Story Gud Taem Iu Teach
1. Wanem nao iumi savve duim for iusim gud Word bilong God long ministry?
1 For duim gud ministry bilong iumi olsem aposol Paul, and ‘teachim message bilong God long stretfala wei,’ iumi mas duim moa samting winim wei for talem scripture nomoa. (2 Tim. 2:15) Taem iumi iusim Word bilong God, hao nao iumi savve “story gud” taem iumi teachim narawan?—Acts 28:23.
2. Hao nao iumi savve helpem pipol tinghae long Word bilong God?
2 Iusim Bible Taem Iumi Story: Firstfala samting, showimaot long haosholder iumi tinghae long wisdom wea kam from God wea stap insaed Bible. Taem iumi showimaot iumi barava trustim Word bilong God, maet datwan helpem haosholder for lisin gud taem iumi readim wanfala scripture. (Heb. 4:12) Iumi savve sei: “Taem mi lukim wanem Bible talem, datwan helpem mi for savve wanem nao tingting bilong God abaotem diswan. Lukim wanem Bible talem.” Sapos hem fitim, read from Bible taem iu story.
3. Bihaen iumi readim wanfala scripture, wanem nao iumi savve duim for helpem haosholder for minim wanem iumi storyim?
3 Mek-tu samting, minim go scripture wea iu readim. Hem no isi for staka pipol minim wanfala scripture wea olketa herem long firstaem. So hem gud for iumi minim long haosholder hao scripture wea iumi readim hem join witim wanem iumi storyim. (Luke 24:26, 27) Showim long haosholder main point from scripture wea iu storyim. Hem gud for askem kwestin for helpem iu savve sapos hem minim wanem iu storyim.—Prov. 20:5; Acts 8:30.
4. Wanem nao mek-thri samting wea iumi savve duim for story gud taem iumi teachim narawan?
4 Minim Gud Olketa Scripture Long Narawan: Mek-thri samting, trae for story long wei for kasem heart. Helpem haosholder for luksavve hao datfala scripture tu savve helpem hem. Taem haosholder minim gud scripture, datwan savve helpem hem for changem tingting bilong hem. (Acts 17:2-4; 19:8) Tingim, bihaen iumi readim Psalm 83:18, iumi savve minim long haosholder hao first samting for man duim for fren gud witim narawan, hem for savve long nem bilong hem. Then, maet iu savve ask olsem, “Waswe, iu tingse wei for savve long nem bilong God bae mekem iu fren gud witim hem taem iu prea?” Taem iu iusim scripture long wei olsem, datwan savve helpem haosholder for luksavve hao Bible savve helpem hem long laef bilong hem. Wei for storyim gud Word bilong God taem iumi teachim narawan, savve helpem olketa wea hambol for laek worshipim trufala God wea laef, Jehovah.—Jer. 10:10.