“Singsing Abaotem Sea”—Manuscript wea Joinim Tufala Difren Taem Long History
LONG May 22, 2007, long Israel Museum long Jerusalem, olketa showim wanfala smol part bilong Hebrew scroll wea olketa raetem long mek-seven or mek-eit century C.E. Raeting long disfala manuscript hem Exodus 13:19 go kasem Exodus 16:1. Hem garem tu disfala “Singsing Abaotem Sea” wea olketa Israelite singim bihaen Jehovah duim mirakol for sevem olketa long Red Sea. Why nao wei wea olketa showim disfala scroll hem important?
Hem important bikos long year wea olketa raetem datfala manuscript. Olketa raetem olketa Dead Sea Scroll midolwan long mek-thri century B.C.E. and first century C.E. Bifor olketa faendem olketa scroll hia samting olsem 60 year go nomoa, Hebrew manuscript wea hem olo tumas winim olketa narawan hem disfala Aleppo Codex, wea olketa raetem long 930 C.E. Olketa no faendem eni nara Hebrew manuscript moa wea olketa raetem midolwan long first century and 930 C.E.
Bigman long Israel Museum, James S. Snyder, hem talem hao datfala “Singsing Abaotem Sea manuscript hem joinim tufala difren taem long history wea datwan nao taem wea olketa raetem olketa Dead Sea Scroll . . . and taem wea olketa raetem datfala Aleppo Codex.” Hem talem hao disfala manuscript witim olketa nara olo Bible manuscript “barava showimaot klia hao nomata olketa copyim Bible for plande handred year, samting olketa scripture talem hem nating change nomoa.”
Olketa sei disfala smol part long scroll hem wanfala long olketa manuscript wea olketa faendem long mek-19 century long wanfala sinagog long Cairo, Egypt. Long firstaem, man wea garem datfala Hebrew manuscript no savve hao datwan hem barava important. Samting wea mekem hem luksavve hem important tumas hem taem hem go lukim wanfala savveman long maet samting olsem 1978. Bihaen olketa faendemaot year wea olketa raetem datfala scroll, olketa keepim for longtaem lelebet, gogo olketa showim for pipol lukim long Israel Museum.
Adolfo Roitman, wea hem bigman long Shrine of the Book, long Israel Museum, and man for lukaftarem olketa Dead Sea Scroll, hem talem olsem: “Singsing Abaotem Sea manuscript barava showimaot hao nomata olketa copyim Bible wea olketa Masorete raetem for plande handred year, samting olketa scripture talem hem nating change nomoa. Hem barava interesting for savve hao stael wea olketa iusim for raetem Singsing Abaotem Sea manuscript hem barava semsem distaem olsem hao olketa raetem datwan long mek-7 and mek-8 century.”
Bible hem kam from God, and hem nao lukaftarem gud kam kasem distaem. And tu, olketa man bifor wea teachim law barava copyim gud olketa scripture. Dastawe iumi savve barava trustim evri toktok long Bible.
[Piksa Credit Line long page 32]
Courtesy of Israel Museum, Jerusalem