Mi Gohed Busy for Duim Waka Insaed Organization Bilong Jehovah

STORY BILONG VERNON ZUBKO

MI BIG kam long wanfala farm klosap long Stenen, wanfala vilij long Saskatchewan province, long Canada. Dadi and mami bilong mi, Fred and Adella, waka hard for teachim sista bilong mi, Aurellia, mi, brata bilong mi Alvin, nara sista bilong mi, Allegra, and nara brata bilong mi Daryl abaotem Jehovah and for provaedem wanem mifala needim. Kam kasem distaem mifala barava hapi tumas dadi and mami teachim truth long mifala.

Dadi bilong mi hem wanfala anointed Christian, and hem no fraet for talemaot gud nius. Hem waka hard for kasem selen, and evriwan savve hem Witness. Evritaem hem story abaotem truth. Mi no forgetim gudfala example bilong hem for gohed strong and no fraet. Hem evritaem talem mi, “Gohed busy for duim waka insaed long organization bilong Jehovah and bae iu no kasem staka problem.”

Mifala savve duim street witnessing evritaem long Stenen and long olketa nara ples klosap. Samfala taem hem no isi for mi duim datwan. Long olketa taon hia, hem garem olketa raf pikinini wea savve kam long mifala olketa young wan and tok spoelem mifala. Wantaem, mi standap long wanfala kona and holem olketa Wastaoa and Awake! magasin. Mi eit year nomoa and samfala boy kam raonem mi. Olketa aotem niu hat bilong mi and putim long post wea mi standap saed long hem. Mi hapi tumas taem wanfala olo brata wea duim street witnessing lukim samting wea happen. Hem kam and askem mi, “Vern, hao eniting rong?” Kwiktaem nomoa olketa boy hia go nao. Nomata samting wea kasem mi mekem mi feel nogud, mi lanem leson hao taem mi duim street witnessing, mi shud no standap long wanfala ples olsem post. Training wea mi kasem taem mi young mekem mi no fraet for preach long haos tu haos.

Mitufala Alvin baptaes long May 1951 and mi 13 year. Mi tingim yet samting wea Brata Jack Nathan talem taem hem givim baptism tok.a Hem talem mifala for no missim eni month for story abaotem Jehovah. Long famili bilong mi, wei for pioneer nao hem best samting for duim. So long 1958, bihaen mi finis skul, mi muv go for pioneer long Winnipeg, Manitoba. Nomata Dadi hapi nomoa for mi waka witim hem long famili bisnis olsem lumber planer (for sheipim timba and mekem smooth and luk naes), hem and Mami encouragem mi for duim full-taem ministry and hapi taem mi muv go long Winnipeg for pioneer.

Niu Ples and Wanfala Partner

Long 1959, bigfala need kamap long Quebec, and branch office invaetem eniwan wea fit for go preach long there. Mi go pioneer long Montreal. Evri samting hem barava difren, bikos mi mas lane for story long French languis and getius long difren kastom! Circuit overseer talem mi, “Iu mas no sei, ‘Long hom mifala savve duim olsem.’ ” Datwan hem gudfala advaes.​—⁠1 Cor. 9:​22, 23.

Taem mi muv go long Quebec mi no garem eni pioneer partner. Bat gogo Shirley Turcotte, wanfala young sista wea mi meetim bifor long Winnipeg nao kamap partner bilong mi taem mitufala marit long February 1961. Famili bilong hem tu lovem Jehovah. Long datfala taem mi no luksavve waef bilong mi bae barava strongim and encouragem mi long olketa year bihaen.

Preach Long Gaspé Peninsula

Tufala year bihaen mitufala marit, mitufala kamap spesol pioneer long Rimouski, Quebec. Long year bihaen, branch office askem mitufala for preach long Gaspé Peninsula, wea stap long east Canada. Assignment bilong mitufala hem for plantim staka seed bilong truth. (Eccl. 11:⁠6) Mitufala tekem winim 1,000 magasin and samting olsem 400 buk, witim samfala kaikai and kaleko insaed car taem mitufala go raon for preach for wanfala month. Mitufala preach long evri smol vilij long Gaspé Peninsula. Radio station long there warnim pipol olketa Witness bae kam for preach and talem olketa for no acceptim eni buk bilong iumi. Bat staka wea stap long there no herem gud datfala announcement and olketa tingse hem advertisement abaotem olketa buk bilong iumi, so olketa tekem olketa buk hia.

Long samfala ples long Quebec, police savve stopem olketa brata wea preach bikos preaching waka hem just start long datfala ples. Datwan happen long wanfala taon wea mifala preach long hem, wea klosap evri haos mifala givimaot olketa buk. Wanfala policeman askem mitufala for go witim hem long police station, so mitufala go. Mi faendemaot lawyer long datfala taon nao givim order for stopem mifala for no preach. From bigman bilong police no stap, mi showim datfala lawyer wanfala leta from branch office long Toronto wea story abaotem raet bilong iumi for preach. Bihaen hem readim datfala leta, lawyer hia kwiktaem sei: “Mi no laek for kosim eni problem. Priest nao talem mi for stopem iufala.” From mifala laekem pipol long territory for luksavve hao waka bilong iumi olketa no stopem, mifala kwiktaem go bak long ples wea police stopem mifala firstaem and gohed for preach long there.

Long next day, taem mifala go bak for lukim bigman bilong police, hem feel nogud for herem olketa stopem mifala for no preach. Hem barava kros taem hem story witim datfala lawyer long telephone! Bigman bilong police talem sapos mifala garem eni problem, mifala shud ringim hem and hem nao bae deal witim datwan. Nomata mitufala niu long datfala ples and mitufala no savve gud long French languis, pipol long there barava kaen and welkamim mitufala. Bat samfala taem mitufala savve ting olsem, ‘Waswe, bae olketa savve long truth tu?’ Mitufala kasem ansa taem mitufala go bak long Gaspé Peninsula long olketa year bihaen for buildim olketa Kingdom Hall. Mitufala lukim staka wea mitufala preach long olketa, kamap olketa brata and sista. Tru tumas, Jehovah nao mekem seed for grow.​—⁠1 Cor. 3:​6, 7.

Mifala Kasem Wanfala Blessing

Dota bilong mitufala, Lisa, hem born long 1970. Diswan hem wanfala blessing from Jehovah wea mekem mitufala hapi tumas. Shirley and Lisa waka witim mi long staka Kingdom Hall construction. Bihaen Lisa finis skul, hem sei: “Dadi and Mami, bae mi pioneer, from mi nao mekem iutufala for no gohed long full-taem service.” Winim 20 year bihaen, Lisa gohed yet for duim pioneer waka, bat distaem witim hasband bilong hem Sylvain. Tufala kasem privilege for waka tugeta long samfala international construction project. Goal bilong mifala long famili, hem for mekem laef bilong mifala simpol and willing for duim eni waka for Jehovah. Mi nating forgetim wanem Lisa talem taem hem start for pioneer. Samting wea Lisa talem strongim mi for duim moa full-taem ministry long 2001, and kam kasem distaem mi gohed for pioneer. Wei for duim pioneer waka teachim mi for trustim Jehovah long evri samting wea mi duim and for garem simpol laef wea mekem mi satisfae and hapi.

For Waka Long Construction Man Mas Faithful and Garem Love

Jehovah teachim mi sapos iumi willing for duim eni waka and assignment wea hem givim, bae iumi kasem staka blessing. Hem wanfala privilege for waka long Regional Building Komiti and long olketa construction project witim olketa brata and sista long Quebec and long olketa nara ples.

Nomata maet samfala volunteer no savve givim olketa nambawan tok long Kingdom Hall, waka wea olketa duim long Kingdom Hall construction hem barava nambawan. Olketa brata hia duim gudfala waka, wea showimaot olketa garem savve for duim datwan. Gud samting wea kamaot from datwan hem olketa naesfala building for iusim for worshipim Jehovah.

Samfala askem mi, “Wanem important fasin nao wanfala brata or sista mas garem for waka long Kingdom Hall construction?” From wanem miseleva savve, man mas firstaem lovem Jehovah and Son bilong hem, and olketa brata and sista. (1 Cor. 16:14) Mek-tu samting, man mas faithful nomata samfala samting no followim hao hem laekem. Taem samting olsem happen, man wea faithful bae followim wanem organization disaedem. Wei for faithful bae helpem hem for volunteer long olketa nara project wea bae kamap.

Thankiu Long Jehovah

Nomata dadi bilong mi hem dae long 1985, mi nating forgetim advaes wea hem talem for mi mas gohed busy for duim waka insaed organization bilong Jehovah. Dadi tu hem barava busy distaem olsem olketa narawan wea kasem assignment for duim waka long organization bilong Jehovah long heven. (Rev. 14:13) Distaem mami bilong mi hem 97 year and bikos hem garem stroke, hem no savve toktok gud. Nomata olsem, hem no forgetim wanem hem lanem long Bible. Hem savve storyim olketa scripture insaed leta wea hem raetem and encouragem mifala for gohed faithful long Jehovah. Mifala evri pikinini hapi tumas for garem dadi and mami wea barava lovem mifala!

Mi barava thankiu tu long Jehovah for givim mi Shirley, wanfala faithful waef and partner. Shirley evritaem tingim disfala advaes wea mami bilong hem talem: “Vern bae gohed busy long truth, and iu mas lane for sapotim hem taem hem helpem olketa narawan.” Mitufala marit for 49 year finis and long datfala taem mitufala plan for nomata mitufala olo, mitufala bae gohed for worshipim Jehovah. Sapos mitufala laef yet taem disfala world hem finis, bae mitufala kamap young tugeta and gohed for worshipim Jehovah for olowe. Tru tumas, mitufala barava “busy long waka bilong Lord.” (1 Cor. 15:58) Jehovah barava lukaftarem mitufala and evritaem mekem mitufala kasem gud samting.

[Footnotes]

[Piksa long page 31]

“Goal bilong mifala long famili, hem for mekem laef bilong mifala simpol and willing for duim eni waka for Jehovah”