‘Son Hem Willing for Helpem Iumi Savve Long Dadi’

“No eniwan savve gud long Dadi long heven. Son nomoa savve long hem witim olketa narawan tu wea Son hem willing for helpem olketa minim hem.” —LUKE 10:22.

WANEM NAO ANSA BILONG IU?

Why nao Jesus fit for helpem iumi savve long Dadi bilong hem?

Long wanem wei nao Jesus helpem pipol for savve long Dadi bilong hem?

Long wanem wei nao iumi savve followim example bilong Jesus for helpem narawan savve long Jehovah?

1, 2. Wanem kwestin nao mekem staka pipol konfius, and why nao olsem?

‘HU NAO God?’ Datfala kwestin mekem staka pipol konfius. Olsem example, staka pipol wea sei olketa Christian bilivim God hem Trinity. Nomata olsem, staka sei hem hard for minim gud datfala teaching. Wanfala bigman long religion raet olsem: “Disfala teaching hem samting wea hard for iumi olketa man minim. Hem winim tingting bilong iumi olketa man.” Staka narawan bilivim teaching bilong Charles Darwin abaotem evolution and tingse no eni God hem stap. Olketa tingse evri samting wea stap, hem kamap seleva nomoa. Nomata olsem, Charles Darwin no sei no eni God hem stap. Hem sei: “Hem hard for iumi olketa man minim sapos God hem stap or nomoa.”

² Staka pipol garem olketa kwestin abaotem God. Staka no faendem gudfala ansa and datwan mekem olketa givap for trae for savve long God. Tru tumas, Satan “blindim mind bilong olketa” wea no biliv. (2 Cor. 4:4) Dastawe staka pipol konfius and no savve long tru samting abaotem God wea wakem evri samting long universe!—Isa. 45:18.

3. (a) Hu nao helpem iumi for savve long Jehovah? (b) Olketa wanem kwestin nao bae iumi storyim?

³ Hem barava important for pipol savve long tru samting abaotem God. Why nao olsem? Bikos olketa wea “prea long Jehovah” nomoa bae sev. (Rom. 10:13) For prea long Jehovah iumi mas savve gud long hem. Jesus Christ helpem olketa disaepol for savve gud long Jehovah, wea hem Dadi long heven. (Readim Luke 10:22.) Bae iumi storyim olketa kwestin hia: Why nao Jesus fit for helpem pipol savve long Jehovah? Hao nao Jesus duim datwan? Wanem nao iumi savve duim for helpem narawan savve long Jehovah olsem Jesus duim?

JESUS FIT FOR HELPEM IUMI SAVVE LONG GOD

4, 5. Why nao Jesus fit for helpem iumi savve long Dadi bilong hem?

⁴ Jesus nao fit for helpem iumi savve long Dadi long heven. Why nao olsem? Bikos Jesus stap longtaem long heven witim God bifor God wakem eni nara samting, and hem “spesol Son bilong God.” (John 1:14; 3:18) Long datfala taem, Jesus lanem staka samting abaotem Jehovah and olketa wei bilong hem. From tufala stap tugeta for staka million year, tufala storyim staka samting, lovem each other and fren gud tugeta. (John 5:20; 14:31) Tru tumas, Jesus barava savve gud long Jehovah!—Readim Colossae 1:15-17.

⁵ Jehovah chusim Jesus for kamap man for toktok for hem. Bible kolem hem “Word bilong God.” (Rev. 19:13) Dastawe Jesus fit for helpem narawan for savve long God. Aposol John storyim hao Jesus hem “Word” wea “barava stap klosap long Dadi long heven.” (John 1:1, 18) Long taem bilong John, hem kastom bilong pipol for sidaon klosap long narawan long taem for kaikai. Datwan mekem hem isi for tufala wea sidaon klosap for story tugeta. From Jesus “barava stap klosap long Dadi,” datwan showimaot hem savve story gud witim Jehovah.

6, 7. Wanem nao helpem Jesus for gohed fren gud witim Dadi bilong hem?

⁶ Taem Jesus and Dadi bilong hem waka gud tugeta, datwan strongim wei wea tufala fren. Bible sei Son hem “kamap datwan wea [God] laekem tumas evriday.” (Readim Proverbs 8:22, 23, 30, 31.) Jesus lane for followim olketa wei bilong Dadi bilong hem taem tufala waka tugeta. Taem Jehovah wakem olketa narawan, Jesus lukim wei wea Jehovah deal witim olketa and datwan mekem Jesus for tinghae long olketa wei bilong God.

⁷ Taem Satan tok againstim raet wea Jehovah garem for rul, Jesus lukim wei wea Dadi bilong hem deal witim datwan. Nomata samting wea happen hem nogud, Jehovah showimaot love, wisdom, paoa, and hem duim stret samting. Datwan helpem Jesus for lane hao for deal witim olketa nogud samting wea kasem hem taem hem duim ministry long earth.—John 5:19.

8. Long wanem wei nao olketa Gospel helpem iumi for savve long olketa wei bilong God?

⁸ From Jesus barava fren gud witim Dadi bilong hem, hem fit for helpem iumi savve long God winim eni narawan. Best samting wea iumi savve duim for lane abaotem Dadi bilong iumi long heven hem for studyim olketa samting wea Jesus teachim and duim. Tingim diswan: Hem bae hard for iumi minim gud wanem nao “love” sapos iumi readim nomoa mining bilong datfala word long dictionary. Bat taem iumi readim and ting raonem wanem olketa Gospel storyim abaotem ministry bilong Jesus and wei wea hem helpem narawan, datwan helpem iumi for minim gud disfala toktok, “God hem love.” (1 John 4:8, 16) Samting wea olketa Gospel storyim abaotem Jesus helpem iumi for savve long olketa nara wei bilong God tu.

HAO JESUS HELPEM PIPOL SAVVE LONG DADI

9. (a) Wanem nao tufala wei wea Jesus helpem iumi for savve long Dadi bilong hem? (b) Storyim wanfala tokpiksa wea Jesus talem for helpem iumi savve long Dadi bilong hem.

⁹ Long wanem wei nao Jesus helpem olketa disaepol bilong hem bifor and iumi distaem for savve long Dadi bilong hem? Bae iumi storyim tufala samting: wanem Jesus teachim and wei bilong hem. Firstaem bae iumi storyim wanem Jesus teachim. Wanem Jesus teachim long olketa disaepol showimaot hem savve gud long tingting, feeling, and wei bilong Dadi bilong hem. Olsem example, Jesus talem wanfala tokpiksa wea hem comparem Dadi bilong hem witim wanfala man for lukaftarem sheepsheep. Wanfala sheepsheep bilong hem lus. From hem lovem evri sheepsheep bilong hem, hem go lukaotem datfala sheepsheep wea lus. Jesus sei datfala man “hem hapi from hem garem 99 sheepsheep, bat sapos hem faendem moa datfala sheepsheep wea lus, bae hem barava hapi tumas nao.” Wanem nao datfala tokpiksa minim? Jesus sei: “Olsem tu, Dadi bilong mi long heven bae no laekem eniwan long olketa disaepol hia for lus.” (Matt. 18:12-14) Wanem nao iumi savve lanem abaotem Jehovah from datfala tokpiksa? Nomata samfala taem iu feel iusles and tingse no eniwan tingim iu, Dadi bilong iumi long heven hem lovem iu. Jehovah tingim iu olsem wanfala sheepsheep bilong hem.

10. Storyim samfala samting wea Jesus duim wea showimaot wei bilong Dadi bilong hem.

¹⁰ Mek-tu wei wea Jesus helpem olketa disaepol for savve long Dadi, hem long wei bilong hem. Taem aposol Philip askem Jesus: ‘Showim Dadi long mifala,’ Jesus fit for sei: “Man wea lukim mi hem lukim Dadi tu.” (John 14:8, 9) Tingim samfala example wea Jesus showimaot wei bilong Dadi bilong hem. Taem wanfala man “wea leprosy kaikaim full body bilong hem” askem Jesus for healim hem, Jesus tasim hem and sei: “Mi barava laek for duim datwan. Iu gud bak nao.” Taem datfala leprosy man kamap gud, hem luksavve Jehovah nao helpem Jesus for healim hem. (Luke 5:12, 13) Nara example hem taem Lazarus dae. Olketa disaepol luksavve long feeling bilong Jehovah for olketa wea safa taem olketa lukim Jesus “barava sorre tumas” and “hem krae.” Nomata Jesus savve bae hem mekem Lazarus laef bak, hem feel sorre taem hem lukim famili and olketa fren bilong Lazarus barava sorre. (John 11:32-35, 40-43) Maet iu tu savve tingim samfala story long Bible abaotem samting wea Jesus duim, wea showimaot feeling wea Jehovah garem for pipol wea safa.

11. (a) Wanem nao iumi lanem abaotem Jehovah from wei wea Jesus raosem olketa man wea market long temple? (b) Why nao datfala story comfortim iumi?

¹¹ Wanem nao iumi lanem from wei wea Jesus raosem olketa man wea market long temple? Tingim samting wea happen. Jesus tekem rope and hem wakem wanfala whip. Then hem iusim datwan for raosem from temple olketa wea salem olketa sheepsheep and buluka. Hem kapsaetem tu selen and tebol bilong olketa wea changem olketa difren selen. (John 2:13-17) Wanem Jesus duim mekem olketa disaepol for tingim profesi wea King David talem. Hem sei: “Mi laekem tumas haos bilong iu and mi tingim evritaem.” (Ps. 69:9) Jesus showimaot hem strong for tru worship taem hem raosem olketa man hia. Wanem nao datwan teachim iumi abaotem Jehovah? Iumi lanem Jehovah bae finisim olketa nogud samting long earth, no bikos hem garem bigfala paoa nomoa bat bikos hem barava laek for duim datwan. Wei wea Jesus strong for againstim olketa nogud samting showimaot tingting bilong Jehovah taem hem lukim olketa rabis samting wea happen distaem. Datwan savve comfortim iumi taem nogud pipol duim samting wea no stret long iumi!

12, 13. Wanem nao iumi savve lanem abaotem Jehovah from wei wea Jesus deal witim olketa disaepol?

¹² Wei wea Jesus deal witim olketa disaepol tu showimaot wei bilong Dadi bilong hem. Olketa disaepol raoa abaotem hu long olketa nao important. (Mark 9:33-35; 10:43; Luke 9:46) From Jesus stap longtaem witim Dadi bilong hem long heven, hem savve long tingting bilong Jehovah abaotem wei for praod. (2 Sam. 22:28; Ps. 138:6) Jesus lukim wei wea Satan kamap praod and trae for kasem hae position. Jesus sorre tumas taem hem lukim olketa disaepol wea hem trainim start for kamap praod. Olketa wea hem chusim for kamap aposol tu start for garem datfala wei! Long lastfala day wea Jesus laef long earth, olketa aposol gohed for raoa abaotem hu long olketa nao important. (Luke 22:24-27) Nomata olsem, Jesus kaonselem olketa long kaenfala wei, and hem gohed helpem olketa for followim wei bilong hem for hambol.—Phil. 2:5-8.

¹³ Wei wea Jesus patient for helpem olketa disaepol taem olketa duim samting wea no stret, showimaot wei bilong Jehovah for patient witim iumi. Wanem Jesus duim and talem showimaot wei wea Jehovah no savve lusim pipol bilong hem nomata olketa duim mistek staka taem. Taem iumi tingim olketa gudfala wei bilong Jehovah hia, datwan helpem iumi for repent and prea long Jehovah for forgivim iumi taem iumi duim mistek.

SON WILLING FOR HELPEM OLKETA SAVVE LONG DADI

14. Wanem nao showimaot Jesus willing for helpem pipol savve long Jehovah?

¹⁴ Staka nogud man wea rul no laek for talem eni information long pipol wea olketa rulim, mekem olketa savve kontrolem olketa. Bat Jesus no olsem. Hem willing for talem wanem hem savve abaotem Jehovah long narawan mekem olketa tu savve long Dadi bilong hem. (Readim Matthew 11:27.) Nara samting tu, Jesus “helpem iumi for minim samting mekem iumi savve long datfala tru God,” Jehovah. (1 John 5:20) Jesus helpem olketa disaepol for minim olketa samting wea hem teachim abaotem Dadi bilong hem. Hem no teachim samting abaotem Dadi wea hard for olketa man minim, olsem teaching bilong Trinity.

15. Why nao Jesus no talem evri samting abaotem Dadi bilong hem long olketa disaepol?

¹⁵ Waswe, Jesus teachim evri samting wea hem savve abaotem Dadi bilong hem? Nomoa, staka samting hem no talem. (Readim John 16:12.) Why nao olsem? Bikos hem luksavve olketa disaepol ‘hard for minim’ evri samting long datfala taem. Bat Jesus sei olketa bae savve long staka samting taem hem sendem kam “holy spirit for helpem” olketa for “barava minim gud olketa samting wea tru.” (John 16:7, 13) Dadi and mami wea wise bae no talem samfala samting long pikinini, bat olketa weit go kasem taem hem big and fit for minim samting. Long sem wei, Jesus no talem evri samting abaotem Dadi long olketa disaepol, bat hem weit go kasem taem olketa mature and fit for minim datwan. Jesus teachim nomoa wanem olketa fit for lanem.

HELPEM NARAWAN FOR SAVVE LONG JEHOVAH OLSEM JESUS DUIM

16, 17. Why nao iumi fit for helpem narawan savve long Jehovah?

¹⁶ Taem iu savve long samwan and tinghae long olketa wei bilong hem, datwan mekem iu for laek talem narawan abaotem hem. Taem Jesus stap long earth, hem talem pipol abaotem Dadi bilong hem. (John 17:25, 26) Waswe, iumi tu savve helpem narawan for savve long Jehovah olsem Jesus duim?

¹⁷ Olsem iumi storyim finis, Jesus savve long staka samting abaotem Jehovah winim eni narawan. Nomata olsem, hem willing for storyim long olketa disaepol samfala samting wea hem savve abaotem Jehovah and for helpem olketa minim wanem hem teachim. Jesus helpem iumi for savve long Jehovah nomata plande pipol no savve long God. Iumi hapi from Jesus helpem iumi for savve long Dadi bilong hem thru long wanem hem teachim and wei bilong hem! Tru tumas, from iumi savve long Jehovah, hem fitim for iumi tok praod abaotem datwan. (Jer. 9:24; 1 Cor. 1:31) From iumi traem best for fren gud witim Jehovah, hem tu fren gud witim iumi. (Jas. 4:8) Datwan mekem iumi fit for helpem narawan savve long Jehovah. Long wanem wei nao iumi savve duim datwan?

18, 19. Long wanem wei nao iumi savve helpem narawan for savve long Jehovah? Minim kam.

¹⁸ Iumi need for followim wei bilong Jesus and helpem pipol savve long God thru long wanem iumi talem and duim. Iumi need for tingim hao staka pipol wea iumi preach long olketa no savve hu nao God, and maet olketa no garem stretfala savve abaotem God bikos long olketa false teaching. Iumi savve helpem olketa for lane abaotem nem bilong God, plan bilong hem for olketa man, and olketa wei bilong hem wea Bible storyim. Nara samting tu, iumi savve storyim long olketa brata and sista eni samting wea iumi lanem long Bible abaotem God wea iumi no minim bifor. Datwan savve helpem olketa tu for kasem gud samting.

¹⁹ Taem iumi traem best for followim wei bilong Jesus, datwan tu bae helpem pipol for savve long Jehovah. Taem iumi showimaot love bilong Christ, datwan bae mekem pipol laek savve long God and Jesus. (Eph. 5:1, 2) Aposol Paul encouragem iumi for ‘followim wei bilong hem, olsem hem tu followim wei bilong Christ.’ (1 Cor. 11:1) Iumi garem nambawan privilege for helpem pipol savve long Jehovah taem iumi showimaot gudfala wei. Iumi evriwan laek for helpem narawan for savve long Jehovah olsem Jesus duim.