Gudfala Pipol Bae Praisem God for Olowe
“Pipol bae gohed for tingim gudfala man . . . Gudfala wei bilong hem bae stap for olowe.”—PS. 112:6, 9.
1. (a) Pipol wea God sei olketa nao gudfala man bae kasem wanem nambawan samting long future? (b) Wanem kwestin nao pipol savve askem?
PIPOL wea God sei olketa nao gudfala man bae kasem nambawan samting long future! Olketa bae lane abaotem olketa nambawan wei bilong Jehovah for olowe. Olketa bae barava praisem God taem olketa lane abaotem olketa samting wea hem wakem. Sapos iumi laek kasem kaen laef olsem, iumi mas duim ‘olketa stretfala samting,’ wea Psalm 112 nao mekhae long hem. Bat from Jehovah hem holy and raeteous, hao nao hem savve ting long iumi man wea sin olsem gudfala man? Nomata sapos iumi waka hard for duim stret samting, iumi savve mistek, and samfala taem maet iumi duim bigfala sin tu.—Rom. 3:23; Jas. 3:2.
2. Wanem nao tufala mirakol wea Jehovah duim wea showimaot hem lovem iumi?
2 Nomata iumi sin, Jehovah duim samting wea showimaot hem lovem iumi and tingim iumi olsem gudfala man. Wanem nao hem duim? Hem duim tufala mirakol. First wan, hem putim laef bilong Son bilong hem wea stap long heven insaed bele bilong Mary mekem hem born kam olsem man wea perfect. (Luke 1:30-35) Bihaen olketa enemy killim dae Jesus, Jehovah duim nara mirakol moa. Hem mekem Jesus laef bak moa olsem wanfala nambawan spirit.—1 Pet. 3:18.
3. Why nao God hapi tumas for mekem Son bilong hem laef bak for stap long heven moa?
3 Jehovah givim nambawan samting long Jesus wea winim wanem hem garem bifor hem kam long earth. Hem givim spirit body long hem wea nating savve dae. (Heb. 7:15-17, 28) Jehovah hapi tumas for duim diswan bikos Jesus hem faithful long hem nomata hem kasem olketa nogud samting. Jehovah savve givim ansa nao long Satan. Satan hem sei pipol worshipim God for kasem samting for olketa seleva nomoa and no from olketa lovem God. Bat from Jesus hem faithful, hem barava showimaot Satan hem laea.—Prov. 27:11.
4. (a) Taem Jesus go bak long heven, wanem nao hem duim for iumi? Jehovah ting hao long datwan? (b) Hao nao tingting bilong iu long wanem Jehovah and Jesus duim for iu?
4 Taem Jesus go bak long heven, hem duim nara samting tu. Hem go “standap front long God for iumi” and hem givim go long God ‘perfect laef bilong hem’ wea hem sakrifaesim. Jehovah hapi tumas long datwan and hem acceptim “sakrifaes wea Jesus givim for sin bilong iumi.” Datwan mekem ‘tingting bilong iumi klin’ and iumi fit for duim “holy waka for God.” Dastawe iumi tu savve talem sem toktok long Psalm 112 wea sei: “Iumi praisem Jah”!—Heb. 9:12-14, 24; 1 John 2:2.
5. (a) Sapos iumi laekem God for tingim iumi olsem gudfala man, wanem nao iumi mas duim? (b) Long wanem wei nao Psalm 111 and Psalm 112 join gud tugeta?
5 Sapos iumi laekem God for tingim iumi olsem gudfala man, iumi mas gohed showimaot faith long sakrifaes bilong Jesus. Iumi mas thankiu long Jehovah evriday bikos hem lovem iumi tumas. (John 3:16) Iumi mas gohed for studyim Bible and duim olketa samting wea Bible talem. Psalm 112 storyim wanem nao man mas duim mekem hem savve gohed fren gud witim God. Disfala psalm hem barava join gud witim Psalm 111. Long start bilong Psalm 111 and Psalm 112, hem talem disfala toktok: “Iumi praisem Jah!” or long samfala Bible hem sei “Hallelujah!”a
Samting wea Mekem Man Hapi
6. Datfala “man” wea Psalm 112 storyim hem kasem wanem gud samting?
6 “Man wea fraet long Jehovah and wea laek tumas for obeyim olketa toktok bilong hem, hem hapi. Olketa pikinini bilong hem bae kamap staka long earth. God bae blessim olketa gudfala man wea born kam bihaen.” (Ps. 112:1, 2) Tingim olketa toktok hia. Long verse 1 hem storyim wanfala “man” bat long verse 2 hem storyim “olketa gudfala man.” Diswan showimaot hao taem Psalm 112 storyim wanfala man, hem savve minim staka man. Taem aposol Paul talem toktok long Psalm 112:9, hem sei disfala man hem olketa Christian long first century. (Readim 2 Corinthians 9:8, 9.) Disfala psalm barava showimaot hao olketa Christian distaem savve hapi!
7. Why nao olketa wea worshipim God mas fraet long hem? Iu mas ting hao long olketa toktok bilong God?
7 Psalm 112:1 showimaot hao olketa tru Christian barava hapi taem olketa “fraet long Jehovah.” From olketa no laek duim eni samting wea God no hapi long hem, diswan helpem olketa for no followim world bilong Satan. Olketa “laek tumas” for studyim Bible and obeyim olketa toktok bilong God. Wanfala nao hem for preachim gud nius abaotem Kingdom long evri ples long earth. Olketa waka hard for helpem pipol long evri kantri for kamap disaepol bilong Christ and talem tu olketa nogud pipol hao klosap nao God bae judgem world.—Ezek. 3:17, 18; Matt. 28:19, 20.
8. (a) From pipol bilong God preachim gud nius, wanem gud samting nao happen? (b) Pipol wea garem hope for stap long earth bae kasem olketa wanem blessing?
8 From pipol bilong God preachim gud nius, 7 million pipol nao worshipim hem distaem. Tru tumas, pipol bilong hem “kamap staka long earth”! (John 10:16; Rev. 7:9, 14) And God bae “blessim” olketa long future tu taem hem mekem plan bilong hem kamap tru! Olketa wea garem hope for stap long earth bae no dae taem “datfala big trabol” hem kam. Bible hem sei olketa nao datfala “niu earth” and olketa bae “duim stret samting.” Gogo pipol hia bae kasem nara ‘blessing’ moa. Olketa bae stap taem staka million pipol wea dae finis laef bak. Datwan hem nambawan samting! Pipol wea “laek tumas” for obeyim olketa toktok bilong God bae gogo kamap perfect. Olketa bae kamap “free tu taem olketa kamap pikinini bilong God.”—2 Pet. 3:13; Rom. 8:21.
Iusim Gud Olketa Material Samting
9, 10. Olketa wea kasem nambawan savve abaotem God iusim datwan for wanem? Sapos pipol bilong God gohed faithful, bae olketa hao?
9 “Olketa samting wea garem hae price and olketa richfala samting stap insaed haos bilong hem. And gudfala wei bilong hem bae stap for olowe tu. Hem olsem laet wea shaen long dark ples for olketa gudfala pipol. Hem kaen, hem sorre long nara pipol, and hem duim stret samting.” (Ps. 112:3, 4) Long bifor, samfala wea worshipim God olketa rich. Bat nomata sapos man no garem staka material samting, long tingting bilong God hem savve rich sapos hem duim samting wea God hapi long hem. For tok stret, maet staka wea worshipim God distaem olketa poor and pipol ting daonem olketa, olsem hem happen long taem bilong Jesus. (Luke 4:18; 7:22; John 7:49) So nomata sapos man hem rich or hem poor, long tokpiksa wei hem savve rich sapos hem garem gudfala tingting and savve abaotem God.—Matt. 6:20; 1 Tim. 6:18, 19; readim James 2:5.
10 Pipol bilong God laek iusim datfala savve wea olketa kasem for helpem narawan. Olketa ‘shaen olsem laet for gudfala pipol’ wea stap long world bilong Satan wea dark tumas. Olketa shaen olsem laet taem olketa helpem pipol for kasem nambawan savve abaotem God. Samfala pipol duim enikaen samting for stopem preaching waka, bat waka hia gohed nomoa. Gudfala samting wea kamaot from waka hia “bae stap for olowe.” Taem pipol bilong God gohed faithful nomata olketa kasem test, olketa bae “stap for olowe.”
11, 12. Pipol bilong God givim material samting bilong olketa for wanem?
11 Olketa anointed Christian and olketa long “big crowd” givim staka material samting for helpem narawan. Psalm 112:9 hem sei: “Hem givim staka samting for helpem poor pipol.” Plande taem olketa tru Christian givim olketa material samting for helpem olketa brata and sista and neiba bilong olketa tu. Olketa givim material samting tu taem olketa disaster happen. Olsem Jesus talem finis, man wea givim samting bae hem hapi.—Readim Acts 20:35; 2 Corinthians 9:7.
12 Tingim tu haomas selen nao hem kostim for wakem disfala magasin long 172 languis. Staka wea readim olketa languis hia olketa poor nomoa. Tingim hao olketa wakem disfala magasin tu long DVD for olketa wea earpas and long languis bilong pipol wea blind.
Hem Kaen and Duim Stret Samting
13. Hu nao barava kaen tumas for givim samting, and wanem nao iumi savve duim for followim olketa?
13 “Man wea kaen and givim kaon long nara pipol hem gudfala man.” (Ps. 112:5) Maet iu luksavve hao samfala pipol wea givim samting for helpem narawan, olketa no savve kaen evritaem. Taem samfala givim samting, olketa laekem pipol for luksavve olketa garem staka samting. Samfala narawan givim samting bat olketa no hapi for givim nomoa. Sapos man olsem nao helpem iu, bae iu no mas feel hapi long datwan. Bat taem man wea kaen nao helpem iu, iu hapi. Jehovah nao barava kaen tumas and hem hapi for givim samting long iumi. (1 Tim. 1:11; Jas. 1:5, 17) Jesus Christ kaen tumas tu olsem Dadi bilong hem. (Mark 1:40-42) So sapos iumi laekem God for tingim iumi olsem gudfala man, iumi mas hapi for givim samting long narawan and kaen long hem. Iumi savve duim diswan taem iumi preach long pipol and helpem olketa for savve long Jehovah.
14. Long wanem wei nao iumi savve ‘duim stretfala samting’?
14 “Hem duim evri samting long stretfala wei.” (Ps. 112:5) Olsem Bible talem, datfala wakaman wea faithful and wise hem lukaftarem evri samting bilong Jesus long stretfala wei. (Readim Luke 12:42-44.) Wanfala samting wea showimaot diswan nao, datfala wakaman givim advaes from Bible for olketa elder duim samting long stretfala wei, bikos samfala taem olketa elder hia mas stretem olketa wea duim bigfala sin. Nara samting tu, datfala wakaman givim stretfala kaonsel from Bible abaotem hao evri samting mas gohed long kongregeson, long missionary hom, and long Bethel. Hem no olketa elder nomoa wea mas duim samting long stretfala wei bat iumi tu mas duim stret samting long olketa brata and sista, pipol long world, and taem iumi duim bisnis.—Readim Micah 6:8, 11.
Blessing wea Gudfala Pipol Bae Kasem
15, 16. (a) Hao nao tingting bilong gudfala pipol abaotem olketa nogud nius wea olketa herem? (b) Wanem nao pipol bilong God disaed strong for duim?
15 “No enitaem bae hem seksek. Pipol bae gohed for tingim gudfala man for olowe. Hem bae no fraet nomata hem herem nogud nius. Hem no seksek bikos hem trustim Jehovah. Hem no wari and hem no fraet go kasem taem olketa enemy bilong hem finis.” (Ps. 112:6-8) Distaem iumi herem staka nogud nius winim enitaem bifor. Iumi herem nius abaotem olketa war, terrorist, niufala sik and olketa sik long bifor wea kamap moa, pipol brekem law, pipol poor, and olketa samting wea spoelem earth. Olketa nogud samting hia savve spoelem pipol bilong God tu, bat olketa no fraet long wanem bae happen long future. Olketa “no seksek” and “no wari” bikos olketa savve niu world bilong God hem klosap nao. Sapos disaster kasem olketa, olketa no wari tumas bikos olketa trustim Jehovah nao for lukaftarem olketa. Hem bae no letem gudfala pipol bilong hem for “seksek.” Hem bae helpem olketa for gohed strong.—Phil. 4:13.
16 Pipol heitim iumi tu and talem olketa laea samting abaotem iumi. Nomata olsem, diswan nating stopem iumi for preach. Iumi gohed strong for preachim gud nius abaotem Kingdom and teachim pipol for kamap disaepol. Bat iumi savve hao taem end hem klosap kam pipol bae barava laek spoelem iumi. Diswan bae big go moa taem Satan, wea hem nao Gog bilong Magog, attakim pipol bilong God. Bat long datfala taem, ‘olketa enemy bilong iumi bae finis.’ Iumi bae hapi tumas taem iumi lukim datwan happen bikos datwan bae barava mekhae long nem bilong Jehovah!—Ezek. 38:18, 22, 23.
“God Bae Mekem Hem Win”
17. Long wanem wei nao ‘gudfala man bae win’?
17 Hem bae naes tumas taem Satan and world bilong hem no savve spoelem iumi moa bat iumi evriwan savve praisem Jehovah! Gudfala pipol bae praisem Jehovah for olowe. Satan bae no finisim olketa bikos Jehovah promisim tu hao ‘hem bae mekem gudfala man win.’ (Ps. 112:9) Gudfala man bae win taem hem lukim evri enemy bilong Jehovah finis.
18. Hao nao lastfala toktok long Psalm 112 bae kamap tru?
18 “Taem nogud man lukim diswan hem bae kros tumas. Hem bae lukluk nogud long gudfala man, bat hemseleva nao bae finis. Samting wea olketa nogud man laekem bae nomoa nao.” (Ps. 112:10) Evriwan wea heitim pipol bilong God and againstim olketa bae “finis.” Samting wea nogud pipol hia laekem nao hem for stopem waka bilong iumi. Bat taem “bigfala trabol” kam, samting wea olketa laekem hia bae no happen nao.—Matt. 24:21.
19. Sapos iumi showimaot faith, wanem nao bae iumi kasem?
19 Waswe, bae iu stap laef bihaen evri samting hia happen? Or sapos iu dae from iu sik or iu olo bifor world bilong Satan finis, waswe, bae iu wanfala long olketa “gudfala man” wea bae laef bak? (Acts 24:15) Bae hem olsem nao sapos iu showimaot faith long sakrifaes bilong Jesus and followim olketa gudfala wei bilong Jehovah, olsem gudfala “man” long Psalm 112 hem duim. (Readim Ephesians 5:1, 2.) Jehovah bae mek sure pipol bae “gohed for tingim” olketa gudfala man and gud samting wea olketa duim. Jehovah bae lovem and tingim olketa for olowe.—Ps. 112:3, 6, 9.
[Footnote]
a Samting wea showimaot tufala psalm hia join gud tugeta nao hem wei wea man hem raetem olketa toktok followim Hebrew alphabet and samting wea tufala psalm hia storyim. Psalm 111 storyim olketa wei bilong God. Psalm 112 story abaotem “man” wea followim olketa wei hia. Iu savve lukim diswan taem iu markem Psalm 111:3, 4 witim Psalm 112:3, 4.
Ting Raonem Diswan
• Why nao iumi fit for talem disfala toktok “Hallelujah”?
• Wanem nao happen distaem wea mekem olketa tru Christian hapi tumas?
• Taem man givim samting, Jehovah laekem hem for hao?
[Piksa long page 25]
Iumi mas showimaot faith long sakrifaes bilong Jesus mekem God tingim iumi olsem gudfala man
[Piksa long page 26]
Contribution wea iumi givim helpem relief waka and for printim olketa buk long staka languis