Olketa Famili, Followim Example Bilong Jesus!
“Christ . . . showim example bilong hem mekem iufala followim gud.”—1 PET. 2:21.
1. (a) Taem God wakem evri samting, wanem nao Son bilong hem duim? (b) Wanem nao tingting bilong Jesus abaotem olketa man?
TAEM God wakem skae and earth, firstborn Son bilong hem waka witim hem. Son hia hem wanfala “nambawan wakaman.” Hem helpem Jehovah tu for designim and wakem staka difren kaen animal and plant long earth. And hem waka witim Jehovah taem Hem mekem Paradaes long earth for olketa man stap long hem. Son bilong God, wea iumi savve hem nao Jesus, hem barava lovem olketa man.—Prov. 8:27-31; Gen. 1:26, 27.
2. (a) Wanem nao Jehovah givim olketa man wea no perfect for helpem olketa? (b) Wanem nao wanfala samting wea Bible savve helpem iumi long hem?
2 Bihaen Adam and Eve sin, wanfala important samting long plan bilong Jehovah nao hem for mekem olketa man kamap free from sin. Jehovah givim Christ nao for dae for iumi mekem datwan savve happen. (Rom. 5:8) Jehovah givim Bible tu for helpem olketa man hapi nomata olketa no perfect. (Ps. 119:105) Long Bible, Jehovah storyim samting wea savve helpem famili for gohed strong and hapi. Buk bilong Genesis story abaotem marit. Hem sei man mas “stap witim waef bilong hem and tufala mas olsem wanfala body.”—Gen. 2:24.
3. (a) Wanem nao Jesus teachim abaotem marit? (b) Wanem nao bae iumi storyim long disfala study?
3 Taem Jesus duim ministry bilong hem, hem storyim hao marit hem for olowe. Hem storyim olketa samting wea evriwan long famili savve followim mekem olketa no garem kaen tingting and wei wea savve spoelem marit or mekem famili no hapi. (Matt. 5:27-37; 7:12) Disfala study bae storyim hao samting wea Jesus teachim and example bilong hem savve helpem olketa hasband and waef, olketa dadi and mami, and olketa pikinini for hapi.
Wanem Hasband Savve Duim for Respectim Waef Bilong Hem
4. Long wanem wei nao waka bilong Jesus and waka bilong olketa Christian hasband semsem?
4 God markem hasband nao for hed long famili, olsem Jesus tu hem Hed long kongregeson. Aposol Paul hem sei: “Hasband nao hem hed long waef olsem Christ tu hem hed long kongregeson, wea hem nao man wea sevem disfala body. Olketa hasband, gohed for lovem waef bilong iufala, long sem wei wea Christ tu hem lovem kongregeson and givim laef bilong hem for datwan.” (Eph. 5:23, 25) Tru tumas, Jesus hem kaen long olketa wea followim hem and diswan hem example for olketa Christian hasband mas followim long hao for olketa mas lukaftarem waef bilong olketa. Bae iumi storyim samfala wei wea Jesus iusim paoa wea God givim long hem taem hem stap witim olketa disaepol.
5. Nomata olketa disaepol stap anda long Jesus, Jesus hem hao long olketa?
5 Jesus ‘no savve raf bat hem hambol.’ (Matt. 11:29) Taem hem mas duim samting, hem duim nao. Hem evritaem duim olketa samting wea hem mas duim. (Mark 6:34; John 2:14-17) Hem givim kaonsel long olketa disaepol bilong hem, nomata hem mas duim datwan staka taem. (Matt. 20:21-28; Mark 9:33-37; Luke 22:24-27) Nomata olsem, Jesus no hotem olketa or mek-shame long olketa. Hem no mekem olketa feel olsem hem no lovem olketa or olketa no fit for duim wanem hem teachim. Bat hem praisem olketa disaepol bilong hem and strongim olketa for duim stret samting. (Luke 10:17-21) Olketa disaepol respectim Jesus bikos hem lovem and tingim olketa!
6. (a) Wanem nao hasband savve lanem from example wea Jesus showimaot? (b) Wanem nao Peter talem olketa hasband for duim?
6 Example wea Jesus showimaot helpem olketa Christian hasband luksavve hao nomata olketa hed long famili, olketa mas no raf long waef bilong olketa. Olketa mas respectim and lovem waef bilong olketa and no tingim olketa seleva nomoa. Aposol Peter talem olketa hasband for followim example bilong Jesus for lovem waef and “duim olketa samting wea showimaot olketa tingim olketa” and “respectim olketa.” (Readim 1 Peter 3:7.) Bat long wanem wei nao hasband savve duim waka bilong hem olsem hed long famili long wei wea showimaot respect for waef bilong hem tu?
7. Long wanem wei nao hasband savve showimaot hem respectim waef bilong hem? Storyim example.
7 Hasband savve showimaot hem respectim waef bilong hem taem hem ting raonem wanem waef hem talem and tingting bilong hem bifor hem disaedem samting for famili. Maet diswan hem abaotem wei for muv go long nara ples or for duim difren waka for selen. Or maet hem abaotem wea nao for famili go holiday or hao nao famili iusim selen taem selen hem hard tumas. From hasband mas disaedem samting for full famili, hem gud for hem tingim tingting bilong waef, bikos diswan savve helpem hem disaedem samting long gudfala wei and hem bae mekem hem isi for waef sapotim hem. (Prov. 15:22) Taem olketa Christian hasband respectim waef bilong olketa, waef bilong olketa bae lovem and respectim olketa. And Jehovah bae barava hapi long olketa tu.—Eph. 5:28, 29.
Wanem Waef Savve Duim for Showimaot Hem Barava Respectim Hasband
8. Why nao olketa waef mas no followim example bilong Eve?
8 Olketa Christian waef savve followim perfect example wea Jesus showimaot for stap anda. Jesus garem stretfala tingting abaotem wei for stap anda, bat Eve, wea hem firstfala waef wea Bible storyim, hem nating olsem! Eve no showimaot gudfala example for olketa waef followim. God markem Adam nao for hed bilong hem and Jehovah story kam long Adam abaotem samting wea tufala mas duim. Bat Eve no respectim hao Adam nao hem hed. Hem no herem wanem Adam talem hem. (Gen. 2:16, 17; 3:3; 1 Cor. 11:3) Hem tru, Satan hem trikim Eve, bat hem fitim for Eve story firstaem witim hasband bilong hem. Hem shud askem hem sapos hem fitim for herem toktok bilong Satan wea talem hem samting wea “God hem savve.” Eve nao talem wanem for hasband bilong hem mas duim, and datwan hem no stret.—Gen. 3:5, 6; 1 Tim. 2:14.
9. Long wanem wei nao Jesus stap anda long Dadi bilong hem?
9 Jesus hem no olsem Eve bikos hem barava stap anda long Jehovah, wea hem nao Hed bilong hem. Wanem hem tingim and duim showimaot “hem nating ting for trae semsem witim God.” Bat “hem lusim hae position bilong hem and kamap wanfala wakaman nomoa.” (Phil. 2:5-7) Nomata Jesus hem King distaem, hem gohed stap anda long Dadi bilong hem long evri samting wea hem duim.—Matt. 20:23; John 5:30; 1 Cor. 15:28.
10. Wanem nao waef savve duim for showimaot hem stap anda long hasband bilong hem?
10 Hem gud for Christian waef followim example bilong Jesus taem hem stap anda long hasband bilong hem. (Readim 1 Peter 2:21; 3:1, 2.) Tingim wanfala wei wea hem savve duim diswan. Maet boy bilong hem laek duim samting wea hem mas askem dadi and mami bilong hem firstaem. From mami and dadi no story yet abaotem datwan, hem fitim for mami askem boy olsem: “Hao, iu askem dadi finis?” Sapos nomoa, mami shud story witim hasband bilong hem firstaem bifor tufala disaedem datwan. Hem bae no fitim tu for waef kwestinim hasband or for sei hasband hem rong taem olketa pikinini stap. Sapos hem no hapi long samting wea hasband disaedem, hem bae story witim hasband taem olketa pikinini no stap.—Eph. 6:4.
Example wea Jesus Showimaot for Olketa Mami and Dadi
11. Wanem example nao Jesus showimaot for olketa mami and dadi?
11 Nomata Jesus no marit or garem pikinini, hem barava showimaot gudfala example for olketa dadi and mami followim. Hao nao olsem? Hem showimaot love and hem isisi witim olketa disaepol bilong hem taem hem teachim olketa long wanem hem duim and long toktok bilong hem. Hem teachim olketa hao for duim waka wea hem givim long olketa. (Luke 8:1) From Jesus kaen long olketa disaepol and hem showimaot naesfala wei, datwan lanem olketa for olsem tu long nara pipol.—Readim John 13:14-17.
12, 13. Sapos dadi and mami laekem pikinini for fraet long God, wanem nao olketa mas duim?
12 Hem wei bilong pikinini for followim wei bilong mami and dadi, nomata sapos wei bilong tufala hem gud or nogud. So tingim diswan: ‘Wanem example nao iumi showimaot for olketa pikinini bilong iumi? Haomas taem nao iumi lukluk long video and duim hapitaem? Haomas taem nao iumi iusim for studyim Bible and go long preaching? Wanem nao important long famili bilong iumi? Waswe, iumi showimaot gudfala example from wei for worshipim Jehovah nao important samting long laef bilong iumi?’ Sapos dadi and mami laekem pikinini for lovem God and fraet long hem, olketa tu mas lovem God and law bilong hem.—Deut. 6:6.
13 Bae olketa pikinini luksavve nomoa sapos mami and dadi traem best evritaem for followim wanem Bible hem talem. Sapos olsem, pikinini bae tinghae long wanem mami and dadi talem. Bat sapos olketa pikinini lukim mami and dadi duim samting wea difren from wanem olketa talem pikinini for duim, maet olketa pikinini tingse wanem Bible talem hem no important and no helpem man. Sapos olsem, world savve isi nomoa for pullim tingting bilong olketa.
14, 15. Mami and dadi savve helpem pikinini bilong olketa for tinghae long olketa wanem samting, and hao nao olketa savve duim datwan?
14 Olketa mami and dadi luksavve olketa mas duim plande nara samting for lukaftarem pikinini and no just givim nomoa olketa material samting wea olketa needim. So hem bae no helpem pikinini sapos iumi encouragem hem for busy nomoa for kasem olketa material samting. (Eccl. 7:12) Jesus teachim olketa disaepol for mekem kingdom nao first samting long laef bilong olketa and for duim olketa samting wea God sei hem stret. (Matt. 6:33) Dastawe olketa mami and dadi mas followim Jesus and helpem pikinini for laek duim samfala samting moa for worshipim God.
15 Wanfala samting wea mami and dadi savve duim nao hem for arrangem taem for olketa wea duim full-taem service savve kaban witim famili bilong olketa. Tingim hao for kaban witim olketa pioneer and circuit overseer and waef bilong hem savve strongim olketa teenager. Olketa missionary, olketa Bethelite, and olketa wea waka long construction savve storyim hapi wea man kasem taem hem worshipim Jehovah. Olketa savve talem tu olketa naes experience abaotem waka wea olketa duim. Sakrifaes wea olketa duim for worshipim Jehovah savve helpem pikinini bilong iu for mekem olketa gudfala disison, for markem olketa spiritual goal, and traem best for faendem waka wea bae helpem olketa for duim full-taem service.
Wanem Nao Bae Helpem Pikinini for Followim Example Bilong Jesus?
16. Wanem nao Jesus duim wea showimaot hem respectim mami and dadi bilong hem witim Dadi bilong hem long heven?
16 Jesus showimaot nambawan example for iufala pikinini tu. Jehovah markem Joseph and Mary for lukaftarem Jesus, and hem obeyim tufala. (Readim Luke 2:51.) Jesus luksavve nomata olketa no perfect, God nao markem tufala for lukaftarem hem and hem mas respectim tufala. (Deut. 5:16; Matt. 15:4) Taem hem big, Jesus evritaem duim samting wea Dadi bilong hem long heven laekem. Taem Satan traem Jesus, hem no letem Satan for switim hem. (Matt. 4:1-10) Maet samfala taem Satan hem traem iufala young wan for no obeyim mami and dadi. So wanem nao savve helpem iu for followim example bilong Jesus?
17, 18. (a) Wanem kaen hard taem nao olketa young wan kasem long skul? (b) Wanem nao hem gud for olketa pikinini tingim mekem olketa savve gohed strong taem olketa kasem hard taem?
17 Plande long olketa pikinini long skul no tinghae long wanem Bible hem talem. Maet olketa laekem iu for duim samting wea no stret and tok spoelem iu from iu no laek duim wanem olketa talem. Waswe, enitaem olketa pikinini long skul duim olsem long iu? Sapos olsem, wanem nao iu duim? Sapos iu fraet and duim wanem olketa laekem iu for duim, bae mami, dadi bilong iu, and Jehovah no hapi long iu. Wanem nao bae happen long iu sapos iu followim olketa pikinini hia? Maet iu markem finis samfala goal olsem for pioneer or ministerial servant or help long ples wea needim samfala pablisa moa or for waka long Bethel. Hao, wei for kaban witim olketa pikinini hia bae helpem iu for kasem olketa goal bilong iu?
18 Iufala olketa young wan long kongregeson, waswe, eni samting happen wea testim faith bilong iufala? Wanem nao iufala duim? Tingim Jesus. Hem no letem Satan for switim hem bat hem strong for duim samting wea hem stret. Sapos iu tingim samting wea Jesus duim, datwan bae helpem iu for talem stret long olketa pikinini long skul hao iu no laek duim eni samting wea no stret. Duim sem samting olsem Jesus and tingim evritaem hao iu bae hapi taem iu worshipim Jehovah and obeyim hem long full laef bilong iu.—Heb. 12:2.
Main Samting for Mekem Famili Hapi
19. Wanem nao savve mekem man barava hapi?
19 Jehovah God and Jesus Christ laekem olketa man for kasem barava gud samting. Nomata iumi no perfect, iumi savve hapi. (Isa. 48:17, 18; Matt. 5:3) Olketa tru samting wea Jesus teachim mekem wei for olketa man savve hapi, bat hem teachim tu olketa nara samting long olketa disaepol bilong hem. Hem teachim olketa samting wea savve helpem pipol for hapi. Tingting bilong hem and samting wea hem duim long laef bilong hem tu showimaot gudfala example for iumi followim. Iumi evriwan long famili savve kasem gud samting taem iumi followim example bilong hem. So olketa hasband and waef, olketa dadi and mami, and olketa pikinini, followim example bilong Jesus! Taem iu followim wanem Jesus teachim and example bilong hem, datwan nao bae mekem famili bilong iu barava hapi.
[Piksa long page 8]
Hasband wea tingim famili bilong hem bae duim wanem samting bifor hem mekem disison?
[Piksa long page 9]
Wanem nao waef savve duim wea showimaot hem stap anda long hasband bilong hem?
[Piksa long page 10]
Pikinini followim gudfala wei bilong mami and dadi
[Piksa long page 11]
Wanem Nao Ansa Bilong Iu?
• Wanem nao hasband mas tingim taem hem lukaftarem famili bilong hem?
• Wanem nao waef savve duim for followim example bilong Jesus?
• Wanem nao mami and dadi savve lanem from wei wea Jesus kaen long olketa disaepol bilong hem?
• Wanem nao olketa young wan savve lanem from example bilong Jesus?