Hao for Kasem Olketa Spiritual Goal Bilong Iu
1. Plande young Christian garem olketa wanem spiritual goal?
1 From iu wanfala young Christian, for sure, wei wea iu lovem Jehovah, and tu, wei wea Jesus encouragem evri Christian for ‘aftarem firstaem kingdom,’ hem affectim olketa goal wea iu garem. (Matt. 6:33) Maet iu garem goal for duim moa samting long ministry olsem for kamap pioneer or for muv go long nara ples wea no garem inaf pablisa for preach abaotem Kingdom. Maet samfala ting for duim construction waka long nara kantri, serve long branch, or kamap missionary. Olketa goal hia nambawan and mekem man hapi!
2. Wanem nao savve helpem iu for kasem olketa spiritual goal bilong iu?
2 Wanfala samting wea savve helpem iu for kasem olketa spiritual goal hem for raetem list long olketa goal hia. Wastaoa bilong July 15, 2004, hem sei: ‘Wanfala idea savve kamap moa klia taem iu raetem long pepa. So hem gud sapos iu raetem olketa goal bilong iu long pepa and hao for kasem olketa.’ And tu, olketa nara smol goal wea bae helpem iu for isisi kasem main goal bilong iu long future bae helpem iu for lukim sapos iu still gohed for kasem and tingting strong long datfala main goal.
3. Talem samfala goal wea man savve kasem insaed shortfala taem wea savve helpem hem kamap fit for baptaes.
3 Olketa Goal for Kasem Insaed Shortfala Taem: Sapos iu no baptaes yet, ting raonem wanem iu need for duim mekem iu kasem datfala goal. Maet iu need for savve gud long olketa main teaching bilong Bible. Sapos olsem, garem goal for studyim gud Savvy buk, and readim evri scripture wea stap. (1 Tim. 4:15) Markem goal tu for readim full Bible from Genesis kasem Revelation, olsem olketa Bethelite and olketa student long Gilead mas duim. Bihaen iu finis for duim datwan, garem schedule for gohed readim Bible evriday. (Ps. 1:2, 3) Tingim wei wea datwan bae barava helpem iu for muv ahed long spiritual wei! Bifor iu readim Bible and study, prea from heart bilong iu long Jehovah, and evritaem trae for followim wanem iu lanem.—Jas. 1:25.
4. Christian wea garem goal for serve long Bethel or kamap spesol pioneer savve markem olketa wanem nara goal for kasem insaed shortfala taem wea bae helpem hem for kasem olketa main goal hia?
4 Sapos iu baptaes finis, olketa wanem goal nao iu trae for kasem? Waswe, iu need for kamap moabeta long hao for preach? Olsem example, waswe, iu trae for kamap moabeta long hao for iusim Bible long field ministry? (2 Tim. 2:15) Hao nao iu savve duim moa samting long ministry bilong iu? Markem olketa goal wea iu savve kasem insaed shortfala taem wea fitim age and living bilong iu and wea bae helpem iu for kasem olketa goal wea iu laek kasem long future.
5. Hao nao wei wea wanfala brata markem olketa goal for kasem insaed shortfala taem helpem hem for kasem goal for serve long Bethel?
5 Young Wan wea Kasem Goal Bilong Hem: Taem Tony wea 19 year visitim wanfala branch office bilong Olketa Jehovah’s Witness, samting wea hem lukim mekem hem laekem tumas for serve long Bethel. Bat, olketa wei bilong hem nogud, and hem no dedicate yet long God. Tony disaed for hem mas mekem Jehovah hapi and hem markem goal for hem kamap fit for baptaes. Bihaen hem kasem datfala goal, hem markem goal for auxiliary pioneer and then regular pioneer. Hem markem long kalenda olketa date wea hem laek for start. Tingim hapi bilong hem taem hem kasem invitation for serve long Bethel bihaen hem pioneer for samfala year!
6. Wanem nao savve helpem iu for kasem olketa spiritual goal bilong iu?
6 Iu tu savve kasem olketa spiritual goal taem iu mekem main samting long laef bilong iu hem for servem God. Talem “evri waka bilong iu” long Jehovah long prea and waka hard for kasem olketa.—Prov. 16:3; 21:5.