala Bible study, datfala sista wea meetim hem gohed for visitim hem, and givim hem olketa niu magasin. Bihaen long distrik convention, datfala pablisa storyim samfala naes point from convention witim datfala sista wea inactive, and gogo, datfala sista hem kamap active moa.
4. Hao nao iumi savve encouragem samwan wea start for attendim moa olketa meeting?
4 Taem Samwan Kam Bak: Wanem nao iumi savve duim taem wanfala brata wea inactive start for attendim olketa meeting moa? Tingim samting wea Jesus duim bihaen olketa disaepol bilong hem lusim hem for lelebet taem. Hem tok abaotem olketa olsem “olketa brata” bilong hem and hem showimaot hem trustim olketa. Hem givim olketa wanfala important assignment tu. (Matt. 28:10, 18, 19) No longtaem bihaen, olketa busy for talemaot gud nius and “nating givap.”—Acts 5:42.
5. Storyim olketa taem wea iumi shud story long olketa elder abaotem samwan wea inactive.
5 Bifor iumi offer for studyim Bible witim samwan wea kamap inactive or bifor iumi invaetem wanfala brata wea inactive for longfala taem finis for joinim iumi long ministry, iumi shud askem direction firstaem from olketa elder. Sapos iumi meetim wanfala pablisa wea inactive long territory, iumi shud talem olketa elder mekem olketa savve givim help long hem.
6. Wanem hapi nao maet iumi kasem taem iumi helpem olketa wea inactive?
6 Olsem Bible hem showimaot klia, olketa wea faithful go kasem end nomoa bae kasem salvation. (Matt. 24:13) So iumi mas tingim olketa wea maet stambol or isisi go difren. Sapos iumi showimaot patient fasin and love olsem Jehovah long wei for interest long olketa hia, maet olketa start for duim moa holy service bilong olketa witim iumi, and sapos olsem, datwan bae barava mekem iumi hapi.—Luke 15:4-10.