Olketa Faendem Important Samting Long Ples for Torowem Rabis

MAET iu tingim ples for torowem rabis hem wanfala ples wea staka rabis stap and hem smel nogud. So maet iu tingse hem hard for faendem eni gud samting long there.

Bat wan handred year go finis, olketa faendem wanfala important samting long kaen ples olsem. Wanem nao datwan? Hao nao datwan helpem iumi distaem?

OLKETA SAPRAES FOR FAENDEM DATWAN

Long start bilong mek-20 century, Bernard Grenfell and Arthur Hunt wea study long Oxford University, tufala go long Egypt. Long ples for torowem rabis klosap long Nile Valley, tufala faendem staka smol pis papyrus. Long 1920, taem tufala go bak long university for raetem information abaotem olketa samting hia, Bernard kasem samfala nara pis papyrus wea olketa narawan faendem long Egypt. The John Rylands Library long Manchester, England, sendem kam olketa samting hia for tufala. Tufala no finisim yet disfala big waka for raetem information abaotem olketa samting hia, then tufala dae.

Colin Roberts, nara man wea study long Oxford University, hem finisim datfala waka. Taem hem lukluk long olketa pis papyrus hia, hem lukim wanfala pis papyrus wea long bilong hem 9 centimeter and waed bilong hem 6 centimeter. Hem sapraes tumas bikos hem luksavve olketa Greek toktok long datfala papyrus hem stap long Bible tu. Wansaed bilong datfala papyrus hem garem olketa toktok wea kam from John 18:31-33 and narasaed hem garem tu-thri toktok wea kam from verse 37 and 38. Colin luksavve diswan hem wanfala barava important samting.

WANEM TAEM NAO OLKETA RAETEM DATWAN?

Colin tingse datfala papyrus hem mas barava old. For savve wanem taem nao olketa raetem datwan, hem comparem raeting long papyrus hia witim raeting wea stap long olketa nara oldfala papyrus. Hem askem tu nara thrifala savveman for helpem hem long diswan.

Thrifala man hia lukluk gud long datfala papyrus and olketa sei hem luk olsem olketa raetem long samting olsem 125 C.E., wea diswan hem no longtaem bihaen aposol John hem dae. Disfala smol pis papyrus hem barava old winim eni nara papyrus wea olketa faendem wea garem raeting bilong olketa Greek Scripture long hem.

WHY NAO HEM IMPORTANT?

Why nao disfala pis papyrus hem barava important long olketa wea tinghae long Bible distaem? First samting, hem showim hao olketa Christian long first century tinghae long olketa Scripture.

Long mek-tu century C.E., olketa savve raet long scroll or codex. Scroll hem olketa papyrus or pepa wea olketa joinim tugeta for kamap wanfala long pepa. Olketa rolim disfala pepa long stik and taem olketa laek for readim then olketa openem. Long staka scroll olketa savve raet long wansaed bilong hem nomoa.

Olketa wakem codex from pepa or papyrus wea olketa sewim tugeta and foldim for luk olsem wanfala buk. So maet datfala pis papyrus hem no kam from wanfala scroll bat hem kam from wanfala codex bikos Colin lukim hem garem raeting long tufala saed bilong hem.

Olketa firstfala Christian olketa pipol for preach. (Matthew 24:14; 28:19, 20) Olketa preach long pipol wea stap long haos, long market, and long street. (Acts 5:42; 17:17; 20:20) So hem isi for olketa iusim codex winim wei for iusim scroll.

Hem isi tu for olketa long kongregeson for raetem copy bilong olketa scripture from wanfala codex. So from pipol raetem staka copy bilong olketa Gospel, datwan helpem staka pipol for kamap Christian.

Mek-tu samting, datfala pis papyrus hem important distaem bikos hem showimaot olketa no changem eni toktok taem olketa copyim datwan. Nomata datfala papyrus garem toktok from tu-thri verse long Gospel bilong John, hem barava semsem witim wanem hem stap long olketa verse hia long Bible distaem. Nomata olketa copyim Bible staka taem, datfala pis papyrus pruvim olketa no changem Bible.

Datfala pis papyrus hem wanfala long plande thousand oldfala papyrus wea showimaot olketa no changem eni toktok long Bible taem olketa copyim. Bat olketa Christian no depend long olketa oldfala samting wea pipol faendem for garem faith. Olketa barava sure “evri toktok insaed long olketa Holy Raeting hem kam from God.” (2 Timothy 3:16) Nomata olsem, olketa oldfala samting hia showimaot wanem disfala scripture talem hem tru: “Toktok bilong Jehovah hem stap for olowe”!—1 Peter 1:25.