Iufala Young Wan, Wanem Nao Bae Iu Duim Long Laef Bilong Iu?

“Mi no ranran nating nomoa, and mi no hit olobaot tu.”​—⁠1 COR. 9:​26.

1, 2. Sapos iu laek kasem gud samting taem iu big, wanem nao iu need for garem?

SAPOS iu plan for go long ples wea iu no go long hem bifor, hem gud for tekem map and go witim man wea savve long datfala ples. Datfala map bae helpem iu for savve wea nao iu stap and wea nao for go. Man wea savve long datfala ples bae leadim iu long stretfala road. Bat datfala map and man wea savve long datfala ples bae no helpem iu sapos iu no savve wea nao iu laek for go. So for mekem iu no go olobaot, iu mas savve wea nao iu laek for go.

² Iu kasem semkaen samting taem iu start for big. Iu garem wanfala map and samting for leadim iu. Bible nao map wea savve helpem iu chusim stretfala samting. (Prov. 3:​5, 6) Konsens bilong iu savve helpem iu for followim stretfala wei sapos iu trainim gud. (Rom. 2:​15) Bat sapos iu laek kasem gud samting long laef, iu mas savve tu wanem nao iu laek for duim. Iu need for garem olketa goal.

3. Olsem Paul storyim long 1 Corinthians 9:​26, wanem nao olketa gud samting wea iu bae kasem sapos iu garem olketa goal?

³ Aposol Paul storyim olketa gud samting wea iu bae kasem sapos iu garem olketa goal and trae hard for kasem olketa. Hem sei: “Mi no ranran nating nomoa, and mi no hit olobaot tu.” (1 Cor. 9:​26) Sapos iu garem olketa goal, datwan bae helpem iu for savve wanem for duim. Long future iu mas disaedem olketa important samting saed long worship, waka, marit, and famili. Maet samfala taem iu konfius bikos staka samting stap wea iu savve chus for duim. Bat sapos iu garem olketa goal and disaedem samting followim olketa tru samting and olketa principle long Bible, iu bae no chusim nogud samting.​—⁠2 Tim. 4:​4, 5.

4, 5. (a) Wanem nao savve happen sapos iu no garem olketa goal? (b) Why nao iu shud chus for duim olketa samting wea God hapi long hem?

⁴ Sapos iu no garem olketa goal, olketa skulfren and teacher nao bae talem iu wanem olketa tingse hem stret for iu duim. And nomata iu garem olketa goal, maet samfala pipol talemaot tingting bilong olketa. Taem iu herem wanem olketa talem, tingim diswan: ‘Waswe, bae olketa goal wea olketa talem helpem mi for tingim God taem mi young or bae hem mekem mi for duim difren samting?’​—⁠Readim Ecclesiastes 12:⁠1.

⁵ Why nao iu shud chus for duim olketa samting wea God hapi long hem? Wanfala reason hem bikos Jehovah givim evri gud samting wea iumi garem. (Jas. 1:​17) Iumi evriwan shud tinghae long Jehovah. (Rev. 4:​11) Hem gud tumas for tingim wanem Jehovah laekem taem iu markem olketa goal! Datwan showimaot iu tinghae long hem. Bae iumi storyim olketa gudfala goal wea iu savve garem and wanem iu mas duim for kasem olketa.

Iu Savve Garem Olketa Wanem Goal?

6. Wanem important goal nao iu savve garem, and why nao olsem?

⁶ Olsem iumi storyim long study bifor, important goal wea iu savve garem hem for pruvim long iuseleva wanem Bible talem hem tru. (Rom. 12:2; 2 Cor. 13:⁠5) Maet olketa skulfren bilivim teaching abaotem evolution or olketa false teaching bilong religion bikos narawan nao talem olketa for bilivim datwan. Bat iu no need for bilivim samting bikos narawan nao talem iu for bilivim datwan. Jehovah laekem iu for iusim evri savve bilong iu taem iu worshipim hem. (Readim Matthew 22:​36, 37.) Hem laekem iu for garem faith long tru samting long Bible.​—⁠Heb. 11:⁠1.

7, 8. (a) Wanem nao samfala goal wea iu savve garem distaem for strongim faith bilong iu? (b) Taem iu kasem samfala goal olsem, bae iu feel hao?

⁷ For strongim faith bilong iu, hem gud for markem samfala goal wea iu savve kasem distaem! Maet wanfala goal hem for prea evriday. Iu savve raetem or tingim olketa samting wea happen long datfala day, mekem taem iu prea iu no talem olketa sem toktok evritaem. No prea nomoa abaotem olketa hard samting wea iu kasem bat prea tu abaotem olketa samting wea iu enjoyim. (Phil. 4:⁠6) Nara goal hem for readim Bible evriday. Iu savve, sapos iu readim fofala page long Bible evriday, bae iu readim full Bible insaed wan year!a Psalm 1:​1, 2 sei: “Hapi nao man wea . . . laekem tumas law bilong Jehovah, and hem read smol long law bilong hem day and naet.”

⁸ Nara goal wea iu savve garem hem for redyim ansa for each kongregeson meeting. Maet firstaem iu savve readim ansa from paragraf or wanfala scripture. Then gogo iu savve givim ansa long toktok bilong iuseleva. Evritaem iu givim ansa, hem olsem iu givim present long Jehovah. (Heb. 13:15) Taem iu kasem olketa goal hia, bae iu feel olsem iu fit for duim samfala samting moa, bae iu tinghae long Jehovah, and laek garem olketa bigfala goal.

9. Sapos iu no pablisa yet, wanem nao olketa bigfala goal wea iu savve garem?

⁹ Wanem nao olketa bigfala goal wea iu savve garem? Sapos iu no pablisa yet, maet goal bilong iu hem for kamap pablisa. Taem iu kasem datfala goal, hem bae mekem iu laek for preach evri month and no missim eni month for duim datfala waka. Hem gud tu for iu lane for iusim Bible long ministry. Datwan bae mekem iu enjoyim preaching waka. Iu savve iusim samfala taem moa for preach long haos tu haos and trae for garem Bible study. Taem iu anbaptaes pablisa, nambawan goal wea iu savve garem hem for dedicate and baptaes!

10, 11. Wanem nao olketa bigfala goal wea olketa young wan wea baptaes finis savve garem?

¹⁰ Sapos iu baptaes finis, samfala big goal stap wea iu savve kasem. Maet samfala taem iu savve preach witim olketa kongregeson long farawe territory. Maet iu savve chus for auxiliary or regular pioneer. Staka pioneer bae talem full-taem service hem nambawan samting for duim taem iu young bikos hem savve helpem iu for tingim nambawan God wea wakem iu. Iu savve kasem olketa goal hia taem iu stap witim dadi and mami. Iu bae helpem kongregeson tu taem iu kasem olketa goal hia.

¹¹ Iu savve garem goal for helpem nara kongregeson. Olsem example, iu savve plan for go long nara ples or kantri wea garem bigfala need. Maet iu laek for waka long Kingdom Hall construction or branch construction. Maet iu savve waka long Bethel, spesol pioneer, or go long Ministerial Training Skul. Bat important goal wea iu mas kasem bifor iu savve garem olketa goal hia, hem nao for baptaes. Sapos iu no baptaes yet, ting raonem wanem nao iu savve duim for kasem datfala important goal.

Kasem Goal for Baptaes

12. Wanem nao mekem samfala for baptaes, bat why nao olketa reason hia no mas gud?

¹² Why nao iu tingse man mas baptaes? Samfala tingse sapos olketa baptaes datwan bae helpem olketa for no duim sin. Samfala tingse olketa shud baptaes bikos olketa fren duim datwan. And samfala young wan laek baptaes for mekem dadi and mami hapi. Bat baptism bae no stopem iu for duim rong samting wea iu laek for duim haed. And iu shud no baptaes bikos samwan talem iu for iu mas baptaes. Iu shud baptaes taem iu savve wanem hem minim for kamap wanfala Jehovah’s Witness and taem iu redi and willing for duim datwan.​—⁠Eccl. 5:​4, 5.

13. Why nao iu shud baptaes?

¹³ Wanfala reason why iu shud baptaes hem bikos Jesus talem olketa wea followim hem for ‘teachim pipol for kamap disaepol and baptaesim olketa.’ Jesus tu baptaes. (Readim Matthew 28:​19, 20; Mark 1:⁠9.) Baptism hem important samting sapos iumi laekem God for sevem iumi. Bihaen aposol Peter story abaotem ark wea Noah wakem mekem hem and famili bilong hem stap sef taem Flood kam, hem sei: “Samting wea olsem diswan wea sevem iufala tu hem nao for baptaes, . . . from Jesus Christ hem laef bak.” (1 Pet. 3:​20, 21) Datwan no minim iu baptaes bikos iu laekem God for sevem iu nomoa. Bat iu baptaes bikos iu lovem Jehovah and laek worshipim hem long full heart, soul, strong, and evri savve bilong iu.​—⁠Mark 12:​29, 30.

14. Wanem nao mekem samfala for no baptaes yet, bat wanem nao iu savve duim?

¹⁴ Samfala fraet for baptaes bikos olketa tingse nogud olketa duim rong samting and olketa disfellowship. Waswe, iu tu feel olsem? Sapos olsem, hem no rong for iu fraet. Hem showimaot iu luksavve long big responsibility wea iu garem taem iu kamap wanfala Jehovah’s Witness. Maet nara reason stap why iu no baptaes yet. Maet iu no barava sure olketa standard bilong God hem best samting for followim. Sapos olsem, tingim olketa nogud samting wea pipol kasem taem olketa no followim standard bilong God. Datwan savve helpem iu for disaed. Or maet iu tinghae long olketa standard bilong God bat maet iu wari nogud iu no savve followim. Datwan hem gud samting bikos hem showimaot iu hambol. Bible sei heart hem savve trikim man. (Jer. 17:⁠9) Bat iu savve duim wanem God laekem sapos iu evritaem ‘followim toktok bilong hem.’ (Readim Psalm 119:⁠9.) Nomata wanem reason nao mekem iu for no baptaes yet, iu need for duim samting abaotem datwan.b

15, 16. Hao nao bae iu savve sapos iu redi for baptaes?

¹⁵ Bat hao nao bae iu savve sapos iu redi for baptaes? Tingim olketa kwestin hia: ‘Waswe, mi savve explainim olketa main teaching long Bible? Waswe, mi savve go preaching nomata dadi and mami no go? Waswe, mi trae hard for go long evri meeting? Waswe, mi savve tingim enitaem wea mi winim hevi from olketa fren? Waswe, bae mi gohed for worshipim Jehovah sapos dadi and mami and olketa fren bilong mi stop for worshipim hem? Taem mi prea, waswe, mi talem Jehovah mi tinghae long wei wea mi fren witim hem? And waswe, mi prea long Jehovah for dedicatem laef bilong mi long hem?’

¹⁶ Taem man baptaes, datwan hem big samting and serious samting wea hem disaedem. Waswe, iu garem mature tingting for disaedem diswan? Man wea mature no minim hem savve givim olketa gudfala tok long meeting or olketa gudfala ansa nomoa. Hem mas savve hao for disaedem samting followim olketa Bible principle. (Readim Hebrews 5:​14.) Sapos iu tingse iu savve duim datwan, iu savve garem nambawan privilege for worshipim Jehovah long full heart bilong iu and duim olketa samting wea showimaot iu dedicate long hem.

17. Bihaen iu baptaes, hu nao bae helpem iu taem iu kasem olketa hard taem?

¹⁷ Bihaen iu baptaes, maet iu laek for duim staka samting for Jehovah. Bat no longtaem bihaen maet iu kasem olketa hard taem wea testim faith bilong iu and wei wea iu gohed strong. (2 Tim. 3:​12) No tingse no eniwan bae helpem iu taem iu kasem hard taem. Askem advaes from dadi and mami. Askem olketa mature brata and sista long kongregeson for helpem iu. Fren witim olketa wea bae helpem iu. No forgetim Jehovah hem tingim iu, and hem bae strongim iu taem iu kasem hard taem.​—⁠1 Pet. 5:​6, 7.

Wanem Nao Iu Savve Duim for Kasem Olketa Goal Bilong Iu?

18, 19. Wanem nao iu savve kasem sapos iu luksavve long samting wea important long iu?

¹⁸ Nomata iu laek for duim staka samting, waswe, iu feel olsem iu no garem inaf taem for duim wanem iu laekem and wanem iu need for duim? Sapos olsem, iu need for luksavve wanem nao important long iu. Tingim disfala tokpiksa: Tekem wanfala baket and putim samfala big ston insaed, and then fulimap baket witim sandbis. Bae iu lukim baket hia hem fulap gud witim olketa ston and sandbis. Then aotem olketa ston and sandbis from baket. Then fulimap baket witim sandbis and trae for putim olketa ston insaed long baket moa. Waswe, olketa ston hia savve fit insaed long baket? Nomoa. Why nao olsem? Hem bikos iu fulimap baket firstaem witim sandbis.

¹⁹ Wei for iusim taem hem olsem tu. Sapos hapitaem hem first samting long laef bilong iu, bae iu no garem inaf taem nao for duim olketa important samting for worshipim God. Bat sapos iu followim kaonsel long Bible for “luksavve long olketa samting wea barava important,” iu bae garem taem for worshipim God and for hapitaem tu.​—⁠Phil. 1:​10.

20. Taem iu trae for kasem olketa goal bilong iu, wanem nao iu shud duim sapos iu wari and daot?

²⁰ Taem iu trae for kasem goal for baptaes and olketa nara goal, maet samfala taem iu wari and daot. Sapos diswan happen, “torowem hevi bilong iu long Jehovah and hem nao bae strongim iu.” (Ps. 55:22) Iu garem chance distaem for duim important waka wea gohed long world, hem nao for preach long pipol and teachim olketa. (Acts 1:⁠8) Iu savve chus for duim datfala nambawan waka or letem narawan nao for duim. No hol bak for iusim savve bilong iu for worshipim God and for sapotim Kingdom. Iu bae hapi tumas for worshipim God “taem iu young.”​—⁠Eccl. 12:⁠1.

[Footnotes]

Wanem Nao Ansa Bilong Iu?

• Why nao iu shud garem olketa goal?

• Wanem nao samfala goal wea hem gud for kasem?

• Wanem nao iu savve duim for kasem goal for baptaes?

• Hao nao wei for luksavve long samting wea important long iu bae helpem iu for kasem olketa goal?

[Piksa long page 13]

Waswe, iu garem goal for readim Bible evriday?

[Piksa long page 15]

Wanem nao bae helpem iu for kasem goal for baptaes?

[Piksa long page 16]

Wanem nao iu lanem from disfala tokpiksa?