Gohed Strong and No Givap for Duim Ministry

WAKA for preachim gud nius abaotem Kingdom hem nao barava important waka wea gohed long earth distaem. From iu Witness bilong Jehovah, iu ting long waka for mekem pipol kamap disaepol olsem nambawan privilege. Nomata olsem, samfala taem olketa pioneer and pablisa tu savve feisim olketa samting wea mekem hem no isi for gohed strong for duim ministry.

Long samfala territory, olketa pablisa no meetim eniwan for story witim bikos staka pipol no stap long haos. And taem olketa faendem samwan, maet hem no interest or hem raosem olketa. Samfala nara pablisa garem bigfala territory and pipol interest, bat olketa wari maet bae olketa no fit for kasem evriwan long territory. And samfala pablisa duim preaching waka for staka year finis, wea olketa tingse bae olketa no duim datwan, so olketa start for wikdaon.

Waswe, iumi sapraes from pipol bilong Jehovah feisim samfala samting wea mekem hem no isi for gohed strong for duim preaching waka? Nomoa. Iumi evriwan savve bae hem no isi for talemaot message bilong God wea savve sevem pipol bikos iumi long world wea “stap long paoa bilong Satan.”—1 John 5:19.

Nomata wanem samting iumi feisim wea mekem hem no isi for talemaot gud nius, iumi savve Jehovah bae helpem iumi for winim olketa samting hia. Bat wanem nao iumi savve duim for helpem iumi for no givap for duim ministry? Distaem bae iumi storyim samfala samting wea savve helpem iumi.

HELPEM OLKETA NIU PABLISA

Evri year, staka thousand niu wan baptaes and kamap Witness bilong Jehovah. Sapos iu just baptaes, iu bae hapi for kasem help from olketa narawan wea duim preaching waka for staka year finis. And sapos iu duim disfala waka for staka year finis, bae iu hapi for helpem and trainim olketa wea just baptaes!

Jesus savve olketa disaepol bilong hem needim training mekem olketa savve hao for preach, and hem showim olketa hao for duim datfala waka. (Luke 8:1) Distaem tu, olketa niu wan needim training mekem olketa savve hao for preach.

Iumi shud no tingse sapos wanfala niu pablisa go olowe long preaching, bae hem savve hao for teach. Hem needim samwan wea kaen and showimaot love for trainim hem. Niu pablisa needim training long olketa samting hia: (1) Hao for preparem story and practicem datwan. (2) Hao for story witim haosholder or eniwan wea hem meetim. (3) Hao for offerim literature. (4) Hao for duim return visit. (5) Hao for startim Bible study. Niu pablisa bae kasem gud samting sapos hem luk followim hao datfala pablisa wea trainim hem duim ministry. (Luke 6:40) And datfala niu pablisa bae no fraet taem hem savve samwan redi for helpem hem taem hem needim datwan. Wei for praisem and storyim samfala gud idea long olketa niu pablisa savve helpem olketa tu.—Eccl. 4:9, 10.

ENCOURAGEM PARTNER BILONG IU

Taem iumi duim preaching waka, samfala day nomata iumi traem best bat no eniwan interest for story witim iumi. Nomata olsem, iumi enjoyim naesfala story witim partner bilong iumi. Iumi mas tingim Jesus hem markem ‘tufala disaepol for waka tugeta’ taem olketa go preach. (Luke 10:1) Taem tufala waka tugeta, tufala savve encouragem tufala. So taem iumi waka witim narawan, datwan hem gudfala chance for iumi “strongim narawan.”—Rome 1:12.

Wanem nao samfala samting wea maet iutufala savve story abaotem? Maet iutufala storyim eni naes experience wea iufala kasem long ministry. Iu savve storyim eni interesting point wea iu faendem taem iu study seleva or duim famili worship. Iu savve storyim tu eni samting wea iu lanem long meeting wea encouragem iu. Samfala taem maet iu waka witim wanfala pablisa wea iu no really savve gud long hem. Iu savve askem hem hao nao hem kam insaed long truth. Wanem nao mekem hem barava sure diswan hem truth? Wanem nao samfala privilege or experience wea hem kasem bifor? Maet iu savve storyim tu samfala experience bilong iu. Nomata pipol long territory willing for lisin or nomoa, wei wea iu waka witim nara pablisa hem gudfala chance for “encouragem and strongim narawan.”—1 Thess. 5:11.

DUIM STUDY SELEVA EVRITAEM

Wanfala important samting wea savve helpem iumi for gohed strong long ministry hem for duim study seleva evritaem. “Datfala wakaman wea faithful and wise” hem pablisim staka information abaotem olketa difren subject. (Matt. 24:45) Olketa subject wea iu savve studyim hem staka tumas. Example bilong wanfala gud subject wea iu savve studyim nao hem: Why nao preaching waka hem barava important? Box wea garem title “Why Nao Hem Important for Gohed Strong and No Givap for Duim Ministry” hem storyim samfala reason.

Sapos iu ting raonem olketa reason insaed long datfala box, datwan bae mekem iu gohed strong and no givap for duim preaching waka. Hem bae gud sapos iu duim research long diswan and faendem olketa narafala reason why nao waka for preach abaotem Kingdom hem barava important. Then ting raonem olketa reason hia and olketa scripture wea sapotim olketa. Sapos iu duim datwan, bae hem strongim wei wea iu gohed strong long ministry.

WILLING FOR TRAEM OLKETA DIFREN WEI FOR PREACH

Organization bilong Jehovah hem evritaem storyim olketa difren idea for preach wea savve helpem iumi for kamap gud long ministry. Main wei for preach nao hem from haos tu haos. Bat iumi savve traem tu olketa difren wei olsem for raetem leta, telephone witnessing, preach long pipol wea iumi meetim long road or long olketa nara ples, enitaem witnessing, and long bisnis territory. And samfala taem iumi savve plan for go preach tu long olketa territory wea iumi no savve duim evritaem.

Waswe, iu willing for traem olketa difren wei hia? Waswe, iu traem finis samfala wei for preach olsem? Staka wea traem finis olketa difren wei for preach olsem olketa kasem gud samting and olketa hapi tumas. Tingim thrifala experience hia.

Firstfala experience hem abaotem wanfala sista wea followim idea insaed Kingdom Ministry abaotem hao for startim Bible study. Sista hia wea nem bilong April offerim Bible study long thrifala woman wea hem waka witim. Hem sapraes and hapi tumas taem thrifala evriwan willing for studyim Bible and start for attendim olketa meeting.

Mek-tu experience hem abaotem wei for offerim olketa magasin long pipol wea olketa subject insaed hem fitim olketa. Wanfala circuit overseer long United States sei hem offerim Awake! magasin wea garem article abaotem olketa tyre, long olketa manager bilong olketa stoa wea salem tyre. Hem and waef bilong hem tekem Awake! magasin wea garem title, “Understanding Your Doctor” long winim 100 office bilong olketa doctor long circuit bilong tufala. Hem sei: “Taem mifala go visitim olketa olsem, olketa savve long mifala and savve abaotem literature bilong iumi. From mifala mek fren witim olketa, mifala savve go bak and visitim olketa moa.”

Mek-thri experience hem abaotem wei for duim telephone witnessing. Wanfala sista wea nem bilong Judy hem raet go long world hedquarter and talem thankiu bilong hem for encouragement wea iumi kasem for duim telephone witnessing. Judy sei mami bilong hem wea 86 year, wea garem staka problem long health bilong hem, hem evritaem duim telephone witnessing, and hem hapi tumas bikos hem conductim wanfala Bible study long telephone witim wanfala woman wea hem 92 year.

Olketa pablikeson bilong iumi storyim olketa barava gudfala idea. Iu traem olketa idea hia! Olketa savve helpem iu for gohed strong and no givap for duim ministry.

MARKEM OLKETA GOAL WEA IU FIT FOR KASEM

Olketa samting olsem haomas literature iumi offerim, haomas study iumi garem, or haomas pipol iumi helpem for worshipim Jehovah, hem no main samting wea showimaot iumi win long ministry. Tingim diswan: Haomas pipol nao Noah helpem for worshipim Jehovah witim hem and famili bilong hem? No eni narawan. Nomata olsem, hem win long preaching waka bilong hem. So important samting nao hem for iumi faithful for worshipim Jehovah.—1 Cor. 4:2.

Samting wea staka pablisa duim for mekem olketa gohed strong for duim preaching waka hem nao for markem olketa goal wea olketa fit for kasem. Wanem nao samfala goal hia? Samfala idea stap long box wea garem title “Markem Olketa Goal wea Iu Fit for Kasem.”

Askem Jehovah for helpem iumi for luksavve long olketa difren wei wea iumi savve duim gud ministry bilong iumi, and for hem blessim datwan. Taem iu kasem olketa goal bilong iu, bae iu hapi tumas and satisfae bikos iu savve iu duim best bilong iu for talemaot gud nius.

Hem tru, wei for preachim gud nius hem no isi. Nomata olsem, samfala samting stap wea iu savve duim mekem iu kamap pablisa wea strong for talemaot gud nius. Iu savve kasem encouragement from partner bilong iu, duim study seleva evritaem, willing for traem olketa difren wei for preach wea datfala wakaman wea faithful hem encouragem iumi for duim, and markem olketa goal wea iu fit for kasem. Main samting nao iu mas no forgetim wei wea God givim iu nambawan privilege for kamap Witness bilong hem wea talemaot gud nius. (Isa. 43:10) Bae iu kasem bigfala hapi sapos iu gohed strong and no givap for duim ministry!