Strong for Sapotim Tru Worship
“Staka samting nao stap for harvestim, bat no staka wakaman stap for duim datwan.”—MATT. 9:37.
1. Sapos iu mas duim samting kwiktaem, datwan savve mekem iu feel hao?
SAPOS iu gogo for wanfala important appointment, bat iu leit, wanem nao bae iu duim? Iu bae wakabaot kwiktaem for kasem datfala ples! Sapos iu redi for go long nara island and iu herem horn bilong ship hem krae, wanem nao bae iu duim? Bae iu kwiktaem go insaed long ship! Tru tumas, taem iu duim samting kwiktaem, hem savve mekem iu wari, heart bilong iu for pampam, and laek hariap for duim datfala samting.
2. Wanem important waka nao olketa tru Christian mas duim?
2 Barava important waka wea olketa tru Christian mas duim distaem hem for preachim gud nius abaotem Kingdom and for teachim pipol long evri kantri for kamap disaepol. (Matt. 24:14; 28:19, 20) Jesus sei disfala waka mas happen “firstaem” bifor world hem finis. (Mark 13:10) Datwan hem fitim bikos Jesus sei: “Staka samting nao stap for harvestim, bat no staka wakaman stap for duim datwan.” Sapos garden hem redi for harvestim, man mas duim datwan kwiktaem bifor taem bilong harvest hem finis.—Matt. 9:37.
3. Wanem nao staka duim from olketa luksavve preaching waka hem important?
3 From iumi luksavve preaching waka hem important, iumi iusim taem and strong bilong iumi for duim datwan. Hem nao wanem staka brata and sista duim. Samfala mekem laef bilong olketa simpol and disaed for pioneer, duim missionary waka, or waka long Bethel. Olketa barava busy tumas. Maet olketa sakrifaesim staka samting and kasem samfala hard taem tu. Nomata olsem, Jehovah barava blessim olketa and iumi hapi long wanem olketa duim. (Readim Luke 18:28-30.) Olketa wea no fit for duim full-taem service duim best bilong olketa for preach and helpem olketa pikinini bilong olketa tu for kasem laef.—Deut. 6:6, 7.
4. Wanem nao maet mekem samfala for no gohed strong for preach?
4 Olsem iumi storyim finis, taem man luksavve lelebet taem nomoa stap for hem duim wanfala samting, hem savve hariap for duim datwan. Staka samting wea happen bifor and olketa pruv long Bible showimaot iumi stap long taem wea world hem gogo for finis. (Matt. 24:3, 33; 2 Tim. 3:1-5) Nomata olsem, no eniwan long iumi savve long barava taem wea world bae finis. Taem Jesus story abaotem “saen” wea showimaot “world hem gogo for finis,” hem sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” (Matt. 24:36) From datwan, maet hem no isi for samfala wea bifor olketa strong for duim preaching waka for gohed strong for duim datwan distaem. (Prov. 13:12) Waswe, samfala taem iu feel olsem? Wanem nao savve helpem iumi for gohed strong for duim preaching waka wea Jehovah God and Jesus Christ laekem iumi for duim?
Tingim Example Bilong Jesus
5. Wanem nao Jesus duim wea showimaot ministry hem barava important long hem?
5 Jesus Christ nao showimaot nambawan example long wei for gohed strong for duim preaching waka. Wanfala samting wea mekem hem gohed strong hem bikos hem garem thri and haf year nomoa for duim datfala waka. Jesus duim staka samting for sapotim tru worship winim eni nara man. Hem talemaot nem bilong God and plan bilong hem. Hem preachim gud nius abaotem Kingdom, hem tok stret long olketa bigman bilong religion hao olketa laea tumas and teachim laea samting, and hem sapotim rul bilong Jehovah go kasem taem hem dae. Long evri ples wea Jesus go, hem teachim pipol, helpem olketa, and healim olketa. (Matt. 9:35) No eniwan duim staka samting olsem Jesus duim insaed thri and haf year nomoa. Jesus barava waka hard.—John 18:37.
6. Wanem nao main samting long laef bilong Jesus?
6 Wanem nao mekem Jesus for waka hard long ministry? Jesus savve long profesi wea Daniel talem abaotem hao long nao hem mas duim waka bilong hem. (Dan. 9:27) Olsem profesi talem, Jesus bae duim ministry go kasem “haf bilong datfala week,” wea minim for thri and haf year nomoa. No longtaem bihaen Jesus go long Jerusalem long 33 C.E., hem sei: “Hem taem nao for Son bilong man kasem hae position.” (John 12:23) Nomata Jesus savve hem klosap for dae, datwan hem no main reason why hem waka hard. Hem iusim evri chance for duim wanem Dadi bilong hem laekem and for showimaot love long olketa man. Love wea hem garem for pipol mekem hem for trainim olketa disaepol and for sendem olketa for duim preaching waka. Jesus duim datwan mekem olketa disaepol gohed for duim waka wea hem startim and for olketa duim samting wea winim wanem hem duim.—Readim John 14:12.
7, 8. Wanem nao olketa disaepol tingim taem Jesus raosem olketa wea market insaed temple, and why nao Jesus duim datwan?
7 Long taem bilong Pasova long 30 C.E., no longtaem bihaen Jesus startim ministry, hem duim samting wea showimaot hem strong for sapotim tru worship. Jesus and olketa disaepol kam long Jerusalem and olketa lukim pipol long temple “salem olketa buluka, sheepsheep, and kurukuru, and olketa man wea changem olketa difren selen tu sidaon long there.” Wanem nao Jesus duim? Datwan mekem olketa disaepol for tingim wanem?—Readim John 2:13-17.
8 Wanem Jesus duim and talem long datfala taem mekem olketa disaepol for tingim disfala profesi wea David raetem: “Mi lovem tumas haos bilong iu and mi tingim evritaem.” (Ps. 69:9) Why nao olketa tingim diswan? Hem bikos Jesus showimaot hem strong for duim samting, nomata laef bilong hem stap long danger. Olketa priest, olketa man wea teachim law, and olketa narawan nao letem pipol for duim bisnis long temple and for ravem pipol. From Jesus raosem olketa wea market insaed temple, datwan mekem hem kamap enemy bilong olketa bigman hia. Olketa disaepol luksavve Jesus ‘lovem tumas haos bilong God,’ wea minim hem strong for sapotim tru worship.
9. Love wea Jesus garem for tru worship hem olsem wanem?
9 Taem Jesus duim ministry, hem barava showimaot love and strong for sapotim tru worship. Today’s English Version transleitim Psalm 69:9 olsem: “God, mi barava lovem tumas haos bilong iu. Love bilong mi for datwan hem olsem fire wea bone insaed long mi.” Samfala languis long Asia transleitim datwan olsem fire wea bone insaed long heart. Dastawe olketa disaepol tingim toktok bilong David taem olketa lukim wanem Jesus duim long temple. Bat wanem nao mekem Jesus for duim datwan?
10. Wanem nao disfala toktok “lovem tumas” wea David storyim hem minim?
10 Disfala toktok “lovem tumas” wea David storyim hem kam from wanfala Hebrew word wea olketa transleitim staka taem olsem “worshipim God nomoa.” (Readim Exodus 20:5; 34:14; Joshua 24:19.) Datfala toktok “lovem tumas” hem no olsem love wea pipol garem for wanfala sport. Love wea David garem mekem hem for no laekem narawan againstim or tok spoelem Jehovah. Hem barava laek protectim nem bilong Jehovah and stretem eni nogud samting wea spoelem datwan.
11. Wanem nao mekem Jesus strong for duim stret samting?
11 Hem stret for olketa disaepol tingim toktok bilong David taem olketa lukim wanem Jesus duim long temple. Jesus no duim datfala samting bikos hem garem lelebet taem nomoa for duim waka bilong hem, bat hem duim bikos hem lovem and tingim tumas nem bilong Dadi bilong hem and tru worship. Taem hem lukim olketa samting wea pipol duim wea spoelem nem bilong God, hem strong for duim samting for stretem datwan. Taem Jesus lukim pipol wea hambol safa and olketa bigman bilong religion spoelem olketa, strong wea hem garem mekem hem for laek helpem pipol and tok strong long olketa bigman bilong religion wea spoelem narawan.—Matt. 9:36; 23:2, 4, 27, 28, 33.
Strong for Sapotim Tru Worship
12, 13. Wanem nao olketa bigman bilong religion duim wea spoelem nem bilong God and Kingdom bilong hem?
12 Tingting and wei bilong pipol wea sei olketa worshipim God hem semsem olsem pipol long taem bilong Jesus, and samfala worse winim pipol bifor. Tingim diswan. First samting wea Jesus teachim pipol for prea abaotem, hem nem bilong God. Hem sei: “Mifala laekem nem bilong iu for holy.” (Matt. 6:9) Waswe, olketa bigman bilong religion teachim pipol abaotem nem bilong God and for respectim datfala nem? Nomoa. Olketa teachim laea samting abaotem God. Olketa teachim Trinity, hao olketa man garem soul wea no savve dae, and nogud pipol bae bone olowe long hellfire. Diswan mekem pipol konfius, no savve gud long God, and tingse hem raf tumas and laek mekem pipol safa. Rabis samting wea olketa bigman hia duim and wei wea olketa laea tumas spoelem nem bilong God tu. (Readim Romans 2:21-24.) Olketa barava les for pipol savve long nem bilong God, and olketa aotem datfala nem from Bible transleison bilong olketa. Datwan mekem pipol for no savve long God and no fren gud witim hem.—Jas. 4:7, 8.
13 Jesus teachim pipol for prea abaotem Kingdom bilong God tu. Hem sei: “Mifala laekem kingdom bilong iu for kam. Duim samting wea iu laek for duim long earth, olsem iu duim long heven.” (Matt. 6:10) Nomata olketa bigman bilong religion talem datfala prea staka taem, olketa encouragem pipol for sapotim gavman and olketa nara organization long world. Olketa tok daonem olketa wea preach abaotem Kingdom bilong God. Datwan mekem staka pipol wea sei olketa Christian no interest for storyim Kingdom bilong God or bilivim tu.
14. Wanem nao olketa bigman bilong religion teachim abaotem Bible?
14 Taem Jesus prea long God, hem sei: ‘Toktok bilong iu hem tru.’ (John 17:17) And taem hem stap long earth, samting wea hem talem showimaot hem bae markem “wakaman wea faithful and wise” for givim spiritual kaikai long pipol bilong hem. (Matt. 24:45) Olketa bigman bilong religion sei olketa teachim pipol abaotem Bible, bat waswe, olketa faithful for duim waka wea Jesus givim? Nomoa. Plande taem olketa sei olketa story long Bible hem no tru. Olketa no teachim wanem Bible talem wea savve comfortim and helpem pipol for minim Bible, bat olketa talem nomoa samting wea pipol laekem tumas for herem. And olketa acceptim nomoa eni samting wea pipol duim bikos olketa no laek for mekem pipol feel nogud.—2 Tim. 4:3, 4.
15. Wanem nao tingting bilong iu abaotem olketa nogud samting wea olketa bigman bilong religion duim?
15 From olketa bigman bilong religion duim olketa nogud samting hia, datwan mekem staka pipol feel nogud long God or no bilivim God hem stap and wanem Bible talem. Olketa stap anda long paoa bilong Satan and nogud world bilong hem. Taem iu lukim and herem olketa samting olsem happen evriday, wanem nao tingting bilong iu? Taem pipol tok spoelem nem bilong God, waswe, iu laek duim samting for stretem datwan? Taem iu lukim narawan spoelem pipol wea hambol and laea long olketa, waswe, iu laek for duim samting for comfortim olketa? Taem Jesus lukim pipol “garekil and stap olobaot olsem olketa sheepsheep wea no garem eni man for lukaftarem olketa,” hem no feel sorre nomoa long olketa, bat hem “teachim olketa plande samting.” (Matt. 9:36; Mark 6:34) Iumi tu shud strong for sapotim tru worship olsem Jesus duim.
16, 17. (a) Wanem samting nao shud mekem iumi strong for duim ministry? (b) Wanem nao bae iumi storyim long next study?
16 Taem iumi strong for duim ministry, iumi bae tingim evritaem disfala toktok wea aposol Paul talem long 1 Timothy 2:3, 4. (Readim.) Iumi strong for duim ministry no from iumi stap long olketa last day nomoa bat bikos iumi luksavve hem nao wanem God laekem. Hem laekem evri difren kaen man for savve abaotem olketa tru teaching mekem olketa tu savve worshipim hem and kasem gud samting. Iumi strong long ministry no bikos lelebet taem nomoa stap bat bikos iumi laek for mekhae long nem bilong God and helpem pipol savve wanem God laekem olketa for duim. Iumi gohed strong for sapotim tru worship.—1 Tim. 4:16.
17 From iumi worshipim Jehovah, iumi savve long plan bilong God for olketa man and disfala earth. Iumi savve helpem pipol for hapi and garem hope for future. Iumi savve helpem olketa tu for savve wanem olketa mas duim for stap sef taem world bilong Satan hem finis. (2 Thess. 1:7-9) Iumi shud no feel nogud or wikdaon bikos iumi tingse day bilong Jehovah no kam kwiktaem, bat iumi shud hapi bikos iumi garem taem yet for duim samting for sapotim tru worship. (Mic. 7:7; Hab. 2:3) Wanem nao savve helpem iumi gohed strong for duim datwan? Bae iumi storyim long next study.
Waswe, Iu Savve Minim Kam?
• Wanem nao mekem Jesus for waka hard long ministry?
• Wanem nao disfala toktok “lovem tumas” wea David storyim hem minim?
• Wanem nao olketa samting wea happen distaem wea shud mekem iumi strong for sapotim tru worship?
[Piksa long page 8]
Jesus duim nomoa wanem Dadi bilong hem laekem and hem showimaot love long pipol
[Piksa long page 10]
Iumi shud strong for sapotim tru worship