Hao Nao Iu Savve Gohed Strong for Preach?
WASWE, enitaem iu barava taed gogo iu no laek for preach nao? Maet hem hard for iumi gohed strong bikos pipol againstim iumi, hevi, sik, hard taem from olketa wea sem age witim iumi, or from pipol no interest. Bat tingim samting wea Jesus duim. Hem gohed strong nomata hem kasem bigfala test “from hem tingim hapi wea hem bae kasem.” (Heb. 12:2) Hem savve hao wei for gohed strong and showimaot olketa toktok wea againstim God hem no tru, datwan mekem Jehovah hapi.—Prov. 27:11.
Iumi tu savve mekem Jehovah hapi taem iumi no givap for preach. Bat hao sapos samfala problem isisi mekem iumi wikdaon for preach? Krystyna wea olo and savve sik talem olsem: “Staka taem mi feel taed and no hapi. Olketa problem wea mi kasem from mi olo, olsem sik and wei for wari abaotem olketa samting long laef evriday, savve mekem mi no strong for laek preach samfala taem.” Hao nao iu savve gohed strong for preach nomata iu kasem olketa hard taem olsem?
Followim Olketa Profet
For gohed strong long preaching waka, olketa pablisa mas trae hard for garem tingting wea semsem olsem olketa profet bifor. Tingim Jeremiah. Taem God askem hem for kamap profet hem no laekem firstaem. Bat from Jeremiah barava trustim God, hem gohed strong for duim waka bilong hem wea hard tumas for winim 40 year.—Jer. 1:6; 20:7-11.
Gudfala wei bilong Jeremiah strongim Henryk. Hem sei: “Mi preach for winim 70 year, and samfala taem wei bilong pipol for no story gud, kros and no interest mekem mi wikdaon. Long taem olsem, mi tingim hao wei wea Jeremiah lovem and fren gud witim Jehovah strongim hem for gohed talemaot profesi.” (Jer. 1:17) Wei bilong Jeremiah strongim Rafał tu. Hem sei: “Jeremiah trustim God and hem no tingim hemseleva nomoa and wanem hem laekem. Hem gohed strong nomata staka pipol againstim hem. Mi trae for tingting olsem evritaem.”
Isaiah hem narafala profet wea wei bilong hem helpem staka for gohed strong for preach. God talem hem hao olketa wantok bilong hem bae no herem wanem hem talem. Jehovah sei: ‘Mekem heart bilong pipol hia no lisin and mekem ear bilong olketa no herehere gud.’ Waswe, waka bilong Isaiah bae nogud nao? God no ting olsem! Taem Isaiah kasem waka olsem profet, hem sei: “Mi long hia! Sendem mi.” (Isa. 6:8-10) Isaiah no givap for duim waka bilong hem. Waswe, iu garem tingting olsem for duim preaching waka wea God talem iu for duim?
For gohed strong for preach olsem Isaiah duim nomata pipol no interest, iumi mas trae for no tingim evritaem pipol wea tok spoelem iumi or no interest. Taem Rafał kasem hard taem, hem sei olsem: “Mi trae for no tingim evritaem olketa nogud toktok wea pipol talem. Pipol long territory savve talem eni samting wea olketa laek for talem.” Anna tu sei olsem: “Mi trae for no tingim olketa nogud tingting wea bae mekem mi wikdaon. Bifor mi go preach, wei for prea and lukluk long text evriday nao helpem mi for duim datwan. Kwiktaem nomoa olketa nogud tingting finis nao.”
Ezekiel hem wanfala profet taem olketa bighed Jew stap prisoner long Babylon. (Ezek. 2:6) Sapos Ezekiel no talemaot evri toktok bilong God and sapos wanfala rabis man dae and hem no herem datfala warning, Ezekiel nao bae kasem blame for datwan. Jehovah talem Ezekiel: “Blood bilong hem mi bae askem bak from hand bilong iu.”—Ezek. 3:17, 18.
Henryk tu laek for garem tingting olsem Ezekiel, hem sei: “Mi no laek for guilty long blood bilong olketa man. Laef bilong pipol stap long danger.” (Acts 20:26, 27) Zbigniew garem tingting olsem tu: “Ezekiel gohed nomata wanem nao pipol talem. Diswan helpem mi luksavve long tingting bilong God abaotem disfala preaching waka.”
Iu No Stap Seleva
Taem iu preach, iu no stap seleva. Olsem aposol Paul talem: “Mifala nao pipol wea waka witim God.” (1 Cor. 3:9) Krystyna, wea samfala taem hem savve wikdaon, talem olsem: “Dastawe mi evritaem askem Jehovah for strongim mi. Evritaem hem herem mi.” Tru nao, for preach iumi needim spirit bilong God for strongim iumi!—Zech. 4:6.
Taem iumi preach, holy spirit helpem iumi for showimaot tu olketa wei wea “spirit hem mekem man for garem.” (Gal. 5:22, 23) Datwan helpem iumi for gohed preach, nomata wanem nao happen. Henryk talem olsem: “Taem mi preach, datwan helpem mi for showimaot olketa gudfala wei. Mi lane for weit and tingim narawan and no givap kwiktaem.” Wei for gohed preach nomata iumi kasem hard taem savve helpem iumi for garem and showimaot wei bilong spirit.
Jehovah iusim olketa angel bilong hem for leadim disfala spesol waka. (Rev. 14:6) Bible talem hao ‘staka million angel wea hard for kaontem’ nao olketa stap. (Rev. 5:11) Jesus leadim olketa angel for helpem olketa wakaman bilong God long earth. Waswe, iu evritaem tingim datwan taem iu preach?
Anna hem sei: “Taem mi ting raonem wei wea olketa angel stap witim iumi taem iumi preach, datwan barava strongim mi. Mi tinghae long wei wea Jehovah and Jesus iusim olketa for helpem iumi.” Hem barava naes tumas for waka witim olketa angel!
Waswe taem iumi preach witim olketa brata and sista? Hem wanfala blessing for iumi waka witim staka nara faithful Witness. Maet iuseleva faendem hao disfala Bible proverb hem tru wea talem olsem: ‘Iron savve sharpenem narafala iron. And wanfala man savve sharpenem narafala man.’—Prov. 27:17.
Taem iumi preach witim olketa narawan, hem naesfala chance for iumi lanem samfala niu wei for preach. Elżbieta sei olsem, “Taem mi preach witim olketa difren pablisa, mi garem chance for showimaot love long olketa and pipol wea iumi preach long olketa.” Trae for preach witim olketa difren pablisa. Taem iu duim olsem, wei wea iu preach bae naes tumas.
Lukaftarem Gud Iuseleva
Iumi mas plan gud, garem gudfala study schedule, and rest gud mekem iumi savve gohed strong for preach. So diswan minim iumi mas fren gud witim Jehovah and lukaftarem gud health bilong iumi tu.
Bible talem olsem: ‘Man wea plan gud bae kasem reward.’ (Prov. 21:5) Zygmunt wea hem 88 year distaem, talem olsem: “Wei for followim gudfala schedule helpem mi for preach long gudfala wei. Mi mas plan gud mekem mi garem taem for preach.”
Savve wea kam from Bible hem strongim iumi and mekem iumi fit for preach. Iumi mas kaikaim spiritual kaikai evriday for gohed preach, olsem iumi mas kaikai evriday for gohed stap laef. Wei for readim Bible evriday and kasem kaikai “long barava taem” savve strongim iumi for preach.—Matt. 24:45-47.
Elżbieta changem living bilong hem mekem hem savve preach gud go moa. Hem sei: “From mi no lukluk TV tumas distaem, datwan mekem mi garem taem for redi for preach. Taem mi readim Bible evri evening, mi tingim nao pipol wea mi preach long olketa. Mi lukaotem olketa scripture and olketa magasin wea savve helpem olketa.”
Taem iu rest gud, datwan bae helpem iu for strong and duim gud preaching waka bilong iu. Bat sapos iu ova tumas long hapitaem, datwan bae mekem iu no duim gud waka bilong iu. Brata Andrzej, wanfala pablisa wea strong for preach talem olsem: “Wei for no rest gud savve mekem man taed tumas and taem man taed hem isi for wikdaon. Mi trae hard for no letem datwan kasem mi.”—Eccl. 4:6.
Nomata iumi strong for preach, tu-thri pipol nomoa tinghae long disfala gud nius. Bat Jehovah bae nating forgetim hard waka wea iumi duim. (Heb. 6:10) Nomata staka no laek for story witim iumi, maet olketa story abaotem waka bilong iumi bihaen iumi go. Samting wea kamaot from diswan maet olsem wanem iumi readim abaotem Ezekiel: ‘Pipol bae luksavve wanfala profet stap midolwan long olketa.’ (Ezek. 2:5) For tok stret, preaching waka wea iumi duim hem no isi, bat iumi savve kasem gud samting from disfala waka and pipol wea herem iumi.
Zygmunt sei: “Taem iumi preach, datwan helpem iumi for showimaot olketa gudfala wei and love bilong iumi for God and olketa neiba.” Andrzej sei tu: “Hem barava gud tumas for share long disfala waka for sevem laef bilong pipol. Iumi bae no duim disfala waka moa long wei wea semsem olsem distaem.” Iu tu savve kasem staka blessing sapos iu no givap for preach distaem.—2 Cor. 4:1, 2.
[Piksa long page 31]
Wei for fren gud witim Jehovah and lukaftarem gud health bilong iumi bae helpem iumi gohed strong for preach