Iusim Gud “Naef for Faet wea Kam From Holy Spirit”
“Holem datfala naef for faet wea kam from holy spirit, wea hem nao message bilong God.”—EPH. 6:17.
1, 2. From iumi needim samfala moa for preach abaotem Kingdom, wanem nao iumi shud duim?
FROM Jesus luksavve pipol wea hipap needim God, hem sei long olketa disaepol: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” Jesus no talem datwan nomoa bat hem “kolem kam twelvfala disaepol bilong hem” and sendem olketa go for preach, wea minim for “harvestim planteison.” (Matt. 9:35-38; 10:1, 5) Bihaen, Jesus “chusim nara seventi man [and] hem markem tufala man for waka tugeta” for duim disfala sem waka.—Luke 10:1, 2.
2 Distaem tu iumi needim staka moa for preach abaotem Kingdom. Long Memorial long 2009, 18,168,323 pipol nao hipap. From namba bilong Olketa Jehovah’s Witness long world hem winim 7 million, diswan minim winim 10 million pipol nao interest long gud nius. Tru tumas, olketa planteison redi nao for harvestim. (John 4:34, 35) Dastawe iumi shud prea long God and askem hem for samfala wakaman moa. Bat wanem nao iumi shud duim for fitim prea bilong iumi? Iumi shud duim gud ministry bilong iumi taem iumi gohed strong for preach and teachim pipol for kamap disaepol.—Matt. 28:19, 20; Mark 13:10.
3. Long wanem wei nao holy spirit savve helpem iumi for teach gud?
3 Study bifor diswan storyim hao taem iumi letem holy spirit bilong God leadim iumi, datwan mekem iumi ‘no fraet for talemaot message bilong God.’ (Acts 4:31) Holy spirit savve helpem iumi for teach gud tu. Wanfala samting wea savve helpem iumi for duim gud ministry bilong iumi nao hem for iusim gud Bible wea Jehovah God givim long iumi. Holy spirit nao helpem olketa man for raetem Bible. (2 Tim. 3:16) Message long Bible kam from God. Dastawe taem iumi iusim gud Bible for teachim pipol, datwan showimaot holy spirit nao leadim iumi. Bifor iumi storyim hao for iusim gud Bible for teachim pipol, bae iumi storyim firstaem hao message bilong God garem bigfala paoa.
‘Message Bilong God Garem Paoa’
4. Wanem nao message bilong God savve mekem man for duim?
4 Message bilong God garem bigfala paoa! (Heb. 4:12) Long tokpiksa wei, message long Bible hem sharp winim eni naef wea man wakem bikos hem savve kat go deep insaed olketa join and bon bilong man. Olketa trufala teaching long Bible savve barava kasem tingting and feeling bilong man and showimaot wanem kaen man nao hem. Olketa trufala teaching hia garem paoa for barava changem wei bilong man. (Readim Colossians 3:10.) Tru tumas, Bible savve changem laef bilong pipol!
5. Long olketa wanem wei nao Bible savve helpem iumi, and wanem nao savve kamaot from diswan?
5 Nara samting tu, wisdom long Bible hem winim eni nara wisdom. Bible storyim wanem nao savve helpem pipol for garem gudfala living long disfala nogud world. Hem olsem laet wea showim iumi stretfala wei for followim long distaem and long future tu. (Ps. 119:105) Bible barava helpem iumi taem iumi kasem olketa problem, for disaedem hu nao for iumi fren witim, hapitaem wea iumi laek duim, waka for selen, kaleko bilong iumi, and kaen samting olsem. (Ps. 37:25; Prov. 13:20; John 15:14; 1 Tim. 2:9) Taem iumi followim olketa Bible principle, iumi savve fren gud witim narawan. (Matt. 7:12; Phil. 2:3, 4) From iumi letem message bilong God wea olsem laet for leadim iumi, iumi luksavve wanem bae kamaot from samting wea iumi disaedem. (1 Tim. 6:9) Bible storyim tu plan bilong God for future, and diswan helpem iumi for duim samting for fitim datfala plan. (Matt. 6:33; 1 John 2:17, 18) Man savve hapi tumas taem hem followim olketa Bible principle!
6. Wanem samting nao message long Bible savve duim?
6 Tingim tu hao message long Bible hem strongfala samting wea iumi savve iusim for faet againstim Satan. Paul sei datfala message hem “naef for faet wea kam from holy spirit.” (Readim Ephesians 6:12, 17.) Taem iumi storyim gud message long Bible, message hia savve helpem pipol for kamap free from paoa bilong Satan. Message hia hem naef wea savve sevem pipol and no killim olketa dae. Dastawe iumi shud iusim gud naef hia!
Teachim Message Bilong God Long Stretfala Wei
7. Why nao iumi mas lane for iusim gud “naef for faet wea kam from holy spirit”?
7 Soldia mas lanem firstaem hao for iusim gud olketa samting for faet bifor hem savve faet. Hem olsem tu for iumi wea faet againstim Satan. Iumi mas savve gud hao for iusim “naef for faet wea kam from holy spirit.” Paul sei: “Duim best bilong iu for mekem God hapi long iu, for kamap wakaman wea no shame long waka wea iu duim, and wea teachim trufala message bilong God long stretfala wei.”—2 Tim. 2:15.
8, 9. Wanem nao savve helpem iumi for minim gud wanem Bible talem? Storyim example.
8 Taem iumi duim ministry, wanem nao bae helpem iumi for teachim “trufala message bilong God long stretfala wei”? Iumiseleva mas minim gud Bible firstaem bifor iumi savve minim long nara pipol. So sapos iumi laek savve long mining bilong wanfala verse, iumi mas readim olketa nara verse long sem chapter tu.
9 Samting wea Paul talem long Galatians 5:13 showimaot hem important tumas for readim olketa nara verse long sem chapter or Bible buk for minim gud datfala verse. Paul sei: “Hem tru olketa brata, God chusim iufala for kamap free. Bat no letem diswan mekem iufala for tingim iufala seleva nomoa, bat from love wea iufala garem duim gud samting for narawan.” Wanem samting nao Paul sei olketa brata kamap free long hem? Waswe, hem sei olketa kamap free from sin and dae, from olketa laea teaching, or from nara samting? Olketa nara chapter long Galatians showimaot olketa ‘kamap free from nogud samting wea olketa kasem from olketa brekem Law.’ (Gal. 3:13, 19-24; 4:1-5) Paul storyim olketa kamap free bikos olketa followim Christ. Olketa wea tinghae long diswan duim gud samting for pipol bikos olketa lovem olketa. Olketa wea no lovem narawan olketa raoa and faet witim narawan.—Gal. 5:15.
10. Sapos iumi laek minim gud wanfala verse, wanem nao iumi mas tingim, and wanem nao iumi mas duim for savve long datwan?
10 Sapos iumi laek minim gud wanfala verse, iumi shud tingim tu olketa samting olsem hu nao raetem datfala Bible buk, wanem taem nao hem raetem, and wanem nao happen taem hem raetem datwan. Hem gud for savve why nao hem raetem datfala buk, and trae for savve tu long kastom bilong pipol long datfala taem, wei bilong olketa, and hao olketa worship.a
11. Wanem nao iumi mas tingim taem iumi minim gud olketa scripture long pipol?
11 For “teachim trufala message bilong God long stretfala wei,” hem no for minim gud long pipol nomoa bat iumi mas tingim nara samting tu. Iumi mas no iusim Bible for forcem pipol for bilivim wanem iumi talem. Nomata iumi iusim olketa Scripture for pruvim olketa tru teaching olsem Jesus duim taem Satan traem hem, Bible hem no olsem stik wea iumi whipim man long hem. Iumi no iusim Bible for mekem man feel nogud or forcem hem for acceptim wanem iumi bilivim. (Deut. 6:16; 8:3; 10:20; Matt. 4:4, 7, 10) Iumi shud followim disfala toktok bilong aposol Peter: “Iufala mas luksavve Christ nao hem Lord and hem holy. Iufala mas redi evritaem for givim gudfala ansa taem eniwan askem iufala why nao iufala garem datfala hope. Bat iufala mas duim long hambol wei and wea showimaot iufala barava respectim olketa.”—1 Pet. 3:15.
12, 13. Olketa wanem “strongfala samting” nao olketa tru teaching long Bible savve aotem? Storyim example.
12 Taem iumi teachim Bible long stretfala wei, wanem samting nao savve kamaot from datwan? (Readim 2 Corinthians 10:4, 5.) Olketa tru teaching long Bible savve “aotem olketa strongfala samting,” wea minim hem savve mekem man luksavve long olketa laea teaching, olketa nogud samting wea savve spoelem man, and olketa idea wea followim tingting bilong pipol long world. Iumi savve iusim Bible for helpem pipol aotem eni tingting wea “againstim savve abaotem God.” Olketa teaching long Bible savve mekem pipol changem tingting bilong olketa for followim olketa trufala teaching.
13 Tingim wanfala woman long India wea 93 year. Taem hem pikinini yet, hem bilivim teaching hao taem man dae hem bae born moa olsem nara man or nara samting wea laef. Taem son bilong hem wea stap long nara kantri start for studyim Bible witim hem long wei for raetem leta, woman hia kwiktaem bilivim wanem hem lanem abaotem Jehovah and olketa promis bilong hem. Bat from hem biliv strong yet hao man bae born moa olsem nara man or nara samting taem hem dae, hem nating agree long wanem son bilong hem talem long leta abaotem wanem nao happen long man taem hem dae. Hem sei: “Mi hard for bilivim wanem iu talem long Bible hem tru. Evri religion sei taem man dae wanfala samting insaed long hem nating savve dae. Long full laef bilong mi, mi bilivim taem man dae, body nao dae bat spirit bilong hem born moa long olketa nara body and diswan bae happen samting olsem 8,400,000 taem. Hao, diswan no tru? Waswe, staka religion no stret?” Waswe, disfala “naef for faet wea kam from holy spirit” savve aotem strongfala biliv olsem? Bihaen son bilong hem storyim samfala scripture moa abaotem diswan, samfala week bihaen woman hia raet long son bilong hem and sei: “Distaem nao mi just start for minim trufala samting abaotem dae. Mi barava hapi for savve taem pipol laef bak, iumi bae lukim moa olketa long famili bilong iumi wea dae finis. Mi laekem Kingdom bilong God for kam kwiktaem.”
Iusim Bible for Story Gud
14. Wanem nao hem minim for story gud long man?
14 Taem iumi iusim gud Bible long ministry, iumi no just readim olketa scripture nomoa. Paul “story gud” witim pipol and iumi tu shud duim olsem. (Readim Acts 19:8, 9; 28:23.) For “story gud” long man, hem minim for mekem hem “bilivim wanem hem herem.” Taem iumi story gud long man abaotem wanfala Bible teaching and hem acceptim datwan, iumi mekem hem for bilivim datfala teaching. So for iumi duim diswan, iumi need for helpem man for bilivim samting wea iumi talem hem tru. Iumi savve duim diswan taem iumi followim olketa idea long olketa next paragraf.
15. Wanem nao iu savve duim for mekem man tinghae long Bible?
15 Story long wei wea bae mekem man wea herem datwan tinghae long Bible. Bifor iu readim wanfala scripture, talem man wea iu story long hem, hem important tumas for savve long tingting bilong God abaotem wanem iutufala storyim. Bihaen iu askem kwestin and iu herem tingting bilong hem, maet iu savve sei, ‘Iumi laek for savve long tingting bilong God abaotem diswan.’ Or maet iu sei, ‘Wanem nao God talem abaotem diswan?’ Sapos iumi duim olsem bifor iumi readim wanfala scripture, diswan bae mekhae long wei wea Bible hem kam from God and iumi helpem man wea lisin for tinghae long Bible. Hem important for duim diswan tu taem iumi preach long man wea biliv long God bat no savve gud long wanem Bible teachim.—Ps. 19:7-10.
16. Wanem nao bae helpem iu for minim gud olketa scripture long pipol?
16 No just readim nomoa olketa scripture, bat minim gud long olketa. Hem wei bilong Paul for ‘iusim olketa Holy Raeting for pruvim’ olketa samting wea hem teachim. (Acts 17:3) Wanfala scripture savve garem staka point, so maet iu need for mekhae nomoa long olketa word wea fitim wanem iu storyim, and no mekhae long evri point long datfala scripture. Iu savve talem moa olketa word long scripture wea mekhae long datfala point or iu savve askem olketa kwestin wea bae helpem man for luksavve long point hia. Then minim gud long hem datfala point. Bihaen iu duim datwan, storyim hao datfala scripture savve helpem hem.
17. Hao nao iu savve storyim Bible long wei for helpem man bilivim datwan?
17 Storyim Bible long wei wea bae helpem man for bilivim datwan. From Paul tok kaen long pipol and hem minim gud olketa samting long kliafala wei, hem mekem pipol bilivim wanem hem talem taem hem ‘iusim olketa Holy Raeting for story witim pipol.’ (Acts 17:2, 4) Duim sem samting olsem Paul and trae for kasem heart bilong man. Askem olketa kwestin wea showimaot iu interest long hem mekem iu ‘savve long tingting bilong hem.’ (Prov. 20:5) No tok stret tumas long hem. Storyim olketa point long klia and stretfala wei. Pruvim olketa samting wea iu talem. Olketa samting wea iu talem mas kam from Bible. Hem gud for iusim nomoa wanfala scripture and tokpiksa for minim gud datfala point winim wei for kwiktaem readim tu-thri scripture. Sapos iumi pruvim olketa samting wea iumi talem, diswan savve mekem man ‘changem tingting bilong hem.’ (Prov. 16:23) Maet samfala taem iumi mas duim research and givim samfala nara information long man wea iumi story witim. Datfala woman wea iumi storyim finis wea 93 year hem need for savve why nao staka pipol bilivim disfala teaching wea man garem soul (or spirit) wea no savve dae. Taem hem minim hu nao startim datfala biliv and why nao klosap evri religion garem biliv olsem, datfala woman acceptim wanem Bible teachim abaotem diswan.b
Gohed Iusim Gud Bible
18, 19. Why nao iumi mas gohed for barava iusim gud “naef for faet wea kam from holy spirit”?
18 Bible sei “olketa samting long world gohed for change.” Wei bilong rabis pipol barava nogud tumas distaem. (1 Cor. 7:31; 2 Tim. 3:13) Dastawe hem barava important for iusim “naef for faet wea kam from holy spirit, wea hem nao message bilong God,” for aotem “olketa strongfala samting.”
19 Iumi hapi tumas for garem Bible and for storyim message long Bible wea garem paoa for aotem olketa laea teaching and mekem man wea hambol for savve long truth! Datfala message hem winim eni strongfala samting. So waka hard for barava iusim gud “naef for faet wea kam from holy spirit” taem iumi duim waka wea God givim iumi for preach abaotem Kingdom.
[Olketa Footnote]
a Olketa nambawan buk wea storyim information olsem abaotem olketa Bible buk hem “All Scripture Is Inspired of God and Beneficial,” Insight on the Scriptures, and olketa article long Wastaoa olsem “Toktok Bilong Jehovah Hem Laef.”
b Lukim brochure Wanem Nao Happen Long Iumi Taem Iumi Dae? long page 5-16.
Wanem Nao Iu Lanem?
• Wanem nao Bible savve mekem man for duim?
• Wanem nao bae helpem iumi for teachim “trufala message bilong God long stretfala wei”?
• Wanem nao message long Bible savve duim long “olketa strongfala samting”?
• Wanem nao savve duim for mekem iu savve story gud long ministry?
[Box/Piksa long page 12]
Hao for Storyim Gud Bible
▪ Mekem man tinghae long Bible
▪ Minim gud olketa Scripture long pipol
▪ Storyim olketa scripture long wei for kasem heart bilong man
[Piksa long page 11]
Iu mas lane for iusim gud “naef for faet wea kam from holy spirit”