Nambawan Blessing From Man Showim Interest lo Narawan

Dadi hem wanfala elder lo United Church blo Canada, so evri week hem sendem mi and sista blo mi go lo Sunday skul, then afta, mitufala joinim hem for 11:00 a.m. church service. Lo aftanun, mitufala go witim mami lo Kingdom Hall. Hem isi tumas for lukim hao tufala religion hia barava difren.

Mami storyim truth lo tufala best fren blo hem Bob and Marion Hutcheson, and tufala tu acceptim truth. Lo 1958, famili blo Hutcheson wea garem thrifala boy tekem mi for attendim eit-day Divine Will International Assembly lo New York City. Taem mi ting go bak lo datfala taem, mi luksavve hem no isi samting for olketa tekem mi witim olketa, bat hem wanfala assembly wea mi hard for forgetim.

GUD SAMTING FROM OLKETA NARAWAN SHOWIM INTEREST LO MI

Taem mi teenager, mifala stap lo farm and mi laek for lukaftarem olketa animal. So mi ting for kamap doctor blo animal. Mami storyim datwan lo wanfala elder lo kongregeson. Elder hia remindim mi hao iumi stap lo “olketa last day” and hem ask if mi go lo university for samfala year, hao nao datwan bae affectim frenship blo mi witim Jehovah. (2 Tim. 3:1) So mi disaed for no go lo university.

Mi ting, wat nao bae mi duim afta mi graduate from hae skul. Evri weekend mi go preaching, bat mi nating enjoyim ministry and mi no ting bae mi fit for pioneer. Lo datfala taem tu, dadi blo mi wea no Witness and uncle blo mi, encouragem mi for waka full taem lo wanfala big insurance company lo Toronto. Uncle hia garem hae position lo datfala company, so mi acceptim datfala job.

Taem mi lo Toronto, staka taem mi waka ovataem and associate witim pipol wea no Jehovah’s Witness and datwan affectim spiritual schedule blo mi. Firstaem mi stap witim grandadi blo mi wea no Witness, bat afta hem dae mi mas lukaotem nara ples for stap.

Bob and Marion Hutcheson, wea tekem mi lo 1958 convention, tufala olsem parents blo mi. Tufala invaetem mi for stap witim olketa and helpem mi lo spiritual wei. Lo 1960, mi and son blo tufala John, mitufala baptaes. John start for pioneer, datwan encouragem mi for duim moa samting lo ministry. Olketa brata lo kongregeson lukim mi gohed gud lo spiritual wei, and gogo olketa appointim mi for Theocratic Ministry Skul servant.a

MARITIM NAES SISTA AND MI KAMAP PIONEER

Lo 1966, mi maritim Randi Berge, wanfala strong pioneer wea laekem tumas for serve lo ples wea garem need. Traveling overseer blo mifala showim interest lo mitufala, and encouragem mitufala for helpem kongregeson lo Orillia, Ontario. So stretawe mitufala muv go lo there.

No longtaem bihaen mitufala kasem Orillia, mi tu start regular pioneer witim Randi. From Randi enjoyim pioneering blo hem, datwan mekem mi laek joinim hem tu! Taem mi pioneer witim full heart, mi experiencem hapi wea kamap taem man iusim Bible and lukim pipol minim truth. Hem wanfala blessing for mitufala helpem wanfala couple lo Orillia for changem laef blo tufala and worshipim Jehovah.

LANEM NIU LANGUIS AND ADJUSTIM TINGTING

Wantaem mitufala go lo Toronto, mi meetim Arnold MacNamara, wanfala lo olketa brata wea garem big responsibility lo Bethel. Hem ask if mitufala willing for spesol pioneer. Stretawe mi sei: “Yes! Bat no lo Quebec!” Mi hol bak for go lo there bikos tingting blo pipol lo Canada wea story lo English hem affectim tingting blo mi abaotem pipol lo province blo Quebec wea story lo French languis. Lo datfala taem, pipol lo Quebec protest againstim gavman and laekem province lo Quebec for independence.

Arnold sei, “Distaem Quebec nao only ples wea branch savve sendem olketa spesol pioneer lo hem.” Stretawe mi agree for go. Mi savve finis Randi hem interest for serve lo there. Bihaen, mi luksavve datwan hem best disison wea mitufala mekem!

Afta mitufala lanem French languis for faevfala week, mitufala Randi and nara couple muv go lo Rimouski, wea hem samting olsem 540 kilometer (336 mi) north east lo Montreal. Mifala no savve gud yet lo datfala languis, so taem mi readim wanfala announcement lo meeting abaotem convention wea klosap for kamap, mi sei staka “ostrich delegate” nao bae kam, instead for sei “Austrian delegate.”

Lo Rimouski, Brata and Sista Huberdeau witim tufala dota blo tufala, and nara fofala singol sista kam joinim mifala fofala. Brata and Sista Huberdeau rentim haos wea garem sevenfala bed rum, and evri pioneer wea stap insaed help for peim rent. Mifala kolem lo White Haos bikos datfala haos and olketa post blo hem white. Samtaem 12 tu 14 pipol nao savve stap lo there. From mitufala spesol pioneer, mi and Randi savve go preach lo morning, aftanun, and evening, so mitufala hapi bikos olketa narawan savve go witim mitufala, nomata lo olketa evening wea kol tumas.

Mifala fren gud witim olketa faithful pioneer hia and mifala olsem famili. Samfala taem mifala sidaon raonem campfire or mifala garem wanfala day wea mifala kolem lo “pierogi day.” Lo datfala day, mifala evriwan kukim wanfala kaikai wea olketa kolem lo dumpling. Wanfala brata hem musician, so lo olketa Saturday naet, staka taem mifala singsing and dance.

Staka pipol lo Rimousk interest lo truth! Insaed faev year nomoa, mifala hapi for lukim samfala Bible study olketa baptaes and kongregeson garem samting olsem 35 pablisa.

Laef lo Quebec hem trainim mifala for kamap gud evangelizer. Mifala lukim hao Jehovah helpem mifala lo ministry and provaedem material need blo mifala. And tu, mifala lane for lovem pipol wea story lo French languis and culture blo olketa tu, datwan helpem mifala for lovem pipol from olketa difren culture.​—2 Cor. 6:13.

Bat seknomoa branch askem mitufala for muv lo Tracadie, lo eastern shore lo New Brunswick. Hem no isi bikos mifala just saenem contract for rentim wanfala apartment, and mi saenem contract for part-taem teacher lo wanfala skul. And tu, samfala Bible study blo mifala just kamap anbaptaes pablisa and mifala midol lo project for buildim wanfala Kingdom Hall.

Mitufala prea abaotem datwan lo full weekend and go visitim Tracadie, wea barava difren from Rimouski. Bat mifala sure from Jehovah sendem mifala, mifala mas go. Mitufala testim if Jehovah bae helpem mitufala, and yes hem aotem evriting wea mitufala tingse bae blokem mitufala. (Mal. 3:10) Samting wea mekem hem isi for mitufala muv go lo Tracadie, hem bikos Randi garem strong frenship witim Jehovah, hem no tingim hemseleva, and hem garem positive tingting.

Robert Ross nomoa hem elder lo datfala kongregeson. Hem bin pioneer witim waef blo hem Linda lo there, and tufala disaed for gohed stap afta first pikinini blo tufala hem born. Nomata tufala mas lukaftarem smol boy blo tufala, tufala kaen and strong lo ministry, and datwan barava encouragem mitufala.

HAPI FOR SERVE LO ENI PLES WEA NEEDIM HELP

Bihaen mitufala pioneer lo Tracadie for tu years, mitufala kasem nara assignment wea mitufala no expectim. Olketa invaetem mitufala for duim circuit waka. Mifala duim circuit waka lo English languis for seven years, then bihaen mifala duim circuit waka lo French languis lo Quebec. Distrik overseer lo Quebec, Léonce Crépeault, hem savve encouragem mi taem mi givim olketa tok. Bat evritaem bihaen tok hem savve ask olsem, “Hao nao iu savve mekem tok for fitim audience?”b From hem interest for helpem mi, datwan mekem mi kamap gud lo wei for teach and givim olketa tok wea pipol isi for minim.

Wanfala assignment wea mi no savve forgetim, hem lo 1978 “Victorious Faith” International Convention lo Montreal. Mi waka lo Food Service. Mifala expectim 80,000 pipol, and wanfala niu arrangement for kaikai hem just start. Mifala garem niu equipment, difren menu, and hao for preparem kaikai hem difren tu. Mifala garem samting olsem 20-fala big refrigerated trailer, and samfala taem olketa no waka gud. Bifor first day blo convention, mifala no fit for go set up lo stadium go kasem midolnaet bikos wanfala sports event kamap lo there. Bat mifala need for redyim evri samting bifor evriwan kam for breakfast lo morning! Mifala taed, bat mi lanem staka samting from olketa nara brata and sista wea mifala waka tugeta from olketa waka hard, mature, and savve mekfani. Mifala barava fren gud tugeta and frenship blo mifala strong kasem distaem. Mi barava hapi for tekpart lo datfala important convention lo theocratic history blo Quebec, bikos lo 1940’s and 1950’s datfala province kasem big persecution!

Mi lanem staka samting from olketa nara overseer taem mifala waka tugeta lo olketa big convention lo Montreal. Lo wanfala year, David Splane, wea distaem hem serve lo Governing Body, hem overseer blo convention office. Then lo nara convention wea kamap bihaen, taem mi kasem datfala assignment, David barava sapotim mi.

Kasem 2011, mitufala Randi serve lo circuit waka for 36 years. Then mi kasem assignment for instructor lo Skul for Olketa Elder. Insaed tufala year mitufala sleep lo 75-fala difren bed, nomata olsem mitufala hapi for mekem sakrifaes for duim datfala waka. Evritaem mifala kasem end lo week blo skul, olketa elder savve hapi tumas bikos olketa lukim hao Governing Body barava kea abaotem spiritual saed blo olketa elder.

Bihaen, mi teach tu lo Skul for Olketa Kingdom Evangelizer. Staka taem olketa student savve taed fogud bikos lo busy schedule blo olketa. Olketa sidaon lo class for sevenfala hour evriday, duim homework for thrifala hour evri evening, and duim fofala or faevfala assignment each week. Mi and nara instructor explainim lo olketa dat hard for olketa duim evri samting hia if Jehovah no helpem olketa. Mi no savve forgetim hao olketa student savve sapraes taem olketa luksavve hao taem olketa depend lo Jehovah, olketa savve duim staka samting wea olketa tingse hem hard.

NAMBAWAN BLESSING FROM MAN SHOWIM INTEREST LO NARAWAN

From mami showim interest lo olketa Bible study blo hem, datwan helpem olketa for baptaes and hem even helpem dadi tu for changem tingting blo hem abaotem truth. Thrifala day bihaen mami dae, mifala sapraes for lukim dadi kam lo wanfala pablik tok lo Kingdom Hall, and for 26 years hem gohed for attendim olketa meeting. Nomata dadi no baptaes, olketa elder lo kongregeson talem mi hao lo evri meeting, hem nao first wan for arrive.

Nambawan example wea mami showim hem helpem mifala olketa pikinini. Thrifala sista blo mi and olketa hasband blo olketa gohed faithful for servem Jehovah. Tufala lo olketa sista blo mi waka lo Bethel, wanfala lo Portugal branch and narawan lo Haiti branch.

Distaem mi and Randi spesol pioneer lo Hamilton, Ontario. Taem mitufala duim circuit waka, mitufala hapi for go witim olketa narawan lo return visit and Bible study blo olketa. Bat distaem mitufala garem olketa own Bible study and hapi for lukim olketa gohed lovem Jehovah. And taem mitufala fren gud witim olketa brata and sista lo kongregeson and lukim hao Jehovah sapotim olketa lo olketa gud taem and hard taem, datwan barava encouragem mitufala.

Taem mi ting bak, mitufala barava appreciatim hao olketa narawan showim interest lo mifala. From datwan, mitufala tu trae for showimaot mitufala “barava tingim” narawan, and encouragem olketa for duim best blo olketa for servem Jehovah. (2 Cor. 7:6, 7) For example, lo wanfala famili waef, son, and dota olketa pioneer. So mi askem hasband if hem tu tingting for pioneer. Hem sei hem bae sapotim nomoa thrifala hia wea pioneer. So mi askem hem, “Hao sapot wea iu givim hem winim hao Jehovah savve sapotim olketa?” Mi encouragem hem for joinim olketa mekem hem tu savve enjoyim datfala waka. Insaed six month hem kamap pioneer.

Mi and Randi bae gohed for talem “next genereson” abaotem olketa “nambawan waka” blo Jehovah, and mifala hope olketa tu bae enjoyim staka samting insaed service blo Jehovah olsem mitufala.​—Ps. 71:17, 18.