Olketa Spiritual Samting Savve Strongim Iumi
“Iufala waka witim mi. . . . Wei for duim olsem bae strongim iufala.” —MATT. 11:29.
1. Wanem nao God duim long Maunt Sinai, and why nao olsem?
TAEM Jehovah startim Law covenant long Maunt Sinai, wanfala law hem for olketa Israelite keepim Sabbath evri week. Jehovah talem Moses for sei long olketa Israelite: “Iufala savve waka for sixfala day, bat long mek-seven day iufala mas rest mekem buluka, donkey, boy bilong haosgele, and pipol from nara kantri wea stap witim iufala savve rest for strongim olketa seleva.” (Ex. 23:12) Tru tumas, from Jehovah tingim pipol bilong hem wea followim Law, hem markem day for olketa rest for “strongim olketa seleva.”
2. Wanem gud samting nao olketa Israelite kasem from olketa keepim Sabbath?
2 Waswe, Sabbath hem day for rest nomoa? Nomoa. Hem wanfala important part long wanem olketa Israelite duim for worshipim Jehovah. Long Sabbath, hem taem wea olketa hed long famili savve teachim famili for “gohed duim stret samting wea Jehovah laekem.” (Gen. 18:19) Hem taem tu for olketa famili and fren for hapi tugeta and ting raonem wanem Jehovah duim. (Isa. 58:13, 14) Important samting nao, Sabbath piksarem taem wea Christ bae rul for 1,000 year and evriwan bae hapi tumas. (Rom. 8:21) Bat waswe long distaem? Wanem nao savve helpem olketa tru Christian for hapi?
Olketa Brata and Sista Savve Strongim Iumi
3. Wanem nao olketa firstfala Christian duim for helpem narawan? Wanem nao kamaot from datwan?
3 Aposol Paul sei Christian kongregeson olsem “post wea sapotim truth.” (1 Tim. 3:15) Olketa firstfala Christian encouragem and helpem narawan and showimaot love, wea strongim olketa. (Eph. 4:11, 12, 16) Taem Paul stap long Ephesus, samfala long kongregeson long Corinth kam lukim hem for strongim hem. Paul sei: ‘Mi hapi tumas from Stephanas and Fortunatus and Achaicus strongim mi.’ (1 Cor. 16:17, 18) Taem Titus helpem olketa brata long Corinth, Paul raet go long olketa and sei: “Iufala evriwan barava strongim hem.” (2 Cor. 7:13) Distaem tu, Olketa Jehovah’s Witness strongim narawan taem olketa hipap tugeta.
4. Olketa meeting strongim iumi long wanem wei?
4 Taem iu go long olketa meeting, iu savve hapi tumas. Paul sei: “Iumi evriwan strongim narawan. Faith bilong iufala bae strongim mi, and faith bilong mi bae strongim iufala tu.” (Rom. 1:12) Olketa brata and sista bilong iumi no pipol wea iumi savve lelebet nomoa long olketa. Olketa trufala fren bilong iumi and iumi lovem olketa and respectim olketa. Taem iumi hipap evritaem witim olketa long meeting, hem strongim iumi and iumi hapi tumas.—Philem. 7.
5. Wanem nao iumi savve duim mekem iumi strongim narawan long olketa convention and assembly?
5 Olketa convention and assembly savve strongim iumi tu. Long taem olsem, iumi kasem spiritual kaikai wea savve mekem iumi kasem laef. Hem taem tu for iumi ‘garem staka niu fren.’ (2 Cor. 6:12, 13) Bat waswe sapos iumi man for shame and hem no isi for story witim pipol? Wanfala wei for meetim olketa brata and sista, hem for willing for duim waka long convention. Wanfala sista wea help for duim waka long international convention hem sei: “Mi savve long famili bilong mi and tu-thri fren nomoa. Bat taem mi help for duim klining, mi start for savve long staka brata and sista! Mi barava enjoyim!”
6. Wanem nao savve helpem evriwan long famili for hapi?
6 Thrifala taem evri year, olketa Israelite savve hipap long Jerusalem for worship. (Ex. 34:23) Plande taem olketa mas lusim garden and stoa bilong olketa and baeleg for staka day long road wea dust. Nomata olsem, olketa “barava hapi tumas” for go long temple for “praisem Jehovah.” (2 Chron. 30:21) Distaem tu staka wea worshipim Jehovah hapi tumas taem olketa go for tour long Bethel. Waswe, iu savve tekem famili bilong iu for duim datwan?
7. (a) Wanem gud samting nao iumi savve kasem from hapitaem? (b) Wanem kaen hapitaem nao hem gud and savve strongim iumi?
7 Wei for hapitaem witim olketa fren and famili savve strongim iumi tu. King Solomon sei: “Hem barava gud for man kaikai, drink, and enjoyim samting wea kamaot from hard waka bilong hem.” (Eccl. 2:24) Taem iumi hipap witim olketa brata and sista, datwan savve strongim iumi and iumi bae lovem go moa olketa from iumi savve gud long olketa. Olketa hapitaem wea no big tumas and wea organize gud nao hem gud and savve strongim iumi. Sapos iumi laek givimaot lelebet alcohol, iumi mas kontrolem gud datwan.
Ministry Strongim Iumi
8, 9. (a) Storyim hao nao message bilong Jesus hem difren from olketa Pharisee. (b) Wanem gud samting nao iumi kasem taem iumi preach?
8 Jesus strong for duim ministry, and hem talem olketa disaepol for duim olsem tu. Hem sei: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Matt. 9:37, 38) Message wea Jesus teachim barava strongim man bikos hem “gud nius.” (Matt. 4:23; 24:14) Bat olketa Pharisee putim hevi long pipol and mekem staka rul for olketa mas followim.—Readim Matthew 23:4, 23, 24.
9 Taem iumi story abaotem Kingdom, iumi helpem pipol for fren witim God and iumi tu minim gud Bible and barava tinghae long hem. Dastawe man wea raetem psalm hem sei: “Praisem Jah, iufala pipol, from hem gud for singsing long God bilong iumi, datwan nao naes tumas.” (Ps. 147:1) Waswe, iu savve lukaotem chance for preach mekem iu savve hapi go moa?
10. Waswe, pipol mas acceptim message bilong iumi for showimaot iumi duim gud ministry? Storyim datwan.
10 Long samfala ples pipol interest tumas long gud nius winim long samfala nara ples. (Readim Acts 18:1, 5-8.) Sapos iu stap long ples wea staka pipol no tinghae long message abaotem Kingdom, ting raonem gud samting wea kamaot from ministry. No forgetim, iu no hard waka nating taem iu gohed strong for talem pipol abaotem Jehovah. (1 Cor. 15:58) Nomata pipol acceptim gud nius or nomoa, datwan no showimaot sapos iumi duim gud ministry. Iumi savve Jehovah bae helpem pipol wea hambol for acceptim message abaotem Kingdom.—John 6:44.
Famili Worship Strongim Iumi
11. Wanem nao Jehovah talem dadi and mami for duim? Hao nao olketa savve duim datwan?
11 Dadi and mami mas teachim olketa pikinini abaotem Jehovah and olketa wei bilong hem. (Deut. 11:18, 19) Olketa dadi and mami, waswe, iu markem taem for teachim pikinini abaotem Dadi bilong iumi long heven wea lovem iumi? Iu savve duim disfala important waka and lukaftarem famili bikos Jehovah givim kam staka spiritual kaikai for strongim iumi. Iumi kasem diswan long olketa buk, magasin, video, and olketa recording.
12, 13. (a) Wanem nao olketa famili mas duim for kasem gud samting from Famili Worship? (b) Wanem nao dadi and mami savve duim for mekem Famili Worship strongim evriwan?
12 Wakaman wea faithful and wise encouragem evriwan for duim Famili Worship tu. Famili shud markem taem evri week for duim famili Bible study. Staka wea duim Famili Worship sei datwan mekem famili fren gud tugeta and fren witim Jehovah. Bat wanem nao dadi and mami savve duim for mekem Famili Worship strongim evriwan for fren gud witim God?
13 Famili Worship mas no boring. From iumi worshipim “hapi God,” hem laekem iumi for hapi tu. (1 Tim. 1:11; Phil. 4:4) Iumi kasem blessing from iumi markem taem evri week for story abaotem Bible. Dadi and mami savve changem hao olketa teach taem olketa ting raonem wanem bae mekem study interesting. Wanfala famili talem Brandon, boy bilong olketa wea ten year, for faendemaot “Why Nao Jehovah Iusim Snek for Piksarem Satan?” Diswan fitim Brandon from hem laekem olketa snek and hem feel nogud bikos snek piksarem Satan. Samfala taem, samfala famili actim Bible drama wea evriwan garem part wea maet olketa readim from Bible, or actim wanfala samting wea happen. Olketa difren wei for teach hia hem mekem famili enjoyim Famili Worship and olketa pikinini duim samting wea savve helpem olketa laek for worshipim Jehovah.a
No Duim Samting wea Mekem Iumi Wiki
14, 15. (a) Why nao pipol wari tumas and barava no feel sef taem world gogo for finis? (b) Wanem nara problem and hevi nao savve kasem iumi?
14 From world gogo for finis, pipol wari tumas and barava no feel sef. Staka million pipol no garem waka and selen hem hard. Pipol wea garem waka sei selen wea olketa kasem hem no fit for peim wanem famili needim. Hem olsem olketa putim selen hia insaed basket wea garem hol. (Markem witim Haggai 1:4-6.) Olketa bigman long gavman and olketa nara leader no fit for finisim terrorism and olketa nara nogud samting nomata olketa trae hard for finisim. Staka pipol feel nogud tu from olketa duim samfala samting wea no stret.—Ps. 38:4.
15 Olketa trufala Christian tu savve kasem problem and hevi from world bilong Satan. (1 John 5:19) Samfala taem olketa disaepol bilong Christ kasem hard samting from olketa gohed faithful long Jehovah. Jesus sei: “Sapos olketa spoelem mi, bae olketa spoelem iufala tu.” (John 15:20) Nomata olsem, taem man “spoelem iumi,” “iumi no stap seleva.” (2 Cor. 4:9) Why nao iumi no stap seleva?
16. Wanem nao savve helpem iumi for gohed hapi?
16 Jesus sei: “Kam long mi, iufala wea waka hard and wea karem hevi samting, mekem mi savve strongim iufala.” (Matt. 11:28) From iumi showimaot faith long Christ wea dae for iumi, Jehovah helpem iumi. Dastawe iumi kasem “strong wea winim wanem iumi garem.” (2 Cor. 4:7) Holy spirit “helpem” iumi and strongim faith bilong iumi mekem iumi savve gohed strong taem iumi kasem hard taem and for gohed hapi.—John 14:26; Jas. 1:2-4.
17, 18. (a) Wanem nao iumi mas keakea long hem? (b) Wanem nao savve happen sapos iumi ova tumas for aftarem wanem iumiseleva nomoa laekem?
17 Olketa trufala Christian mas keakea nogud world switim olketa for aftarem hapitaem olowe. (Readim Ephesians 2:2-5.) Sapos iumi no keakea, maet “samting wea body laekem and samting wea eye laekem and wei for show-off witim samting wea man garem” spoelem iumi. (1 John 2:16) Or maet iumi tingse hem stret nomoa for duim wanem body laekem for strongim iumi. (Rom. 8:6) Samfala start for tekem drug or drink tumas, lukluk long rabis piksa, duim sport wea danger, or nara nogud samting for mekem olketa hapi. Satan laek for ‘trikim’ iumi for duim eni samting wea maet iumi tingse datwan bae strongim iumi, nomata hem no stret.—Eph. 6:11.
18 Hem no rong for kaikai and drink and duim gudfala hapitaem sapos hem no ova tumas. Bat iumi no letem olketa samting olsem for kamap main samting long laef bilong iumi. Iumi mas no ova tumas and kontrolem wanem iumi duim from world hem gogo for finis. Sapos iumi aftarem olketa samting wea iumiseleva nomoa laekem, iumi savve ‘wiki and isisi long waka wea iumi shud duim from iumi garem stretfala savve abaotem Lord bilong iumi, Jesus Christ.’—2 Pet. 1:8.
19, 20. Wanem nao savve strongim iumi?
19 Taem iumi wan mind witim Jehovah, iumi luksavve olketa samting long world wea mekem pipol hapi hem for lelebet taem nomoa. Moses and iumi tu luksavve long datwan. (Heb. 11:25) Taem iumi duim samting wea Dadi long heven laekem, datwan savve mekem iumi barava hapi and strongim iumi.—Matt. 5:6.
20 So iumi mas gohed for duim olketa spiritual samting for strongim iumi. Taem iumi duim olsem, iumi “lusim olketa rabis wei and olketa samting wea pipol long world laekem . . . taem iumi weitim disfala hapi hope and nambawan God bilong iumi and Christ Jesus, man wea sevem iumi.” (Titus 2:12, 13) So iumi mas disaed strong for waka witim Jesus taem iumi stap anda long hem and followim wanem hem talem. Taem iumi duim olsem, iumi bae barava hapi and kasem strong!
[Footnote]
a Samfala idea moa for mekem famili study interesting stap long October 2008, Kingdom Ministry Bilong Iumi, page 8, paragraf 3 and 4.
Wanem Nao Ansa Bilong Iu?
• Wanem nao strongim pipol bilong Jehovah distaem?
• Long wanem wei nao ministry savve strongim iumi and pipol wea iumi witness long olketa?
• Wanem nao hed long famili savve duim for mekem Famili Worship strongim evriwan?
• Olketa wanem samting nao savve mekem iumi wiki long spiritual wei?
[Piksa long page 26]
Taem iumi waka witim Jesus, staka samting savve strongim iumi