Stap Sef Witim Pipol Bilong God
“Mi bae praisem iu long big kongregeson.”—PS. 35:18.
1-3. (a) Wanem nao savve mekem olketa Christian stap long danger ples? (b) Long wea nao pipol bilong God savve stap sef?
TAEM Joe and waef bilong hem holiday, tufala daeva long reef and lukim staka fish wea difren kaen size and kala. Tufala swim go long ples wea deep lelebet for lukim datfala reef. Taem tufala lukim hem barava deep, waef bilong Joe sei, “Mi fraet nao, hem deep tumas.” Joe hem sei, “No wari, hem olraet nomoa.” Then Joe ting olsem, ‘Wea nao evri fish?’ Seknomoa hem luksavve nao. Hem lukim wanfala shark swim stret kam for hem. Hem no wei nao. Bat taem shark hia kam klosap nomoa, shark tane go difren and go nao.
2 Long sem wei tu, wanfala Christian savve letem world bilong Satan, hapitaem, waka, and olketa material samting for mekem hem busy tumas gogo hem no luksavve hem stap long danger ples. Joe, wanfala elder, hem sei: “Samting wea kasem mi mekem mi ting raonem hu nao iumi fren witim. Swim long gudfala ples wea sef, hem nao long kongregeson!” Sapos iu letem olketa samting long world for mekem iu no hipap witim kongregeson, iu savve kasem nogud samting. Sapos olsem, iu mas duim samting kwiktaem for hipap moa witim kongregeson. Sapos nomoa, datwan savve spoelem wei wea iu fren witim Jehovah.
3 Disfala world hem no sef ples for olketa Christian stap long hem. (2 Tim. 3:1-5) Satan savve lelebet taem nomoa stap for hem, so hem barava laek for spoelem olketa wea no gohed for lukaot. (1 Pet. 5:8; Rev. 12:12, 17) Nomata olsem, Jehovah givim iumi Christian kongregeson for iumi stap sef long hem.
4, 5. Hao nao tingting bilong staka pipol abaotem future, and why nao olsem?
4 Man no savve barava stap sef long disfala world. Olketa samting olsem crime, pipol raf, price bilong olketa samting hae tumas, and pipol spoelem earth, hem mekem pipol for no barava feel sef. Iumi evriwan savve kamap olo and kasem sik. And olketa narawan wea garem waka, haos, rich lelebet, and no sik tumas, olketa no savve sapos diswan bae gohed for longfala taem or nomoa.
5 Staka pipol no hapi tu. Staka wea marit and garem pikinini tingse datwan nao bae mekem olketa hapi and stap gud, bat hem no olsem. Samfala wea go long service bilong olketa nating kasem gud samting from religion bilong olketa, and datwan mekem olketa konfius and sorre. Hem olsem bikos olketa bigman long church duim olketa nogud samting and teachim olketa laea teaching. Dastawe staka pipol biliv nomoa long science and trustim olketa man for helpem olketa. So iumi no sapraes taem pipol no barava feel sef or no laek for tingim wanem bae happen long future.
6, 7. (a) Why nao tingting bilong pipol bilong God hem difren from pipol wea no worshipim hem? (b) Wanem nao bae iumi ting raonem long disfala study?
6 Bat tingting bilong pipol bilong God hem barava difren from pipol wea no worshipim hem! Nomata iumi kasem olketa sem samting and problem olsem nara pipol, hao iumi ting long olketa samting hia hem barava difren from pipol long world. (Readim Isaiah 65:13, 14; Malachi 3:18.) Why nao olsem? Hem bikos iumi lanem from Bible why nao disfala world hem no sef and iumi kasem help for winim olketa hard samting. Dastawe iumi no wari tumas abaotem future. From iumi worshipim Jehovah, iumi luksavve long olketa teaching wea no kam from Bible. Iumi no kasem tu olketa problem wea man kasem from hem duim bigfala sin. Dastawe olketa long Christian kongregeson kasem peace and hapi wea nara pipol no kasem.—Isa. 48:17, 18; Phil. 4:6, 7.
7 Iumi bae lane abaotem samfala wea feel sef bikos olketa worshipim Jehovah and samfala wea kasem problem bikos olketa no worshipim hem. Story bilong olketa bae helpem iumi for ting raonem samting wea iumiseleva duim and tingim. From kaonsel bilong God savve helpem iumi, hem gud for lukluk long iumiseleva for savve sapos iumi barava followim or nomoa.—Isa. 30:21.
‘Klosap Nomoa Mi Go Difren’
8. Wanem nao pipol wea worshipim Jehovah duim evritaem?
8 Start kam long bifor yet, pipol wea worshipim Jehovah and obeyim hem no fren witim pipol wea no worshipim hem. Tru tumas, Jehovah talem finis hao pipol wea followim Satan bae heitim pipol wea worshipim Jehovah. (Gen. 3:15) From pipol bilong God strong for followim Bible, olketa barava difren from nara pipol. (John 17:15, 16; 1 John 2:15-17) Hem no isi for duim olsem evritaem. Dastawe samfala wea worshipim Jehovah daotem sapos hem wise for no duim samting wea man seleva nomoa laekem.
9. Wanem nao kasem man wea raetem Psalm 73?
9 Wanfala man wea worshipim Jehovah start for daotem sapos hem duim stret samting. Hem nao raetem Psalm 73 wea luk olsem hem wanfala long laen bilong Asaph. Hem laek for savve why nao staka taem nogud pipol hapi and garem selen, bat samfala wea trae hard for worshipim God olketa safa and kasem trabol.—Readim Psalm 73:1-13.
10. Hao nao tingting bilong iu abaotem Psalm 73?
10 Waswe, enitaem iu askem semkaen kwestin tu olsem man hia wea hem raetem Psalm 73? Sapos olsem, no feel nogud and tingse iu no garem strong faith. Samfala pipol bilong Jehovah and samfala wea raetem Bible tu askem semkaen kwestin. (Job 21:7-13; Ps. 37:1; Jer. 12:1; Hab. 1:1-4, 13) Tru tumas, evriwan wea laek for worshipim Jehovah mas tingting strong abaotem disfala kwestin: Waswe, hem gud for worshipim God and obeyim hem? Long Eden, Satan nao first wan wea kwestinim sapos Jehovah fit for rulim universe. (Gen. 3:4, 5) So hem gud for iumi evriwan ting raonem wanem Psalm 73 storyim. Waswe, iumi shud jealous sapos hem luk olsem olketa barava nogud pipol no garem eni problem? Waswe, iumi shud ‘go difren’ from Jehovah and followim olketa? Datwan nao samting wea Satan barava laekem iumi for duim.
11, 12. (a) Wanem nao helpem man wea raetem Psalm 73 for no daot moa? Wanem nao iumi lanem from datwan? (b) Wanem nao mekem iumi agree witim man wea raetem Psalm 73?
11 Wanem nao helpem man wea raetem Psalm 73 for no daot moa? Nomata hem klosap go difren and duim samting wea no stret, hem changem tingting bilong hem taem hem go long temple, wea hem “nambawan holy ples bilong God.” Taem hem stap long there nao hem fren witim pipol bilong God and hem ting raonem plan bilong God. Then hem savve nao hem no laek for kasem nogud samting olsem nogud pipol. Hem luksavve samting wea olketa duim and disaedem hem mekem olketa olsem olketa wakabaot long “graon wea slippery.” Hem luksavve tu evriwan wea duim bigfala sin and lusim Jehovah bae “kwiktaem kasem trabol,” bat pipol wea worshipim Jehovah bae stap sef. (Readim Psalm 73:16-19, 27, 28.) Iuseleva tu lukim diswan. Sapos man duim wanem hemseleva nomoa laekem and no followim law bilong God, maet hem luk olsem hem gud samting, bat hem mas kasem nogud samting wea kamaot from datwan.—Gal. 6:7-9.
12 Wanem moa iumi lanem from experience bilong man wea raetem Psalm 73? Hem start for tingting stret taem hem go long ples for worshipim Jehovah. Taem hem stap witim pipol bilong God, hem stap sef and kasem wisdom. Distaem tu iumi savve kasem wise kaonsel and gudfala spiritual kaikai long olketa meeting. Dastawe Jehovah talem pipol bilong hem for go long olketa meeting. Olketa bae kasem encouragement and help for duim samting wea wise.—Isa. 32:1, 2; Heb. 10:24, 25.
Chusim Gud Olketa wea Iu Fren Witim
13-15. (a) Wanem nao iumi lanem from samting wea happen long Dinah? (b) Wanem gud samting nao iumi kasem from iumi fren witim olketa Christian?
13 Dinah, dota bilong Jacob, kasem bigfala trabol from hem fren witim pipol long world. Bible sei hem savve gogo evritaem for lukim olketa gele long Canaan wea stap klosap long famili bilong hem. Pipol long Canaan no followim olketa law bilong Jehovah olsem pipol wea worshipim hem. Olketa samting wea olketa savveman wea digdig long graon faendem showimaot olketa long Canaan worshipim idol, durong, and raf tumas. (Ex. 23:23; Lev. 18:2-25; Deut. 18:9-12) Tingim samting wea happen from Dinah fren witim pipol olsem.
14 Shechem hem wanfala man long datfala ples wea pipol “barava respectim winim olketa nara man long famili bilong hem.” Taem hem lukim Dinah, hem “tekem hem and leidaon witim hem and spoelem hem.” (Gen. 34:1, 2, 19) Datwan hem nogud tumas! Luk olsem Dinah no savve samting olsem bae kasem hem! Maet hem laek for savve nomoa long samfala young wan long there and hem tingse olketa bae no duim eni nogud samting long hem. Bat Shechem barava trikim Dinah.
15 Wanem nao iumi lanem from datfala story? Sapos iumi fren witim pipol long world, iumi bae kasem nogud samting. Bible sei: “Sapos iufala fren witim nogud pipol bae olketa spoelem gudfala wei bilong iufala.” (1 Cor. 15:33) Bat iumi bae kasem gud samting sapos iumi fren witim pipol wea garem sem biliv olsem iumi, wea lovem Jehovah, and followim wanem Bible talem. Wei for fren witim pipol olsem bae strongim iumi for duim wise samting.—Prov. 13:20.
‘God Mekem Iufala Klin’
16. Wanem nao aposol Paul talem abaotem samfala long kongregeson long Corinth?
16 Christian kongregeson helpem staka pipol for no duim moa olketa rabis samting. Taem aposol Paul raetem firstfala leta go long kongregeson long Corinth, hem storyim hao olketa Christian long there lusim rabis wei bilong olketa for followim wanem God laekem. Long bifor, samfala durong, worshipim idol, duim adultery, man sleep witim nara man, steal, drunk, and duim olketa nara samting tu. Bat Paul sei: ‘God mekem iufala klin.’—Readim 1 Corinthians 6:9-11.
17. Hao nao wei for followim Bible changem laef bilong staka pipol?
17 Pipol wea no garem faith long God no garem gudfala kaonsel for followim. Olketa followim tingting bilong olketa seleva or maet duim olketa rabis samting olsem samfala long Corinth duim bifor olketa kamap Christian. (Eph. 4:14) Bat taem man kasem stretfala savve abaotem Bible and plan bilong God, datwan savve strongim hem for lusim nogud wei bilong hem. (Col. 3:5-10; Heb. 4:12) Staka insaed Christian kongregeson distaem followim rabis wei bilong disfala world bifor olketa kamap Christian and olketa no hapi long datfala taem. Bat taem olketa start for fren witim pipol bilong God and followim olketa Bible kaonsel, olketa hapi.
18. Wanem nao kasem wanfala young wan, and datwan pruvim wanem samting?
18 Samfala wea lusim Christian kongregeson olketa barava sorre olketa duim datwan. Wanfala sista, wea iumi bae sei nem bilong hem Tanya, hem “big kam long truth.” Hem sei taem hem 16 year, hem lusim kongregeson bikos hem “aftarem olketa samting long world.” Hem babule nating and killim dae baby insaed long bele bilong hem. Distaem Tanya sei: “Thrifala year wea mi lusim kongregeson barava spoelem feeling and tingting bilong mi wea mekem mi no savve forgetim nogud samting wea mi duim. Samting wea mi feel nogud long hem nao, mi tingim olowe hao mi killim dae baby bilong mi bifor hem born. . . . Mi laek for talem evri young wan wea maet laek ‘teistim’ lelebet disfala world: ‘No duim datwan!’ Maet firstaem world hem swit bat bihaen hem barava saoa. World no savve mekem man hapi. Mi savve bikos mi teistim finis. Stap insaed organization bilong Jehovah! Hem nomoa savve mekem man barava hapi.”
19, 20. Long wanem wei nao Christian kongregeson hem sef ples for iumi?
19 Tingim samting wea bae kasem iu sapos iu lusim Christian kongregeson wea hem sef ples. Staka savve rememberim nogud laef wea olketa garem bifor olketa lanem truth, and olketa barava no laek for lusim truth. (John 6:68, 69) Taem iu fren gud witim olketa brata and sista, iu savve gohed for stap sef and no kasem olketa problem and wei for sorre wea pipol long world bilong Satan kasem. Sapos iu fren gud witim olketa brata and sista and iu go long olketa meeting evritaem, bae iu herem why nao hem gud for followim olketa gudfala advaes bilong Jehovah. Bae iu kasem encouragement for followim wanem Jehovah laekem. Dastawe iu tu bae laek ‘praisem Jehovah long big kongregeson’ olsem man wea raetem psalm.—Ps. 35:18.
20 Hem tru, evri Christian kasem samfala hard taem wea mekem hem hard for olketa gohed faithful long God. Maet olketa needim nomoa samwan for givim gudfala advaes long olketa. Wanem nao iu and full kongregeson savve duim for helpem olketa brata and sista long taem olsem? Study bihaen diswan bae storyim wanem iu savve duim for ‘gohed comfortim olketa brata and sista and strongim olketa.’—1 Thess. 5:11.
Wanem Nao Ansa Bilong Iu?
• Wanem nao iumi lanem from man wea raetem Psalm 73?
• Wanem nao iumi lanem from samting wea happen long Dinah?
• Why nao iumi savve stap sef long Christian kongregeson?
[Piksa long page 7]
Swim long ples wea sef, stap insaed kongregeson!