Prea Bilong Iu Savve Kamap Barava Gud Taem Iu Studyim Bible
“Plis Jehovah, herem prea bilong wakaman bilong iu.”—NEH. 1:11.
1, 2. Why nao hem gud for iumi storyim samfala prea wea stap long Bible?
TUFALA important samting wea iumi duim for worshipim Jehovah nao hem for prea and studyim Bible. (1 Thess. 5:17; 2 Tim. 3:16, 17) Bat Bible hem no prea buk. Nomata olsem, hem storyim staka difren prea wea pipol talem wea iumi savve readim tu long buk bilong Psalms.
2 Taem iu readim Bible and studyim, bae iu savve long olketa prea wea pipol talem wea maet iu tu kasem semkaen samting wea olketa kasem. Tru tumas, taem iu talem toktok wea stap long olketa prea long Bible, prea bilong iu savve kamap gud go moa. Wanem nao iu savve lanem from pipol wea God ansarem prea bilong olketa and from toktok wea olketa talem long prea bilong olketa?
Prea Long God for Leadim Iu and Followim Wanem Hem Talem
3, 4. Wanem nao Abraham talem wakaman bilong hem for duim? Wanem nao iumi savve lanem from samting wea happen?
3 Taem iu studyim Bible, iu bae luksavve iu mas prea long God evritaem for hem leadim iu. Tingim olo wakaman bilong Abraham wea maet hem Eliezer. Abraham talem hem for go long Mesopotamia for lukaotem gele wea worshipim God for maritim Isaac. Taem olketa gele kam for tekem wata long well, datfala wakaman prea olsem: “Jehovah . . . , saen wea mi laek for lukim nao hem sapos mi askem wanfala young gele olsem, ‘Plis, iu savve givim lelebet wata long botol bilong iu mekem mi drink,’ and sapos hem sei olsem, ‘Iu drink, and bae mi go tekem kam wata for olketa camel bilong iu tu,’ then bae mi savve hem nao gele wea iu chusim for maritim wakaman bilong iu, Isaac. Sapos iu duim olsem, bae mi savve iu showimaot love long masta bilong mi.”—Gen. 24:12-14.
4 Taem Rebekah tekem kam wata for olketa camel bilong wakaman bilong Abraham, hem luksavve God ansarem prea bilong hem. No longtaem bihaen, Rebekah go bak witim hem long Canaan and hem kamap waef bilong Isaac. Bat taem iu prea long God, iu mas no tingse God bae showim spesol saen long iu. Nomata olsem, sapos iu prea long God and letem holy spirit leadim iu, Jehovah bae leadim iu long evri samting wea iu duim.—Gal. 5:18.
Prea Helpem Iumi for No Wari Tumas
5, 6. Wanem gud samting nao iumi lanem from prea bilong Jacob taem hem klosap meetim Esau?
5 Taem man prea, hem bae no wari tumas. From Jacob tingse twin brata bilong hem Esau bae duim nogud samting long hem, hem prea olsem: “Jehovah, . . . Iu lovem wakaman bilong iu and faithful long hem. Mi no fit for kasem olketa samting hia . . . Mi prea long iu for sevem mi from brata bilong mi Esau. Mi fraetem hem nogud hem kam killim mi, witim olketa mami and olketa pikinini. Iu talem mi finis olsem, ‘Mi bae duim gud samting for iu and iu bae garem olketa pikinini wea staka olsem sandbis and no eniwan savve kaontem bikos olketa staka tumas.’”—Gen. 32:9-12.
6 Bihaen Jacob prea long Jehovah, hem duim samfala samting for protectim famili bilong hem. Jehovah ansarem prea bilong Jacob taem Jacob and Esau fren bak moa. (Gen. 33:1-4) Taem iu ting raonem gud prea bilong Jacob, bae iu luksavve hem barava askem Jehovah for helpem hem. Bat datfala prea showimaot tu Jacob garem faith hao God bae sendem kam Pikinini wea hem promisim and hem tinghae long wei wea God lovem hem. Waswe, iu “wari” abaotem eni samting? (2 Cor. 7:5) Sapos olsem, prea bilong Jacob mekem iu luksavve hao taem man prea, hem bae no wari tumas. Taem man prea, hem savve askem samting long God and talem tu samting wea showimaot hem garem faith long God.
Prea for Garem Gudfala Tingting
7. Why nao Moses prea long Jehovah for mekem hem savve long olketa wei bilong Jehovah?
7 Iumi prea long Jehovah for givim iumi gudfala tingting bikos iumi laek tumas for duim wanem hem hapi long hem. Moses prea long God mekem hem savve long olketa wei bilong God. Hem barava ask strong olsem long God: “Iu [Jehovah] nao sei long mi, ‘Leadim pipol hia go aot [from Egypt]’ . . . Plis, sapos distaem iu hapi long mi, plis, iu showim olketa wei bilong iu long mi, . . . mekem iu hapi long mi.” (Ex. 33:12, 13) From Moses ask olsem, God mekem hem barava savve gud long olketa wei bilong hem. Datwan mekem Moses savve leadim pipol bilong hem.
8. Taem iu ting raonem 1 Kings 3:7-14, long wanem wei nao datwan savve helpem iu?
8 David tu prea olsem: “Plis Jehovah, iu mekem mi savve long olketa wei bilong iu.” (Ps. 25:4) Solomon wea hem boy bilong David, hem barava askem God for givim gudfala tingting long hem for rulim olketa Israelite. Jehovah hapi long prea bilong Solomon and givim hem bigfala savve, riches, and staka nambawan samting. (Readim 1 Kings 3:7-14.) Sapos iu garem waka for duim long kongregeson wea hem big tumas for iu duim, prea long God for givim iu gudfala tingting for duim datfala waka and iu mas hambol. Then God bae helpem iu for garem savve and gudfala tingting for duim datfala waka long gudfala wei and for showimaot love.
Taem Iu Prea, Story From Heart Bilong Iu
9, 10. Wanem important samting nao iu savve lanem from prea bilong Solomon long taem for dedicatem temple?
9 Sapos iumi laekem God for herem iumi taem iumi prea, iumi mas prea from heart bilong iumi. Long 1 Kings chapter 8, Solomon talem prea olsem long God. Hem prea front long pipol wea hipap long Jerusalem long taem for dedicatem temple bilong Jehovah long 1026 B.C.E. Solomon praisem God bihaen olketa putim ark bilong covenant insaed long Most Holy and cloud bilong Jehovah stap evriwea long temple.
10 Taem iu studyim gud prea bilong Solomon, bae iu lukim plande taem hem storyim heart bilong man. Solomon sei Jehovah nomoa savve wanem nao long heart bilong man. (1 Ki. 8:38, 39) Prea wea Solomon talem showimaot man wea duim sin savve ‘fren bak moa witim God.’ Sapos pipol bilong God fren gud witim hem, hem bae herem prea bilong olketa taem enemy tekem olketa. (1 Ki. 8:48, 58, 61) Dastawe iu mas prea from heart bilong iu.
Buk Bilong Psalms Savve Mekem Prea Bilong Iu Kamap Barava Gud
11, 12. Wanem nao iu lanem from toktok wea wanfala Levite talem from hem no savve go long temple bilong God for longtaem lelebet?
11 Taem iu studyim buk bilong Psalms, hem savve mekem olketa prea bilong iu kamap barava gud and helpem iu for weitim God for ansarem olketa prea hia. Tingim wanfala Levite wea stap long narafala kantri. Nomata for lelebet taem hem no savve go long temple bilong Jehovah, hem weit nomoa for Jehovah helpem hem. Hem sei: “Soul bilong mi, why nao iu sorre tumas and why nao iu wari tumas? Mi bae weit for God and mi bae praisem hem moa bikos hem nao sevem mi and hem nao God bilong mi.”—Ps. 42:5, 11; 43:5.
12 Wanem nao iumi savve lanem from Levite hia? Sapos iu duim stret samting bat olketa putim iu long prison and iu no savve hipap nao witim pipol bilong Jehovah for longtaem lelebet, hem gud for iu weit go kasem taem God helpem iu. (Ps. 37:5) Ting raonem olketa samting wea iu duim finis for Jehovah wea mekem iu hapi and prea for no givap taem iu “weit for God” helpem iu mekem iu savve hipap moa witim pipol bilong hem.
Trustim Jehovah Taem Iu Prea Long Hem
13. Why nao iu mas trustim Jehovah taem iu prea long hem olsem James 1:5-8 talem?
13 Nomata wanem nao kasem iu, iu mas evritaem trustim Jehovah taem iu prea long hem. Taem iu kasem eni test wea maet mekem iu no faithful long Jehovah, followim kaonsel wea disaepol James talem. Prea long Jehovah and no daotem hao hem savve givim iu gudfala tingting for helpem iu for gohed and no givap taem iu kasem hard taem. (Readim James 1:5-8.) God savve long evri hard taem wea iu kasem, and hem bae iusim holy spirit for leadim and strongim iu. Storyim tingting bilong iu long Jehovah and “no daotem” hem bae helpem iu. Letem holy spirit leadim iu and followim wanem Bible talem.
14, 15. Why nao iumi savve sei Hannah trustim Jehovah taem hem prea long hem?
14 Elkanah, wanfala Levite, garem tufala waef. Wanfala waef bilong hem nao Hannah. Hannah prea long God and showimaot hem trustim Jehovah. Hannah no garem eni pikinini bat nara waef bilong Elkanah, Peninnah hem garem samfala pikinini and hem tok spoelem Hannah. Taem Hannah go long tabernacle, hem promisim Jehovah sapos hem bornem pikinini boy hem bae givim for Jehovah. Hae Priest Eli tingse Hannah hem drunk bikos hem no herem eni toktok bat hem lukim mouth bilong hem nomoa mumuv taem hem prea kwaet. Bat taem Eli savve Hannah no drunk, hem sei: “Letem God bilong Israel givim disfala samting long iu wea iu askem.” Nomata Hannah no savve wanem nao bae happen, hem trustim Jehovah from hem savve Jehovah bae ansarem prea bilong hem. So “feis bilong hem no luk wari nao.” Hem no sorre nao.—1 Sam. 1:9-18.
15 Bihaen Hannah bornem Samuel and gogo taem hem finis susu, hem tekem Samuel go long tabernacle bilong Jehovah for duim holy waka. (1 Sam. 1:19-28) Sapos iumi laekem prea bilong iumi kamap barava gud, ting raonem prea wea Hannah talem. Sapos iumi trustim Jehovah taem iumi prea long hem, iumi bae winim eni problem wea mekem iumi sorre.—1 Sam. 2:1-10.
16, 17. From Nehemiah trustim Jehovah taem hem prea, wanem nao happen?
16 Nehemiah hem wanfala gud man wea stap laef long mek-faev century B.C.E. Hem trustim Jehovah taem hem prea long hem. Hem ask strong olsem: “Plis Jehovah, herem prea bilong wakaman bilong iu and prea bilong olketa wakaman bilong iu wea laekem tumas for mekhae long nem bilong iu, and, plis, mekem wakaman bilong iu win long samting wea hem duim and mekem disfala man feel sorre long wakaman bilong iu.” Hu nao “disfala man”? Hem nao King Artaxerxes from Persia. Nehemiah waka for hem.—Neh. 1:11.
17 Taem Nehemiah savve olketa Jew wea kamap free from Babylon “kasem hard taem, olketa feel shame, and wall long Jerusalem hem foldaon,” hem prea long Jehovah abaotem datwan for staka day and hem trustim Jehovah. (Neh. 1:3, 4) Jehovah ansarem olketa prea bilong Nehemiah long wei wea winim nao wanem hem tingim. King Artaxerxes letem hem for go long Jerusalem and no longtaem nomoa olketa buildim bak wall nao. (Neh. 2:1-8) Jehovah ansarem olketa prea bilong Nehemiah bikos hem prea abaotem samting wea join witim tru worship and hem trustim Jehovah taem hem prea long hem. Waswe, iu prea tu for olketa samting wea join witim tru worship?
Praisem and Thankiu Long Jehovah
18, 19. Why nao iumi mas praisem Jehovah and thankiu long hem?
18 Praisem Jehovah and thankiu long hem taem iu prea. Iumi savve praisem Jehovah and thankiu long hem for staka samting! Tingim David. Hem barava laek for mekhae long wei wea Jehovah hem King. (Readim Psalm 145:10-13.) Taem iu prea, waswe, toktok bilong iu showimaot iu tinghae long preaching waka? Taem iu ting raonem buk bilong Psalms, iu bae storyim long Jehovah hao iu tinghae long olketa meeting, assembly, and convention.—Ps. 27:4; 122:1.
19 Taem iumi tinghae long spesol wei wea iumi fren witim God, iumi savve talem semkaen toktok olsem: “Mi bae praisem iu Jehovah front long pipol. Mi bae singsing long iu front long pipol bilong olketa nara kantri. Wei bilong iu for kaen tumas hem hae go kasem heven nao and wei bilong iu for tok tru hem hae go kasem skae nao. God, iu nao iu hae winim heven. And evri pipol long evri ples mas savve long bigfala paoa bilong iu.” (Ps. 57:9-11) Olketa toktok hia barava strongim iumi for praisem Jehovah! Olketa toktok olsem from buk bilong Psalms savve mekem prea bilong iumi kamap barava gud.
Taem Iu Prea, Showimaot Iu Barava Respectim God
20. Wanem nao Mary talem long God wea showimaot hem barava lovem God?
20 Taem iu prea, toktok bilong iu mas showimaot iu barava respectim God. Mary hem duim olsem taem hem savve hem bae kamap mami bilong Messiah. Wanem hem talem long Jehovah hem klosap semsem witim wanem Hannah talem taem hem tekem Samuel go long tabernacle for duim holy waka. Toktok wea Mary talem showimaot hem barava respectim God. Hem sei: “Soul bilong mi hem mekhae long Jehovah, and mi hapi tumas long God bilong mi wea sevem mi.” (Luke 1:46, 47) Waswe, iu savve mekem prea bilong iu kamap gud taem iu talem olketa semkaen toktok olsem Mary and Hannah? Mary strong for worshipim Jehovah dastawe Jehovah chusim hem for kamap mami bilong Jesus wea hem nao Messiah!
21. Wanem nao Jesus duim wea showimaot hem barava respectim God and trustim hem taem hem prea?
21 Taem Jesus prea long God, hem barava respectim and trustim hem. Tingim diswan. Bifor Jesus mekem Lazarus laef bak moa, hem “luk go ap long skae and sei: ‘Dadi, mi thankiu long iu bikos iu herem mi. Mi savve iu evritaem herem mi.’” (John 11:41, 42) Waswe, olketa prea bilong iu showimaot iu barava respectim and trustim God? Taem iumi studyim gud Lord’s Prea, datwan bae helpem iumi for luksavve long olketa important samting wea Jesus prea abaotem. Hem nao for mekem nem bilong Jehovah stap holy, for Kingdom bilong hem kam, and for God duim samting wea hem plan for duim. (Matt. 6:9, 10) Waswe, olketa prea bilong iu showimaot iu barava interest long Kingdom bilong Jehovah, iu laek tumas for duim wanem Jehovah laekem, and iu laekem nem bilong Jehovah for stap holy? Olketa prea bilong iu mas olsem.
22. Wanem nao mekem iu savve Jehovah bae helpem iu for no fraet for talemaot gud nius?
22 Pipol bilong God barava prea strong long God staka taem for helpem olketa no fraet taem pipol spoelem olketa or taem olketa kasem hard taem. Taem Hae Kot bilong olketa Jew stopem Peter and John for no “teachim eni samting long nem bilong Jesus,” tufala gohed strong and nating givap for teach. (Acts 4:18-20) Bihaen, tufala storyim long olketa nara disaepol samting wea happen. Evriwan wea hipap barava prea strong long God for helpem olketa mekem olketa no fraet for preach. Olketa hapi tumas taem God ansarem prea bilong olketa and “God givim holy spirit long evriwan and olketa nating fraet nao for talemaot message bilong God”! (Readim Acts 4:24-31.) From datwan, staka pipol nao worshipim Jehovah. Taem iu prea, datwan bae mekem iu no fraet for talemaot gud nius tu.
Gohed Mekem Olketa Prea Bilong Iu Kamap Barava Gud
23, 24. (a) Storyim samfala example wea showimaot wei for studyim Bible savve mekem prea bilong iu kamap barava gud. (b) Wanem nao iu savve duim for mekem prea bilong iu kamap barava gud?
23 Staka example stap long Bible wea showimaot taem man readim Bible and studyim, hem savve mekem olketa prea bilong hem kamap barava gud. Tingim Jonah. Hem prea olsem: “Jehovah nomoa savve sevem man.” Iu tu savve talem sem samting taem iu prea. (Jonah 2:1-10) Sapos iu tingim olowe bigfala sin wea iu duim and iu story finis witim olketa elder for helpem iu, olketa toktok wea David talem wea showimaot tingting bilong hem savve helpem iu for talemaot tingting bilong iu taem iu prea long Jehovah for hem forgivim iu. (Ps. 51:1-12) Long samfala prea bilong iu, iu savve praisem Jehovah olsem Jeremiah hem duim. (Jer. 32:16-19) Sapos iu laek for marit and iu prea long Jehovah abaotem diswan, wei for studyim gud prea long Ezra chapter 9 savve strongim iu for obeyim God mekem iu ‘maritim man wea followim Lord.’—1 Cor. 7:39; Ezra 9:6, 10-15.
24 Gohed readim Bible and studyim gud. Lukluk for olketa point wea iu savve talem taem iu prea. Iu savve talem olketa point hia taem iu thankiu long God and praisem hem. Taem iu studyim Bible, prea bilong iu bae kamap barava gud and iu bae fren gud witim Jehovah God.
Wanem Nao Ansa Bilong Iu?
• Why nao iumi mas prea for God leadim iumi and followim wanem hem talem?
• Why nao iumi prea long God for givim iumi gudfala tingting?
• Long wanem wei nao buk bilong Psalms savve mekem prea bilong iumi kamap barava gud?
• Why nao iumi mas barava respectim God and trustim hem taem iumi prea?
[Piksa long page 8]
Wakaman bilong Abraham prea long God for leadim hem. Waswe, iu duim olsem tu?
[Piksa long page 10]
Famili Worship savve mekem olketa prea bilong iu kamap barava gud