Religion Disison Bilong Mi or Bilong Mami and Dadi?

STAKA pipol long Poland sei long Olketa Jehovah’s Witness: “Religion wea mi born long hem, hem nao bae mi followim go kasem taem mi dae.” Datwan showimaot long tingting bilong olketa, olketa pikinini savve followim religion bilong mami and dadi. Waswe, pipol long ples wea iu stap garem sem tingting tu? Wanem nao savve kamaot sapos pipol garem tingting olsem? Religion bae olsem samting wea man duim nomoa and samting wea evriwan long famili duim. Waswe, diskaen samting savve kasem tu olketa pikinini wea lanem truth from mami and dadi or grani bilong olketa wea Witness?

Datwan no kasem Timothy wea mami and grani bilong hem helpem hem for bilivim tru God and lovem hem. Timothy savve long olketa holy raeting “start kam from taem [hem] baby yet.” Gogo Timothy tu luksavve wanem hem lanem from mami and grani bilong hem, hem tru and hemseleva nao disaed for followim datwan. Hem “barava bilivim” wanem olketa scripture talem abaotem Jesus Christ. (2 Tim. 1:5; 3:14, 15) So nomata Christian mami and dadi waka hard for helpem pikinini for worshipim Jehovah, pikinini seleva mas showimaot hem laek worshipim Jehovah.—Mark 8:34.

Man wanwan mas bilivim wanem hem lanem sapos hem laek worshipim Jehovah from hem lovem hem and faithful long hem nomata wanem nao kasem hem. Sapos olsem, faith bilong hem bae barava strong.—Eph. 3:17; Col. 2:6, 7.

Samting wea Pikinini Mas Duim

Alberta wea born long famili wea Witness sei: “Mi savve Olketa Jehovah’s Witness nao tru religion, bat hem no isi for mi followim wanem olketa talem abaotem olketa samting wea mi mas duim long laef bilong mi.” Sapos iu wanfala young wan, maet iu garem sem tingting olsem Albert. Hem gud sapos iu waka hard for savve wanem nao God laekem iu for duim and hapi for duim datwan! (Ps. 40:8) Albert sei: “Mi start for prea long God bat firstaem hem no isi long mi. Mi mas forcem miseleva for prea. Bat no longtaem nomoa, mi luksavve sapos mi trae hard for duim stret samting, God bae hapi long mi. Datwan strongim mi for changem wei bilong mi.” Taem iu fren witim Jehovah, iu bae laek tumas for duim wanem hem talem.—Ps. 25:14; Jas. 4:8.

Tingim sapos iu pleim soccer or eni nara sport. Sapos iu no savve long olketa rul or no savve pleim gud, iu bae les nomoa for plei. Bat sapos iu savve long olketa rul and savve gud hao for pleim sport hia, waswe, bae iu laekem tumas for pleim datwan and lukaotem eni chance for plei? Hem semsem tu witim olketa samting wea iumi duim for worshipim Jehovah. So prepare gud for olketa meeting and tekpart. Nomata iu young, gudfala wei bilong iu savve strongim olketa narawan for duim sem samting!—Heb. 10:24, 25.

Hem olsem tu taem iu storyim wanem iu bilivim long pipol. Iu story long pipol bikos iu lovem God and no from iu mas duim. Tingim diswan: ‘Why nao mi laek story long pipol abaotem Jehovah? Why nao mi lovem Jehovah?’ Iu need for luksavve Jehovah hem Dadi wea lovem iu. Hem mekem Jeremiah for tok olsem: “From iufala barava lukaotem mi, bae iufala faendem mi.” (Jer. 29:13, 14) Wanem nao maet iu need for duim? Jakub sei: “Mi mas changem tingting bilong mi. Taem mi smol yet, mi go long olketa meeting and mi go preach, bat hem samting wea mi duim nomoa. Taem mi savve gud long Jehovah and fren gud witim hem, mi barava tinghae nao long truth.”

Sapos iu garem olketa gudfala fren wea strongim iu, iu bae laek tumas for duim ministry. Bible hem sei: “Man wea fren witim pipol wea wise bae hem wise.” (Prov. 13:20) So fren witim olketa wea laek duim samfala samting moa for worshipim Jehovah and wea hapi for worshipim hem. Jola sei: “Taem mi fren witim olketa young wan wea laekem tumas for worshipim Jehovah, datwan barava strongim mi. Mi hapi taem mi duim ministry.”

Samting wea Mami and Dadi Mas Duim

Jola sei: “Mi hapi tumas mami and dadi lanem mi abaotem Jehovah.” Tru tumas, olketa mami and dadi savve duim big samting for helpem pikinini disaedem wanem for duim. Aposol Paul sei: “Iufala dadi, . . . gohed trainim and lanem [olketa pikinini bilong iu] long wei bilong Jehovah.” (Eph. 6:4) Disfala scripture showimaot mami and dadi mas teachim olketa pikinini wei bilong Jehovah and no wei bilong tufala. Hem bae gud tumas sapos iu helpem olketa pikinini for laek duim wanem Jehovah nao laekem and no wanem iutufala seleva maet laekem hem for duim!

Iu savve lanem olketa pikinini wanem Jehovah talem and “storyim taem iufala sidaon long haos bilong iufala and taem iufala wakabaot long road and taem iufala redi for sleep and taem iufala getap.” (Deut. 6:6, 7) Ewa and Ryszard, mami and dadi bilong thrifala boy sei: “Mifala story staka taem abaotem olketa difren wei for duim full-taem ministry.” Wanem nao kamaot from datwan? “Taem olketa boy smol yet, olketa joinim Theocratic Ministry Skul, kamap pablisa, and gogo olketa seleva nao disaed for baptaes. Then bihaen olketa duim full-taem service.”

Hem important tumas for mami and dadi showimaot gudfala example for olketa pikinini. Ryszard sei: “Mitufala traem best for showimaot gudfala wei nomata mifala stap long haos or long kongregeson.” Hem gud for iu tingim diswan: ‘Wanem nao olketa pikinini lukim long mi? Waswe, olketa lukim mi barava lovem Jehovah? Waswe, olketa luksavve long diswan long prea wea mi talem and hao mi evritaem duim study seleva? Waswe, olketa lukim datwan long wanem mi duim long ministry, hapitaem wea mi chusim, tingting bilong mi abaotem material samting, and wanem mi talem abaotem olketa long kongregeson?’ (Luke 6:40) Olketa pikinini lukluk long evri samting wea iu duim and olketa luksavve sapos iu duim difren samting from wanem iu talem.

Hem important for disciplinem olketa pikinini. Bat Bible talem for dadi and mami “lanem boy for followim stretfala wei.” (Prov. 22:6) Ewa and Ryszard sei: “Mifala markem taem for studyim Bible witim olketa pikinini wanwan.” Bat mami and dadi nao bae disaed sapos tufala bae study witim olketa olsem or study witim evriwan wantaem. Nomata wanem nao mami and dadi disaed for duim, tingim wei bilong olketa pikinini wanwan and no markem hem witim nara pikinini. Mami and dadi mas no strict tumas and no ova tumas. Tingim diswan. No talem nomoa long pikinini hao samfala music hem nogud, bat helpem hem for disaed long gudfala wei and for tingim olketa toktok long Bible taem hem disaedem samting!

Maet olketa pikinini savve long wanem iu laekem olketa for duim and olketa duim datwan. Nomata olsem, iu mas trae for kasem tingting bilong olketa. Tingim hao “tingting bilong man hem olsem deep wata, bat man wea garem wei for luksavve bae faendemaot datwan.” (Prov. 20:5) Garem wei for luksavve. Lukluk for eni samting wea maet showimaot pikinini garem problem and kwiktaem duim samting. No judgem hem, bat showimaot iu tingim hem and askem olketa kwestin wea fitim nomoa and no askem tumas kwestin. Sapos iu showimaot iu tingim olketa, iu bae kasem tingting bilong olketa and helpem olketa.

Samting wea Kongregeson Mas Duim

Waswe, iu savve helpem olketa young wan long kongregeson for tinghae long wanem olketa lanem from mami and dadi wea worshipim Jehovah? Nomata mami and dadi mas lanem olketa pikinini, olketa narawan long kongregeson and olketa elder tu savve helpem mami and dadi long diswan. Hem important tumas for helpem famili wea dadi or mami no Witness.

Wanem nao olketa elder savve duim for helpem olketa young wan lovem Jehovah and for olketa luksavve evriwan needim olketa? Mariusz, elder long wanfala kongregeson long Poland sei: “Olketa elder mas story evritaem witim olketa young wan. Olketa savve duim diswan long ministry, bihaen long olketa meeting, long eni narataem, and no long taem wea problem kamap nomoa.” Waswe sapos iu askem olketa young wan wanem nao tingting bilong olketa abaotem kongregeson? Taem olketa elder duim olsem, olketa young wan bae fren gud witim olketa long kongregeson and luksavve hao kongregeson needim olketa.

Sapos iu elder, waswe, iu savve gud long olketa young wan long kongregeson bilong iu? Albert wea iumi storyim finis hem elder distaem. Taem hem young hem kasem hard taem. Hem sei: “Taem mi young, elder duim shepherding kol long mi.” Olketa elder showimaot olketa interest long olketa young wan tu taem olketa prea long Jehovah for helpem olketa for worshipim Jehovah and fren gud witim hem.—2 Tim. 1:3.

Hem gud for olketa young wan duim olketa samting wea kongregeson duim. Sapos nomoa, maet olketa tingting nomoa for garem goal for duim olketa samting long world. Waswe, iufala mature brata and sista, iufala savve waka witim olketa long ministry and fren witim olketa? Duim samting witim olketa mekem hem isi for olketa trustim iu and laek fren witim iu. Jola sei: “Wanfala pioneer sista fren gud witim mi. Mi go witim hem long ministry and long taem hia nao hem firstaem wea mi laek duim datwan.”

Samting wea Iu Disaedem

Hem gud for iufala young wan tingim diswan: ‘Wanem nao olketa goal bilong mi? Sapos mi no baptaes yet, waswe, mi laek baptaes?’ Sapos iu laek baptaes, iu mas duim bikos iu barava lovem Jehovah and no from hem samting wea evriwan long famili duim.

Mifala laekem Jehovah for kamap trufala fren bilong iu, and for iu barava tinghae long truth. Jehovah mekem profet Isaiah for tok olsem: “No lukluk olobaot, mi nao God bilong iu.” Sapos iu fren witim Jehovah, hem bae lukaftarem iu. Hem bae strongim iu and “barava holem strong raet hand bilong iu.”—Isa. 41:10.

[Footnote]

[Piksa long page 4]

Trae for luksavve long tingting bilong pikinini bilong iu

[Piksa long page 6]

Iu bae laek for baptaes from iu barava lovem Jehovah