Waswe, Iu Ting Long Jehovah Olsem Dadi Bilong Iu?

WANFALA disaepol bilong Jesus askem hem: “Lord, teachim mifala for prea.” Then Jesus sei: “Taem iufala prea, iufala savve sei, ‘Dadi bilong mifala, mifala laekem nem bilong iu for stap holy.’” (Luke 11:​1, 2) Jesus savve iusim olketa spesol title olsem “Olmaeti,” “Nambawan Teacher,” “God wea wakem evri samting,” “Man from taem bifor kam,” and “King for olowe” taem hem story long Jehovah. (Gen. 49:25; Isa. 30:20; 40:28; Dan. 7:9; 1 Tim. 1:​17) Nomata olsem, Jesus iusim datfala toktok “Dadi.” Why nao olsem? Nomata God hem winim evri narawan long universe, maet Jesus laekem iumi for story long God olsem wanfala pikinini hem story witim dadi bilong hem wea lovem hem.

Bat hem no isi for samfala ting long God olsem Dadi bilong olketa. Wanfala Christian sista wea nem bilong hem Atsukoa hem sei: “Staka year bihaen mi baptaes, hem no isi for mi fren gud witim Jehovah and for kolem hem Dadi taem mi prea long hem.” Hem talem why nao olsem taem hem sei: “Mi no savve tingim enitaem really dadi bilong mi showimaot love long mi.”

Long olketa nogud taem distaem, staka dadi no showimaot “love” wea olketa shud showimaot long famili. (2 Tim. 3:​1, 3) So staka savve garem semkaen tingting olsem Atsuko. Nomata olsem, staka samting nao savve mekem iumi ting long Jehovah olsem Dadi wea lovem iumi.

Jehovah Lovem Iumi and Givim Wanem Iumi Needim

Iumi mas savve gud long Jehovah firstaem bifor iumi savve ting long hem olsem Dadi bilong iumi. Jesus sei: “No eniwan savve gud long Son. Dadi long heven nomoa savve long hem. No eniwan savve gud long Dadi long heven. Son nomoa savve long hem witim olketa narawan tu wea Son hem willing for helpem olketa minim hem.” (Matt. 11:27) Wanfala nambawan wei for savve long Jehovah olsem Dadi nao, hem for ting raonem wanem Jesus talem abaotem tru God. So wanem nao Jesus talem abaotem Dadi bilong hem?

Jesus luksavve Jehovah nao mekem hem laef, so hem sei: “Bikos long Dadi long heven nao mi laef.” (John 6:​57) Iumi tu laef bikos Dadi bilong iumi long heven mekem iumi laef. (Ps. 36:9; Acts 17:28) Wanem nao mekem Jehovah for givim laef long olketa narawan? Hem bikos Jehovah lovem iumi. From Dadi bilong iumi long heven givim iumi laef, iumi tu shud lovem hem.

God showimaot hem barava lovem iumi taem hem givim Jesus for dae for iumi, wea datwan hem price for sevem iumi. Datwan mekem pipol wea sin savve fren gud witim Jehovah. (Rom. 5:​12; 1 John 4:​9, 10) And from Dadi bilong iumi long heven mekem evri promis bilong hem kamap tru, iumi savve evriwan wea lovem hem and obeyim hem bae gogo kamap “free olsem olketa pikinini bilong God.”​—⁠Rom. 8:​21.

Dadi bilong iumi long heven hem “mekem sun hem shaen” long iumi evriday. (Matt. 5:​45) Maet iumi ting iumi no need for prea long God for hem mekem sun kamap long morning. Nomata olsem, iumi barava needim sun and iumi hapi taem sun hem sunim iumi! Nara samting tu, Dadi bilong iumi nomoa savve givim iumi evri samting wea iumi needim and hem savve wanem iumi needim nomata iumi no askem hem yet. Dastawe iumi shud ting raonem gud wei wea Dadi bilong iumi long heven lukaftarem evri samting wea hem wakem!​—⁠Matt. 6:​8, 26.

Dadi Bilong Iumi ‘Protectim Iumi Gud’

Profesi wea Isaiah talem encouragem pipol bilong God bifor. Hem sei: “Jehovah wea protectim iufala gud hem sei olketa maunten bae muv and olketa hill bae seksek, bat mi bae fren bilong iufala for olowe and promis wea mi mekem witim iufala for stap gud hem bae for olowe tu.” (Isa. 54:​10, The Bible in Living English) Long lastfala naet wea Jesus stap long earth, prea wea hem talem mekhae long wei wea Jehovah ‘protectim pipol gud.’ Jesus prea olsem abaotem olketa disaepol: “Olketa hia bae gohed stap long world. Dadi long heven wea iu holy, plis lukaftarem olketa hia bikos long nem bilong iu.” (John 17:​11, 14) Jehovah lukaftarem olketa follower bilong Jesus and protectim olketa.

Wanfala samting wea God duim for protectim iumi from olketa nogud samting wea Satan duim nao hem iusim “wakaman wea faithful and wise” for givim iumi spiritual kaikai long barava taem. (Matt. 24:45) Sapos iumi laek for “werem evri samting for faet wea kam from God,” hem important tumas for iumi kaikaim olketa spiritual kaikai hia for strongim iumi. Tingim hao “bigfala shield wea protectim faith bilong iumi” savve “stopem olketa arrow wea fire laet long hem wea Satan sutim kam.” (Eph. 6:​11, 16) Faith bilong iumi savve protectim iumi from eni samting wea laek spoelem wei wea iumi fren witim Jehovah and datwan showimaot iumi trustim Dadi bilong iumi for protectim iumi.

Taem iumi lukluk long wanem Son bilong God duim taem hem stap long earth, iumi savve lanem staka samting abaotem wei wea Dadi bilong iumi long heven hem kaen and lovem iumi. Tingim story long Mark 10:​13-​16. Jesus sei long olketa disaepol: “Letem olketa smol pikinini for kam long mi.” Taem olketa smol pikinini hia hipap raonem Jesus, hem holem olketa and blessim olketa. Olketa pikinini hia mas hapi tumas! Iumi savve tru God laekem iumi for fren witim hem bikos Jesus sei: “Man wea lukim mi hem lukim Dadi tu.”​—⁠John 14:⁠9.

Jehovah God nao barava showimaot love. Hem nomoa savve givim evri samting iumi needim and hem protectim iumi. Hem laekem iumi for fren witim hem. (Jas. 4:⁠8) So Jehovah nao barava nambawan Dadi!

Iumi Kasem Gud Samting!

Iumi kasem gud samting taem iumi trustim Jehovah olsem Dadi bilong iumi long heven wea lovem iumi and lukaftarem iumi. (Prov. 3:​5, 6) Jesus kasem gud samting from hem barava trustim Dadi bilong hem. Christ talem olketa disaepol: “Mi no stap seleva bikos Dadi hem stap witim mi.” (John 16:​32) Jesus savve Jehovah evritaem sapotim hem. Taem hem baptaes, Dadi bilong hem sei: “Diswan nao Son bilong mi wea mi lovem and wea mi hapi long hem.” (Matt. 3:​15-​17) And taem Jesus klosap for dae, hem singaot olsem: “Dadi, mi putim laef bilong mi long hand bilong iu.” (Luke 23:46) Nomata long datfala taem tu Jesus barava trustim Dadi bilong hem.

Iumi savve duim olsem tu. From Jehovah stap witim iumi, bae iumi no fraetem eni samting! (Ps. 118:⁠6) Atsuko, wea iumi storyim finis, hem evritaem duim samting long strong bilong hemseleva taem hem kasem olketa problem. Bat gogo Atsuko study abaotem laef bilong Jesus and ministry wea hem duim. Hem ting raonem gud wei wea Jesus fren witim Dadi bilong hem long heven. Wanem nao kamaot from datwan? Atsuko sei: “Mi lanem wanem nao hem minim for garem Dadi and for depend long hem for helpem mi.” Hem sei tu: “Mi garem peace and mi hapi. For tok stret, iumi shud no wari abaotem eni samting.”

Wanem nao samfala gud samting moa wea iumi savve kasem taem iumi ting long Jehovah olsem Dadi bilong iumi? Hem wei bilong pikinini for lovem dadi and mami and for laek duim samting for mekem tufala hapi. Son bilong God lovem God dastawe hem ‘evritaem duim samting wea Dadi bilong hem laekem.’ (John 8:​29) Sapos iumi lovem Dadi bilong iumi long heven, iumi tu bae duim stret samting and “praisem” hem.​—⁠Matt. 11:25; John 5:​19.

Dadi Bilong Iumi ‘Holem Strong Raet Hand Bilong Iumi’

Dadi bilong iumi long heven givim holy spirit tu for “helpem” iumi. Jesus sei holy spirit ‘bae helpem iumi for barava minim gud olketa samting wea tru.’ (John 14:​15-​17; 16:​12, 13) Holy spirit bilong God savve helpem iumi for savve gud long Dadi bilong iumi. Hem savve helpem iumi for “aotem olketa strongfala samting” wea hem nao olketa idea wea no stret, mekem iumi garem “tingting wea followim Christ.” (2 Cor. 10:​4, 5) So askem Jehovah for givim holy spirit long iumi and trustim hao “Dadi bilong [iumi] long heven bae barava givim holy spirit long olketa wea askem hem.” (Luke 11:13) Hem fitim tu for iumi prea for holy spirit for helpem iumi fren gud witim Jehovah.

Smol pikinini savve feel sef taem hem holem hand bilong dadi bilong hem taem tufala wakabaot. Sapos iu ting long Jehovah olsem Dadi bilong iu, disfala toktok savve strongim iu: “Mi nao Jehovah, God bilong iufala. Mi holem strong raet hand bilong iufala and tok olsem long iufala, ‘Iufala no fraet, bae mi helpem iufala.’” (Isa. 41:13) Iu savve “wakabaot” witim God for olowe. (Mic. 6:⁠8) Gohed duim wanem Jehovah laekem, and sapos iu ting long Jehovah olsem Dadi bilong iu, hem bae lovem iu, iu bae hapi, and feel sef.

[Footnote]