Gud Samting Kamaot From Spesol Waka Long Bulgaria
“Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.”—MATT. 9:37, 38.
DISFALA toktok bilong Jesus hem fitim samting wea happen long Bulgaria, wanfala naes Balkan kantri long southeastern Europe! Bigfala need stap for samfala wakaman moa for go preachim gud nius long winim 7 million pipol wea stap long datfala kantri. Samting olsem 1,700 pablisa nao stap long Bulgaria, bat olketa no savve kavarem full kantri. Dastawe, Governing Body askem olketa Witness long Bulgaria wea stap long olketa nara kantri long Europe for kam long Bulgaria and share long wanfala spesol preaching waka long 2009. Olketa arrangem datfala spesol waka for gohed for sevenfala week long taem bilong hot season, go kasem taem bilong “Gohed for Lukaot! Distrik Convention long Sofia, long August 14-16, 2009.
Staka Pipol Acceptim Kingdom Message
Olketa brata long branch office long Sofia no sure haomas pablisa from France, Germany, Greece, Italy, Poland, and Spain nao bae kam. Datwan minim olketa bae iusim selen bilong olketa seleva and iusim holiday bilong olketa for duim preaching waka. Hem barava naes for lukim hao evri week, namba bilong olketa wea laek kam hem go ap kasem 292! From staka nao laek kam, hem bae gud for sendem olketa hia long thrifala difren taon long Bulgaria olsem, Kazanlak, Sandanski, and Silistra. Olketa circuit overseer long Bulgaria askem tu olketa pioneer and pablisa for sapotim datfala spesol waka. Gogo, 382 Witness nao strong for preach long olketa territory wea pipol no herem gud nius evritaem.
Olketa sendem olketa brata from olketa kongregeson wea stap klosap for arrangem ples for stap. Olketa rentim ples for stap and bukim olketa hotel wea no expensive tumas. Olketa brata barava waka hard for helpem and lukaftarem olketa narawan wea kam. Long thrifala taon hia, olketa rentim olketa ples for meeting. Olketa arrangem olketa brata wea kam for conductim olketa meeting. Hem naes for lukim, long olketa ples wea no eni Witness stap, 50-fala pablisa attendim meeting for praisem Jehovah.
Wei wea olketa long nara kantri willing for kam long datfala spesol preaching waka muvim evriwan. Long taem bilong hot season, temperature long Bulgaria savve kasem winim 40 degrees Celsius. Nomata olsem, no eni samting savve stopem olketa faithful brata and sista hia. Long first thrifala week nomoa, olketa finisim nao taon bilong Silistra long Danube River wea 50,000 pipol stap long hem. From datwan, olketa go moa long olketa vilij wea stap klosap, and gogo olketa kasem tu Tutrakan, wea stap 55 kilometer long west bilong Silistra. Olketa savve start preach long 9:30 long morning. Bihaen lunch, samfala taem olketa savve gohed preach go kasem 7:00 p.m. or winim datfala taem. From olketa barava strong for preach, olketa wea duim spesol waka long Kanzanlak and Sandanski duim sem samting tu, olketa preach go kasem olketa vilij and taon wea stap klosap.
Wanem Gud Samting Nao Olketa Kasem?
Long datfala sevenfala week, olketa barava duim nambawan preaching waka. Olsem long taem bilong olketa aposol, pipol long olketa taon hia sei, ‘Evriwan long taon bilong mifala herem teaching bilong iufala nao.’ (Acts 5:28) Olketa wea duim datfala spesol waka offerim 50,000 magasin and startim 482 Bible study. Hapi samting nao, wanfala kongregeson hem start long Silistra long September 1, 2009, and samfala grup tu kamap long Kazanlak and Sandanski. Hem barava naes for lukim olketa wea firstaem bilong olketa for herem gud nius gohed gud long spiritual wei.
Long firstfala week long datfala spesol waka, wanfala spesol pioneer sista wea savve long languis bilong Bulgaria wea kam from Spain, preach long Karina wanfala woman from Silistra wea salem niuspepa long saed road. Karina interest and go long meeting. Hem laek for studyim Bible. Hasband bilong hem no biliv long God, so Karina laek for olketa duim study long park. Tufala gele bilong hem tu joinim study. Big gele bilong hem Daniela, showimaot hem barava tinghae long tru samting wea hem lanem from Bible. Insaed wanfala week nomoa, hem readim Wanem Bible Teachim buk and followim wanem Bible talem abaotem wei for no iusim image long worship. Then hem start for storyim tru samting hem lanem long olketa fren bilong hem. Bihaen hem study for thrifala week and attendim firstfala meeting, hem sei long datfala sista: “Mi feel olsem mi wanfala long iufala nao. Wanem nao mi mas duim mekem mi savve preach?” Daniela witim mami and smol sista bilong hem gohed gud long spiritual wei.
Long Kazanlak, Orlin wanfala brata from Bulgaria wea kam from Italy for joinim datfala spesol waka, wakabaot go bak long ples wea hem stap bihaen long field service. Hem preach long tufala young man wea sidaon long park. Hem offerim Wanem Bible Teachim buk, and markem taem for visitim tufala long next day. Taem Orlin go bak, hem startim study witim Svetomir and tufala gohed study moa long nara day. Insaed naenfala day, Orlin study witim Svetomir eitfala taem. Svetomir sei: “Tufala day bifor mi meetim iu, mi prea long God for helpem mi for savve long hem. And mi promis, sapos hem helpem mi, bae mi dedicatem laef bilong mi long hem.” Bihaen Orlin go bak long Italy, olketa brata long Bulgaria gohed study witim Svetomir, and hem disaed strong for worshipim Jehovah.
Olketa wea Willing Kasem Staka Blessing
Hao nao feeling bilong olketa wea willing for iusim holiday and selen bilong olketa for go long nara kantri for preachim gud nius? Wanfala elder wea serve long Spain sei olsem: “Datfala spesol waka mekem olketa brata and sista wea story long languis long Bulgaria wea stap long Spain for savve gud long each other. Datfala spesol waka barava helpem olketa brata and sista.” Wanfala hasband and waef sei: “Mitufala barava enjoyim datfala month!” Tufala sei tu: “Datfala spesol waka barava changem tingting bilong mitufala abaotem laef!” Tufala ting for duim samfala samting mekem tufala go stap long Bulgaria, wea needim samfala pablisa moa for preach. Carina hem wanfala singol regular pioneer sista from Spain wea sapotim spesol waka long Silistra. Bihaen datwan, hem finis from waka wea hem duim long Spain and muv go long Bulgaria for helpem datfala niu kongregeson long Silistra. Hem garem inaf selen for stap long Bulgaria for wanfala year. Carina sei olsem abaotem wanem hem disaedem: “Mi barava hapi Jehovah hem letem mi for stap long Bulgaria, and mi hope mi savve gohed stap long hia. Mi garem faevfala Bible study, and thrifala nao kam long olketa meeting.”
Wanfala sista from Italy laek tumas for joinim datfala spesol waka, bat from hem just garem waka, hem no garem eni holiday. Nomata olsem, hem askem boss for no peim hem for wanfala month and sapos boss no letem, hem willing for finis from datfala waka. Bat hem sapraes taem boss sei: “Hem olraet, bat wanfala samting nomoa: Mi laek for iu sendem kam wanfala postcard from Bulgaria.” Datfala sista savve Jehovah herem olketa prea bilong hem.
Stanislava, wanfala young sista from Varna, wanfala taon long Bulgaria garem wanfala gud waka, hem iusim holiday bilong hem for joinim datfala spesol waka long Silistra. Taem hem lukim olketa pioneer wea kam from olketa nara kantri hapi for preachim gud nius long ples bilong hem, datwan mekem hem laek for krae. Hem start for ting raonem laef bilong hem and waka wea hem duim for kasem selen. Taem hem go bak hom bihaen tufala week, hem finis from waka bilong hem and kamap regular pioneer. Distaem hem barava hapi for tingim Creator bilong hem taem hem young.—Eccl. 12:1.
Hem nambawan blessing for gohed worshipim Jehovah. No eni samting hem gud winim wanem iu duim for iusim taem and strong bilong iu for duim disfala important waka for teach and preachim gud nius. Waswe, eni wei stap wea iuseleva savve tingim mekem iu savve duim moa samting long disfala waka for sevem laef? Maet samfala ples stap long kantri bilong iu wea needim samfala pablisa moa for preach. Waswe, iu savve go stap long olketa ples olsem? Or maet iu savve lanem nara languis for helpem pipol long kantri bilong iu wea barava laek for savve long tru samting abaotem Bible. Iu savve Jehovah bae barava blessim iu long eni change wea iu bae mekem long laef for duim moa samting long ministry.—Prov. 10:22.
[Box long page 32]
Wanfala Spesol Day
Staka from olketa nara kantri long Europe wea kam for sapotim datfala spesol preaching waka long Bulgaria plan for attendim datfala “Gohed for Lukaot!” Distrik Convention long Sofia. Olketa brata and sista long Bulgaria kasem encouragement from olketa brata and sista long nara kantri wea kam. Taem Brata Geoffrey Jackson bilong Governing Body releasem full Bible, New World Translation of the Holy Scriptures long languis long Bulgaria, 2,039 wea hipap barava hapi tumas! Evriwan wea hipap long datfala Friday, barava tinghae and klap for longfala taem for showimaot olketa barava laekem. Staka krae bikos olketa hapi. Disfala stret transleison wea isi for minim, bae helpem olketa long Bulgaria wea hambol for savve long Jehovah.
[Map long page 30, 31]
(For fully formatted text, see publication)
BULGARIA
SOFIA
Sandanski
Silistra
Kazanlak
[Piksa long page 31]
Long sevenfala week hia, olketa barava duim nambawan preaching waka