Fren Gud Witim God
Jehovah Tinghae Long Pipol wea Hambol
WEI FOR praod, jealous, and for laekem pipol tinghae long iu. Staka wea gohed gud long disfala world nao garem nogud wei olsem. Bat waswe, olketa wei olsem mekem iumi fren gud witim Jehovah God? Jehovah tinghae long olketa wea worshipim hem taem olketa hambol. Wanfala story wea showimaot diswan hem long Numbers chapter 12. Hem storyim drae ples long Sinai, bihaen olketa Israelite kamap free from Egypt.
Miriam and Aaron wea born firstaem long Moses, “start for tok againstim” young brata bilong tufala. (Verse 1) Winim wei for story long Moses, tufala tok againstim hem, and luk olsem tufala komplen long olketa narawan insaed camp tu. From Bible storyim Miriam firstaem, luk olsem hem nao main wan for komplen. First reason why tufala komplen hem bikos Moses maritim wanfala Cushite woman. Maet Miriam jealous lelebet nogud pipol tinghae long datfala woman wea hem no Israelite.
Olketa nara reason tu stap wea tufala komplen abaotem. Miriam and Aaron gohed for sei: “Waswe, Moses nomoa Jehovah savve toktok witim?” Waswe, hem no savve toktok witim iumi tufala tu?” (Verse 2) So waswe, wei wea tufala komplen hem bikos tufala laek for kasem paoa mekem pipol tinghae long tufala?
Long datfala story, Moses no talem or duim eni samting. Luk olsem hem stap kwaet nomoa and patient taem olketa tok againstim hem. Dastawe Bible storyim hem olsem, ‘hem hambol winim evri nara man’ wea stap long earth.a (Verse 3) Moses no need for talem pipol why Jehovah iusim hem. Jehovah herem Moses, and sapotim hem.
Jehovah tingim hao wei wea tufala komplen againstim Moses hem olsem tufala komplen againstim hem. For tok stret, hemseleva nao chusim Moses. God talem tufala wea komplen hao Moses and Hem barava fren gud tugeta: “Mitufala story tugeta.” Then nomoa Jehovah askem Miriam and Aaron olsem: “Why nao iufala no fraet for againstim . . . Moses?” (Verse 8) Wei wea tufala tok againstim Moses hem olsem tufala barava tok againstim God. Hem wanfala serious samting for no showimaot respect, dastawe Jehovah kros long tufala.
Miriam wea luk olsem hem nao startim komplen, hem kasem leprosy. Kwiktaem nomoa Aaron askem Moses for prea for Miriam. Tingim datwan, for Miriam kamap gud moa, hem needim Moses wea hem tok againstim firstaem for helpem hem! Moses hambol nomoa and duim wanem tufala askem. Distaem nomoa Moses hem tok and hem askem Jehovah for helpem sista bilong hem. Miriam kamap gud nao, bat hem mas kasem shame and stap difren for sevenfala day.
Disfala story helpem iumi for luksavve long olketa wei wea Jehovah tinghae long hem and olketa wei wea hem againstim. Sapos iumi laek for fren gud witim God, iumi mas trae hard for aotem wei for praod, jealous, and wei for laekem pipol tinghae long iumi. Jehovah lovem man wea hambol. God promis for “givim earth long olketa wea hambol, and olketa bae hapi fogud bikos olketa stap gud.”—Psalm 37:11; James 4:6.
[Footnote]
a Wei for hambol hem wanfala wei wea mekem man patient and strong for winim nogud samting and no pei bak.